KUPUTUKA 24
24
Navamuhuhwila Isaka pwevo
1Jino Apalahama alingile nakulu lyehi cikuma, apwile kaxinakaji vene. Yehova amuwahixile Apalahama kuvyuma vyosena.
2Apalahama ambile kuli ndungo yenyi uze wamukulwane wakuzuvo yenyi, uze alaminenga vyuma vyenyi vyosena ngwenyi, Aci hake livoko lyove muxi yatungi yami.
3Kaha nangukuxingisa ulixinge Yehova Kalunga wamwilu, Kalunga wahamavu, ngwove, Kangwexi kukamumbacila mwanove pwevo wakuli vana yavaKanane, mukaci kavo ngwatwamako.
4Oloze ukaya kulifuci lyami, kuli vausoko wami, ukamumbacile mwanami Isaka pwevo.
5Ndungo yenyi amwambile ngwenyi, Kwiji, pamo pwevo mwakakana kwiza nayami kulifuci lino. Nyi kuvanga ngumutwale ceka mwanove kulifuci lize wafumine, tahi?
6Apalahama amwambile ngwenyi, Lilamenga, kanda ukatwala ceka mwanami kuzeko.
7Yehova, Kalunga wamwilu, Ou angukatwile kuzuvo yatata kulifuci lize ngwasemuwilile, Ou ahanjikile kuli ami nakulixinga kuli ami ngwenyi, #12.7; 13.15; 15.18.Vaka-tanga yove nangukavahana lifuci lino, Ikiye mwakatuma kangelo kenyi kumeso ove, kaha ukamumbacila mwanami pwevo kuze.
8Oloze kaci nge pwevo mwakakana kwiza nayove, kaha naukasamba kukulixinga kana ngunakuxingisa. Oloze kanda ukatwala ceka mwanami kuzeko.
9Uze ndungo ahakile livoko lyenyi muxi yatungi yakaka yenyi Apalahama, alixingile kuli ikiye mwayile lizu lize.
10Jino kuli vangamela jakaka yenyi uze ndungo ahandunwineko vangamela likumi, akatukile. Mwomwo vikumba vyakaka yenyi vyosena vyapwile mumavoko enyi. Ngoco akatukile, ayile kuMesopotamya, kwimbo lyaNahole.
11Avafukamixile vangamela kusali yalimbo kulixima lyameya halikumbi lyacingoloxi, haze veji kulovokanga mapwevo nakuswita meya.
12Ambile ngwenyi, Ove Yehova, Kalunga kakaka yami Apalahama, aci ngumwenese mwamwaza likumbi lyalelo, umusolwele kaka yami Apalahama likoji.
13Tala, ngunemana kulixima lyameya, kaha vana vavenyembo vamapwevo vali nakulovoka vaswite meya.
14Acitave mwane cisoloke uze mwanapwevo nangwamba ngwami, Aci hotonone mulondo wove mwane ngunwe, kaha ikiye himwamba ngwenyi, Nwako, kaha nanguhana meya nakuli vangamela jove nawa, ikiye apwenga uze unamusakwila ngamba yove Isaka. Ngoco nangutacikiza ngwami, unamusolwela kaka yami likoji.
15Kaha casolokele, ximbu apwile ikiye kanda akumise kuhanjika, tala, Laveka alovokele namulondo wenyi hacifwiji cenyi, ou asemukile kuli Mbetwele mwanaMilika pwevo lyaNahole yaya yaApalahama walunga.
16Uze mwanapwevo apwile wamwaza kumutala, mujike, kanda alimone lyehi nalunga. Axikumukile kulixima nakusulisa mulondo wenyi nakukanduka ceka.
17Uze ndungo alahile mangana alihumangane nenyi, amwambile ngwenyi, Acitave ngunweko meya kumutondo wove mwane.
18Ikiye amwambile ngwenyi, Ove mwata wami, nwako. Anguhwixile nakuhotonona mutondo wenyi kulivoko lyenyi, nakumuhana meya anwe.
19Omu akumixile kumuhana meya, amwambile ngwenyi, Nanguvaswicila vangamela jove nawa, palanga nomu vanamanyisa kunwa.
20Anguhwixile nakuhingununa meya amumulondo wenyi mucizau, alahilile ceka kulixima nakuswita, avaswicilile vangamela jenyi vosena.
21Uze lunga amuxixikile, aholele kulu, atacikize numba nge Yehova nafukisa lyehi jila yenyi nyi ciku.
