Hechos 11

Mana Israel runakunapis Jesúsman creyikuyanqanta Pedro willakunqan

1Mana Israel runakunapis Dios Yayapa willakuyninta chaskikuyanqantam apostolkuna y Judea provinciachö wawqikuna y panikunapis musyayarqan. 2Tsaypita Jerusalénman Pedro kutiptinmi señalashqa kaq wakin wawqikuna musyapar 3niyarqan: <<¡Imanirtan mana Israel runakunapa wajinman yaykur paykunawan mikushkanki!>>

4Pedrunam ima päsanqantapis willakur nirqan: 5<<Jope markachö Dios Yayata mañakuykarmi ciëlupita chuskun puntan watashqa jatun jakunö bäjaykämuqta revelacionchö rikarqä. 6Tsay jakunö bäjaykämuqchömi tukuyläya wätakunata rikarqä manshu kaqta y chucaru kaqta, patsapa lätaypa puriqta y päriqkunatapis. 7Tsayta rikaraykaptïmi ciëlupita nimurqan: <Pedro, tsaykunata pishtaskir mikuy>.

8<<Tsaynö nimaptinmi nirqä: <Taytay, manam tsaykunata mikümantsu. Impüru wätakunataqa manam ni imaypis mikushkätsu>.

9<<Tsaymi ciëlupita yapay nimurqan: <Mikunaykipaq püru kanqanta Dios Yaya nikäshuptikiqa ama <<impürum>> ninkitsu>. 10Tsay revelacionta kimsa kuti rikaskatsimarmi jakuta ciëlupa kutitsikurqan.

11<<Tsay höram Cesarea markapita kachamunqan kimsa runakuna ashiyämar patsakunqä wajiman chäyämurqan. 12Tsaymi Espíritu Santu nimarqan mana mantsakur paykunawan aywayänäpaq. Tsaynö nimaptinmi kay soqta wawqikunawan aywar qayatsimaq runapa wajinman yaykuyarqä. 13Tsaychömi willayämarqan wajinchö juk ángel yuripuskir ninqanta. Tsay angelshi ninaq: <Simón shutiyuq runata pushayämunanpaq Jope markaman kachakuy. Paypam jukaq shutin Pedro. 14Paymi tantiyatsishunki qampis y wajikichö täkuqkunapis imanö salvakuyänaykipaq kanqanta>.

15<<Tsaychö willakur qallaykaptïmi noqantsikman chämunqannölla paykunamanpis Espíritu Santu chashqa. 16Tsaychömi Señor Jesucristo ninqanta yarpaskirqä: <Juanqa yakullawanmi bautizarqan. Peru qamkunam sïqa Espíritu Santuwan bautizashqa kayanki>.#Hech. 1.5. 17Señor Jesucristuman creyikushqa Espíritu Santuta qaramanqantsiknöllam paykunatapis Dios Yaya qarashqa. Tsaynö kaykaptinqa ¡pitan noqa kä amatsanäpaq!>>

18Tsaynö willakunqanta wiyaykurmi Pedruta imatapis niyarqannatsu. Tsaypa rantinmi kushikur niyarqan: <<¡Mana Israel runakunatapis Dios Yayam tantiyaykätsin jutsankunapita arrepentikur mana ushakaq kawayta tariyänanpaq!>>

Antioquíachö Jesucristuman creyikuyanqan

19Estebanta wañuskatsiyaptin Jerusalénpita qeshpir aywakuqkunam Feniciaman, Chipriman y Antioquíaman#Hech. 8.1-4. chaykur Israel majinkunallata alli willakuyta willakuyarqan. Mana Israel runakunataqa manam ni pitapis willayarqantsu. 20Peru Chipripita y Cirenipita wakin wawqikunam sïqa Antioquíaman chaykur mana Israel runakunatapis Señor Jesucristupa alli willakuyninta willakuyarqan. 21Tsaynö willakuyänanpaq Dios Yaya yanapaptinmi Jesucristuman atskaq creyikuyarqan.

22Tsayta wiyarmi Jerusalénchö kaykaq wawqikunata y panikuna Bernabéta Antioquíaman kachayarqan. 23Tsaychö mana Israel runakunatapis Dios Yaya llakipanqanta rikarmi Bernabé alläpa kushikurqan. Tsaymi paykunata animatsirqan cäsukur Dios Yayaman imaypis confiakuyänanpaq. 24Bernabéqa alli runam karqan. Tsaynöllam Dios Yayaman creyikur Espíritu Santupa poderninchö imaypis kawakuq. Tsaychö yachatsikuptinmi atskaq runakuna Señor Jesucristuman creyikuyarqan.

25Tsaypitanam Bernabéqa Sauluta ashiq Tarso markaman aywarqan. 26Tinkuskirnam Antioquíaman kutimur Sauluwan Bernabé wawqikunawan y panikunawan juk wata qorikäyarqan. Tsay watam atskaq runakunata yachatsikuyarqan. Antioquíachöraqmi Jesúspa discïpulunkunata#11.26 Discïpulukunapaq parlarqa Jesucristuman creyikuqkunapaqmi parlan. cristiänu niyta qallaykuyarqan.

27Tsay witsaymi Jerusalénpita Antioquíaman profëtakuna aywayarqan. 28Tsaychömi Espíritu Santu tantiyatsiptin profëta Agabo#Hech. 21.10. willakurqan maytsaychöpis alläpa muchuy kananpaq kanqanta. Willakunqannöllam muchuy karqan Romachö Claudio César mas mandakuq kanqan witsay. 29Muchuy kananpaq willakuptinmi discïpulukuna willanakuyarqan imallatapis kanqanpita qoriskir Judeachö kaq wawqikunaman y panikunaman apatsiyänanpaq. 30Tsaynö qoriskirmi Judeachö mayor wawqikunaman Bernabéwan Saulo apatsiyarqan.

Currently Selected:

Hechos 11: qxn

Highlight

Copy