KUPUTUKA 31
31
1Jino evwile mazu avana vaLavane, vapwile nakwamba ngwavo, Yakova natambula vyosena vyapwile vyasetu. Kuvyuma vyapwile vyasetu kukiko nawanyinako ulemu wosenou.
2Yakova amwene meso aLavane, kaha tala, kawamutalile nge muze mwamwakako.
3Yehova ambile kuli Yakova ngwenyi, Hiluka kulifuci lyavakaka jove, kuli vausoko wove, kaha nangupwanga nayove hamwe.
4Yakova atumine nakusanyika Lakele naLeya veze mucipapa mwapwile vimuna jenyi.
5Avambile ngwenyi, Ngunamono meso asenu, kawexi nakungutala nge muze mwamwakako. Oloze Kalunga katata napunga nayami hamwe.
6Enu munatacikiza ngwenu, ngunamuzacila senu nangolo jami josena.
7Kaha senu nangutangisa, nalumuna fweto yami kusokesa mulikumi. Oloze Kalunga kamwitavilile kungupihisako.
8Kaci nge angwambile ngwenyi, Vosena vali namavalanga-mavalalanga navakapwa fweto yove, kaha vimuna vosena vasemene vakweci mavalanga-mavalanga. Kaci nge angwambile ngwenyi, Ava vali namapenga navakapwa fweto yove, kaha vimuna vosena vasemene vakweci mapenga.
9Ngoco Kalunga namufumisa senu vimuna, navahane kuli ami.
10Kaha casolokanga, omu vapwanga vimuna nakwimita majimo, ngwandulanga meso ami, ngwamonanga hakulota, kaha tala, vizamba vaze vapwanga nakunyina havihwevo vapwanga vakweci mapenga, navava vamavalanga-mavalanga, navava vamapelenge.
11Kaha kangelo kaKalunga hakungulotesa kana angwambanga ngwenyi, Ove Yakova. Ngwambanga ngwami, Yami uno mwane.
12Angwambanga ngwenyi, Andula jino meso ove utale, vizamba vosenava vali nakunyina havihwevo vanapu vamapenga, navava vamavalanga-mavalanga navava vamapelenge. Mwomwo ngunamono vyosenovyo ali nakukulinga Lavane.
13Ami yami Kalunga wakuMbetele, kuze wahingunwinyine maji kulilolwa lyakwimika, kuze walixingilile kuli Ami. Katuka jino, ufume mulifuci lino, uhiluke kulifuci lize wasemuwilile.
14Lakele naLeya vamukumbulwile ngwavo, Muzuvo yasetu mucili cazano cetu, cipwe uswana wetu numba?
15Eji kutumonanga nge tuvakatanga yeka nyi? Mwomwo natulande, kaha nali nawa jimbongo jetu josena ma.
16Mwomwo vikumba vyosenevi nafumisa Kalunga kuli setu vinapu vyayetu navana vetu. Xikaho jino, mwexomwo nahanjika Kalunga kuli ove, ijiva kulingamo.
Yakova mwamucina Lavane
17Yakova akatukile, atwamixile vana venyi namapwevo jenyi havangamela.
18Atwalile vimuna jenyi vosena, navikumba vyenyi vyosena vize ahetele, vimuna vaze apwile navo, vaze ahetele kuPatane-alame, akatukile nakuya kuli ise Isaka kulifuci lyaKanane.
19Lavane alingile hanayi lyehi nakutewula mikoko jenyi. Lakele evile vakixi vaze vapwile vaise.
20Yakova aseunukile kuli Lavane kaSulya, mwomwo kamulwezele omu acinyineko.
21Ngoco acinyine navyuma vyenyi vyosena, akatukile, azaukile Kalwiji, atalixile meso enyi kupili Ngileyate.
22Vamulwezele Lavane halikumbi lyamucitatu ngwavo, Yakova nacinyi lyehi.
23Lavane akatwile vausoko wenyi aye navo, vamukavangijile makumbi atanu naavali, kaha vamuwanyine kupili Ngileyate.
24Kalunga ejile kuli Lavane kaSulya nakumulotesa naufuku, amwambile ngwenyi, Lilame, kanda uhanjika kuli Yakova cipwe mwamwaza cipwe mwamupiko.
25Lavane ahetele kuli Yakova. Jino Yakova alingile hanatungu lyehi mbalaka yenyi kupili. Lavane navausoko wenyi vatungile jimbalaka javo kupili Ngileyate.
26Lavane amwihwile Yakova ngwenyi, Unalingi ngacilihi nakuseunuka kuli ami nakutwala vana vami vamapwevo nge vafunge vakukwata kujita?
27Ikaze wacinyinanga kupenge, nakunguseunuka, nakuzeneka kungulweza mangana ngukuxinjikizeko namiselo namyaso nakwimba tungoma navisaji?
28Kawangwitavilile kusweswenya vana vami vamalunga navava vamapwevoko. Jino unalingi mwakuhulama.
29Cili mungolo jamavoko ami kukulinga mwamupi, oloze Kalunga kaiso ahanjikanga kuli ami ufuku walelo ngwenyi, Lilame, kanda uhanjika kuli Yakova cipwe mwamwaza cipwe mwamupiko.
30Kaha jino, cipwe nausaka kuya mwomwo uli nakufwila cikuma kumona kuzuvo yaiso, oloze ikaze unevila tulunga twami?
31Yakova amukumbulwile Lavane ngwenyi, Mwomwo ngwevwanga woma ngwami, Kucina naungunyanga vana vove vamapwevo nangolo.
