KULOVOKA 18
18
Yetelo mweza nakumumeneka Mose
1Jino Yetelo kapilixitu wakuMicane, isewenu lyaMose, evwile vyuma vyosena vize alingile Kalunga hali Mose navatu jenyi vaIsalele, nomu alowele Yehova vaIsalele muEjipitu.
2Kaha Yetelo isewenu lyaMose ayile naJipola pwevo lyaMose, omu alingile hanamusuwula lyehi,
3navana venyi vamalunga vavali, vakivo majinavo ou Ngelexome, mwomwo ambile ngwenyi, Ngunapunga ngumuka-kuzuzumana mulifuci lyavatu veka.
4Kaha lijina lyamukwavo apwile ikiye #18.4:Nge ngwenyi, Kalunga Muka-kungukafwako.Eliyeze, mwomwo ambile ngwenyi, Kalunga katata Ikiye apwile Muka-kungukafwako, angulwilile kupoko yaFwalo yamukwale.
5Yetelo, isewenu lyaMose, ejile navana venyi vamalunga napwevo lyenyi kuli Mose mupambo, kuze atungilile cilombo kupili yaKalunga.
6Ambile kuli Mose ngwenyi, Ami isowenu Yetelo nguneza kuli ove, napwevo lyove nawa navana venyi vavali.
7Mose alovokele nakusesa isewenu, kaha alifukwile kuli ikiye, amusweswenyele. Valihwile omu vanatwame, kaha vengilile mumbalaka.
8Mose amuhicilile isewenu muvyuma vyosena vize alingile Yehova kuli Fwalo nakuli vaEjipitu hali vaIsalele, nakukilikita cosena cize vawanyine mujila, nomu avapululwile Yehova.
9Yetelo awahililile hakuwaha cosena cize alingile Yehova hali vaIsalele, mwomwo avapululwile mumavoko avaEjipitu.
10Yetelo ambile ngwenyi, Vamukisule Yehova, Ou namipululula mumavoko avaEjipitu namulivoko lyaFwalo, Ou napululula vatu muxi jamavoko avaEjipitu.
11Jino ngunatacikiza ngwami, Yehova napu wamunene kuhambakana tulunga veka vosena. Camwenemwene nomu nawa valipambwile navo.
12Yetelo, isewenu lyaMose, akwacile wana wakulumba navimuna vakumuvatwila Kalunga. Kaha Alone ejile, navakulwane javaIsalele vosena, valile naisewenu lyaMose hamwe kumeso aKalunga.
Navatongola vaka-kuyula
(Luxi. 1.9-18)
13Kaha casolokele hakuca, Mose atwamine nakusopa milonga yavatu. Vatu Vemanyine kuli Mose jingulwixi kufumisa kucimene nakutwala kucingoloxi.
14Kahomu amwene isewenu lyaMose vyosena vize alingile kuli vatu, amwambile ngwenyi, Eci cuma kana uli nakulinga kuli vatu cika? Ikaze naulitwamina uka wove, kaha vatu vosena vanemana kuli ove jingulwixi kufumisa kucimene nakutwala kucingoloxi?
15Mose ambile kuli isewenu ngwenyi, Mwomwo vatu veji kwizanga kuli ami nakwihula kuli Kalunga.
16Omu vali nacihande, veji kwizanga kuli ami, kahami nanguvasopesa mutu namukwavo, nanguvalweza mangana vatacikize vilika vyaKalunga najiximbi jenyi.
17Isewenu lyaMose amwambile ngwenyi, Omu weji kulinganga kamwawahileko.
18Nauzeya cakuzeya, nayove navatu ava uli navo. Mwomwo cuma kana cinapu cacilemu kuhambakana ngolo jove. Kawexi kuhasa kucilinga uka woveko.
19Ivwilila jino mulizu lyami, nangukulweza mangana kaha Kalunga apwenga nayove. Ove upwenga hali vatu kumeso aKalunga, kahove uhetese milonga yavatu kuli Kalunga.
20Kaha uvanangule vilika najiximbi, uvalweze jila yatela kuli vakivo kutambukanga, namilimo yatela kuli vakivo kuzatanga.
21Kaha nawa, ove utalilila malunga vakuzangama muli vatu vosena, vaze vanamwivu Kalunga woma, malunga vamucano vakuhunga cipululu, uvalingise kupwa vamyata javo, vaka-kuyula makombakaji, navaka-kuyula makulukaji, navaka-kuyula vizavu vyamakumi atanu makumi atanu, navaka-kuyula makumi.
22Vakivo vasopesenga vatu hamakumbi osena. Kaha cipwenga, milonga yayinene yosena vayinehe kuli ove, oloze milonga yayindende yosena vayisope vavene. Ngoco nacipwa cacaxi kuli ove, kaha vambatenga citeli kana nayove hamwe.
23Kaci nge naulinga ngoco, kaci nge Kalunga mwakulweza ngoco, kaha nauhasa kwilila, kaha vatu vosenava navakaya kwavo nakeke.
24Ngoco Mose evwililile mulizu lyaisewenu, alingile mwosenomwo amwambile.
25Mose asakwile malunga vakuzangama muli vaIsalele vosena, avalingixile kupwa vamyata javatu, vaka-kuyula makombakaji, navaka-kuyula makulukaji, navaka-kuyula vizavu vyamakumi atanu makumi atanu, navaka-kuyula makumi.
26Vakivo vasopeselenga vatu hamakumbi osena. Milonga yayikalu vayitwalilenga kuli Mose, oloze milonga yayindende yosena vayisopeselenga vavene.
27Kaha Mose asuwile isewenu, ikiye aliyililile kwenyi kulifuci lyenyi.
Currently Selected:
KULOVOKA 18: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
