Luka 23
23
Anɔ na Yezo ka gbɛlɛ Pilato
(Mat. 27.1-2,11-14; Mar. 15.1-5; Yoa. 18.28-38)
1Azi zu alonga ndozu, amu Yezo anɔ na lo ka gbɛlɛ Pilato. 2Ala vɔ̃ to tɛrɛ lo ya: “E tã kɔli olo so ndosa siɔ wangɔ na bɛ azi ti sese tɛ e. Lo pa hɛ̃ la ya, ta ala futa lapo hɛ̃ kota gbia ti Roma ma, ko lo ndomu nga tɛrɛ lo ya, ni nvɛni ni Kristo, ni kota gbia.” 3La Pilato ahũnda Yezo ya: “Mɔ kota gbia tɛ Ayuda?” Yezo agbia hɛ̃ lo ya: “Tɛnɛ ni la mɔ tɛnɛ.” 4La Pilato apa hɛ̃ agbia tɛ awa lungɔ Nzapa na ye, na azi ko butu butu ya: “Ta mbi hũ tɛ mbi nda fangɔ ngbanga, bingɔ li kɔli olo ma.” 5Ala ti tɛnɛ na nguru ya: “Eó mɛ lo ndoha na azi ti kɔdɔrɔ ko, andoto la ya, ala tɔmbɔkɔ. Ko lo to nda hangɔ azi na lo ni ka sese ti Galilea, lo ɔ ti sese ti Yudea zu, ko na olo ko, lo si nga ge kɔdɔrɔ tɛ e.”
Anɔ na Yezo ka gbɛlɛ Erodɛ
6Pilato ĩ ma tɛnɛ ko ala tɛnɛ ko, lo hũnda la ya: “Kɔli olo wa Galilea?” 7Ala yeka da. Ko ngoi mɛ Pilato ĩ hĩnga ya, Yezo alo ka sese mɛ Erodɛ ndole gbia da ko, lo to Yezo ka tɛ Erodɛ. Erodɛ aga nga ka Yeruzalɛmɛ na ngoi ni ko. 8Ngoi mɛ Erodɛ ĩ hũ Yezo ko, bɛ lo ade zɔgɔrɔ. Ta sanga ma, lo ma ndo pa tɛ Yezo, lo ya ndo separangɔ gã ya, ni hũ Yezo. Lo ndosepara nga ndo ya, Yezo ali ye ti kpɛnɛ kɔi ni hũ na lɛ ni. 9La Erodɛ ahũnda Yezo na ndo ma wo ma, ko ta Yezo agbinya tɛnɛ kɔi hɛ̃ lo ma. 10Agbia tɛ awa lungɔ Nzapa na ye, na awa hangɔ ndia ndo so ndo ko, ko ala vɔ̃ to tɛrɛ Yezo na kpengba tɛnɛ. 11Erodɛ na aturugu tɛ lo abuba lo, asamana na lo. Ala yu lo na bɔngɔ mɛ adɛ̃ ma wo ma, la ala ti mu lo, adiri na lo ka tɛ Pilato. 12Bo na lá ko ndo la Erodɛ na Pilato ato nda yengbingɔ. Ndo uzu ko, ala kɛ̃ngbi ndo sĩ.
Afa ngbanga li Yezo ya aho lo
(Mat. 27.15-26; Mar. 15.6-15; Yoa. 18.39—19.16)
13Pilato abombi agbia tɛ awa lungɔ Nzapa na ye, na akota azi ti kɔdɔrɔ, nga na azi ti kɔdɔrɔ, 14apa hɛ̃ la ya: “Ĩ ga na kɔli olo ge tɛ mbi, ko ĩ pa hɛ̃ mbi ya, lo ndogbɛ̃ ya li awa kɔdɔrɔ ya, ala tɔmbɔkɔ. Mbi hũnda lo na ndo so gbɛlɛ ĩ, ko na ndo alo zu mɛ ĩ vɔ̃ na to tɛrɛ lo na lo ni ko, mbi hũ ya, ta lo li siɔ ye kɔi ma. 15Ta Erodɛ alua nga ndo lo na siɔ ye kɔi ma, nda mɛ ndo lo diri lo to lo hɛ̃ e la. Adu yango ya, ta kɔli olo ali siɔ ye mɛ alengbi ti hongɔ lo na lo ni ma. 16Mbi na hɛ̃ngɔ nyɔ ya, asɔ̃ lo na fimbo, so pɛni, wa mbi zi lo.” [ 17Na ngoi yenga kɔi kɔi ti Lipandasi tɛ Ayuda ko, Pilato ndozi hɛ̃ Ayuda wa bɔlɔkɔ kɔi.] 18La ala zu adɛrɛ kɔngɔ ngoi kɔi ya: “Aho kɔli olo, ko mɔ zi Barabasi hɛ̃ e!” 19Abi ndo Barabasi bɔlɔkɔ, na lo mɛ ya, lo wa ndo azi ti kɔdɔrɔ ala tɔmbɔkɔ, nga na lo mɛ ya, lo ho ndo zo. 20Pilato atɛnɛ tɛnɛ fani mɛ ndɛ̃ hɛ̃ azi butu butu, na lo mɛ ya, lo separa zingɔ Yezo. 21La ala gbinya hɛ̃ lo na kɔngɔ ya: “Agɔngɔ lo ndo krusi! Agɔngɔ lo ndo krusi!” 22Pilato ati hũnda la ti fani ta ya: “Siɔ ye mɛ lo li nɛ? Ta mbi lua lo na siɔ ye kɔi mɛ alengbi ti hongɔ lo na lo ni ma. Mbi na hɛ̃ngɔ nyɔ ya, asɔ̃ lo na fimbo, so pɛni, wa mbi zi lo.” 23Ko ala baba bo hũndangɔ Pilato na kɔngɔ kpengbani ya: “Agɔngɔ lo ndo krusi!” Ko na lo ti kɔngɔ mɛ ndo ala dɛrɛ kpengbani sĩ, 24la Pilato aye ya, ni li hɛ̃ la ye mɛ ala hũnda. 25La lo zi Barabasi mɛ ndo abi lo bɔlɔkɔ, na lo mɛ ya, lo wa ndo azi, ala tɔmbɔkɔ, nga na lo mɛ ya, lo ho ndo zo. So pɛni, Pilato adiri na Yezo hɛ̃ la ya, ala li lo na ye mɛ bɛ la aye.
