Matiyu 17
17
1Penūri dan sū sūkrĭmmesikĭ Iesū yivī Piter, ĭm Yakōbō, ĭm Yōane, avensĭ eni, memtōrora irorago, memsah ra numpūo tantop, miyi yesumpoli ūnĭmĭnda, 2nĭpmi eni yemeselĭ sugkū nĭpminen, ĭm nemas eni omwisū yetekosebo sugkū nilara; 3ĭm Mōses ĭm Elīya dūmūvelum mūmūtampi dal iyi. 4Im Piter yemtamsi memenūwi pugi Iesū memokū, Aremĭ kos ilete ĭgko; nagkū kemagkū kakelenumpi ĭgko ūvrok endesel, sĭ nĭsekom, Im sĭ nĭsekon Mōses, ĭm sĭ nĭsekom, Elĭya. 5Im polekū iyi yemenūwi sĭ numpūaū nempes yemtenĭsevora, ĭm sĭ navian yemne marugi numpūaū memenūwi memokū, Imo Netūg paū ya umampekotekat ugi iyi; 6Mōvun nūrie dūmūrĭgi mūmokolugi nimĭnda ra nemap mūmūmtetugi tamas. 7Im Iesū yivelum memsugkorora memenūwi memokū, Utūok, mūtūmtetugi; 8Mirora dūmūlasah mōmū dūtokesi sĭ, Iesū wokon.
9Im pol sugkū irora dūmyep ra numpūo Iesū yemwalivat ūnōwanda memokū, Utūtampĭgi pugi sĭ, nokesi mori afeli nempugon Netni eni neteme ōmamsorasah marugi nemas. 10Mōvun nūrie eni dūmūtagkeli iyi mūmōkū, Mōvun Somūl ūmanūwi mūmagkū Elĭya ampūm mampelum irantie? 11Im Iesū yemtamsi memenūwi punora memokū, Itnesog, Elīya umampūm memampitorĭleki tiamesū. 12Kō ya umanūwi pugkūm memagkū, Elīya okevelum mirora dūtūkili iyi, mirora dūmumpi iran sugkū irora dūmakĭugi; 13ĭm irora wonumpi nesorū sugkū iran Netni eni neteme. Mōvun nūrie mori dūmokili ma iyi yemenūwi punora memokū ugi Yōane baptiso.
14Im pol sugkū irora dūmūvelum punora ōvun numpūn lō, sī neteme yivelum pugi memsumpūneteren iran memenūwi memokū, Narisah, 15togesoveli iran netūg ĭtnate-man, ĭt iyi nemelū, mumneĭĭleki iran tamas; iyi umandūnomol ra nōm ĭm ra nū; 16ĭm ya otōri iyi punora ōvun nūrie enugkĭk, mirora tawi faneteme worumpi iyi hōrĭgives. 17Im Iesū yetamsi memenūwi memokū, Ah, palsi ūtūmuntavniri mūtūmuntarūves, ya antendōwi dal kĭmi afeli nempugon nĭgoi? 18ya antendōwi nomolsep ugi kĭmi afeli nempugon nĭgoi ĭ Tōri iyi ĭgko po yaū. Im Iesū yemenūamwūs pugi naviatĭndi miyi yemōwi iyi: marimago avunyan yemeti hōrĭgives.
19Mōvun nūrie mori dūmūvelum pugi Iesū, irorago, mūmūtagkeli mūmōkū, Irasie kam tawi faneteme woretevĭleguni? 20Im Iesū yemenūwi punora memokū, Popōwo tawi tavniri enugkĭmi; ĭt ĭtnesog ya umanūwi pugkūm memagkū, Nagkū tavniri enugkĭmi sugkū sĭ novsen mustar, kĭmi kwanūwi pugi imo numpūo magkū, Eve pelah ra nūrū sī miyi ampe; ĭm kĭmi kwanti horog worumpi tiamesū. 21Kō sugkū imo mori umampe ratilat ugi nufwaki ĭmnetevokom wokon.
22Im polekū irora dūmetendōwi Kalĭli Iesu yōmenūwi memokū, Wonempirĭgi Netni eni neteme ūnokovenda ōveteme; 23mirora wontalugi iyi, ĭm ran dan deselugi iyi ōmamsorasah; mirora dūmūrĭgi sat tamas ugi. 24Im pol sugkū irora dūmūvelum ra Kapernaum, ōveteme mori dūmalekon haf sikel mori, dūmūvelum pugi Piter mūmūtagkeli mūmōkū, Tavsogi enugkĭmi umampugi muni mori kū? 25Miyi yemenūwi memokū, Monokowo. Im pol sugkū iyi yivelum ūnisog nimo, Iesū yōbūm memtagkeli iyi memokū, Sĭmon, kĭk emagkū ōvun natemonok umampĭ muni mori marugi mē e mē? marokonda ōvun netnime enirora, kū marokonda ōvun dōmō? 26Piter yemtamsi memenūwi pugi memokū, Marokonda ōvun dōmō. Iesū yōmenūwi pugi memokū, 27Im ūmosūlora ōvun netnime: Kō ma kos kūtūonumpi irora malokoi pugkos, eve wun tok, movkisep kĭlekĭl ĭm tī sĭ nomū mori ampūm mampelum, ĭm pol sugkū konaveran agesi sī muni, kampī mōvunora tovun yaū ĭm tovunok.
Currently Selected:
Matiyu 17: ERGNT79
Highlight
Share
Copy
Want to have your highlights saved across all your devices? Sign up or sign in
Erromangan New Testament © British and Foreign Bible Society, 1909,1979.
