KUPUTUKA 43
43
Vayaya jaYosefwe naveza ceka naMbenjamine
1Zala yakalombolombo yize yatohwele mulifuci.
2Kaha casolokele, omu valingile hivanali lyehi tiliku yize vejile nayo kuEjipitu yosena ma, sevo avambile ngwenyi, Yenu ceka, mukatulanjile tumwe twakulya.
3Yuta amwambile ngwenyi, Uze lunga atulwezele cikuma nangolo ngwenyi, Kamwexi kukamona meso amiko, kuvanga muneza nasongo yenu.
4Kaci nge nausuwula songo yetu nayetu hamwe, kaha natuya nakukulanjila kulya.
5Oloze nge kaute kumusuwula, kahetu katwexi kuyako. Mwomwo uze lunga atwambile ngwenyi, Kamwexi kukamona meso amiko, kuvanga muneza nasongo yenu.
6Isalele avambile ngwenyi, Ikaze mwangulingilile ngoco mwamupi nakumulweza uze lunga ngwenu, Tucili nasongo yetu weka?
7Vamwambile ngwavo, Uze lunga atwihwojwele kutwala kuli etu nakuli vausoko wetu, ngwenyi, Senu acili wamutonyi, tahi? Ngwenyi, Muli nandumbwenu weka, tahi? Kaha twamulwezele nge mwaya mazu awa. Kutacikiza twatacikijile numba, ngwetu, pamo mwatwamba ngwenyi, Kanehenu songo yenu kuno?
8Yuta ambile kuli ise Isalele ngwenyi, Musuwule mukweze nguyenga nenyi, kaha natukatuka, natuya, mangana tukayoye, kucina natufwa, nayetu nayove navana vetu nawa.
9Ami nangupwa ngucijikilo hali ikiye. Ukamwihula kumavoko ami. Kaci nge ami kangwexi kumuneha ceka kuli ove, nakumutumbika kumeso oveko, Ukapwenga mulonga wayami haya myaka yosena.
10Mwomwo kaci katwalangixileko, Camwenemwene oholili kaci tunahiluka lyehi kamucivali.
11Sevo Isalele avambile ngwenyi, Kaci nge ngoco, kaha lingenu ngana. Mbatenu vyuma vyakusakula vyamulifuci lino mujituku jenu, mumutwalile uze lunga wana, #43.11:Tala 37.25.nambalasamu yayindende, nawuci waundende, #43.11:Tala 37.25.naxitolake, #43.11:Tala 37.25.nalatanume, namikau, #43.11:Mihako yakulifuci lize. Veji kulyanga mikau yamumikoswa yayo.namamonde.
12Kaha mbatenu jimbongo jajindando jivali mumavoko enu, najimbongo jize vahilwixile mutunwa twajituku jenu, jimbatenu ceka mumavoko enu.
13Kwiji, pamo vahungumukile. Yenu nawa nasongo yenu, katukenu, muyenga ceka kuli uze lunga.
14Kaha Kalunga ukweci ngolo josena akamimwenese keke kuli uze lunga, akece ndumbwenu mukwavo naMbenjamine nawa. Kaci nge navakanguvindamisa vana vami, kaha ngunavindama vene.
15Malunga vaze vambacile wana uze najimbongo jajindando jivali mumavoko avo, vayile naMbenjamine, kaha vakatukile, vayile kuEjipitu, vemanyine kumeso aYosefwe.
16Yosefwe amwene vaneza naMbenjamine, ambile kuli muka-kumulamina vyuma muzuvo yenyi ngwenyi, Vengise malungava muzuvo yami, jiha nyama, uteleke kulya. Mwomwo malungava navalya nayami halikumbi lyamulungu.
17Uze lunga alingile nge omu amulwezele Yosefwe, avatwalile vaze malunga muzuvo yaYosefwe.
18Kaha vaze malunga vevwile woma mwomwo vavatwalile muzuvo yaYosefwe. Valyambile ngwavo, Mwomwo jimbongo jize vahilwixile mujituku jetu haze twejile hakulivanga, xikaho vanatwingisa muzuvo muno, mangana awane kanyinyilo kuli etu, atuhane mulonga nakutukwata tupwenga tuvandungo, atambule navimbulu jetu nawa.
19Kaha vapandamine kuli uze muka-kulama vyuma muzuvo yaYosefwe, vahanjikile kuli ikiye kucikolo cazuvo,
20vamwambile ngwavo, Ove mwata, Camwenemwene twejile hakulivanga nakulanda kulya.
21Kaha casolokele, omu twahetele kucilombo, twakasunwine kujituku jetu, kaha kumana, jimbongo jamutu himutu japwile kukanwa katuku yenyi, jimbongo jetu vene, pezo yajo yatelemo. Tunajinehe ceka mumavoko etu.
22Najimbongo jeka nawa tunajinehe mumavoko etu jakulanda kulya. Katwatacikijile iyaze ahakile jimbongo jetu mujituku jetuko.
23Avambile ngwenyi, Undenu mumicima yenu, kanda mwivwa womako. Kalunga kenu, Kalunga kasenu, namihane luheto mujituku jenu. Ami ngwapwile najimbongo jenu. Avalowelele Ximeyone.
24Uze lunga avengixile muzuvo yaYosefwe, avahanyine meya, kaha vasanyine kumahinji avo.
25Kaha ahanyine kulya kuli vimbulu javo. Kaha valongesele wana wavo mangana Yosefwe auwane hakwiza halikumbi lyamulungu. Mwomwo vevwile ngwavo, navalya muze.
26Omu ejile Yosefwe kuzuvo yenyi, vamutwalilile wana uze wapwile mumavoko avo muzuvo yenyi, valifukwile kuli ikiye nameso avo hamavu.
27Avehwile muvanatwame, avambile ngwenyi, Senu ali kanawa tahi? uze kaxinakaji mwavulukile. Acili wamutonyi, tahi?
28Vamwambile ngwavo, Ngamba yove Setu ali kanawa, acili wamutonyi vene. Kaha vanongamine mitwe yavo nakulifukula.
29Andwile meso enyi, amwene songo yenyi Mbenjamine, mwananaye. Avambile ngwenyi, You songo yenu wakanyike mwanguvulukilile tahi? Kaha amwambile ngwenyi, Ove mwanami, Kalunga akutetele.
30Yosefwe anguhwixile, mwomwo evwile hyangu mumucima wenyi hakumona songo yenyi, kaha atalile kwakulilila. Engilile muzuvo yenyi yakusavala alililile muze.
31Kaha asanyine kumeso enyi, alovokele, alihulikile, ambile ngwenyi, Twalenu kulya kumesa.
32Vamutwalilile cenyi hauka wenyi, navakivo hauka wavo, navaze vaEjipitu valilenga nenyi hauka wavo nawa. Mwomwo vaEjipitu kavahaxileko kulya navaHepeleu hamwe, mwomwo cikiko cinapu caunyengwe kuli vaEjipitu, xikaho.
33Vatwamine kumeso enyi, twatwa nge kuutwatwa wenyi, kanyike nge kuunyike wenyi, kaha vaze malunga valikomokelele.
34Avatuminyine vyazano vyakumeso enyi. Oloze cazano caMbenjamine cavulile cikuma nge cavatu vakwavo vatanu. Kaha vanwine, vasehelelele nenyi.
Currently Selected:
KUPUTUKA 43: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
