Lucas 13

Jutsankunapita arrepentikuyänanpaq Jesús ninqan

1Tsaypitanam runakuna Jesústa willar niyarqan: <<¡Galilea runakuna templuchö sacrificiuta waykaykäyaptinshi Pilato mandanqan soldädunkuna wañutsiyashqa!>>

2Tsayta willayaptinmi Jesús nirqan: <<¿Wakin Galilea runakunapita tsay wañuq runakuna mas jutsayuq kayanqantaku yarpäyanki? 3Noqam niyaq: Manam jutsayuq kayanqanpitatsu wañuyashqa. Peru qamkunam sïqa jutsaykikunata mana dëjar paykunanö wañuyanki. 4Tsaynömi Jerusalénchö Siloé törri juchur chunka pusaq runakunata qopiskirqan. ¿Jerusalénchö täkuq marka majinkunapita tsay wañuq runakuna mas jutsayuq kayanqantaku yarpäyanki? 5Noqam niyaq: Manam jutsayuq kayanqanpitatsu wañuyashqa. Peru qamkunam sïqa jutsaykikunata mana dëjar paykunanö wañuyanki>>.

Mana wayuq hïgusman Jesús iwalatsinqan

6Hïgusman iwalatsirmi Jesús nirqan: <<Juk runapash üva chakranchö hïgusnin kanaq. Tsayshi wayuyninta pallaq aywar ni jukllayllatapis tarinaqtsu. 7Tsaynash aruqninta ninaq: <Kimsa watana kay hïguspa wayuyninta pallaq shamurpis manam ni jukllayllatapis tarishkätsu. ¡Walluskiy! Mana wayuykarqa ¡imapaqnatan chakrächöpis kanqa!>

8<<Peru aruqninnash ninaq: <Taytay, mä kay watallana kaykutsun. Allpata kuyutsipaskirmi chapanman wanuta wiñäshaq. 9Tsaynö ruraptï wayurqa allim kanqa. Peru tsaychö mana wayuptinmi sïqa walluskir jitaskishaq> >>.#13.9 Israel runakunatam hïgus jachaman iwalatsir Jesús yachatsirqan.

Kurmu waqta warmita Jesús kutikätsinqan

10Jamay junaqnam sinagögachö Jesús yachatsikuykarqan. 11Tsaychömi supay kurmuyätsinqan warmi kaykarqan. Paymi imanöpapis derechakayta mana puëdir chunka pusaq watana kakurqan. 12Tsay warmita rikaykurmi Jesús qayaykur nirqan: <<Warmi, kutikashqanam kanki>>.

13Tsaynö nir yataykuptinmi tsay warmi jina höra derechakaskir Dios Yayata alabarqan.

14Peru jamay junaqchö Jesús kutikaskatsiptinmi sinagögachö mandakuq runa piñakurnin nirqan: <<Soqta junaqmi kaykan runakuna aruyänanpaq. Kutikayta munarqa tsay junaqkunachö shayämunkiman. ¡Imanirtan jamay junaqchöraq shayämunki!>>

15Jesúsnam nirqan: <<¡Allish tukuq runakuna! Jamay junaq kaptinpis ¿manaku buyisnikikunata y ashnuykikunata paskaskir yakütsiq apayanki? 16Kay warmiqa Abrahampita miraqmi. ¡Allaw! Chunka pusaq watanam Satanás ñakatsishqa. Tsaynö kaykaptinqa ¿manaku jamay junaqchöpis kutikätsïman?>>

17Tsaynö niptinmi chikiqninkuna penqakuyarqan. Peru wakin runakunanam sïqa Jesús mantsakaypaq ruranqankunata rikar alläpa kushikuyarqan.

Mostäza muruman Jesús iwalatsinqan

Mateo 13.31-32; Marcos 4.30-32

18Jesús mastam nirqan: <<Dios Yayapa mandakuyninta ¿imamanraq iwalatsïman? ¿Ima iwalatsikuywanraq tantiyatsïman? 19Dios Yayapa mandakuyninqa mostäza muruta juk runa chakranman murunqannömi. Jeqarkamur jatunyaptinmi rämankunachö pishqukunapis qeshunkuna rurayan>>.#13.19 Tsaynö nirmi Jesús nirqan: Ichik murullapita mostäza jeqarkamur wiñanqannömi Dios Yayapa willakuynin maytsaymanpis chanqa.

