Lucas 3
3
Bautizaq Juan yachatsikunqan
Mateo 3.1-12; Marcos 1.1-8; Juan 1.19-28
1-2Tiberio César chunka pitsqa watana Romachö mandakuq rey kaykaptinmi tsunyakunachö Zacaríaspa tsurin Juanta Dios Yaya willakuyninta revelarqan. Tsay witsaymi Judeachö Poncio Pilato gobernador karqan. Galileachönam Herodes mandakuq karqan. Iturea y Traconite provinciakunachönam Herodespa wawqin Felipe mandakuq karqan. Abilinia provinciachönam Lisanias mandakuq karqan. Jerusalénchönam Anáswan Caifás mas mandakuq sacerdötikuna kayarqan.
3Tsaymi Jordán mayu kuchun markakunapa purir Juan willakur nirqan: <<Dios Yaya perdonayäshunaykipaq jutsaykikunapita arrepentikur bautizakuyay>>.
4Tsaynö Juan willakunanpaqmi Dios Yayapa profëtan Isaías qellqanqanchö nin:
<<Juk runam desiertuchö qayakuypa willakur nin:
<Dios Yaya shamunanpaq nänita allitsayay.
Wiksu nänikunata derechayay.
5Raqrakunatapis pampatsäyay.
Lömakunatapis parijayay.
Wiksu wiksu nänikunatapis derechayay.
Uchku uchkukunatapis pampatsäyay.
6Dios Yaya poderninwan salvanqantam maytsaychö täkuq runakuna rikäyanqa> >>.#Isa. 40.3-5.
7Tsay witsaymi atskaq runakuna bautizakuyänanpaq Juanman aywayarqan. Paykunatam Juan nirqan: <<¡Culebra casta runakuna! ¡Pitan qamkunata niyäshushkanki Dios Yayapa castïgunpita qeshpiyänaykipaq kanqanta! 8Jutsaykikunapita rasunpa arrepentikushqa karqa Dios Yaya munanqannöna kawayay. Ama yarpäyaytsu Abrahampa ayllun kayanqaykipita Dios Yaya salvayäshunaykipaq kanqanta. Noqam niyaq: Dios Yaya munarqa kay rumikunatapis Abrahampa ayllunmanmi tikratsinman. 9Mana wayuq jachata chapapita walluskir ninaman jitaykuqnömi jutsa ruraqkunata castigananpaq Dios Yaya listu kaykan>>.
10Tsaynam runakuna tapur niyarqan: <<Tsaynö kaptinqa ¿imatatan rurayäshaq?>>
11Juannam nirqan: <<Ishkay llatapaykikuna kaptinqa jukaqta llatapannaq kaqta qaraykuyay. Tsaynölla mikuyninkuna faltapukuqkunata qaraykuyay>>.
12Tsaynöllam impuestu cobraqkunapis bautizakuyänanpaq chaykur tapuyarqan: <<Rabí, noqakunaqa ¿imatatan rurayäshaq?>>
13Juannam nirqan: <<Cobrayänaykipaq kaqpita mastaqa ama cobrayankitsu>>.
14Tsaynöllam soldädukunapis tapuyarqan: <<Noqakunaqa ¿imatatan rurayäshaq?>>
Paykunatanam nirqan: <<Ama runakunapa imankunatapis qechuyankitsu ni manakaqta tumpayankitsu. Pägayäshunqaykillawan conformakuyanki>>.
15Tsayta wiyarmi runakuna yarpachakur niyarqan: <<¿Juantsuraq Dios Yaya kachamunqan Cristo?>>
16Tsaynö niyanqanta musyarmi Juan nirqan: <<Noqaqa yakullawanmi bautizayaq. Peru jukmi noqapita mas poderyuq shamunqa. Manam noqaqa paypa llanqinpa watunta paskanällapaqpis välïtsu. Paymi Espíritu Santuwan y ninawan bautizayäshunki. 17Trïguta wayränanpaqmi jurquïtan aptashqa kaykan. Wayraskirmi trïguta wajinman churanqa. Päjantanam imaypis mana wañuq ninaman jitaykunqa>>.
18Tsaynö yachatsikurmi Dios Yayapa alli willakuyninta tukuyläyapa tantiyatsirqan. 19Tsaypitanam mandakuq Herodesta piñaparqan wawqin Felipipa warmin Herodíaswan täkunqanpita y llutankunata ruranqanpita. 20Tsaynö ninqanpitam mas peorraq mana allita rurarnin carcelman Juanta Herodes qaykatsirqan.
