Luka 22

Koporo Kop me Neko Yesu

(Matayo 26.1-5; Marako 14.1-2; Yokana 11.45-53)

1 # Yai 12.1-27 Ebaga me Mugati kame Arup li kiye oudo oyapuno tuno, kame oudo kolwongo be ebaga me Bwot. 2Jodongo me josaseredoti kede jopwony me Iswil oudo tie mono epone me neko Yesu, pien oudo kilworo jo.

Yuda Oyei Rupao Yesu

(Matayo 26.14-16; Marako 14.10-11)

3Di Sitani oko donyo i cuny Yuda, kame bin kolwongo be Isikariot, kame oudo obedo ngat acel kikom josiao tomon kiwie are. 4Di do Yuda oko yai eko ot tenge poro kop kede jodongo me josaseredoti kede jodongo me isirikalen kame daro tempulo pi udo epone kame etwero mino kede Yesu i cing gi. 5Gin kiko bedo kede yomcuny, di kiko cikere pi mine sente. 6Yuda di do oko yei, en eko cako mono kare aber me mino Yesu i cing gi di ekodet me jo li.

Yesu Oikere pi Camo Ebaga me Kalamo

(Matayo 26.17-25; Marako 14.12-21; Yokana 13.21-30)

7Ceng me ebaga me Mugati kame Arup li kiye di do oko tuno, en oudo ebedo ceng me mino giayala me atin romo me Ebaga me Kalamo. 8Di do Yesu oko cwano Petero kede Yokana di ewaco ne gi be, “Wun otunu ikounu iiko ne wa cam me Ebaga me Kalamo, me wek ocamenu.”

9Gin kiko penye be, “Tuai en kame in imito be wan ooti oik iye ebaga?”

10En eko dwoko ne gi be, “Di do wun itiekunu donyo i bomba, ibinunu riamo kede icuo moro kame yeo agulu me pii; lubenu paka tuno i ot kame en ebino donyo iye, 11di ikounu waco ne won ot nono be, ‘Apwony penyere be: Agola me wele tie tuai, kame ango aromo camo iye Ebaga me Kalamo karacel kede josiao na?’ 12En ebino nyuto ne wu agola alac me malo, kame kotieko iiko kiber. Iikunu ne wa ebaga kanono.”

13Gin di kiko ot, kiko udo gi dedede di tie bala kite kame Yesu oudo owaco ne gi kede; di do gin kiko iiko cam me Ebaga me Kalamo.

Cam ka Rwot me Otieno

(Matayo 26.26-30; Marako 14.22-26; 1 Jokorinti 11.23-25)

14Kakame do esawa me cam oromo kede, en eko bedo piny kacam karacel kede joor mege. 15Di en eko waco ne gi be, “Cunya omito twatwal camo kede wu Ebaga me Kalamo noni di pwodi likame abeo i can. 16Ango awaco ne wu kamano pien likame bobo abino camo cam no tuno kede kame dwong mere ocobere i Ajakanut ka Rubanga.”

17Yesu oko kwanyo ikopo, di eko mino pwoc, eko waco be, “Gamunu inywakunu wun dedede; 18ango awaco ne wu kamano pien cako nan, likame bobo abino mato pige me anyakini me olok, tuno kede di do Ajakanut ka Rubanga obino.”

19En eko kwanyo mugati, kakame etieko mino kede pwoc, eko tuturo, di eko mino gi di ewaco be, “Man en koma kame komio piru. Timunu kamanoni pi yutuno ango.” 20#Yeremia 31.31-34Iepone nono da, ingei cam, en eko kwanyo i kopo me bwini, di eko mino gi di ewaco be, “Ikopo ni en isikan kanyen me remo na, kame kobino onyo piru.

21 # Sabuli 41.9 “Do nenunu, ngat koyaro rupao ango tie cam keda kanoni. 22Pien Wot ka dano bino to bala kame Rubanga oudo oiko, do ngat kame rupao en bino neno can tin benyo!”

23Josiao di do oko cako penyere ken gi ken gi, be ngai kikom gi inonono kame bino timo kamanoni.

