Lucas 14

Saksapäkushqa runata Jesús kutikätsinqan

1Tsaypitanam juk jamay junaqchö mandakuq fariseupa wajinman Jesús mikuq aywarqan. Tsaychö kaykaqkunanam Jesústa qawaraykäyarqan <<mä imatash ruranqa>> nirnin. 2Jesúspa puntanchönam jankat saksapäkuywan qeshyaqyasha runa kaykarqan. 3Jesúsnam ley yachatsikuqkunata y fariseukunata tapurqan: <<Qeshyaykaq runata jamay junaqchö ¿kutikätsishwanku o manaku?>>

4Peru paykunaqa upällallam kayarqan. Tsaymi qeshyaykaq runata Jesús yataykurnin kutikaskatsir nirqan: <<Kananqa wajikipa aywakuy>>.

5Tsaypitanam tsay runakunata nirqan: <<Mayqaykipapis wamraykikuna o buyisnikikuna pözuman jeqaskiptin jamay junaq kaykaptinpis ¿manaku jina höra jipiq aywayanki?>>#14.5 Tsaynö Jesús nirqan runakuna wamranta o buyisninta jamay junaq kaykaptinpis pözupita jipiyanqannö paypis qeshyaqyashakunata jamay junaqchö kutikätsinqantam.

6Tsaynö niptinmi ni ima niyta puëdiyarqantsu.

Punta puntaman mana jamakunapaq Jesús yachatsikunqan

7Invitanqan runakuna jamayänanpaq punta puntamanraq aywaqta rikaykurmi Jesús nirqan: 8<<Casamientuman invitayäshuptiki ama punta puntamanqa jamakuyankitsu. Talvezqa qamkunapita mas reqishqa runata invitashqa kanman. 9Tsaychö jamaykäyaptikim invitayäshuqniki niyäshunki: <Pay jamakunanpaq witikuy>. Tsaynö niyäshuptikim penqakurnin qepaman aywar jamakuyanki. 10Masbien fiestaman invitayäshuptikiqa qepaman jamakuyanki. Tsaymi invitashuqniki shamur niyäshunki: <Amïgu, mas puntaman jamakamuy>. Tsaynöpam mësachö qamwan jamaqkuna respitayäshunki. 11Allish tukuqkunam penqakushqa kayanqa. Peru qollmi shonqu kaqkunam sïqa mas reqishqa kayanqa>>.

Mikuyänanpaq pikunata invitanapaq Jesús ninqan

12Tsaypitanam invitaqnin fariseuta Jesús nirqan: <<Pitapis mikuyänaykipaq invitarqa ama mas reqishqa kaq amïguykikunallata, wawqikikunallata, aylluykikunallata ni kapuqyuq marka majikikunallataqa invitankitsu. Paykunallata invitaptikiqa rantintam qamtapis invitayäshunki. 13Tsaypa rantinqa invitanki waktsakunata, ratakunata, wishtukunata y qaprakunata. 14Paykuna mana kutitsiyäshuptikipis alli ruraq runakuna kawayämunqan junaqmi Dios Yaya kutitsishunki>>.

Mikuyänanpaq invitanqan runakunaman Jesús iwalatsinqan

Mateo 22.1-10

15Tsaymi mësachö Jesúswan jamaykaq juk runa nirqan: <<¡Alläpa kushishqach kayanqa Dios Yayapa mandakuyninchö mikuqkuna!>>

16Jesúsnam nirqan: <<Juk runash atskaq runakunata invitanaq wajinchö alli mikuykunata mikuyänanpaq. 17Meriendayänan höranash serviqninta kachanaq invitanqan runakunata ninanpaq: <Llapanpis listunam. Jina hörash aywakayällämunki>.

18<<Peru tsay invitanqan runakunash disculpata mañakuyänaq. Tsayshi jukaq ninaq: <Chakratam tsayraq rantishkä. Tsaymi chakra rikaq aywar shamuyta puëdillämütsu. Disculpaykallämätsun>.

19<<Jukaqnash ninaq: <Pitsqa yunta törukunatam rantishkä. Kananmi mansaq aywaykä. Disculpaykallamätsun>.

20<<Jukaqnash ninaq: <Tsayraqmi casarakushkä. Tsaymi shamuyta puëdillätsu>.

21<<Serviqnin kutiskirnash runakuna imanö niyanqanta patronninta willanaq. Patronninnash alläpa rabyashqa serviqninta ninaq: <Pläzakunapa y cällikunapa jina höra aywar waktsakunata, wishtukunata, ratakunata y qaprakunata pushamuy>.

22<<Ninqannölla rurarshi patronninta ninaq: <Taytay, mandamanqaykinöllam rurashkä, peru wajiqa jäkunraqmi>.

23<<Patronninnash ninaq: <Nänikunapa y chakrakunapa aywar tarinqayki runakunata wajï junta kayänanpaq imaykanöpapis pushamuy. 24Noqam niyaq: Puntata invitanqä kaqkunaqa mananam wajïchö mikuyanqanatsu> >>.

Discïpulun kananpaq Jesús yachatsikunqan

Mateo 10.37-38

25Maytsikaq runakuna qatiräyaptinmi Jesús nirqan: 26<<Pipis discïpulü kayta munarqa mamanta, taytanta, warminta, tsurinkunata, wawqinkunata, paninkunata y kikinpa kawayninta kuyanqanpita noqata mas kuyamätsun. Tsaynö mana kuyamarqa manam discïpulü kayanmantsu. 27Cruzninta apaqnö mana qatirämarqa#14.27 Cruzninta apaqnö mana qatirämar nirqa ima ñakaychö karpis Jesucristuta qatiränanpaq kanqantam nin. manam discïpulü kayanmantsu.#Mat. 10.38; Mar. 8.34; Luc. 9.23; Juan 12.25.

28<<Mayqaykipis wajita rurayänaykipaq shumaqraqmi yarpachakuyanki ushatsiyänaykipaq qellayniki paqtanqanta o mana paqtanqantapis. 29Cimientuta ruraskirlla dëjaskiyaptikiqa llapan rikaqkunam musyapäyäshurniki niyäshunki: 30<¡Kay runaqa wajita qallaykatsirlla manam ushatsiyta puëdishqatsu!>

31<<Maski juk rey jukpa contran guërrata rurananpaq aywatsun. Manaraq aywarmi yarpachakur nin: <Noqapa soldädükunaqa chunka waranqallam (10,000), peru chikimaqnïpaqa ishkay chunka waranqam (20,000). Tsay wallkaqlla soldädükunawan ¿vencishaqtsuraq?> 32Mana venciqnö karqa contran rey karullachöraq kaykaptinmi willakuqkunata mandanqa manana pelyayänanpaq. 33Tsaynöllam mayqaykipis imaykaykikunata noqa rayku mana dëjarqa discïpulü kayta puëdiyankitsu>>.

Kachiman Jesús iwalatsinqan

Mateo 5.13; Marcos 9.50

34<<Kachiqa allim. Peru qamyaskirqa manam imapaqpis välinnatsu. 35Allpapaq y wanupaqpis manana serviptinmi jitaskintsik. ¡Rinriyuq kaqkunaqa ninqäkunata wiyakuyätsun!>>

Currently Selected:

Lucas 14: qxn

Highlight

Copy