Levadüraman Jesús iwalatsinqan

Mateo 13.33

20Tsaynöllam yapay nirqan: <<Dios Yayapa mandakuyninta ¿imamanraq iwalatsïman? 21Tsayqa imayka levadüranömi. Tantata rurananpaq ishkay arröbanö jarinaman levadürata wiñaptinmi mäsa atskaman saksan>>.#13.21 Tsaynö nirmi Jesús nirqan: Ichiklla levadüra mäsata saksätsinqannömi Dios Yayapa mandakuyninpis maytsayman chanqa.

Kichki punkuman Jesús iwalatsinqan

Mateo 7.13-14, 21-23

22Tsaypitanam Jerusalénman Jesús aywar markakunapa y estanciakunapa päsar yachatsikurqan. 23Tsaychönam juk runa tapurqan: <<Taytay, ¿wallkaqllaku salvakuyanqa?>>

Jesúsnam nirqan: 24<<Imanöpapis kichki punkupa yaykuyay. Noqam niyaq: Atskaq yaykuyta munarpis manam puëdiyanqatsu. 25Wajiyuq runa punkunta wichqaskiptinmi waqtachö quëdaskir takakur niyanki: <¡Taytay, punkuta kichapaykayällämay!> Peru wajiyuqnam niyäshunki: <Qamkunata manam reqiyaqtsu. ¡Maypitaraq kayankipis!> 26Tsaymi niyanki: <Qamwanmi mikurqantsik y upyarqantsik. Markäkunachömi yachatsikurqaykipis>. 27Peru wajiyuqnam niyäshunki: <Qamkunata manam reqiyaqtsu. ¡Maypitaraq kayankipis! ¡Jutsasapa runakuna, puntäpita witikuyay!>

28<<Tsaynö niyäshuptikim alläpa waqar kiruykikunatapis requchyätsirraq ñakayanki. Tsay höram Abrahamta, Isaacta, Jacobta y profëtakunata Dios Yayapa mandakuyninchö kaykaqta rikäyanki. Qamkunam sïqa yaykuyta puëdiyankitsu. 29Maytsay nacionkunapita qorikaykurmi Dios Yayapa mandakuyninchö mikupakuyanqa.#Mat. 8.11. 30Tsay höram qepa kaqkuna puntachö kayanqa. Punta kaqkunanam qepachö kayanqa>>.

Jerusalén runakunapaq Jesús llakikur waqanqan

Mateo 23.37-39

31Tsay junaqmi fariseukuna Jesúsman chaykur niyarqan: <<¡Kaypita sas aywakuy! Herodesmi wañutsishuynikita munan>>.

32Jesúsnam nirqan: <<Tsay atuqta willayay: <Juk ishkay junaqllanash supaykunata runakunapita qarqunqa y qeshyaqyashakunatapis kutikätsinqa. Warantinllanash llapan rurananpaq kaqkunata cumplinqa. 33Imanö kaptinpis kay junaqkunash Jerusalénman aywanqa. Jerusalénpita juklächöqa profëtakuna manash wañuyanmantsu> >>.

34Tsaypitanam Jesús nirqan: <<¡Ay, Jerusalén, Jerusalén! Qammi Dios Yayapa profëtankunata unaypita wañutsinki.#1Rey. 19.10; Jer. 2.30. Pay kachamunqan willakuqkunatam saqmanki. Chipshankunata wallpa oqllaqnö wawaykikunata#13.34 Jerusalénpa wawankunaqa Jerusalénchö täkuq runakunam kayan. atska kuti qoriyta munaptïpis manam munashkankitsu. 35Tsaynö kanqaykipitam wajikikunapis templuykipis tsunyaraykar quëdanqa. Noqam niyaq: Manam yapay rikämankinatsu hasta <¡Dios Yayapa shutinchö shamuq runa alabashqa kaykullätsun!>#Sal. 118.26. ninqaykiyaq>>.

Currently Selected:

Lucas 13: qxn

Highlight

Copy