Luka 5

Yezo aili akɔzo ava lo

(Mat. 4.18-22; Mar. 1.16-20)

1Mbanga lá kɔi, Yezo alo so nyɔ tungu ti kpo ti Genezarɛtɛ, ko azi butu butu aka lo kɛrɛ kɛrɛ, agbangbi ndo ya, ani ma tɛnɛ tɛ Nzapa. 2Yezo ahũ ngɔ sɛ so nyɔ tungu, ta awa hongɔ susu ndo so ya ni ma, ala ndokpokpo ndo gbanda tɛ la. 3Yezo ako ya ngɔ kɔi, adu ngɔ tɛ Simɔ. Lo hũnda Simɔ ya, se lo ye ko, lo yuru ngɔ ni ka lɛ ngu nyi yɔ na nyɔ tungu. La Simɔ ayuru ngɔ ni, ko Yezo adu so ya ni, ato nda hangɔ azi butu butu na tɛnɛ tɛ Nzapa.

4Lo ĩ kɔ nda tɛnɛ tɛ lo ko, lo pa hɛ̃ Simɔ ya: “Yuru ngɔ ni ka du ngu, ko mɔ na afɔ̃ mɔ ĩ sa gbanda tɛ ĩ.” 5Simɔ agbinya hɛ̃ lo ya: “Wa hangɔ lo tɛ Nzapa, e li fɛrɛ kwa na bi ngbĩi, ko ta e gbɔ̃ kpĩ bɛ kɔi ma. Kanda oko mɔ pa ya mbi sa gbanda ko, mbi na sanga ni.” 6Ala ĩ sa gbanda ko, ala gbɔ̃ kpĩ sĩ nvɛni, ko lɛ gbanda tɛ la ato nda faranga. 7Ala ĩ hũ so ko, ala pɛpɛ ti la hɛ̃ afɔ̃ la mɛ ka ya ngɔ mɛ ndɛ̃ ya, ala ga aza ani, la afɔ̃ la anɔ. Ala hãna akpĩ ka lɛ gbanda, asa na ya ngɔ ko sɛ, ko ngɔ ni zu sɛ asĩsĩ, ko ato ndo gwengɔ gbe ngu. 8Simɔ Petro ĩ hũ so ko, akuku gbɛlɛ Yezo, apa hɛ̃ lo ya: “Gbia, i tɛrɛ mɔ yɔngɔrɔni na mbi, ta sanga ma, mbi wa lingɔ siɔ ye!” 9Mbɛtɔ agbɔ̃ ndo Simɔ nga na azi mɛ so ndo ko, na lo ti kpĩ mɛ ndo ala ho ma wo ma. 10Mbɛtɔ agbɔ̃ nga ndo Zaki na Yoanɛ mɛ afɔ̃ Simɔ mɛ aya Zebedeo. La Yezo apa hɛ̃ Simɔ ya: “Zia mbɛtɔ, ato na la olo ko, ta mɔ ti gi asusu ma, mɔ ti wa gingɔ azi hɛ̃ Nzapa.” 11Ala ĩ diri na ngɔ tɛ la, ĩ gbɛlɛ li ni ka nyɔ tungu ko, ala dɔ aye zu so ndo ko azia, ala na Yezo aɔ ndoni kɔi.

Yezo asara wa ndiba

(Mat. 8.1-4; Mar. 1.40-45)

12Yezo ndo ka mbanga kɔdɔrɔ kɔi, ko kɔli kɔi mɛ ndiba amu tɛrɛ lo zu, aga akuku gbɛlɛ lo, atolo lɛ lo tise, adema tɛrɛ lo hɛ̃ Yezo ya: “Wa hangɔ lo tɛ Nzapa, mɔ na nguru ti sarangɔ mbi, wa se bɛ mɔ aye ko, mɔ sara mbi.” 13Yezo aye ti lo, abɔrɔ tɛrɛ wa ndiba ko, apa hɛ̃ lo ya: “Mbi ye, ndiba tɛ mɔ awe.” Bo na ngoi ni ko, ndiba tɛ kɔli ko awe. 14La Yezo ahɛ̃ nyɔ hɛ̃ lo ya: “Ta mɔ pa lo ni hɛ̃ zo kɔi ma. Wa nɔ ka tɛ wa lungɔ Nzapa na ye, mɔ fa lo na se mɛ tɛrɛ mɔ ati na ni. So pɛni, mɔ lu Nzapa na ye mɛ ndo Mɔizɛ alu ndia ni, so fangɔ na azi zu ya, ndiba tɛ mɔ awe.” 15Na ngoi ko ndo ko, pa ili Yezo ndoti ndo bo tingɔ gboo gboo. Azi butu butu abombi ndo tɛrɛ la ya, ani ma tɛnɛ tɛ lo, ko lo sara nga ngã na tɛrɛ ani. 16Yezo azia ndo la so ndo ko, anɔ ka bɛ ndo so sambelangɔ Nzapa.