Agɔngɔ Yezo ndo krusi
(Mat. 27.32-44; Mar. 15.21-32; Yoa. 19.17-27)
26Ngoi mɛ ala so ndogwe na Yezo ko, ala tengbi na kɔli kɔi mɛ alo ka yaka so ndoga. Ili lo Simɔ, lo wa kɔdɔrɔ ti Sirɛnɛ. Ala gbɔ̃ lo, aya krusi ni, akpa ndo gɔ̃ lo ya, lo yɔ, lo nɔ na ni ndali Yezo.
27Azi ti kɔdɔrɔ butu butu anɔ ndali Yezo. Awe anɔ nga ndali lo, ala so ndoto to, so ndodema so lo. 28Yezo ĩ ma la so ndoto to ko, lo sana tɛrɛ lo ka tɛ la, lo pa hɛ̃ la ya: “Ĩ awe ti Yeruzalɛmɛ, ta ĩ to so mbi ma! Ĩ to so tɛrɛ ĩ, nga so aya ĩ! 29Ta sanga ma, na mbanga ngoi kɔi gbanda ko, azi apa gbanda ya: ‘Dengɔ bɛ ati na ata ngombo, na awe mɛ ta adu nyi bɛ gbɔ ma, nga na ala mɛ ta ayangambi aã la bɛ gbɔ ma!’ 30Na ngoi ni ko gbanda ko, azi apa gbanda hɛ̃ ahɔtɔ ya: ‘Ĩ sa ndo e!’ Ala pa nga gbanda hɛ̃ alita ya: ‘Ĩ vĩ e!’ 31Ta sanga ma, singa na mbi mɛ nga ma fĩ kɛkɛ, ala li mbi so, o singa na ĩ mɛ nga ma akuru kɛkɛ ma!”
32Anɔ nga na akɔli sɛ mɛ awa lingɔ siɔ ye, ya abombi la na Yezo aho. 33Ala ĩ nɔ ĩ si ka ndo mɛ andoili ya: “Ndo ti kpokpo li zo” ko, ala gɔngɔ Yezo ndo krusi so ndo ko. Ala gɔngɔ nga akɔli sɛ mɛ awa lingɔ siɔ ye ndo krusi mɛ ndɛ̃ osɛ, kɔi na ndo kɔti ti Yezo, kɔi na ndo ga. 34Yezo apa hɛ̃ To lo ya: “Baba, ka lɛ mɔ ndo siɔ ye ko la ala li tɛrɛ mbi, ta sanga ma, ta ala hĩnga ye ko la ala li ma.” Aturugu ato zeke so kangbingɔ na abɔngɔ tɛ Yezo na tɛrɛ la. 35Azi alonga so ndo ko, so ndoba lo. Agbia tɛ Ayuda ae lo, apa ya: “Lo so ndo azi mɛ ndɛ̃, ko se lo du Mɛsia mɛ Nzapa asara lo akpã ko, ale lo so nga tɛrɛ lo nvɛni!” 36Aturugu ae nga lo, ala i tɛrɛ la ka gunda krusi, aye kpekpe kana hɛ̃ lo, 37apa hɛ̃ lo ya: “Se mɔ du gbia tɛ Ayuda ko, so tɛrɛ mɔ nvɛni!” 38Tɛnɛ mɛ asu ka ta li lo na ndo krusi lo mɛ: “Kɔli olo adu Kota Gbia tɛ Ayuda.”