22Kaha casolokele, omu vamanyixile vangamela kunwa, uze lunga akwacile kapata kaulu kapezo yacimbwa caxekele, navinunga vyaulu vivali vyamavoko enyi vyapezo yalikumi lyajixekele.
23Amwihwile ngwenyi, Ove umwaneya? Aci ngulwezeko mwane. Muzuvo yaiso muli mwakusavaletu tahi?
24Amwambile ngwenyi, Ami ngumwanaMbetwele, ikiye mwanaMilika, uze asemene naNahole.
25Amwambile ngwenyi, Mwila tuli nawo, nawou wakuutama nawou wakulya, kaha muli nomu mwakusavala nawa.
26Uze lunga anongamine mutwe wenyi, alemesele Yehova.
27Ambile ngwenyi, Vamukisule Yehova Kalunga kakaka yami Apalahama, mwomwo kalitwaminyine kusolola likoji lyenyi namucano wenyi kuli kaka yamiko. Yehova nangutwaminyinako mujila nakuzuvo yavausoko wakaka yami.
28Uze mwanapwevo alahile, avalwezele vaze vakuzuvo yanaye navosena mwaya mazu awa.
29Laveka apwile nandumbwenyi walunga, lijina lyenyi ikiye Lavane. Kaha Lavane alahile kuli uze lunga kulixima,
30kaha casolokele, omu amwene kapata navinunga kumavoko andumbwenyi, nomu evwile mazu andumbwenyi Laveka ngwenyi, Ngoco mwanahanjika uze lunga kuli ami, ikiye ayile kuli uze lunga, kaha tala, hanga nemanyina kuli vangamela kulixima.
31Lavane amwambile ngwenyi, Twaya wingile, ove vawahisa kuli Yehova, unemanyina ika kuweluka? Mwomwo ngunalongesa lyehi zuvo, nakwakuutama vangamela nawa.
32Uze lunga engilile muzuvo, alemwine vangamela, kaha avahanyine mwila wakuutama nawou wakulya, nameya akusana kumahinji enyi nakumahinji avaze apwile navo.
33Vatumbikile kulya kumeso enyi alye. Oloze ikiye avambile ngwenyi, Kuvanga ngunamilwezeci ngunakatukila, numba ngulyenga. Lavane amwambile ngwenyi, Hanjika tuhu.
34Avambile ngwenyi, Ami ngundungo yaApalahama.
35Kaha Yehova namuwahisa kaka yami cikuma, ikiye napu wamulemu. Yehova namuhane mautanga avimuna vavandende nawawa avangombe, napalata naulu, navandungo vamalunga navava vamapwevo, navangamela navimbulu.
36Sala pwevo lyakaka yami asemene mwana walunga nakaka yami hauxinakaji wenyi. Apalahama namuhane ikiye vyuma vyosena vize aheta.
37Jino kaka yami anguxingixile ngwenyi, Kanda ukamumbacila mwanami pwevo wakuli vana vavaKananeko, venyalifuci lino ngwatwama.
38Oloze ngwenyi, ukaya kuzuvo yatata kuli vausoko wami, ukamumbacile mwanami pwevo.
39Ngwamwambile kaka yami ngwami, Kwiji, pamo pwevo mwakakana kwiza nayami.
40Angwambile ngwenyi, Yehova, Ou kumeso enyi ngweji kutambukanga, mwakatuma kangelo kenyi ayenga nayove kaha mwakafukisa jila yove. Kaha ukamumbacila mwanami pwevo wakuli vausoko wami, wakuzuvo yatata.
41Naukasamba kukulixinga kana ngunakuxingisa, omu naukaheta kuli vausoko wami, kaci nge kavexi kukuhanayoko, kaha naukasamba kukulixinga kana ngunakuxingisa.
42Jino ngwezanga lelo kulixima, ngwambanga ngwami, Ove Yehova, Kalunga kakaka yami Apalahama, nge jino uli nakufukisa jila yami,
43tala, ngunemana kulixima lyameya. Acitave mwane cisoloke, uze mwanapwevo mwalovoka nakuswita meya, ou nangwamba ngwami, Aci nguhane tumeya twamumulondo wove mwane ngunwenga,
44kaha ikiye himwamba ngwenyi, Nwako nayove, kaha nanguvaswicila navangamela jove nawa, ikiye apwe pwevo ou unamusakwila mwanakaka yami Ove Yehova.
