Luka 1

1Baluwa but Teopilo.

Bed bala jo atot oudo otamakino kede teko gi pi coko kede wandiko kop i kom gikame otimere i diere wa, 2di kilubo kop kame jo mogo bin otatamo ne wa, gin jo kame bin kineno kede wang gi cako ki agege, doko di gin nogo jotic me kop nono. 3Omio oudo eko neeno ber ne ada, pi wandiko ni gi nogi i yore i yore, in adwong me awora Teopilo, ingei ango ngico gi dedede kiber. 4Ango atimo kamano tetekeny in ingei ateni i kom gi dedede kame bin kopwonyi.

Kokwenyaro pi Nywalo Yokana Ngaibatis

5 # 1 Iyutun 24.10 I kare ka Erode abaka me Yudea, oudo ngasaseredoti tie kuno kame nyinge Sakaria, kame oudo tie i ekodet me jo ka Abija. Dako mere oudo nyinge Alisabeti, kame oudo obedo nyako me ot ka Aroni. 6Gin jo are nogo oudo kibedo jo kopoore i nyim Rubanga, doko da di kilubo cik dedede kede iswilia ka Rubanga kiber abongo raco moro. 7Gin oudo likame kitie kede atin moro, pien Alisabeti oudo obedo adonge, doko oudo gin kitii da.

8I kare kame Sakaria oudo tie timo kede tic mere bala ngasaseredoti i nyim Rubanga, di oudo tic wang mergin jo me ekodet ka Abija, 9di lubere kede itok me josaseredoti; alulu oko mako en pi ot donyo i kabedo kacil me tempulo ka Rwot pi wango bubani. 10Ekodet dedede kame oudo odong ooko di do oko donyo ilega esawa me wango bubani.

11Malaika ka Rwot oko nyutere bute, di cungo i bad tetu cam me alutari, kakame kowango kiye bubani. 12Kakame Sakaria onene kede, kome oko to, lworo oko make adikinicel. 13Do Malaika nono oko waco ne be, “Sakaria, kur ilwori, Rubanga otieko winyo kwac ni, Alisabeti dako ni oyaro nywalo ni atin awobi, di iko cako nyinge Yokana. 14Ibino bedo kede kilel kede yomcuny adwong twatwal, doko jo atot da bino lelo pi nywale. 15#Wel 6.3Piento en ebino bedo dano adwong adikinicel i nyim Rwot. En likame ebino mato bwini arabo gimoro akec kame mero jo. Doko ebino pong kede Tipo Kacil, cako ki yi toto mere. 16Doko en ebino dwoko idwe atot me Isirael but Rwot Rubanga gi. 17#Malaki 4.5-6En ebino telo yongayo ne Rwot, di etie kede Tipo Kacil kede twer bala me ka enabi Elia, pi loko cuny jonywal di eko ribo gi kede idwe gi, bobo ebino loko jo kalikame wor edwoko gi i yongayo me rieko me jo kopoore, doko da ebino iiko ne Rwot jo mege.”

18Sakaria oko penyo malaika nono be, “Kara abino ngeno kop noni benyo? Pien ango gira do atieko ti, doko dako na da mwakini mege otieko kato.”

19 # Danieri 8.16; 9.21 Di malaika oko dwoko ne be, “Ango en Gabulieri kame acungo i nyim Rubanga, en kame eora pi bino yamo kedi kede pi kelo ni kop aber noni. 20Do pien in likame iyei kop nango kame bino cobere kame kare otuno, omio in do ber ibino dong di iling alinga di likame itwero yamo tuno kede i ceng kame gigi bino cobere kede.”

21Kakame gigi tie timere kede, jo oudo tie daro Sakaria di kiuro gikame omio en egal kamano i tempulo. 22Kakame ewok kede ooko, likame oudo etwero do yamo kede jo. Di jo oko niang kiber be, poore di gianyuta ka Rubanga oneeno bute i tempulo. En do eko donyo poro ne gi kop apora kede cinge, di do likame etwero yamo.

