Lucas 2

Jesús yurinqan

Mateo 1.18-25

1Tsay witsaymi Augusto César willakatsirqan mandakunqan nacionkunachö llapan runakuna censakuyänanpaq. 2Tsay punta censutam rurayarqan Siria provinciachö Cirenio mandakuq gobernador kaykaptin. 3Llapan runakunam unay ayllunkunapa markankunaman censakuq aywayarqan.

4Unay ayllun rey David Belénchö yurishqa kaptinmi Josépis Galileachö Nazaretpita Judeachö Belénman censakuq aywarqan. 5Warmin kananpaq parlashqana karmi Maríatapis pusharqan. Maríaqa qeshyakunanpaqnam kaykarqan. 6Belénchö kaykäyaptinmi killan paqtaskiptin qeshyakunanpaq nanakurqan. 7Tsaychönam mayor wawanta qeshpikurqan. Qorpakuna patsakuyänan cuartuchö posäda mana kaptinmi inchanawan piturkur wätakunapa mikukuyänanllaman puñuykatsirqan.#2.7 Tsay witsaymi wajikuna ishkay cuartuyuqlla karqan. Juk cuartum karqan qorpakunata patsatsiyänanpaq y jukaq cuartunam karqan wajiyuqkuna castankunawan puñuyänanpaq. Wajiyuqpa cuartunpa jukaqläninchömi wätankuna mikuyänanpis karqan. Tsaymanmi nïñu Jesústa puñuykatsirqan.

Üsha mitsikuqkunata angelkuna yuripunqan

8Tsay paqasmi Belénpa washaläninchö mitsikuq runakuna üshankunata täpaykäyarqan. 9Tsaymanmi illaqpita ángel yuriskir Dios Yayapa poderninwan imayka illaqunöraq atsikyaykurqan. Tsayta rikaykurmi üshata täpakuqkuna mantsakäyarqan. 10Angelnam nirqan: <<Ama mantsakäyaytsu. Llapan runakuna kushikuyänanpaqmi alli willakuyta apamushkä. 11Kananmi rey Davidpa markanchö juk salvador yurishqa. ¡Payqa Señornintsik Cristum! 12Kay willayanqaq rasunpa kanqanta musyayänaykipaq kanan aywarmi wätakunapa mikukuyänanchö inchanawan pitushqa ujuraykaqta llullu wamrata tariyanki>>.

13Ángel tsaynö nikaptinnam maytsikaq angelkuna yuriskir Dios Yayata alabarnin niyarqan:

14<<¡Ciëluchö kaqkuna Dios Yayata alabaykuyällätsun!

¡Kay patsachöpis Dios Yaya kuyanqan kaqkuna alli päsakuychö kaykuyällätsun!>>

15Angelkuna ciëluman kutiskiyaptinnam mitsikuqkuna juknin juknin ninakuyarqan: <<Dios Yaya willatsimanqantsiknö aku Belénman aywar rikämushun>>.

16Tsaynö nirmi saslla aywar Josétawan Maríata y llullu wamrata tariyarqan. Wamranam wätakunapa mikukuyänanchö puñuykarqan. 17Tsayta rikaykurnam llullupaq ángel ninqanta willakuyarqan. 18Willakuyaptinmi llapan wiyaqkuna kushikuyarqan. 19Maríanam shonqullanchö llapanta yarpachakurqan. 20Ángel willakunqannölla llapanta tariskirmi mitsikuqkuna rikäyanqanpita y wiyayanqanpita Dios Yayata alabarnin kutikuyarqan.

Nïñu Jesústa templuman apayanqan

21Wamra semänayuqna kaykaptinmi penqayninchö señalatsiyarqan. María manaraq qeshyaq kaptin ángel yuripur ninqannöllam shutin churayarqan Jesústa.

22 Moisés qellqanqan leykunachö ninqannöllam María qeshyakunqanpita purificakunan junaq chäramuptin#Lev. 12.2-8. Dios Yayata entregayänanpaq Joséwan María Jerusalén templuman llullu wamrata apayarqan. 23Tsaynö apayänanpaqmi Diospa leynin qellqashqachö nin: <<Mayor kaq ollqu tsurikim Dios Yayapaq kanqa>>.#Éxo. 13.2, 12-13; Núm. 3.11-13, 45-47; 18.15-16.

24Tsaynöllam Diospa leynin qellqashqachö nin: <<Ishkay kullkushkunata o ishkay llullu palumakunata apamunqa>>.#Lev. 12.8. Tsaytapis cumpliyänanpaqmi templuman aywayarqan.