39Mbanga wa lingɔ siɔ ye mɛ agɔngɔ lo ndo krusi aguru Yezo ya: “Mɔ pa ya, mɔ Mɛsia, wa so tɛrɛ mɔ nvɛni, ko mɔ so nga e!” 40La fɔ̃ lo abela lo ya: “Ta mɔ ndokpɛ Nzapa ma sia! Pɛnɔ mɛ mɔ ndohũ na olo nga la lo ndohũ. 41Pɛnɔ mɛ mbi na mɔ e ndohũ ko, adu na seni, ta sanga ma, siɔ ye mɛ ndo e ndoli la adiri ndo e. Kanda tɛ lo ko, ta lo li siɔ ye bɛ kɔi ma.” 42La wa lingɔ siɔ ye ko asana, apa hɛ̃ Yezo ya: “Yezo, ngoi mɛ gbanda mɔ ga so lɛngɔ gbia na ndo azi ko, da bɛ mɔ na mbi.” 43La Yezo agbinya hɛ lo ya: “Mbi pa hɛ̃ mɔ ti bɛta tɛnɛ ya, na lá olo ko, mbi na mɔ, e si ndɛ ka paradizo ka yayu.”
Yezo akpi
(Mat. 27.45-56; Mar. 15.33-41; Yoa. 19.28-30)
44-45Ngoi ati ndo nga ma ge tɛ bɛ kɔmbitɛ, ko ta lá ti sũ ndo ma. Mbingo avu kpi kpi kpi, amu lɛ sese zu, ko aninga ngbĩi ati na saa ota ti pɛ bɛ kɔmbitɛ. Ma bɔngɔ lau mɛ ndo amu afa na ya kota da Nzapa, asungbi na ndo bɛ ni kpoa! 46Yezo ade kɔngɔ kpengbani ya: “Baba, mbi zia tɔrɔ tɛrɛ mbi na yamba ti mɔ.” Lo ĩ tɛnɛ so wɛ ko, lo kpi. 47Mbanga wa Roma mɛ na ndo aturugu ko ĩ hũ so ko, agonda Nzapa ya: “Biani, kɔli olo adu nzɔ̃ zo!” 48Azi zu mɛ ndo aga butu butu so bangɔ ye mɛ aturugu na lingɔ na Yezo ko, ala hũ ndo ni. Ko ngoi mɛ ala so ndodiri ko, ala ma vundu, ko ala so ndoba li bɛ la. 49Akwa Yezo zu, nga na awe mɛ ndo ato nda ɔngɔ ndoni kɔi na lo ka sese ti Galilea, alonga yɔngɔrɔni na krusi, so ndoba ye mɛ aturugu ndoli tɛrɛ lo.
Mbanga kɔli kɔi ahɔ kinda tɛ Yezo
(Mat. 27.57-61; Mar. 15.42-47; Yoa. 19.38-42)
50-51Mbanga kɔli kɔi ili lo Yozɛfu, lo zo ti mbanga kɔdɔrɔ tɛ Ayuda mɛ andoili ya Arimatea. Lo nzɔ̃ zo, lo nga bɛta zo, lo ndolɛndɛrɛ ndo nga lá ti gangɔ tɛ Nzapa so lɛngɔ gbia na ndo azi. Lo ndo na li nɔ tɛ awa fangɔ ngbanga. Ko ta lo ye ndo ngbanga mɛ afɔ̃ lo afa abi li Yezo ma, ta lo ye nga ndo ye mɛ ala li tɛrɛ lo ma. 52Lo nɔ ka tɛ Pilato, lo hũnda Pilato ya, se lo ye ko, ni mu kinda tɛ Yezo ni nɔ, ni hɔ. 53Pilato aye, la Yozɛfu anɔ ahã kinda tɛ Yezo ka ndo krusi, azu na ni, amu fana bɔngɔ ti hɔngɔ na kinda, agana na ni. La lo nɔ, lo kpa kinda ni ka ya sende mɛ ndo agɛ̃ na tɛrɛ tɛnɛ. Ta ade akpa kinda tɛ zo na ya sɛndɛ ni ko bɛ gbɔ ma. 54Lá ni ko adu ndo bi kwa okɔ̃, ko angbã ndo yakere ato nda lá ti wɔngɔ tɛrɛ.
55Awe mɛ ndo ato nda ɔngɔ ndoni kɔi na Yezo ka Galilea anɔ ndali Yozɛfu. Ala ba ya sɛndɛ, ala hũ nga se mɛ ndo akpa na kinda tɛ Yezo. 56So pɛni, ala diri ka ndo tɛ la, ala lɛkɛ akpɔ̃ nga na ayɔmbɔ ya, ani diri ĩ nɔ, ko ani klkĩ na ndo kinda tɛ Yezo.
Ĩ ti na lá ti wɔngɔ tɛrɛ ko, ala wɔ tɛrɛ la na se ko la alu na ndia.
Currently Selected:
Luka 23: NGB87
Highlight
Share
Copy
Want to have your highlights saved across all your devices? Sign up or sign in
Ngbandi New Testament © United Bible Societies, 1987.
