Hechos 7
7
Autoridäkunapa puntanchö Esteban parlanqan
1Tsaypitam Estebanta mas mandakuq sacerdöti tapurqan: <<¿Rasunpaku kay runakuna niyanqannö parlashkanki?>>
2Estebannam nirqan: <<Wawqikuna y taytakuna, wiyaykayämay. Unay castantsik Abraham manaraq Haránman aywakur Mesopotamiallachöraq täkuykaptinshi poderösu Dios Yaya yuripunaq. 3Tsaychö yuripuskirshi ninaq: <Markaykita y aylluykikunata dëjaskir rikätsinaqpaq sitiuman aywakuy>.#Gén. 12.1.
4<<Tsaynö niptinshi caldeo runakuna täkuyanqanpita yarquskir Harán markachöna Abraham täkunaq.#Gén. 11.31. Taytan wañukuskiptinnash Dios Yaya pushamunaq kanan täkunqantsikman.#Gén. 12.4. 5Kaychö täkuptin manash juk pedäzu chakrallatapis rikätsinaqtsu. Mana rikätsirpis tsurin manaraq kaptinshi Dios Yaya prometinaq täkunqan nacionta payta y paypita miraqkunata qarananpaq.#Gén. 12.7; 13.15; 15.18; 17.8. 6Tsaynöllash ninaq: <Qampita miraq aylluykikunam chusku pachak (400) wata juk markachö juklä runakunapa serviqnin kar ñakayanqa. 7Tsaynö kaptinpis tsay marka runakunatam castigashaq. Servikuq kayanqanpita yarqaskamurmi kay nacionchö serviyämanqa> >>.#Gén. 15.13-14.
8<<Tsaynö prometinqanta mana qonqananpaqshi Abrahamwan Dios Yaya pactuta rurar ninaq cuerpunchö señalakunanpaq y ollqu tsurinkuna yuriptin paykunapa cuerpunkunachöpis señalananpaq.#Gén. 17.10-14. Tsayshi tsurin Isaac yuriskiptin pusaq junaqyuq kaykaptin cuerpunchö señalanaq.#Gén. 21.2-4. Tsaynöllash Isaacpis tsurin Jacobta señalanaq y Jacobpis chunka ishkay tsurinkunata señalanaq. Tsay chunka ishkay tsurinkunapitam llapan Israel runakuna mirayashqa.
9<<Jacobpa tsurinkunanash wawqin Joséta chikir#Gén. 37.11. Egiptuman rantikuskiyänaq.#Gén. 37.28. Peru tsaynö kaykaptinpis Dios Yaya Joséta yanaparshi#Gén. 39.2, 21. 10imayka peligrupitapis salvanaq. Yachayyuq kananpaq yanapaptinshi Egipto nacionpa mandakuqnin Faraón payta churanaq palaciunchö aruqkunata mandananpaq y Egiptuchöpis mandäsinanpaq.#Gén. 41.39-41.
11<<Tsay witsayshi Egiptuchö y Canaánchöpis alläpa muchuy kaptin unay castantsikkuna mikuyänanpaq imapis kanaqtsu.#Gén. 42.1-2. 12Tsayshi Egiptuchö trïgu kanqanta musyaskir Jacobqa tsurinkunata trïguta rantiyämunanpaq kachanaq. 13Tsaypita trïgu rantiq yapay kutiyaptinshi wawqinkuna kanqanta José willanaq.#Gén. 45.1. Tsaynöpash Josépa wawqinkunata Faraónpis reqinaq.#Gén. 45.16. 14Tsaypitanash ayllunkunatawan taytan Jacobta Egiptuman José qayatsinaq.#Gén. 45.9-10, 17-18. Egiptuman chaqkunash qanchis chunka pitsqa (75) runakuna kayänaq.#Gén. 46.27. 15Tsaynöpash tsurinkunawan Egiptuman Jacob aywayänaq.#Gén. 46.1-7. Tsaychö täkuykarshi paypis y tsurinkunapis wañukuyänaq.#Gén. 49.33.
16<<Jacobpa y Josépa ayankunatanash tsakiskatsir Siquem markaman apayänaq.#Gén. 50.1-8; Éxo. 13.19; Jos. 24.32. Tsaychöshi Abraham rantinqan machayman pampayänaq. Tsay machaytash Hamor shutiyuq runapa tsurinkunapita rantinaq.#Gén. 23.3-10; 33.19; 50.12-13; Jos. 24.32.
17<<Abrahamta Dios Yaya prometinqanta cumplinanpaq tiempu chämuptinnash Israel runakuna Egiptuchö maytsikaqmanna mirayänaq. 18Tsay witsayshi juk runana Egiptuchö rey kananpaq yaykunaq. Payqa manash José pï kanqantapis musyanaqtsu.#Éxo. 1.7-8. 19Tsayshi unay castantsikkunata Faraón alläpa ñakatsir arutsinaq.#Éxo. 1.10-11. Castantsikkuna mirananta mana munarshi ollqu yuriq kaqkunataqa jitariyänanpaq ninaq.#Éxo. 1.22.
