KUPUTUKA 27
27
Yakova navamuwahisa kuli Isaka
1Kaha casolokele, omu alingile Isaka hanakulu lyehi cikuma, omu afuvalalile meso enyi, kahaxile kumonako, asanyikile mwanenyi watwatwa Esau, amwambile ngwenyi, Ove mwanami. Amwitavilile ngwenyi, Yami uno mwane.
2Amwambile ngwenyi, Tala jino, ngunakulu lyehi cikuma, kangwatacikijile likumbi lyakufwa camiko.
3Xikaho jino, aci mbate vitwa vyove, namusakali wove nauta wove wamanana, uye mucipapa, ukangujihile nyama,
4ukangutelekele kulya ciyema nge omu ngwazanga, ukanguneheleco, ngulyenga, mangana mwono wami ukukisule ximbu kanda ngufwe.
5Laveka evwileko haze ahanjikile Isaka kuli mwanenyi Esau. Esau ayile mucipapa nakuzomba nyama, akayinehe.
6Kaha Laveka ahanjikile kuli mwanenyi Yakova ngwenyi, Tala, ngwevwanga iso hakuhanjika kuli yayove Esau ngwenyi,
7Ngunehele nyama, ungutelekele kulya ciyema ngulyenga, ngukukisule kumeso aYehova ximbu kanda ngufwe.
8Xikaho jino, ove mwanami, ononoka mulizu lyami omu nangukulweza.
9Yako jino kuutanga wavimuna vavandende, ungunehele misamba javapembe vamwaza vakuze vavali. Nangutelekela iso kulya ciyema, nge omu azanga.
10Kaha ucitwala kuli iso, alyenga, akukisule ove ximbu kanda afwe.
11Yakova ambile kuli naye Laveka ngwenyi, Tala, yayami Esau ikiye lunga waungona, Oloze ami ngumutu usenena.
12Kwiji pamo tata mwangupapacila nakungumona ngwenyi, muka-kutangisa. Kaha nangulikokela kwangula, kexi kungukisulako.
13Naye amwambile ngwenyi, Ove mwanami, kwangula kana cipwenga hali ami. Ijiva kwononoka mulizu lyami, yako ungunehelevo.
14Ayile nakuvasaka, avanehele kuli naye. Naye atelekele kulya ciyema, nge omu azangile ise.
15Laveka anonele mahina amwanenyi watwatwa Esau amwaza apwile nawo muzuvo, amuvwikilewo mwanenyi wakanyike Yakova.
16Ahakile nawa vilambu vyavaze vana vavapembe kumavoko enyi nahakusenena haxingo yenyi.
17Kaha kulya cize ciyema nambolo yize alongesele avihanyine mumavoko amwanenyi Yakova.
18Ikiye ayile kuli ise, amwambile ngwenyi, Ove tata. Etavile ngwenyi, Yami uno, ove yoveya, mwanami?
19Yakova ambile kuli ise ngwenyi, Yami mwanove watwatwa Esau. Ngunalingi nge omu wangulwezanga. Aci hinduke utwame ulyenga nyama yami, mangana mwono wove ungukisule.
20Isaka amwihwile mwanenyi ngwenyi, Ove mwanami, ngacilihi unayiwane lufuxi ngana? Amwambile ngwenyi, Mwomwo Yehova Kalunga kove nanguwanyisayo, xikaho.
21Isaka ambile kuli Yakova ngwenyi, Aci pandame kuno, mwanami, ngukupapacile, numba ove lyavene umwanami Esau nyi ciku.
22Yakova apandamine kuli ise Isaka. Ikiye amupapacilile, ambile ngwenyi, Olyo lizu linapu lizu lyaYakova, Oloze mavoko anapu mavoko aEsau.
23Kamutacikijileko, mwomwo mavoko enyi apwile namangona, nge mavoko ayayenyi Esau, xikaho amukiswile.
24Amwihwile ngwenyi, Yove vene mwanami Esau tahi? Amwambile ngwenyi, Yami vene.
25Amwambile ngwenyi, Nguneheleyo, kaha nangulya nyama yamwanami, mangana mwono wami umukisule. Amutwalilileyo, kaha alile. Amutwalilile navinyo nawa, kaha anwine.
26Ise Isaka amwambile ngwenyi, Pandama kuno jino, ove mwanami, ungusweswenye.