Piem me Marao Dwongo

24 # Matayo 18.1; Marako 9.34; Luka 9.46 Piem bobo oko cakere i dierediere me josiao, pi mito ngeno ngai kikom gi en kame kopoore tero be pire dwong kalamo jo icegun. 25#Matayo 20.25-27; Marako 10.42-44Yesu oko waco ne gi be, “Abakai me jo kalikame Iyudayan pugo gi tetek, doko jo kame tie kede akarunikin i kom gi kolwongo gi be jo kame timo bero. 26#Matayo 23.11; Marako 9.35Do likame etie kamano kede wun; akaka mano, miero ngat kame pire dwong kikom wu bed bala dano atitidi twatwal, kede ngat kame telo jo miero bed bala ngat kame tio ne jo. 27#Yokana 13.12-15Pien ngai kong en kame pire dwong kalamo, ngat kame bedo piny cam arabo ngat kame timo tic me poko cam? Mam ngat kame bedo piny cam? Do ango atie i diere wu kan bala ngatic wu.

28“Wun en jo kame ocungo keda i atama na dedede; 29bala kite kame Papa omia kede twero me pug, ango da amio wu twero acel nono, 30#Matayo 19.28tetekeny icamunu kede imatunu i emesa na i Ajakanut na, di ikounu bedo i komini me Ajakanut, ikounu ngolo kop ne atekerin tomon kiwie are me Isirael.”

Yesu Otuco be Petero bino Dage

(Matayo 26.31-35; Marako 14.27-31; Yokana 13.36-38)

31Di Yesu oko waco be, “Simoni, Simoni, neningo, Sitani otieko udo twer kibut Rubanga me tamo wun dedede, me wek eyek wu bala kame koyeko kede kal ki kom cucung. 32Do ango atieko lego nin be kur yei ni poti; doko kame ilokere idwogo buta, poore inen be isupo cuny imiegu ni.”

33Petero oko dwoko be, “Rwot, ango atieko yei ot kede in i otkol, akadi tuno i to da!”

34Yesu oko waco ne be, “Petero, amito waco ni be, iwor me tin di pwodi tongweno likame okok, in ibino daga tien adek.”

Isau, Ikapu, kede Epima

35 # Matayo 10.9-10; Marako 6.8-9; Luka 9.3; 10.4 Di Yesu oko penyo josiao mege be, “I kare kame bin aoro wu kede abongo isau me sente, arabo ikapu, amoto amuka, bin nyo en oko rem ne wu?” Gin kiko dwoko ne be, “Likame tie.”

36Yesu oko waco ne gi be, “Nan do ngat kame tie kede isau me sente, emaki, doko emak ikapu da. Doko ngat kame li kede epima, poore ecat ekoti mere ewil kede. 37#Isaya 53.12Pi mano, awaco ne wu be, iwandik miero cobere i koma kame waco be, ‘En bin kotere bala ngat acel kikom jotur Iswil’; pien gikame bin kowandiko i koma tie cobere kakare.”

38Di gin kiko waco be, “Neningo, Rwot, ipimai are ige.” En eko dwoko be, “Mago romo.”

Yesu Olego i wi Moru me Olibeti

(Matayo 26.36-46; Marako 14.32-42)

39Yesu oko wok ki bomba di eko ot i wi moru me Olibeti bala kite kame lem etimo kede sek, josiao mege da oko lube. 40Kakame etuno kede kuno, en eko waco ne gi be, “Kwaunu Rubanga me wek kur ipotunu i atama.”

41Di en eko yai kibut gi, eko ot tenge kakame boro mere dano romo lwomo engaro ko tuno iye; di eko riondiko piny eko lego be, 42“Papa, ka imito, kwany ikopo me can noni tenge ki buta; akadi kamano da, wek kur etimere pi mit nango do pi mit nin.” 43(Malaika oko wok ki malo, di oko neeno bute, di oko dino cunye. 44Kite kame oudo etie kede cwercuny atek, en eko lego kede cunye dedede, kwok oko make di oko donyo ton piny bala remo.)

45Kakame eyai kede kiye ilega, en eko dok but josiao mege, di eko udo gi kitie nino pien par oudo otieko teko gi. 46En eko waco ne gi be, “Pinyo komio itienu nino? Yaunu ilegunu, me wek kur ipotunu i atama.”

