Hechos 5
5
Safirawan Ananías llullakuyanqan
1Tsaychömi Ananías shutiyuq juk runa karqan. Paymi warmin Safirawan chakrankunata rantikuyarqan. 2Ishkan yachatsinakuskirmi chakrata rantikuyanqan qellayta rakiskir wakillantana apostolkunaman Ananías aparqan.
3Tsaymi Pedro nirqan: <<Ananías, ¿imanirtan Satanásta cäsur Espíritu Santuta llullaykätsinki? ¿Imanirtan wakin qellayta rakikuskir: <Kayllam chakräpa chanin> nikanki? 4Rantikuyanqayki chakra y qellaypis ¿manaku kikikikunapa kashqa? Tsaynö kaykaptinqa ¿imanirtan llullakushkanki? Manam runakunatatsu llullatsishkanki, sinöqa Dios Yayatam>>.
5Pedro tsaynö ninqanta wiyaykurmi jina höra Ananías wañuskirqan. Tsaynö wañunqanta musyaskirmi runakuna alläpa mantsakäyarqan. 6Ananíaspa ayantanam piturkur jövinkuna pampaq apayarqan.
7Tsaypita kimsa höratanömi Ananíaspa warmin Safira charqan. Payqa manam musyarqanraqtsu ollqun wañunqanta. 8Chaykuptinmi Pedro tapurqan: <<¿Rasunpaku ollquyki apamunqan qellayllachö chakraykikunata rantikuyashkanki?>>
Tsaymi Safirapis nirqan: <<Awmi, tsayllachömi rantikuyashkä>>.
9Pedrunam nirqan: <<Señornintsikpa Espïritun musyaykaptin ¿imanirtan llullakuyänaykipaq yachatsinakuyashkanki? ¡Rikay! Punkuchönam kaykäyan ollquykipa ayanta pampaq jövinkuna. Kananqa qamtanam apayäshunki>>.
10Tsaynö niykuptinmi Safirapis Pedrupa puntanman shikwaskir wañuskirqan. Tsayman jövinkuna yaykuskirmi wañushqa jitaraykaqta tariyarqan. Tsaymi paytapis ollqunpa lädunman apaykur pampayarqan. 11Ananíaswan Safira wañuyanqanta musyaskirmi Jesúsman creyikuqkunapis y mana creyikuqkunapis alläpa mantsakäyarqan.
Qeshyaqyashakunata apostolkuna kutikätsiyanqan
12Runakuna rikaykäyaptinmi apostolkuna atska milagrukunata rurayaq. Tsaynöllam Jesúsman llapan creyikuqkuna templuman aywar Salomónpa Coredornin niyanqanman qorikäyaq. 13Wakin kaq runakunam Jesúsman creyikuqkunata alli rikarpis paykunawan tallukayta mantsakuyarqan. 14Tsaynö kaptinpis Jesúsman creyikuqkunam warmipis ollqupis mas atskaqna kayarqan.
15Runakunanam qeshyaqyashakunata puñunantinta cällikunaman jipimur yarpäyarqan Pedro päsaptin llantunllapis jananman chaptin kutikänanpaq kanqanta. 16Cercan markakunapitam qeshyaqyashakunata y supayyuq runakunata aparkur runakuna Jerusalénman shayämuq. Tsay llapan apayanqan qeshyaqyashakunatam apostolkuna kutikätsiyarqan.
Apostolkunata autoridäkuna prësu apayanqan
17Mas mandakuq sacerdötiwan saduceukunam apostolkunata chikirnin 18prësu achkuskatsir carcelman qaykatsiyarqan. 19Qaykuraykäyaptinmi tsay paqas Dios Yaya kachamunqan ángel carcelpa punkunkunata kichaskirqan. Pedrutawan Juanta waqtaman jipiskirmi nirqan: 20<<Templupa patiunman aywar runakuna salvakäyänanpaq alli willakuyta willakuyay>>.#Juan 11.25; 14.6; Rom. 6.4.
21Tsaymi waränin alliq templupa patiunman apostolkuna yaykuskir runakunata willakuyarqan.
Tsayyaqmi yanapaqninkunawan mas mandakuq sacerdöti Sanedrín juezkunata y Israel runakunapa llapan autoridäninkunata sesionta rurayänanpaq qayatsiyarqan. Willanakuskirmi carcelpita apostolkunata jipiyämunanpaq wardiakunata kachayarqan. 22Wardiakuna carcelman chaykurmi apostolkunata tariyarqannatsu. Kutiskirnam niyarqan: 23<<Carcelpa punkun alli wichqaraykaqta y prësu cuidaqkunatapis punkukunachö ichiraykäyaqtam tariyashkä. Peru ruriman yaykuskirmi sïqa ni mayqan prësuta tariyashkätsu>>.