27Apandamineko, amusweswenyele. Isaka evwile livumba lyamahinenyi, kaha #Hepe. 11.20.amukiswile, ambile ngwenyi,
Ivwa, livumba lyamwanami,
Linapu nge livumba lyawande ou nawahisa Yehova,
28Kaha Kalunga akakuhane kumume wakufuma kwilu,
Nakumaji ahamavu,
Natiliku yakulisala navinyo vyavihya.
29Vatu veka naveka vakakuzacilenga milimo,
Vaka-mafuci amavulu vakalifukulenga kuli ove,
Ukapwenga umwata wavandu-mbwove,
Kaha vana vanoko vamalunga vakalifukulenga kuli ove.
Wexowo mwakakwangulove navakamwangula ikiye,
Wexowo mwakakukisulove navakamukisula ikiye.
30Kaha casolokele, omu alingile Isaka hanakumisa kukisula Yakova, Yakova mukulovoka kuli ise Isaka, yayenyi Esau ejile hakufuma kukuzomba cenyi.
31Naikiye nawa atelekele kulya ciyema, acitwalile kuli ise. Ambile kuli ise ngwenyi, Ove tata, hinduka ulyenga nyama yayami mwanove, mangana mwono wove ungukisule.
32Ise Isaka amwihwile ngwenyi, Yoveya? Amwambile ngwenyi, Yami Esau mwanove watwatwa.
33Isaka acikimine cikumakuma, amwambile ngwenyi, Kaha iyaze ou akwatanga nyama nakungunehelayo, kaha ngwayilyanga yosena ximbu wapwangove kanda wize, nakumukisula? pundu vene, ikiye mwakamona kutokwa.
34Omu evwile Esau mazu aise, #Hepe. 12.17.atetele muteto wakulinyenga waunene cikuma, ambile kuli ise ngwenyi, Ove tata, ngukisule nayami nawa.
35Isaka amwambile ngwenyi, Songo yove ezanga nakungwonga, nakutambula kukisuloco capwanga cove.
36Esau ambile ngwenyi, Kavamulukile #27.36:Tala 25.26.lijina lyaYakova mwamucanoko, numba? Mwomwo ikiye nangwongo kavali. Angutambwile utwatwa wami, kaha jino natambula kukisuloco capwanga cami. Amwambile ngwenyi, Kawalamine kukisula cakungukisulako, tahi?
37Isaka amukumbulwile Esau, amwambile ngwenyi, Tala, ngunamulingisa kupwa mwata wove, vandumbwenyi vamalunga vosena ngunamuhanevo kupwa vangamba jenyi, ngunamuzamikisa natiliku navinyo. Kaha jino, ove mwanami, nangukulingila ika?
38Esau amwihwile ise ngwenyi, Ove tata, uli nakukisula cimwe kaha, tahi? Ngukisule nayami nawa, ove tata. Kaha Esau #Hepe. 12.17.alilile nalizu lyakukanguka.
39Ise Isaka amukumbulwile, #Hepe. 11.20.amwambile ngwenyi,
Tala, kumaji ahamavu kukiko naukatwamanga,
Nakumume wakufuma kwilu.
40Naukayoyela hapoko yove yamukwale, kaha naukamuzacilanga songo yove.
Kaha nacikasoloka, omu naukasomokamo,
Naukahokola toka yenyi yifume kuxingo yove.
Yakova mwamucina Esau
41Esau ahungile Yakova hakukisula cize amukiswile ise. Esau alyambile mumucima wenyi ngwenyi, Makumbi akulila tata ali kwakamwihi, numba ngumujihe songo yami Yakova.
42Vamwambulilile Laveka mazu amwanenyi wamukulwane Esau. Kaha atumine nakusanyika mwanenyi wakanyike Yakova, amwambile ngwenyi, Tala, yayove Esau ali nakulivendejeka hali ove, ngwenyi, akujihe.
43Xikaho jino, ove mwanami, ononoka mulizu lyami. Katuka, Cinyina kuli ndumbwami Lavane ali kuHalane.
44Kaximbule nenyi makumbi amwe amandende, palanga nomu yinapeuka ndombo yayayove,
45palanga nomu unapeuka utenu wayayove kuli ove, nomu navulyameci unamulingi, numba ngukatume kuze nakukusaka. Ngumivindamine muvosena muvavali halikumbi limwe ika?
46Laveka ambile kuli Isaka ngwenyi, Mwono wami unanguseke lyehi hali vana vaHete vamapwevo. Kaci nge Yakova mwambata pwevo wakuli vana vaHete nge ava, vakuli vana vamapwevo valifuci lino, kaha mwono wami naukanguwahila halihi?
Currently Selected:
KUPUTUKA 27: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
