Hechos 15

Jerusalénchö willanakuyanqan

1Tsay witsaymi Judeapita Antioquíaman aywar wakin runakuna wawqikunata yachatsir niyarqan: <<Moisés qellqanqan leykuna ninqannö#Lev. 12.3. mana señalakurqa manam salvakuyankitsu>>.

2Tsaynö yachatsiyaptinmi Pablo y Bernabé paykunawan alläpa piñanakuyarqan. Tsaymi Antioquía wawqikuna y panikuna willanakuskir Pabluta, Bernabéta y wakin wawqikunatapis Jerusalénman kachayarqan apostolkunata y mayor wawqikunata tapuyämunanpaq.

3Jerusalénpa aywaqnö Feniciapa y Samariapa päsarmi wawqikunata y panikunata willakuyarqan mana Israel runakunapis Jesucristuman creyikuyanqanta. Tsaynö willakuyaptinmi llapanpis kushikuyarqan.

4Jerusalénman chaykuyaptinmi apostolkuna, mayor wawqikuna y tsaychö llapan wawqikuna y panikunapis paykunata kushishqa chaskiyarqan. Tsaychömi Pabluwan Bernabé willakuyarqan markan markan puriyaptin Dios Yaya yanapanqanta. 5Peru wakin creyikuq fariseukunanam contran shärir niyarqan: <<Jesúsman creyikurpis mana Israel runakuna señalakuyätsun y Moisés qellqanqan leykunata cumpliyätsun>>.

6Tsaynö niyaptinmi apostolkuna y mayor wawqikuna qorikaykur willanakuyarqan. 7Alläpa piñanakuyaptinmi Pedro ichirkur nirqan: <<Wawqikuna, musyayankim mana Israel runakuna Jesucristuman manaraq creyikuyaptin willakuyninta willakunäpaq Dios Yaya akramanqanta.#Hech. 10.1-43. 8Dios Yayaqa musyanmi runapa shonqun imata yarpanqantapis. Tsaymi rasunpa creyiyanqanta musyatsimänapaq noqantsikman kachamunqannö#Hech. 2.4. paykunamanpis Espíritu Santuta kachamushqa.#Hech. 10.44. 9Tsaynöpam musyantsik Jesucristuman creyikuq kaqtaqa Israel runa o mana Israel runa kaptinpis Dios Yaya shonqunkunata purificar salvanqanta.

10<<Tsaynö kaykaptinqa ¿imanirtan Dios Yayata rabyatsir discïpulukunata#15.10 Discïpulukunapaq parlarmi Jesucristuman creyikuqkunapaq parlan. niyanki Moisés qellqanqan leykunata cumpliyänanpaq? Tsay leykunataqa manam unay castantsikkuna ni kikintsikpis cumpliyta puëdishkantsiktsu. 11Israel runa o mana Israel runa kashqapis Señor Jesucristo llakipämarnintsikmi salvamantsik>>.

12Tsaynö Pedro niptinmi tsaychö kaykaq runakuna upällaskiyarqan. Tsaynam Pabluwan Bernabé willakuyarqan mana Israel runakuna kaqchöpis milagrukunata rurayänanpaq Dios Yaya yanapanqanta.

13Tsaynö willakur ushaskiyaptinmi Santiago nirqan: <<Wawqikuna, wiyayämay. 14Simónmi#15.14 Simónpam jukaq shutin Pedro karqan. willamashkantsik mana Israel runakunata willakuptin Dios Yaya salvanqanta. 15Tsaynö kananpaqmi profëtakuna qellqayanqanchöpis nin:

16<< <Tsaypita kutimurmi Davidpa juchushqa wajinta yapay shäritsishaq.#15.16 Davidpa wajinpaq parlarqa Davidpita miraq reykunapaqmi parlaykan. Davidpa wajin juchushqa kanqanta nirqa Davidpita miraqkuna manana reykuna kayanqantam nin. Yapay shäritsishaq nirqa Davidpa castanpita rey kananpaq yapay churashaq ninmi.

Unay kanqannö yapay kananpaqmi juchushqa kaqkunata allitsashaq.#Mat. 1.1; Luc. 23.3.

17Tsaynömi rurashaq llapan runakunapis ashiyämänanpaq.

Noqa akranqä mana Israel runakunapis noqamannam creyikayämunqa.

18Noqa Dios Yayam nï.

Tsaynö kananpaqmi unaypitana musyatsikurqä>.#Amós 9.11-12.

