Hechos 10

Pedruta Cornelio qayatsinqan

1Cesarea markachömi Cornelio shutiyuq runa täkurqan. Paymi Italiano ninqan batallonpa capitannin karqan. 2Wajinchö llapan täkuqkunawanmi Dios Yayapita mantsakur pay munanqannö kawakuyaq. Waktsakunata yanaparmi Dios Yayata imaypis mañakuq. 3Juk tardinam las tres kaykaptin Dios Yayapa angelninta revelacionchö rikarqan. Tsay angelmi nirqan: <<¡Cornelio!>>

4Tsaynam alläpa mantsakashqa rikaykur nirqan: <<Taytay, ¿imallatatan?>>

Angelnam nirqan: <<Mañakunqaykitam Dios Yaya wiyashushkanki. Waktsakunata yanapanqaykitam rikäshushkanki. 5Kananqa Simón shutiyuq runata pushayämunanpaq Jope markaman kachakuy. Paypam jukaq shutin Pedro. 6Paymi lamar kuchunchö suëla ruraq Simónpa wajinchö patsakushqa kaykan. [Paymi willashunki imata ruranaykipaqpis]>>.

7Ángel aywakuskiptinnam Cornelio qayarqan ishkay serviqninkunata y Dios munanqannö kawaq juk yanapaqnin soldäduta. 8Paykunatam ángel ninqankunata willaykur Jope markaman kachakurqan.

9Waränin pullan junaqnam Cornelio kachakunqan runakuna Jope markaman chäyarqan. Tsay höram Pedrupis patsakunqan waji jananman Dios Yayata mañakuq lätarqan.#10.9 Tsay witsaymi Israel nacionchö wajita qatayanqanpa rantin teranti jananman tsaqllaskir qetäwan lashtayaq. Tsay jananchömi awakuyaq, aqakuyaq y trïgutapis akrakuyaq. 10Mañakuykarmi alläpa mallaqar mikuyta munarqan. Kusinakuyanqanyaqmi Dios Yaya revelaptin 11ciëlu kicharaykämuqta rikarqan. Ciëlupitanam chuskun puntan watashqa jatun jakunö bäjaykämuqta rikarqan. 12Tsay jakuchömi karqan tukuyläya wätakuna, patsapa lätaypa puriqkuna y päriqkunapis. 13Tsaynam ciëlupita nimurqan: <<Pedro, tsaykunata pishtaskir mikuy>>.

14Pedrunam nirqan: <<Taytay, manam tsaykunata mikümantsu. Impüru wätakunataqa#Lev. 11.1-46. manam imaypis mikushkätsu>>.

15Tsaynö niptinmi yapay nimurqan: <<Mikunaykipaq püru kanqanta Dios Yaya nikäshuptikiqa ama: <Impürum> ninkitsu>>.

16Tsay revelacionta kimsa kuti Pedro rikaskiptinmi tsay jakuta ciëlupa kutitsikurqan.

17<<¿Imapaqraq rikätsimashqa?>> nir yarpachakuykaptinmi Cornelio kachanqan runakuna tapukur Simónpa wajiman chäyarqan. 18Chaykurnam tapukuyarqan: <<¿Kaychöku Simón Pedro patsakushqa kaykan?>>

19Revelacionta rikanqanpita Pedro yarpachakuykaptinmi Espíritu Santu nirqan: <<Kimsaq runakunam ashiykäyäshunki. 20Noqam tsay runakunata kachamushkä. Mana mantsakur paykunawan ayway>>.

21Tsaynö niptin bäjaskamurmi tsay runakunata Pedro nirqan: <<Tsay ashiykäyanqayki runaqa noqam kä. ¿Imallapaqtan ashiykäyämanki?>>

22Paykunanam niyarqan: <<Taytay, capitán Cornelium kachayämashqa. Paymi Dios Yayapita mantsakuq alli runa. Paytam llapan Israel runakunapis kuyayan. Qamta qayatsishunaykipaqshi Dios Yayapa santu angelnin nishqa. Willakuyninta willakunaykipaqshi wajinman aywaykulläshun>>.

23Tsaynö niyaptinmi patsakunqan wajichö Pedro paykunata quëdatsirqan.

Waränin alliqnam Cornelio kachakunqan runakunawan y Jopichö täkuq wakin wawqikunawan Pedro aywarqan. 24Aywayanqanpita waräninraqmi Cesarea markaman chäyarqan. Corneliunam castankunawan y kuyanqan runankunawan wajinchö shuyaraykäyarqan. 25Chaykuyaptinnam Pedrupa puntanman Cornelio qonqurikuykur payta adorarqan. 26Tsaymi Corneliuta sutarkur Pedro nirqan: <<¡Shäriy! noqapis qamnö runallam kä>>.