23Kakame etieko kede wang tic mere i tempulo, Sakaria oko dok do ture. 24Ingei ceng nogo di do dako mere Alisabeti gamo yie. Di eko tieko dwete kanyape abongo donyo ooko, di eyamo be, 25“Bu! Okwe! Nan do Rwot otieko paro pira. Pien elaka do ki nyero me jo.”

Malaika Okwenyaro pi Nywalo Yesu

26Rubanga di do oko cwano malaika Gabulieri i bomba kame kolwongo be Nasaret, kame tie Galilaya. I kare no Alisabeti oudo tie kede yie me dwete kanyape. 27#Matayo 1.18En oudo ekelo kop ne nyako moro kalikame pwodi ongeo icuo, kame icuo moro kame nyinge Yosepu akwar Abaka Daudi oudo onero pi nyomo; nyako nono oudo nyinge Maria. 28Malaika oko bino but Maria, di eko mote di ewaco be, “Yoga in nyawinyo, Rwot tie kedi!”

29Do kop noni oko neko kom Maria twatwal, en eko donyo do paro dwong me amot noni i cunye. 30Do malaika oko waco ne be, “Maria, kur ibed lwor, pien in itieko do udo kisa ka Rubanga! 31#Matayo 1.21In ibino yac iko nywalo atin awobi, di iko cako nyinge Yesu. 32#2 Samuel 7.12, 13, 16; Isaya 9.7En ebino bedo dwong adikinicel, kobino lwonge be Wot ka Ngamalo Twal. Rwot Rubanga bino mine ebedo i kom me ajakanut ka kwaru mere Daudi, 33doko ebino pugo jo me ot ka Yakobo ikar kede ikar; ajakanut mere likame bino jik.”

34Maria oko penyo malaika be, “Man bino timere benyo benyo di likame pwodi ango atie kede icuo?”

35Di malaika oko dwoko ne be, “Tipo Kacil oyaro bino i komi, di twer ka Ngamalo Twal ko bino umi; pi mano, atin kacil kame koyaro nywalo nono kobino lwonge be Wot ka Rubanga. 36Neningo ber wadu Alisabeti. En oudo kotieko cako ne be adonge, do nan etieko yac, yie do nan tie dwete kanyape, bed bala etieko do ti adikinicel. 37#Ageini 18.14Pien likame tie gi kalikame twerere kibut Rubanga.”

38Di do Maria oko dwoko be, “Ango abedo ngatic ka Rwot; wek etimere bala kite kame in iwaco kede.” Di malaika oko do yai eoto tenge kibute.

Maria Owelao Alisabeti

39I kare nono, Maria oko yai di eko onyaro i bomba kame tie i piny me Yudea, piny kobedo mori mori. 40En eko donyo i ot ka Sakaria, eko moto Alisabeti. 41Kakame Alisabeti owinyo kede amot ka Maria, atin kame oudo tie i yie oko tingere. Alisabeti oko pong kede Tipo Kacil, 42di eko lelemo kede dwan amalo di ewaco be, “In itie kede winyo kikom mon dedede, doko kodi me yi no tie kede winyo! 43Nyo ber komio gini otimere nango, komio toto me Rwot na obino welao ango? 44Pien kakame do awinyo kede amot nin, atin kame tie i yia oko tingere kede kilel adwong adikinicel. 45Etie kede winyo dako kame yei be gikame Rwot waco ne bino cobere.”

Wer ka Maria me Pak

46 # 1 Samuel 2.1-10 Maria oko waco be,

“Cunya pako Rwot;

47kuo na lelo pi Rubanga Ngalak na,

48 # 1 Samuel 1.11 piento en eneno kede kisa ruom apiny kame ango apasoit mere oudo atie iye.

Pi mano, cako tin jo me kare dedede bino lwonga be ngawinyo;

49pien Won Twer otieko timo nango gikame dongodongo.

Nyinge cil.

50Doko cuny mere me kisa tie but lwak me i kare dedede kame wore.

