KUPUTUKA 37
37
Yosefwe navamutwala kuEjipitu
1Yakova atwaminenga mulifuci lyaKanane, muze azuzumanyinenga ise.
2Eci cikiko kusemunwina caYakova. Omu apwile Yosefwe namyaka likumi nayitanu nayivali, apwile nakufunga vimuna vavandende navayayenyi hamwe. Apwile mwanalunga navana vaMbiliha vamalunga hamwe, navana vaZelepa vamalunga, ava mapwevo jaise. Yosefwe amwambuliiilenga sevo vilinga vyavo vyavipi.
3Jino Isalele azangilenga Yosefwe kuhambakana vana venyi vakwavo vosena, mwomwo ikiye apwile mwanenyi wahauxinakaji wenyi, xikaho. Kaha amutongelele #37.3:Mokomoko ngwavo, Cikuto cacisuku capwile namavoko amasuku.cikuto caulombo weka naweka.
4Vayayenyi vamalunga vamwene omu amuzangile sevo kuhambakana vandumbwenyi vosena, kaha vamuhungile, kavahaxile kuhanjika nenyi nakekeko.
5Yosefwe alotele, acilwezele kuli vayayenyi, kaha vakivo vahambakanyine kumuhunga.
6Avambile ngwenyi, Acivwililenu omu ngunaloto.
7Mwomwo talenu, twapwanga nakukasa mikuta muwande, kaha mukuta wami wakatukanga, wemananga. Kaha kumana, mikuta yenu yaujingulwisanga ce ndo nakulifukula kumukuta wami.
8Vayayenyi vamwambile ngwavo, Kumana, ove naukapwa umwangana wetu numba? Nyi naukapwa umwata wetu numba? Kaha vahambakanyine kumuhunga hakulota cenyi nahamazu enyi.
9Alotele ceka, ahicilemo kuli vayayenyi ngwenyi, Talenu, ngunaloto ceka. Kaha kumana, nalikumbi nakakweji navatanganyika likumi naumwe valifukulanga kuli ami.
10Acambulwile kuli ise nakuli vandumbwenyi. Kaha ise amuhanjikilile, amwihwile ngwenyi, Eci kulota kana unaloto cika? Kumana, nayami nanoko navayayove natwiza kulifukula kuli ove cameso hamavu numba?
11Vayayenyi #Vili. 7.9.vamwivwilile luxiwuxiwu. Oloze ise alaminenga cihande kana mumucima wenyi.
12Vayayenyi vayile nakufunga utanga wasevo wavimuna vavandende kuXekeme.
13Isalele ambile kuli Yosefwe ngwenyi, Vayayove vali nakufunga vimuna vavandende kuXekeme nyi? Twaya, nangukutuma kuli vakivo. Amwitavilile ngwenyi, Yami uno mwane.
14Amwambile ngwenyi, Yako jino, ukavatale numba nge vayayove vali kanawa, navimuna nawa, kaha ukeze ceka ungulweze. Ngoco amusuwile kucinema caHevelone, kaha ahetele kuXekeme.
15Lunga umwe amuwanyine, kaha tala, apwile nakulumbwangila mucipapa. Uze lunga amwihwile ngwenyi, Uli nakutalatala ika?
16Amwambile ngwenyi, Nguli nakutalatala vayayami. Aci ngulwezeko mwane oku vali nakulixila utanga wavimuna vavandende kulihi.
17Uze lunga amwambile ngwenyi, Kunonyi vanafumuko lyehi. Mwomwo ngwavevwanga hakuhanjika ngwavo, Tuyenu kuNdotane. Kaha Yosefwe akavangijile vayayenyi, avawanyine kuNdotane.
18Jino omu vamumwene ndola, ximbu apwile kanda ahete hakamwihi navo, vamutwamine punga ngwavo, vamujihe.
19Valyambile ngwavo, Talenu, muka-kulotou mweza.
20Xikaho tuyenu jino, tumujihenu, tumumbilenu muwina, kaha natukamba ngwetu, Kanyama wamupi namuli. Kaha natukatala mwaya kulota cenyi.
21Oloze Luvene evwileko, kaha amupululwile mumavoko avo. Avambile ngwenyi, Kanda tumujihako.
22Luvene avambile ngwenyi, Kanda mumwanga manyingako. Mumbilenu muwina uno uli mupambo. Oloze kanda mumunangika livokoko. Ngwenyi, Mangana ngumupululule mumavoko avo, ngukamuhilwise ceka kuli ise.
23Kaha casolokele, omu ahetele Yosefwe kuli vayayenyi, vamuzulile cikuto cenyi, cikuto caulombo weka naweka cize avwalile.
24Vamukwacile nakumumbila muwina, muwina kana mwapwile mwamupolongwa, kamwapwile meyako.
25Vatwamine nakulya. Kaha vandwile meso avo nakutala, vamwene cendo cavalximele vapwile nakwiza kufuma kuNgileyate, navangamela javo vanambate #37.25:Ulilila wamitondo walivumba lyamwaza.xitolake, #37.25:Ulilila wamutondo wakutenga vitumbo.nambalasamu, #37.25:Ulilila wamitondo walivumba lyamwaza.nalatanume, navaya nakuvitwala kuEjipitu.
26Yuta ambile kuli vandumbwenyi ngwenyi, Kaci nge natujiha songo yetu nakucisweka, kaha nacikatuwahisa ngacilihi?
27Tuyenu, tumulandenu kuli vaIximele, kanda tumunangika mavoko etuko. Mwomwo ikiye songo yetu, nyama yetu. Vandumbwenyi vevwililile mulizu lyenyi.
28Kwapalikile vaMicane vaka-kusepa, kaha vamukokele Yosefwe nakumufumisa muwina, #Vili. 7.9.vamulanjile Yosefwe kuli vaIximele najimbongo japalata makumi avali. Vakivo vamutwalile Yosefwe kuEjipitu.
29Luvene ahilukile kuwina, kaha kumana, Yosefwe kapwile muwinako, kaha apulile mahinenyi.
30Ahilukile kuli vandumbwenyi, avambile ngwenyi, Mukweze waucimo, kahami nanguya kulihi?
31Vanonele cikuto caYosefwe, Vajihile musamba wapembe, nakutupika cikuto mumanvinga.
32Kaha vatumine cikuto cize caulombo weka naweka nakucitwala kuli sevo, vamwambile ngwavo, Eci tunaciwane. Citale mangana utacikize numba nge cinapu cikuto camwanove nyi ciku.
33Acitacikijile, ambile ngwenyi, Cikiko cikuto camwanami. Kanyama wamupi namuli. Camwenemwene Yosefwe vanamusanyula lyehi sanyusanyu.
34Yakova apulile mahinenyi, avwalile vikelei mumitanda yenyi, kaha alixonene hali mwanenyi makumbi amavulu.
35Vana venyi vamalunga vosena navava vamapwevo vosena vakatukile vamuvendejeke. Oloze ikiye ketavile kumuvendejekako, ambile ngwenyi, Mwomwo nangukaxikumuka #37.35:Kwaya vafu.kuXeyole kuli mwanami nakulixona lika. Ngoco ise amulilile.
36Kaha vaMicane vamulanjile Yosefwe muEjipitu kuli Potefwale, kapitau kaFwalo, citapanga wamukulwane.
Currently Selected:
KUPUTUKA 37: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