32Wexowo nauwana ali natulunga twove kexi kuyoyako. Kumeso avausoko wetu talovyo vyove vili kuli ami, uvitambule. Mwomwo Yakova katacikijileko ngwenyi, Lakele avevile.
33Lavane engilile mumbalaka yaYakova, namumbalaka yaLeya, namujimbalaka javaze vandungo vamapwevo vavali, oloze kavawanyinemoko. Alovokele mumbalaka aLeya, engilile mumbalaka yaLakele.
34Lakele alingile hanambate lyehi vaze vakixi nakuvasweka muselei yangamela, kaha atwamineho. Lavane atalile mumbalaka mwosena, Oloze kavawanyinemoko.
35Lakele ambile kuli ise ngwenyi, Ove mwata wami, kanda wivwa kupihyako omu ngunahono kukatuka kumeso ove, mwomwo kaxilikilo kamapwevo kananguwane. Lavane atalatalile, oloze kawanyine vaze vakixiko.
36Kaha Yakova atenukile, akokojwesele Lavane. Yakova amwihwile ngwenyi, Oho ngunazombokela jiximbi halihi? mulonga wami uka? numba unguzengalale ngana nautenu.
37Omu unapapacila kuvyuma vyami vyosena unawane cuma cakuvyuma vyakuzuvo yove cika? Citumbike kuno kumeso avausoko wami navausoko wove, mangana vayule mukaci ketu.
38Myakeyi makumi avali ngunatwamenga nayove. Mikoko jove navapembe jove vavihwevo kavahongomwenengako, navizamba jove vamikoko kangwavalileko.
39Vaze vakutanya kuli visuma ami kangwavatwalilenga kuli oveko, ngwaxixixilengamo veka. Ove wavasakilenga kulivoko lyami, cipwe vakwiva namusana cipwe vakwiva naufuku.
40Mukiko mungwapwilenga, liyena lyanguyanjixilenga namusana, nacixika naufuku, kaha tulo twami twafuminenga kumeso ami.
41Myakeyi makumi avali ngunatwamenga kuzuvo yove. Ngwakuzacilile myaka likumi nayiwana hali vana vove vamapwevo vavali, namyaka yitanu naumwe hali vimuna jove, kaha unalumuna fweto yami kusokesa mulikumi.
42Kaci Kalunga katata, Kalunga kaApalahama, Woma waIsaka kaci kapwile nayamiko, kaci Camwenemwene unangusuwula jino mavokovoko. Kalunga namono luyando lwami nakukilikita camavoko ami, kaha akuhanjikilanga ufuku walelo.
43Lavane amukumbulwile Yakova ngwenyi, Ava mapwevo vanapu vana vami, ava vana vavo vanapu vana vami, ava vimuna vanapu vimuna jami, navyosenevi unamono vinapu vyayami. Nanguhasa lelo kuvalinga ikava vana vami navava vana vavo vanaseme?
44Kaha jino twaya, tulixike luxiko nayami nayove, upwenga unjiho mukaci ketu nayove.
45Yakova anonele lilolwa, alimikile kupwa lilolwa lyakwimika.
46Yakova ambile kuli vausoko wenyi vamalunga ngwenyi, Kungululenu malolwa. Vanonele malolwa nakulumbika mulumba, kaha valile kulya kuze kwakwamwihi namulumba uze.
47Lavane aulukile ngwenyi, #31.47:Ahanjikile muuSulya ngwenyi, Mulumba waunjiho.Yengale-saha-nduta. Oloze Yakova aulukile ngwenyi, #31.47:Ahanjikile muuHepeleu ngwenyi, Mulumba waunjiho.Ngalete.
48Kaha Lavane amwambile ngwenyi, Lelo lino mulumba uno unapu unjiho mukaci ketu nayove. Xikaho vaulukile lijina lyawo ngwavo, Ngalete,
49ngwavo, #31.49:Nge ngwavo, Kapoxi kukutala.Mijipa, mwomwo amwambile ngwenyi, Yehova atale hakaci ketu nayove Ximbu natuhona kulimona.
50Kaci nge naukayanjisa vana vami vamapwevo, mokomoko kaci nge naukambata mapwevo veka nawa vakulunjika hali vana vami, kuli etu kakwexi mutu umweko, tala, Kalunga Ikiye Cinjiho mukaci ketu nayove.
51Lavane ambile kuli Yakova ngwenyi, Tala, mulumba uno, nalilolwa lyakwimika lino ngunatumbika mukaci ketu nayove.
52Mulumba uno upwenga unjiho, nalilolwa lyakwimika lino lipwenga unjiho, ngwavyo, ami kangwexi kuhambakana mulumba uno nakuya kuli oveko, nayove nawa kawexi kuhambakana mulumba uno nalilolwa lino nakwiza kuli ami nakulilinga mwamupiko.
53Kalunga kaApalahama, Kalunga kaNahole, Kalunga kasevo, akayule mukaci ketu. Yakova alixingile Woma waise Isaka.
54Yakova avatwile cimuna kuze kupili, kaha avasanyikile vausoko wenyi valyenga. Valile kulya, vasavalile ufuku wosena kuze kupili.
55Lavane amenekele cimenemene, asweswenyele vana venyi vamalunga navava vamapwevo, avakiswile. Kaha Lavane akatukile, akindulukile kumahyenyi.
Currently Selected:
KUPUTUKA 31: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