27Tsaypitanam paywan parlar yaykuskir atskaq runakuna qorikashqa kaykäyaqta tarirqan. 28Pedrunam nirqan: <<Qamkunaqa musyayankim Israel runakuna mana Israel runakunawan mana qorikänanpaq ni wajinkunamanpis mana yaykunanpaq kanqanta. Peru tsaynö kaykaptinpis Dios Yayam tantiyatsimashqa pipis impüru mana kanqanta.#10.28 Israel runakunam niyarqan mana Israel runakuna impüru kayanqanta. Tsaymi paykunawan qorikäyaqtsu ni wajinmanpis yaykuyaqtsu. 29Tsaymi qayatsimaptiki saslla shamushkä. Kanan imapaq qayatsiyämanqaykitapis nimay>>.

30Corneliunam nirqan: <<Chusku junaqnam kaynö höra [ayunar] Dios Yayata mañakuykarqä. Las tres de la tardim chipakyaykaq llatapashqa runa yuripamashqa. 31Paymi nimashqa: <Cornelio, mañakunqaykitam Dios Yaya wiyashqa. Waktsakunata yanapanqaykitam rikashqa. 32Kananqa Simón shutiyuq runata pushayämunanpaq Jope markaman kachakuy. Paypam jukaq shutin Pedro. Paymi lamar kuchunchö suëla ruraq Simónpa wajinchö patsakushqa kaykan. [Pay chaykamurmi parlapäshunki]>. 33Tsaynö nimaptinmi saslla kachakamurqä. Taytay, shamunqaykitam kushikü. Willakuyninta wiyayta munarmi Dios Yayapa puntanchö llapäkuna qorikäyashkä>>.

Corneliupa wajinchö Pedro willakunqan

34Pedrunam nirqan: <<Kanan rasunpam tantiyä Dios Yaya pïmaytapis kuyanqanta.#Deut. 10.17. 35Tsaynöllam may nacionpita kaptinpis paypita mantsakur cäsukuq kaqtaqa pïmaytapis llakipan. 36Tsaynö llakipämarnintsikmi Jesucristo rayku perdonamantsik paywan alli kawakunapaq. Jesucristum llapanpa Señornin kaykan. Tsay alli willakuytam Israel runakunata Dios Yaya musyatsirqan.

37<<Qamkuna musyayankim bautizakuyänanpaq Juan willakunqanpitaraq Galileachö qallaykur entëru Judeachö ima päsanqantapis. 38Tsay witsaymi Nazaret markapita Jesús poderyuq kananpaq Espíritu Santuta Dios Yaya payman kachamurqan. Dios Yaya yanapaptinmi markan markan Jesús purirqan allikunata rurar y diablu qeshyatsinqan runakunata kutikätsir.

39<<Noqakunam rikäyashkä Jerusalénchö y entëru Judeachö Jesús ruranqankunata. Cruzchö wañutsiyaptinpis 40kimsa junaqtam Dios Yaya kawaskatsimushqa. Kawaskamurmi yuripayämashqa. 41Tsaytaqa manam llapan runakunatsu rikäyashqa, sinöqa unaypita Dios Yaya akranqan kaqkunallam. Tsaymi kawaskamuptin paywan paqta mikur upyar kayashkä. 42Tsaypitanam kachayämashqa willakuyninta willakur niyänäpaq: <Wañushqakunata y kawaykaqkunatapis juzgananpaqmi Dios Yaya Jesústa churashqa>. 43Paypaqmi llapan profëtakunapis willakuyarqan. Tsaynöpam musyantsik llapan payman creyikuq kaqtaqa jutsankunapita Dios Yaya paypa shutinchö perdonanqanta>>.

Mana Israel runakuna Espíritu Santuta chaskiyanqan

44Pedro tsaynö willakuykaptinmi tsaychö wiyaykaqkunaman Espíritu Santu shamurqan. 45Tsayta rikarmi Pedruwan aywaq Israel runakuna mantsakashqa niyarqan: <<¡Mana Israel runakunatapis Espíritu Santutam Dios Yaya qarashqa!>>

46Tsaynö niyarqan juk idiömakunapana parlar Dios Yayata alabaykäyaqta wiyarmi. 47Tsaymi Pedro nirqan: <<Paykunapis noqantsiknö Espíritu Santuta chaskiyaptin manam ni pipis bautizakuyänanta amatsanmantsu>>.

48Tsaynö nirmi Jesucristupa shutinchö paykunata bautizarqan. Tsaypitanam Corneliupa wajinchö qorikaqkuna Pedruta rugayarqan ishkay kimsa junaqllapis quëdananpaq.

Currently Selected:

Hechos 10: qxn

Highlight

Copy