Komako Yesu

(Matayo 26.47-56; Marako 14.43-50; Yokana 18.3-11)

47Di pwodi oudo Yesu tie yamo, ekodet me jo di tuno; icuo kame kolwongo be Yuda, kame bin eda oudo etie ngat acel kikom josiao tomon kiwie are, en kame oudo tie telo gi. En eko noko Yesu pi mote di enoto leme. 48Do Yesu oko waco ne be, “Yuda, mam do notere en kame in inyuto kede Wot ka dano but jokwor mege?”

49Kakame do bin josiao mege oniang kede gikame oudo oyaro timere, gin kiko penye be, “Rwot, ototongo gi kede epima?” 50Ngat acel kikom gi oko tongo yit epasoit me Ngatel Josaseredoti paka ngolo yite tetu cam tel.

51Do Yesu oko waco ne gi be, “Wekunu do kamano.”

52Di do Yesu oko waco ne jodongo me josaseredoti kede isirikalen adongo me tempulo karacel kede joadongo me piny, kame bin oudo obino pi make be, “Mam ibinunu kede ipimai kede akutai bala itienu bino mako ngayak? 53#Luka 19.47; 21.37I kare kame oudo atie kede wu i tempulo ceng dedede, cabo likame ikounu maka. Do man en esawa wu, kede esawa me twer me colo.”

Petero Odagi Yesu

(Matayo 26.57-58, 69-75; Marako 14.53-54, 66-72; Yokana 18.12-18, 25-27)

54Gin kiko mako Yesu di kiko tere i ot me Ngatel Josaseredoti. Petero oko donyo lubo gi ki kakabobor. 55Kakame kimoko kede mac i diakal, kiko bedo piny karacel, Petero da oko bedo i diere gi kanono. 56Di do nyako apasoit moro oko neno Petero di tie bedo i dog mac, en eko donyo ngino Petero, di eko waco be, “Kom icuo ni da oudo tie kede Yesu.”

57Do Petero oko dagi di ewaco be, “Dako ni, ango gira akwia lono.”

58Di likame pwodi ocwao esawa, dano moro ace da doko oko neno Petero, en eko waco be, “Ida ibedo ngat acel kikom gi.” Do Petero oko dwoko ne be, “Icuo ni, likame ango gira inonono.”

59Do di pwodi okato bala esawa acel kenekene, dano ace bobo oko ketakin di ewaco be, “Ateteni icuo ni da oudo tie kede Yesu; pien eda ebedo Ngagalilaya.”

60Do Petero oko dwoko ne be, “Icuo ni, ango akwia gikame in itie yamo.”

Cucuto nono di likame pwodi Petero otieko yamo, tongweno di oko kok. 61Rwot oko ngoloro Petero. Di Petero oko yutuno kop kame Rwot oudo owaco ne be, “Tin di pwodi tongweno likame okok, in ibino daga tien adek.” 62Petero oko donyo ooko di eko koko kitek.

Konywaro Yesu di Kobunge

(Matayo 26.67-68; Marako 14.65)

63Cuo kame bin komio daro Yesu oko donyo nyware di kibunge. 64Kiko donyo umo wange di kiwaco ne be, “Tuci! Ngai kobapi?” 65Di kiko donyo yamo kope atot me anywar i kome.

Kotero Yesu i nyim Kansulo

(Matayo 26.59-66; Marako 14.55-64; Yokana 18.19-24)

66Kakame piny oru kede, joadongo me piny, kede jodongo me josaseredoti, karacel kede jopwony me Iswil oko cokere karacel, di kiko tero Yesu i nyim kansulo gi. 67Di kiko waco ne be, “Ka in en Kirisito, wac ne wa.”

Do en eko dwoko ne gi be, “Ka ayamo ne wu, likame ibinunu yei; 68doko ka apenyo wu, likame iyarunu twero dwoko. 69Do cako nan, Wot ka dano bino bedo i bad tetu cam me twer ka Rubanga.”

70Gin lung kiko do penye karacel be, “Mam in do en kame Wot ka Rubanga?” En eko dwoko ne gi be, “Wun iwacunu be ango inonono.”

71Di do kiko waco be, “Ijura nyo kame wan pwodi bobo omitunu? Wan otiekunu winyo kop ki doge kikokome!”

Currently Selected:

Luka 22: BILKDC13

Highlight

Copy