24Tsaynö niyaptinmi [mas mandakuq sacerdöti,] templuchö wardiakunapa capitannin y wakin mandakuq sacerdötikunapis yarpachakur niyarqan: <<¿Imanöpatan qeshpiyashqa? ¿Imaraq päsashqa?>>
25Tsaynö yarpachakur kaykäyaptinmi juk runa chaykur nirqan: <<¡Carcelman qaykatsiyanqayki runakunam templupa patiunchö yachatsikuykäyan!>>
26Tsaynö niptinmi wardiakunata pusharkur capitán aywarqan apostolkunata prësu apayänanpaq. Chaykurmi runakuna saqmayänanta mantsakur mana maqayllapa prësu apayarqan. 27Sanedrín juezkuna qorikashqa kaykaqman chaykatsiyaptinmi mas mandakuq sacerdöti apostolkunata nirqan: 28<<¿Manaku niyashkaq Jesúspa shutinchö manana yachatsikuyänaykipaq? Peru tsaynö nikäyaptiqpis Jesúspaq yachatsikuyanqaykitam entëru Jerusalénchö musyakaykan. Tsaynöllam culpatsaykäyämanki noqakuna Jesústa wañutsiyanqäta>>.#Mat. 27.25.
29Tsaymi Pedro y paqtan kaykaq apostolkuna niyarqan: <<Runakunata cäsuyanqäpa rantin Dios Yayatam cäsuyäshaq. 30Qamkuna Jesústa crucificar wañutsishqa kayaptikipis unay castantsikkuna creyikuyanqan Dios Yayam kawatsimushqa. 31Paymi mandamaqnintsik y salvamaqnintsik kaykan. Jutsantsikpita arrepentikur perdonashqa kanapaqmi derëcha kaq lädunman jamatsishqa. 32Tsaytam noqakunapis musyatsikuyä y Espíritu Santupis runakunata musyatsin. Payta cäsuqkunamanmi Espíritu Santuta Dios Yaya kachamushqa>>.
33Tsaynö niyanqanta wiyaykurmi autoridäkuna alläpa rabyar wañutsiyta munayarqan. 34Tsaymi llapan runakuna respitayanqan juk fariseo runa sharkur apostolkunata waqtaman sas jipiyänanpaq wardiakunata nirqan. Tsay fariseo runapa shutinmi Gamaliel karqan. Paymi Dios Yayapa leyninkunata alli yachatsikuq. 35Tsaynö jipiskatsirmi nirqan: <<Israel runakuna, kay runakunapa contran imatapis manaraq rurar shumaq yarpachakuyay. 36¿Yarpäyankiku ñawpata Teudas shutiyuq runa <mandakuqmi kä> nir purinqanta? Paytam chusku pachak (400) runakuna qatiräyarqan. Peru tsaynö puriykaqta wañuskatsiyaptinmi qatiraqninkuna wakpa kaypa witsikäyarqan. 37Tsaynöllam censakuy witsay Galileapita shamuq Judas yurimuptinpis atskaq qatiräyarqan. Paytapis wañuskatsiyaptinmi qatiraqninkuna wakpa kaypa witsikäyarqan. 38Tsaymi noqa niyaq: Kay runakunata mana cäsurnin dëjaykuyay. Kikinkunapa yarpayllankunapita willakuyaptinqa ushakanqam. 39Peru willakuyänanpaq Dios Yaya churashqa kaptinqa manam ni imanöpapis ushakätsiyankitsu. Ushakätsiyta munar cuidädutaq Diospa contran kaykäyankiman>>.
40Tsaymi Gamaliel ninqanta cäsur apostolkunata wañutsiyarqantsu. Tsaypa rantinmi qayaykatsir alli astatsiyarqan. Tsaypitanam Jesúspa shutinchö manana willakuyänanpaq albertiykur dëjayarqan. 41Dëjaskiyaptinmi apostolkuna Dios Yayata kushishqa alabar niyarqan: <<Kuyayämarmi qampa shutikichö willakuyanqäpita ñakayänäpaq permïtishkanki>>.
42Paykunam waran waran templupa patiunchö y wajikunachöpis runakunata yachatsir Jesús salvamaqnintsik Cristo kanqanta willakuyaq.
Currently Selected:
Hechos 5: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