51En etieko nyuto teko mere;

en esarakino jo kame wakere i cuny gi.

52 # Yobu 5.11; 12.19 En edwoko wegi twer piny ki komini gi me ajakanut,

di eko kiarao jo kame pirgi likame tek.

53En emio jo kame kec oudo oneko oyeng kede jamini abeco,

di eko cwano jo kobaro tenge abongo gimoro.

54En etieko konyo ngatic mere Isirael,

pien eyutuno pi nyuto cuny mere me kisa,

55 # Ageini 17.7 bala kite kame bin ecikere kede but joakwari wa,

but Aburaam kede ikwae mege, pi ikar kede ikar.”

56Maria oko bedo kede Alisabeti pi dwete kame romo bala adek, di do en eko dok ture.

Nywalo Yokana Ngaibatis

57Kare do oko romo ne Alisabeti me nywal, en eko nywalo atin awobi. 58I kare kame jokio kede joawade mege owinyo kede be Rwot do onyuto cuny mere me kisa but Alisabeti, gin kiko lelo kede en karacel.

59 # Jolebi 12.3 I ceng me kanyauni, di do gin kiko tero atin ot kepo; oudo bin komito cako nying atin be Sakaria bala papa mere, 60do toto mere oko dagi di ewaco be, “Likame kamano; atin no kobino lwonge be Yokana.”

61Di gin kiko dwoko ne be, “Do likame tie wadu moro kame tie kede nying no.” 62Gin kiko donyo poro ne Sakaria kop apora di kipenye nying kame poore cak ne atin.

63Sakaria oko penyo gi ebao moro me iwandik; en eko wandiko iye be, “Nyinge Yokana.” Gin dedede kiko uro adikinicel. 64Cucuto nono di do leb Sakaria oko gony di eko cako yamo bobo. Kikano di do en eko donyo pako Rubanga. 65Lworo oko mako jokio gi dedede. Di do kope go oko sarakin i piny kobedo mori mori me Yudea dedede; 66jo dedede kame bin owinyo oko kano kope nogi i cuny gi, di kipenyere be, “Atin noni kara do ber oyaro bino bedo nyo?” Pien ateteni twer ka Rwot oudo tie i kome.

Imurai ka Sakaria

67Sakaria papa me Yokana oko pong kede Tipo Kacil, di eko murao be,

68“Pak bed but Rwot Rubanga me Isirael,

piento en ebino but jo mege di eko lako gi.

69En etieko woto ne wa Ngalak kame tie kede twer,

ki ot ka ngatic mere Daudi.

70Bala kite kame bin eyamo kede i dog inabin kacil me kare asek

71be en ebino lako wa kibut jokwor wa,

kede ki cing jo dedede kame dagi wa.

72Pi mano, en enyuto cuny me kisa kame bin komio cikere mere but joakwari wa,

kede etieko yutuno isikan mere kacil,

73kame obedo ilair kame bin Rwot olairo but kwaru wa Aburaam,

74pi mino wa timo ne tic abongo lworo moro,

ingei lako wa ki cing jokwor wa,

75di otienu jokacil kede di opoorenu i nyime

i kare dedede me kuo wa.

76 # Malaki 3.1 “Doko in atin na, kobino lwongi be enabi ka Ngamalo Twal;

pien in ibino telo ne Rwot yongayo

pi ot iiko ne yote mege,

77pi mino jo mege ngec be kobino sasiro dub gi

di kiko udo alako,

78pi cuny me kisa ka Rubanga wa,

kame bino ki malo but wa bala ru me piny,

79 # Isaya 9.2 pi mino lero but jo kame bedo kakacol kede i tipo me to,

pi nyuto ne wa yote kabeco kame kelo ne wa mulem.”

80Di atin oko dongo, en eko doko tek i kuo mere me cuny. En eko bedo i wi tim tuno kede i ceng kame en do eko wokun kede kakaler i dier jo me Isirael.

Currently Selected:

Luka 1: BILKDC13

Highlight

Copy