Hechos 4

Pedrutawan Juanta autoridäkunaman apayanqan

1Pedruwan Juan willakuykäyaptinmi sacerdötikuna, saduceukuna y templuchö wardiakunapa capitanninpis chäyarqan. 2Jesucristo kawamunqannö wañuqkuna kawayämunanpaq kanqanta yachatsiyaptinmi alläpa rabyayarqan. 3Prësu achkuskirmi tardina kaptin waränin alliqyaq carcelman qaykatsiyarqan. 4Peru tsaynö kaptinpis Pedruwan Juan willakuyanqanta wiyarmi atskaq creyiyarqan. Tsay creyikuqkunam pitsqa waranqanö (5,000) kayarqan.

5Waränin alliqnam Jerusalénchö qorikäyarqan Israel runakunapa autoridäninkuna, mayor runakuna y ley yachatsikuqkuna. 6Paykunawanmi qorikäyarqan mas mandakuq sacerdöti Anás, Caifás, Juan, Alejandro y Anáspa wakin ayllunkunapis. 7Tsaypitam Pedrutawan Juanta carcelpita jipiskamur tapuyarqan: <<¿Ima podernikikunawantan y pipa shutinchötan kaykunata rurayashkanki?>>

8Espíritu Santupa poderninwanmi Pedro nirqan: <<Autoridäkuna y Israel mayor runakuna, 9¿puriyta mana puëdiq runata kutikätsiyanqäpitaku tapuyämanki? 10Qamkunawan llapan Israel runakunapis, wiyayämay. Nazaretpita Jesúspa shutinchömi kay runata kutikätsiyashkä. Payta crucificar wañutsishqa kayaptikipis Dios Yayam kawatsimushqa. 11<Kay rumi manam allitsu> nir waji shäritsiqkuna jitariqnömi payta wañutsiyashkanki. Tsaynö kaptinpis maestru ruminömi kaykan.#Sal. 118.22. 12Jesucristullam salvamaqnintsik kaykan. Paypita mas jukqa salvamänapaq manam pipis kantsu>>.

13Pedruwan Juan mana estudiashqa kaykarpis mana mantsakur parlayaptinmi autoridäkuna mantsakashqa kayarqan. Tsaymi Jesúspa discïpulun kayanqanta tantiyaskiyarqan. 14Kutikätsiyanqan runa tsaychö ichiraykaqta rikarmi ni ima niytapis puëdiyarqantsu.

15Qorikäyanqanpita Pedrutawan Juanta waqtaman qarquskirmi kikinkunapura willanakur niyarqan: 16<<Kay runakunata ¿imatatan rurashun? Tsay runata kutikätsiyanqanta Jerusalénchö täkuq llapan runakunam musyayan. Tsaytaqa manam nëgashwantsu. 17Peru willakuyanqan maytsayman mana chänanpaq paykunata amatsashun Jesúspa shutinchö pitapis manana willakuyänanpaq>>.

18Tsaynö willanakuskirmi waqtapita qayaskatsimur albertiyarqan Jesúspa shutinchö manana ni imaypis willakuyänanpaq ni yachatsikuyänanpaq.

19Pedruwan Juannam niyarqan: <<Taytakuna, shumaq tantiyakuyay. ¿Alliku kanman Dios Yayata cäsuyanqäpa rantin qamkunata cäsuyaptiq? 20Rikäyanqäta y wiyayanqätaqa manam upälla kayämantsu. Tsaytaqa imaypis willakuyäshaqmi>>.

21Puriyta mana puëdiq runata kutikätsiyanqanpita llapan runakuna Dios Yayata alabayaptinmi autoridäkuna castigayarqannatsu. Tsaypa rantinmi albertiykur dëjayarqan. 22Jesúspa poderninwan kutikaq runaqa chusku chunka (40) watayuqpita masmi karqan.

Dios Yayata mañakuyanqan

23Carcelpita yarquskirmi Pedruwan Juanqa creyikuq majinkunaman kutiykur willayarqan mandakuq sacerdötikuna y Israel mayor runakuna ima niyanqanta. 24Tsaynö willayaptinmi Dios Yayata llapan mañakur niyarqan: <<Dios Yaya, qammi kamashkanki ciëluta, kay patsata, lamarta y llapan imaykatapis.#Éxo. 20.11; Neh. 9.6; Sal. 146.6. 25Espíritu Santu tantiyatsiptinmi servishuqniki David nirqan:

<<¿Imanirtan Diospa contran runakuna shäriyan?

¿Imanirtan manakaqkunata yarpäyan?

26Dios Yayapa y akranqan Cristupa contran shäriyänanpaqmi

kay patsachö reykuna y autoridäkuna qorikaskir willanakuyan>>.#Sal. 2.1-2.

27<<David ninqannöllam Herodes,#Luc. 23.7-11. Poncio Pilato,#Mat. 27.1-2; Mar. 15.1; Luc. 23.1; Juan 18.28-29. mana Israel kaqkuna y Israel kaqkunapis santu servishuqniki#4.27 Tsay palabraqa griëguchö servishuqniki o wamrayki ninanmi. Tsaynöllam 4.30-chöpis kaykan. Jesúspa#Isa. 52.13; Fil. 2.7. contran shäriyänanpaq kay Jerusalénchö qorikäyarqan. Paytam salvakuq Cristo kananpaq churashkanki. 28Tsaynö kananpaq unaypita ninqaykinöllam llapanta rurayarqan.

29<<Dios Yaya, autoridäkuna niyämanqantam wiyashkanki. Willakuynikita mana mantsakur willakuyänäpaq yanapaykayällämay. 30Santu servishuqniki Jesúspa shutinchö tukuyläya milagrukunata rurar qeshyaqyashakunatapis podernikiwan kutikätsiyänäpaq yanapaykayällämay>>.

31Dios Yayata mañakur ushaskiyaptinmi qorikäyanqan waji tsuktsukyarqan. Tsaymi Espíritu Santupa poderninwan Dios Yayapa willakuyninta mana mantsakur willakuyarqan.

Jesúsman creyikuqkuna yanapanakuyanqan

32Jesucristuman creyikuqkunam llapan juk yarpaylla kayarqan. Tsaymi imatapis kikinkunapaq churayanqanpa rantin wanayanqanman rakipunakuyaq.#Hech. 2.44-45. 33Señor Jesucristo kawamunqantam mana mantsakur apostolkuna willakuyaq. Llapan creyikuqkunatam Dios Yaya yanaparqan.

34Tsaymi paykunaqa mayqanpis faltapukuyarqantsu. Chakrankunata wajinkunata rantikuskirmi tsay qellayta 35apostolkunaman apayaq. Paykunanam waktsakunata wanayanqanman aypuyaq.

36Tsaynöllam José shutiyuq runapis rurarqan. Paymi Chipre islapita Leví trïbu runa karqan. Paypam kuyay shutin Bernabé kananpaq apostolkuna churayarqan. Tsay shutim <<llakipäkuq runa>> ninan. 37Bernabémi chakranta rantikuskir apostolkunaman qellayta aparqan.

Currently Selected:

Hechos 4: qxn

Highlight

Copy