25Tsay witsaymi Jerusalénchö Simeón shutiyuq runa täkurqan. Paymi Dios Yayata alläpa kuyaq alli runa karqan. Tsaynöllam Israel runakuna ñakayanqanpita Cristo jipinanpaq kanqanta shuyararqan. Payqa Espíritu Santupa poderninwanmi karqan. 26Jukpunnam Espíritu Santu musyatsir nirqan Dios Yaya kachamunqan Cristuta rikarraq wañukunanpaq kanqanta. 27Tsaynö tantiyatsiptinmi templuman Simeón aywarqan. Tsaymannam Joséwan María ley ninqankunata cumpliyänanpaq nïñu Jesústa chätsiyarqan. 28Simeónnam llullu wamrata marqarkur Dios Yayata alabar nirqan:

29<<Dios Yayallä, änillämanqaykitam cumplirquyki.

Kananmi sïqa kushishqana wañukulläshaq.

30Kachamunqayki salvadortam rikarqüna.

31Paytam kachamushkanki maytsaychö täkuq runakunata salvanaykipaq.

32Mana Israel runakunapaqpis aktsim kanqa.

Pay raykum kuyanqayki Israel runakunapis reqishqa kayanqa>>.

33Simeón ninqanta wiyarmi Joséwan María kushikuyarqan. 34Simeónnam Dios Yayata mañakurqan bendicionninta paykunaman churananpaq. Jesúspa maman Maríatanam nirqan: <<Kay wawayki raykum wakin Israel runakuna condenakäyanqa y wakinnam salvakashqa kayanqa. Paytaqa atskaq runakunam chikiyanqa. 35Tsaynöpam runakuna allita o mana allita yarpäyanqanpis musyakanqa. Wawayki raykum sufrinki cutsilluwan shonquykita tuksiyämuptin nanatsikuqnöraq>>.

36Templupa patiunchömi Diospa profëtan Ana shutiyuq chakwanpis kaykarqan. Paypa taytanmi Aser trïbupita Fanuel karqan. Payqa qanchis watallam ollqunwan täkuyarqan. 37Ollqun wañuskiptinmi pusaq chunka chusku (84) watana japallan täkurqan. Templupa patiunpita mana yarqukurmi paqasta junaqta ayunarnin Dios Yayata mañakuq. 38Simeón mañakur ushaskiptinmi Anapis Jesúsman witiykur Dios Yayata agradëcikurqan. Tsaypitanam Dios Yaya kachamunqan Cristuta shuyaraykaq runakunata nirqan: <<Kay llullu wamram salvamänapaq shuyaranqantsik>>.

39Dios Yayapa leyninchö mandakunqankunata cumpliskirnam Joséwan María Galileachö Nazaret markankunaman kutikuyarqan. 40Dios Yaya yanapaptinmi nïñu Jesús wiñarnin alläpa yachayyuq y kallpayuq tikrarqan.

Templuchö Jesústa tariyanqan

41Wata watam Jesúspa taytanwan maman Pascua fiestata päsaq Jerusalénman aywayaq. 42Jesús chunka ishkay watayuq kaykaptinmi Israel runakunapa costumbrinkunamannö Pascua fiestaman aywayarqan. 43Fiesta ushakaskiptinnam Joséwan María markankunapa kutikuyarqan. Jesúsnam mana musyayanqanyaq Jerusalénchö quëdaskinaq. 44Paykunaqa runakunawan Jesús aywaykanqantam yarpäyarqan. Juk junaq qoyat aywaykarmi pullan nänichö Jesústa watukaskir ayllunkunatawan reqishankunata tapupakur ashiyarqan. 45Mana tarirnam Jerusalénman ashiq kutiyarqan.

46Kimsa junaq ashiyanqanchöraqmi templuchö kaykaqta Jesústa tariyarqan. Tsaychömi ley yachatsikuqkunawan tapunakur jamaykarqan. 47Jesús alli yachayyuq kar tapuyanqankunata contestaptinmi wiyaqnin runakunapis mantsakäyarqan. 48Tsaychö rikaykurnam taytanwan maman mantsakäyarqan. Mamannam nirqan: <<Ä wawa, ¿imanirtan kaychö quëdarquyki? Alläpa llakishqam ashiyashkaq>>.

49Jesúsnam nirqan: <<¿Imanirtan ashiyämarquyki? ¿Manaku musyayanki Taytäpa wajinchö kanäpaq kanqanta?>>

50Peru paykunaqa imapaq ninqantapis manam tantiyayarqantsu.

51Tsaypitanam paykunawan Nazaretman kutikur llapan mandayanqankunata rurarqan. Mamannam shonqunllachö llapan päsanqankunata yarpachakurqan. 52Jesús wiñar alli yachayyuq kaptinmi Dios Yaya y runakunapis kushikuyarqan.

Currently Selected:

Lucas 2: qxn

Highlight

Copy