20<<Tsay witsayshi Moiséspis yurinaq. Payshi alläpa kuyakuypaq kanaq. Taytanwan mamanshi kimsa killayuq kanqanyaq wajillankunachö wätayänaq.#Éxo. 2.2. 21Tsaypitanash Faraón mandakunqanta cäsur wamra wañukunanpaq dëjaskiyänaq. Tsaytanash Faraónpa warmi tsurin qorikuskir kikinpa wawantanö qeshpitsikunaq.#Éxo. 2.3-10. 22Tsaychöshi Moisésqa Egipto runakuna estudiayanqanta yachakunaq. Alli yarpayyuq karshi imaykatapis alli ruranaq y alli parlanaq.
23<<Chusku chunka (40) watayuqna kaykarshi Israel majinkunaman watukaq aywayta yarpänaq. 24Tsaynö aywarshi Israel runata Egipto runa maqaykaqta tarinaq. Tsayshi Israel runapa janan shärir tsay Egipto runata wañuskatsinaq. 25Moisésshi yarpänaq: <Israel majïkunam tantiyayanqa ñakaykäyanqanpita jipinäpaq Dios Yaya kachamanqanta>. Peru tsaynö yarpaptinpis Israel majinkunaqa manash tantiyayänaqtsu.
26<<Egipto runata wañutsinqan waränin junaqshi Moisés tarinaq ishkaq Israel runakuna maqanakuykäyaqta. Tsayshi paykunata washar ninaq: <Qamkunaqa tsay castalla kaykar ¿imanirtan maqanakuykäyanki?> 27Tsayshi marka majinta maqaykaq runa Moisésta tanqaskir ninaq: <Qamta ¿pitan churashushkanki mandaqnïkuna y jueznïkuna kanaykipaq? 28¿Egipto runata qanyan wañutsinqaykinöku noqatapis wañutsimayta munanki?> 29Tsaynö niptinshi Madián partiman Moisés qeshpiskir#Éxo. 2.11-15. juklä runanölla tsaychö täkunaq. Tsaychö kaykaptinshi ishkay ollqu tsurinkuna yurinaq.#Éxo. 18.2-4.
30<<Madiánchö chusku chunka (40) watana täkuykarshi Sinaí jirka cercanman aywanaq. Tsay desiertuchöshi shiraka lunyaykaqchö juk ángel yuripunaq. 31Tsayta rikaykurshi alläpa mantsakänaq. Tsayshi mas shumaq rikänanpaq witiykaptin Dios Yaya ninaq: 32<Unay castaykikuna Abrahampa, Isaacpa y Jacobpa Diosninmi kä>. Tsayta wiyaykurshi Moisés karkaryarraq rikaytapis mantsakunaq. 33Tsayshi Dios Yaya ninaq: <Kay ichiraykanqayki patsaqa alläpa sagrädum. Tsaynö kaykaptinqa llanqikita jipiy. 34Noqam rikaykä kuyanqä runakuna Egiptuchö ñakayanqanta. Tsaychö waqayanqantam wiyaykä. Tsaymi paykunata jipimunäpaq shamushkä. Kananmi Egiptuman qamta kachashayki>.#Éxo. 3.1-10.
35<<Tsayshi lunyaykaq shirakachö ángel parlapaskiptin Moisésta Dios Yaya Egiptuman kachanaq. Israel majinkuna <¿pitan churashushkanki mandaqnïkuna y jueznïkuna kanaykipaq?> nikäyaptinshi Egiptupita jipimunanpaq y mandaqninkuna kananpaq kachanaq. 36Tsayshi Israel runakunata jipimur Egiptuchö,#Éxo. 7.3. Puka Lamarchö#Éxo. 14.21. y desiertuchöpis#Núm. 14.33. chusku chunka (40) wata milagrukunata y señalkunata Moisés ruranaq.
37<<Moisésshi Israel majinkunata ninaq: <Dios Yayam qamkunapita juk runata churanqa noqanö profëta kananpaq. [Payta cäsuyanki]>.#Deut. 18.15, 18. 38Unay castantsikkunawan desiertuchö Sinaí jirkaman Moisés witsaptinshi juk ángel parlapänaq.#Éxo. 19.1—20.17; Deut. 5.1-33. Tsaychöshi salvacionpaq willakuyta ángel willanaq noqantsikpis chaskinapaq.
39<<Peru tsaynö kaykaptinpis unay castantsikkunash Moisésta mana cäsurnin contran shärir Egiptuman kutikuyta munayänaq. 40Tsayshi Aarónta niyänaq: <Egiptupita jipimaqnintsik Moisésta ima päsanqantapis manam musyantsiktsu. Tsaynö kaykaptinqa nänichö yanapamänapaq dioskunata ruramuy>.#Éxo. 32.1. 41Tsaynö nirshi becërrunö ïduluta rurayänaq. Tsay rurayanqan ïduluta adorarshi sacrificiuta waykar fiestata kushishqa rurayänaq.#Éxo. 32.2-6.
