KULOVOKA 13
13
Navajilika vana vavatwatwa
1Yehova ambile kuli Mose ngwenyi,
2 # v. 12, 13, 15; 22.29; Luka 2.23. Ngujilikile vana vavatwatwa vosena, wexowo wakuliteta mutwe muli vana vaIsalele, cipwe mutu cipwe kanyama, napu wami.
3Mose ambile kuli vatu ngwenyi, Anukenunga likumbi lino munalovoka muEjipitu, muzuvo yaundungo. Mwomwo Yehova namilovola muno nangolo jalivoko lyenyi. Kanda mukalya mbolo yacimbalwila yimweko.
4Likumbi lino vene munalovoka hakakweji Avive.
5Kaha cikapwe, omu mwakamihetesa Yehova mulifuci lyavaKanane navaHete navaAmole navaHivi navaYevuse, lize alixingilile kuli vakakuluka jenu kumihana, lifuci lyakumbwambumuka mavele nawuci, mukalinge milimo eyi hakakweji uno.
6Mukalyanga mbolo yakuzeneka cimbalwila makumbi atanu naavali, kaha halikumbi lyamucitanu naavali hakapwe ciwanyino kuli Yehova.
7Mbolo yakuzeneka cimbalwila mukayilyanga makumbi atanu naavali. Kanda vakamona mbolo yacimbalwila kuli enuko, kaha nawa kanda vakamona cimbalwila kuli enuko omu mwahita ngiza yenu mwosena.
8Mukavalweza vana venu halikumbi lize ngwenu, Mwomwo hacuma cize alingile Yehova kuli etu omu twalovokele muEjipitu, xikaho.
9Cikapwenga cinjikizo kuli enu hamavoko enu, cakwanukilangaho mukaci kameso enu, mangana jiximbi jaYehova jitwamenga mutunwa twenu, mwomwo Yehova amilowele muEjipitu nalivoko lyangolo.
10Xikaho mukalama cilikeci hangonde yaco hamwaka hamwaka.
11Kaha cikapwe, omu mwakamihetesa Yehova mulifuci lyavaKanane, nge muze alixingile kuli enu nakuli vakakuluka jenu, omu mwakamihanalyo,
12mukahandunwina vaze vakuliteta mitwe vosena kuli Yehova, navaze vakuliteta mitwe vosena muli navo vakusemuka kuli tunyama, vilunga vosena vakapwe va Yehova.
13Wexowo wakuliteta mutwe wacimbulu mukamusokola namwana-mukoko. Oloze kaci nge kamute kumusokola, kaha mukahokola xingo yenyi. Kaha vana venu vavatwatwa vavatu vosena mukavasokola.
14 #
Luxi. 6.20. Kaha cikapwe, omu navakamihula kuli vana venu kumwaka ngwavo, Eci cika? mukavambulila ngwenu, Yehova atulowele muEjipitu, muzuvo yaundungo, nangolo jalivoko lyenyi.
15Kaha casolokele, omu amwene Fwalo kukaluhwa hakutusuwula, Yehova ajihile vana vavatwatwa vamuEjipitu vosena, navatwatwa vavatu, navava vatunyama. Xikaho tweji kumuvatwilanga Yehova ava vakuliteta mitwe vosena, ava vavilunga, oloze vana vetu vavatwatwa vosena tweji kuvasokolanga.
16Kaha cikapwenga cinjikizo kumavoko enu, cakukaxila mukaci kameso enu, mwomwo Yehova atulowele mulifuci lyaEjipitu nangolo jalivoko lyenyi, xikaho.
Panda yalivwi nakakahya
17Kaha casolokele, omu asuwile Fwalo vatu, Kalunga kavatwalile mujila yakulifuci lyavaFwilixiteko, cipwe yapwile yakamwihi, mwomwo Kalunga ambile ngwenyi, Kucina pamo vatu navakalumukomu navamona jita, nakukinduluka ceka kuEjipitu.
18Oloze Kalunga avakondolwesele vatu mujila yapambo kuKalungalwiji Ucila. Kaha vana vaIsalele valovokele mulifuci lyaEjipitu vanavwale lyehi vitwa.
19Mose ambacile vifuhwa vyaYosefwe, ayile navyo, mwomwo Yosefwe avaxingixile vana vaIsalele cikuma ngwenyi, Camwenemwene Kalunga mwakamyalakana, kaha namukatwala vifuhwa vyami nayenu hamwe.
20Vakatukile kuSukote, vayile nakusavala kuEtame, kusembwa yapambo.
21 #
14.19, 24; 33.9, 10; Samu 78.14; 99.7; 105.39. Yehova avatwaminyinyinengako hamusana mupanda yalivwi, nakuvatwala mujila, kaha naufuku mupanda yakakahya nakuvamunyikila, mangana vahase kutambuka namusana naufuku.
22Panda yaliwvi hamusana, napanda yakakahya haufuku kayafumine kumeso avatuko.
Currently Selected:
KULOVOKA 13: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