45Ximbu ngwapwanga kanda ngukumise kuhanjika mumucima wami, kumana, Laveka mwalovoka namulondo wenyi hacifwiji cenyi, mwaxikumuka kulixima nakuswita meya. Ngwamwambanga ngwami, Aci nguhaneko meya ngunwe.
46Anguhwisanga nakuhotonona mulondo wenyi, angwambanga ngwenyi, Nwako, kaha nanguhana meya kuli vangamela jove nawa. Ngoco ngwanwanga, kaha anwisanga vangamela nawa.
47Ngwamwihulanga ngwami, Ove umwaneya? Angwambanga ngwenyi, NgumwanaMbetwele, ikiye mwanaNahole, uze asemene naMilika. Kaha ngwamuvwikanga kapata halizulu lyenyi navinunga kumavoko enyi.
48Ngwanongaminanga mutwe wami nakumulemesa Yehova nakumukisula Yehova, Kalunga kakaka yami Apalahama, Ou nangutwaminyinako mujila yamwenemwene ngumumbacile mwanakaka yami mwanandumbwenyi.
49Jino nge namulinga mwalikoji mwamucano kuli kaka yami, ngulwezenu. Nge pimbi, ngulwezenu, mangana nguyenga kulivoko lyacilyo cipwe kulivoko lyacimoswe.
50Jino Lavane naMbetwele vamukumbulwile ngwavo, Cuma cino cinafumu kuli Yehova. Etu katwexi kuhasa kuhanjika kuli ove cipwe mwamupi cipwe mwamwazako.
51Tala, Laveka ali kumeso ove, mutambule, uyenga, akapwenga pwevo lyamwanakaka yove, nganomu nahanjika Yehova.
52Kaha casolokele, omu evwile ndungo yaApalahama mazu avo, alifukwile kuli Yehova cameso-hamavu.
53Uze ndungo alowele vyuma vyapalata navyevi vyaulu namahina, avihanyine kuli Laveka. Nandumbwenyi walunga nanaye nawa avahanyine nawa vyuma vyamwaza vyavikalu.
54Kaha valile, vanwine, naikiye namalunga vaze apwile navo, vasavalile ufuku wosena. Vahindukile nacimene, kaha ikiye avambile ngwenyi, Ngusuwulenu nguyenga kuli kaka yami.
55Ndumbwenyi walunga nanaye vamwambile ngwavo, Mwanapwevo acitwame nayetu makumbi amwe, cipwe likumi, numba akaye.
56Avambile ngwenyi, Kanda munguhungikako, hamono Kalunga nafukisa lyehi jila yami. Ngusuwulenu nguyenga kuli kaka yami.
57Vamwambile ngwavo, Natusanyika mwanapwevo nakumwihula twivwe mukanwa kenyi.
58Kaha vasanyikile Laveka, vamwihwile ngwavo, Nauya nalunga uno tahi? Etavile ngwenyi, Nanguya.
59Kaha vasuwile ndumbwavo Laveka nandeji yenyi nandungo yaApalahama natumbaji twenyi.
60Vakiswile Laveka, vamwambile ngwavo, Ove ndumbwetu, ukapwe unevo yavatu makombakaji atununu, kaha vaka-tanga yove vakahete cikolo cavaze vavahunga.
61Ngoco Laveka akatukile navangamba jenyi vamapwevo, vatambukile havangamela nakuya nayauze lunga. Kaha uze ndungo atwalile Laveka, ayile mujila yenyi.
62Jino Isaka ejile mujila kufuma kuMbele-lahai-loi, mwomwo atwamine mulifuci lyaSulo.
63Isaka alovokele mucipapa nakuxinganyeka hakutoka calikumbi. Andwile meso enyi nakumona, kaha tala, kwapwile nakwiza vangamela.
64Laveka andwile meso enyi, kahomu amwene Isaka asulukile hangamela.
65Amwihwile uze ndungo ngwenyi, Ou lunga muka ali nakutambuka mucipapa nakwiza nakutusesa? Uze ndungo amwambile ngwenyi, Ikiye kaka yami. Pwevo anonele ciwuva cenyi aliwuvile kumeso.
66Kaha uze ndungo amulwezele Isaka vyuma vyosena vize alingile.
67Isaka amwingixile Laveka mumbalaka yize yapwile yanaye Sala. Amumbacile Laveka, kaha ikiye hyapwile pwevo lyenyi. Isaka amuzangile, kaha Isaka alivendejekele kukufwa canaye.
Currently Selected:
KUPUTUKA 24: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