42<<Tsaynö rurayanqanpitash qoyllurkunata, rupayta y killata adorayänanpaq Dios Yaya paykunata dëjaskinaq. Tsaynöllam profëtakuna qellqayanqanpis nin:
<< <Israel runakuna, chusku chunka (40) wata desiertupa purirpis manam noqapaqtsu wätakunata y tsaki mikuykunata waykayarqayki.
43Tsaypa rantinmi Moloc diosnikipaq rurayanqayki carpata puritsiyarqayki.
Refán diospa qoyllurnin rikuqtam adorayarqayki.
Tsaykunatam diosnikikuna kayänanpaq kikikikuna rurayarqayki.
Tsaynö kayanqaykipitam Babiloniapita mas karuman qarquyäshayki>.#Amós 5.25-27.
44<<Desiertuchöshi unay castantsikkuna Pactu Carpata puritsiyänaq. Rikätsinqannölla tsay carpata rurananpaqshi Dios Yaya Moisésta ninaq.#Éxo. 25.9, 40. 45Tsay carpantintash kay täkunqantsik nacionman paykunata Josué pushamunaq.#Jos. 3.14-17. Castantsikkuna chaykayämuptinshi kay markakunachö täkuq runakunata Dios Yaya qarqunaq. Tsaynöpash kay nación paykunapana kanaq.
<<Tsay carpash rey David kawanqan witsayyaq kay markantsikkunachö kanaq. 46Dios Yaya yanapaptinshi templutana ruratsiyta David munanaq Jacobpita miraqkuna#7.46 Jacobpita miraqkunam Israel runakuna kayan. Dios Yayata adorayänanpaq.#2Sam. 7.1-16; 1Crón. 17.1-14. 47Peru tsaynö yarpaptinpis tsurin Salomónraqshi tsay templuta ruratsinaq.#1Rey. 6.1-38; 2Crón. 3.1-17.
48<<Templuta Salomón ruratsishqa kaptinpis poderösu Dios Yaya manam runakuna rurayanqan templuchötsu täkun. Profëta qellqanqanchömi nin:
49<< <Ciëlum trönü.
Patsam chakï jarukunan.
Tsaynö kaykaptinqa ¿maychöraq wajï shäritsiyankiman?
¿Maychöraq jamaykunäpaq ruratsiyankiman?
50Ciëluta y patsatapis ¿manaku kikï kamashkä?> >>#Isa. 66.1-2.
51Mastam Esteban nirqan: <<Qamkunaqa ashnu rinrim kayanki. Shonquykikuna señalanni#7.51 Cuerpunta señalarmi penqayninpa punta qaranta roqur jipiyaq. Tsaynöllam shonqunkunata señalarqa jutsankunata dëjayan. kaptinmi mana cäsukuq kayanki. Unay castaykikunanöllam Espíritu Santupa contran imaypis kayanki.#Isa. 63.10. 52Llapan profëtakunatam ñakatsiyarqan. Jutsannaq runa#7.52 Tsay jutsannaq runam Jesucristo. shamunanpaq kanqanta willakuyaptinmi wañutsiyarqan. Qamkunapis paykunanölla karmi salvamaqnintsik runata wañutsiyänanpaq entregayashkanki. 53Leyninkunata angelkunawan Dios Yaya qaramashqapis manam cäsuyankitsu>>.
Estebanta wañutsiyanqan
54Esteban tsaynö ninqanta wiyaykurmi autoridäkuna kirunkunatapis requchyätsirraq alläpa rabyayarqan. 55Estebanqa Espíritu Santupa poderninchö karmi ciëlupa rikanqanchö chipakyaq poderösu Dios Yayapa derëcha kaq lädunchö Jesús kaykaqta rikarqan. 56Tsayta rikarmi nirqan: <<Ciëlu kicharaykämuqtam rikaykä. Dios Yayapa derëcha kaq lädunchömi Runapa Tsurin kaykämun>>.
57Tsaynö niptinmi autoridäkuna qayaykachar rinrinkunatapis tsapaskir jina höra Estebanta achkuskiyarqan. 58Tsaypitam markapita jukläman jipiskir alli saqmayarqan. Tsaynö saqmayänanpaqmi capötinkunata jipiskir Saulo shutiyuq jövinta paytakuyarqan.
59Saqmaykäyaptinmi Esteban mañakur nirqan: <<Tayta Jesús, ¡makikimanmi almalläta churaykamü!>>#Sal. 31.5; Luc. 23.46.
60Tsaypitanam qonqurikuykur jinchi nirqan: <<¡Taytay, kay saqmamaq runakunata perdonaykullay!>>
Tsaynö niskirmi wañuskirqan.#Luc. 23.34.
Currently Selected:
Hechos 7: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