Jesústa Juan bautizanqan
Mateo 3.13-17; Marcos 1.9-11
21Runakunata Juan bautizaykaptinmi Jesúspis bautizakurqan. Bautizakur Dios Yayaman mañakuykaptinmi ciëlu kichakaskamuptin 22Jesúsman Espíritu Santu imayka palumanö urämurqan. Tsay höram ciëlupita Dios Yaya nimurqan: <<Qammi kuyay tsurï kanki. Qampitam kushikü>>.
Jesúspa unay ayllunkuna
Mateo 1.1-17
23Jesús kimsa chunka watayuqnö kaykarmi Dios Yayapa alli willakuyninta willakur qallaykurqan. Paypaqmi Josépa tsurin kanqanta runakuna yarpäyarqan.
Josémi Elípa tsurin.
24Elími Matatpa tsurin.
Matatmi Levípa tsurin.
Levími Melquipa tsurin.
Melquim Janapa tsurin.
Janam Josépa tsurin.
25Josémi Matatíaspa tsurin.
Matatíasmi Amóspa tsurin.
Amósmi Nahúmpa tsurin.
Nahúmmi Eslipa tsurin.
Eslim Nagaipa tsurin.
26Nagaim Maatpa tsurin.
Maatmi Matatíaspa tsurin.
Matatíasmi Semeipa tsurin.
Semeim Josépa tsurin.
Josémiqa Joiadapa tsurin.
27Joiadam Joanapa tsurin.
Joanam Resapa tsurin.
Resam Zorobabelpa tsurin.
Zorobabelmi Salatielpa tsurin.
Salatielmi Neripa tsurin.
28Nerim Melquipa tsurin.
Melquim Adipa tsurin.
Adim Cosampa tsurin.
Cosammi Elmodampa tsurin.
Elmodammi Erpa tsurin.
29Ermi Josuépa tsurin.
Josuémi Eliezerpa tsurin.
Eliezermi Jorimpa tsurin.
Jorimmi Matatpa tsurin.
30Matatmi Levípa tsurin.
Levími Simeónpa tsurin.
Simeónmi Judápa tsurin.
Judámi Josépa tsurin.
Josémi Jonánpa tsurin.
Jonánmi Eliaquimpa tsurin.
31Eliaquimmi Meleapa tsurin.
Meleam Mainánpa tsurin.
Mainánmi Matatapa tsurin.
Matatam Natánpa tsurin.
32Natánmi Davidpa tsurin.
Davidmi Isaípa#3.32 Wakin traduccionkunachöqa Jesépa niyanmi. tsurin.
Isaími Obedpa tsurin.
Obedmi Boozpa tsurin.
Boozmi Salapa tsurin.
Salam Naasónpa tsurin.
33Naasónmi Aminadabpa tsurin.
Aminadabmi Admínpa tsurin.
Admínmi Arnípa tsurin.
Arními Esrompa tsurin.
Esrommi Farespa tsurin.
Faresmi Judápa tsurin.
34Judámi Jacobpa tsurin.
Jacobmi Isaacpa tsurin.
Isaacmi Abrahampa tsurin.
Abrahammi Tarépa#3.34 Wakin traduccionkunachöqa Térahpa niyanmi. tsurin.
Tarémi Nacorpa tsurin.
35Nacormi Serugpa tsurin.
Serugmi Ragaupa tsurin.
Ragaum Pelegpa tsurin.
Pelegmi Heberpa tsurin.
Hebermi Salapa tsurin.
36Salam Cainánpa tsurin.
Cainán Arfaxadpa tsurin.
Arfaxadmi Sempa tsurin.
Semmi Noépa tsurin.
Noémi Lamecpa tsurin.
37Lamecmi Matusalénpa tsurin.
Matusalénmi Enocpa tsurin.
Enocmi Jaredpa tsurin.
Jaredmi Mahalaleelpa tsurin.
Mahalaleelmi Cainánpa tsurin.
38Cainánmi Enóspa tsurin.
Enósmi Setpa tsurin.
Setmi Adánpa tsurin.
Adánmi Dios Yayapa tsurin.
Currently Selected:
Lucas 3: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