19<<Tsaymi noqa nï: Mana Israel runakunapis Jesucristuman creyikuyaptin ama ima tsapatapis churashuntsu. 20Tsaypa rantinqa cartakushun ïdulukunapaq pishtayanqan aytsata mana mikuyänanpaq,#Éxo. 34.15-17. fornicación jutsata mana rurayänanpaq, kikillan wañushqa wätakunapa aytsanta mana mikuyänanpaq y wätapa yawarnintapis mana mikuyänanpaq.#Lev. 17.10-16. 21Tsaykunata cumpliyänanpaqmi unaypitana Moisés qellqanqan leykunata cada markachö yachatsikuyan. Tsaynöllam cada jamay junaq sinagögakunachö liyiyan>>.

Jerusalénpita cartakuyanqan

22Tsaynö niptinmi apostolkuna, mayor wawqikuna y llapan wawqikuna y panikunapis kushikuyarqan. Tsaymi Pabluwan Bernabé Antioquíaman kutiyaptin compañayänanpaq ishkay wawqikunata akrayarqan. Tsay wawqikunam Judaswan Silas kayarqan. Judaspam jukaq shutin karqan Barsabás. Judastawan Silastam llapan wawqikuna y panikuna respitayaq. 23Paykuna apayanqan cartachömi nirqan:

Antioquíachö, Siriachö y Ciliciachö kaykaq mana Israel wawqikuna y panikuna, qamkunapaqmi apostolkuna, mayor wawqikuna y Jerusalénchö kaykaq wawqikuna y panikunapis kay cartata cartakayämü. Salüdükunatam apatsiyämü.

24Musyayashkämi wakin wawqikuna Jerusalénpita shamuykur llutanta yachatsikur llakikatsiyäshunqaykita. [Paykunam Moiséspa leyninta cumplir señalakuyänaykipaq kanqanta niyan.] Paykunataqa manam noqakunatsu kachayämushkä. 25Tsayta musyarmi llapäkuna willanakuskir kuyay wawqintsik Pabluwan y Bernabéwan paqta shayämunanpaq ishkay wawqikunata kachaykäyämü. 26Pabluwan Bernabémi wañuytapis mana mantsar Señornintsik Jesucristupa willakuyninta willakuyan. 27Paykunawanmi Judastawan Silasta kachayämü kay cartachö qellqayämunqäta tantiyatsiyäshunaykipaq.

28Manam noqakunapis ni Espíritu Santupis qamkunata obligayaqtsu Moisés qellqanqan leykunata cumpliyänaykipaq. 29Peru ïdulukunapaq pishtayanqan aytsata, kikillan wañushqa wätakunapa aytsanta y wätapa yawarninta ama mikuyaytsu. Tsaynölla fornicación jutsata ama rurayaytsu. Kay ninqäkunata cumpliyaptikiqa allim kanqa. Aywallä.

30Despachayaptinmi Judaswan Silas Antioquíaman chaykur wawqikuna y panikuna qorikaskiyaptin apayanqan cartata entregayarqan. 31Tsay cartata liyipuskiyaptinnam llapan kushikuyarqan. 32Judaswan Silaspis profëta karmi tukuynöpa tantiyatsir wawqikunata y panikunata animatsiyarqan. 33Tsaychö atska junaq qoyaskiyaptinmi Dios Yayata mañakuskir Jerusalénman kutikuyänanpaq wawqikuna y panikuna despachayarqan. 34[Peru Silasnam tsaychö quëdaskirqan.] 35Pabluwan Bernabépis Antioquíachö quëdarmi Jesucristupa alli willakuyninta wakin wawqikunawanpis yachatsikuyarqan.

Pablo yapay willakuq aywanqan

36Tsaypita atska junaqtanam Bernabéta Pablo nirqan: <<Jesucristupa willakuyninta willakunqantsik markakunaman kutir wawqikuna y panikuna imanö kaykäyanqanta musyamushun>>.

37Tsaynam Bernabéqa Marcos niyanqan Juanta pushayta munarqan. 38Peru Pablum sïqa munarqantsu, Panfiliapita#Hech. 13.13. dëjaskir kutikamushqa kaptin. 39Tsaymi Pabluwan Bernabé alläpa piñanakurnin rakikaskiyarqan. Bernabémi Marcusta pusharkur büquiwan Chipriman aywarqan. 40Pablunam compañananpaq Silasta akrarqan. Tsaypitam wawqikuna y panikuna Dios Yayata mañakuskir kachayaptin paykunapis aywayarqan. 41Siria y Cilicia provinciakunachö markakunaman charmi Pabluwan Silas wawqikunata y panikunata animatsiyarqan.

Currently Selected:

Hechos 15: qxn

Highlight

Copy