Yezo asara wa ngbengule

(Mat. 9.1-8; Mar. 2.1-12)

17Mbanga lá kɔi, Yezo aha azi na lo tɛ Nzapa, ko Afarizeo, na awa hangɔ ndia aga, adunga so gunda lo. Ala lo ndo na ya akɔdɔrɔ ti Galilea zu, ti Yudea, nga na ti Yeruzalɛmɛ la aga. Gbia Nzapa ahɛ̃ Yezo nguru, la Yezo asara ambanga awa ngã. 18Azi ayɔ wa ngbengule kɔi na ndo tange, aga na lo. Ala gi lege ya, ani li na lo ka ya da, ko ani kpã lo na gbɛlɛ Yezo. 19Ko ta ala hũ ndo lege ti lingɔ na lo ka ya da ma, na lo tɛ azi butu butu mɛ aga so ndo ko. La ala mu lo, ama na lo ka ndo da. Ala ĩ hã bɛ li da ĩ zi ko, ala mu lo na ndo tange tɛ lo, azu na ni so gbɛlɛ Yezo, na popo tɛ azi. 20Yezo ĩ hũ ya, azi ko aye lo tɛ ni biani ko, lo pa hɛ̃ wa ngbengule ko ya: “Kwa mbi, mbi ka le mbi ndo siɔ ye tɛ mɔ.” 21Ko awa hangɔ ndia, na Afarizeo atɛnɛ ka ya bɛ la ya: “Zo olo ndoguru Nzapa so ko, lo na? Zo mɛ alengbi ti kangɔ lɛ lo ndo asiɔ ye tɛ azi na? Bo Nzapa kɔi!” 22Yezo ahĩnga dangɔ bɛ tɛ la, ko lo hũnda la ya: “Nda mɛ ĩ ndodu na gi tɛrɛ dangɔ bɛ so nɛ? 23Na popo ti tɛnɛ olo se: ‘Mbi ka le mbi ndo asiɔ ye tɛ mɔ,’ bere ‘Lo ndozu, mɔ dɔ nɔ’ ko, tɛnɛ mɛ woni nɛ? 24Kanda mbi ye ya ĩ hĩnga ya, mbi Nyi Zo mbi na nguru ti kangɔ lɛ mbi ndo asiɔ ye tɛ azi ge lɛ sese.” La lo pa hɛ̃ wa ngbengule ko ya: “Mbi pa hɛ̃ mɔ ya, mɔ lo ndozu, mɔ̃ mu tange tɛ mɔ, mɔ̃ diri ka ndo tɛ mɔ!” 25Bo na ngoi ni ko la, wa ngbengule adɔ alo so gbɛlɛ azi zu, amu tange tɛ lo mɛ ndo lo ndose ndo ni, adiri ka ndo tɛ lo, na gondangɔ Nzapa buai. 26Azi zu abema ndo sĩ, ala gonda ndo Nzapa, mbɛtɔ agbɔ̃ ndo la sĩ, ko ala pa ndo ya: “Ye mɛ e hũ na olo ko, adu ye mɛ ta e dɛ e hũ ma!”

Yezo aili Levi

(Mat. 9.9-13; Mar. 2.13-17)

27So pɛni, Yezo alo ka ya da asi, ko lo hũ wa sɔrɔngɔ lapo mɛ ili lo la Levi, adu so tɛrɛ mɛsa ti kwa tɛ lo. Yezo apa hɛ̃ lo ya: “Ga e ɔ ndoni kɔi.” 28Levi ĩ ma so ko, alo, adɔ aye zu azia, ana Yezo aɔ ndoni kɔi. 29So pɛni, ala ĩ si ka ya da tɛ Levi ko, Levi ahɛ̃ tɛ ti yenga hɛ̃ Yezo. Ala na awa sɔrɔngɔ lapo ma wo ma, nga na azi mɛ ndɛ̃ atɛ ndo ye ndoni kɔi. 30Afarizeo na awa hangɔ ndia mɛ na li nɔ tɛ la ĩ hũ so ko, ala ndunguma Yezo, ko ala hũnda ava Yezo ya: “Nda mɛ ĩ na awa sɔrɔngɔ lapo, nga na awa lingɔ siɔ ye ĩ ndotɛ, ĩ ndonyɔ ndoni kɔi nɛ?” 31Yezo ĩ ma so ko, agbinya hɛ̃ la ya: “Azi ko la gbe tɛrɛ la nzɔ̃ni ko, ta ala ndodu na gwɛ̃ tɛ mɔnganga ma, kanda bo awa ngã la ndodu na gwɛ̃ tɛ mɔnganga. 32Ta mbi ga ge so ilingɔ anzɔ̃ azi ma, kanda mbi ga so ilingɔ awa lingɔ siɔ ye, ya ala gbinya bɛ la.”

Yezo aha azi na alo mɛ ndɛ̃

(Mat. 9.14-17; Mar. 2.18-22)

33Azi apa hɛ̃ Yezo ya: “Ava Yoanɛ nga na ava Afarizeo ndokɛ̃ tɛngɔ ye fani sĩni so vɔrɔngɔ Nzapa. Ko nda mɛ ava mɔ ndotɛ, ndonyɔ nɛ?” 34La Yezo agbinya hɛ̃ la ya: “Ĩ da bɛ ĩ ya, azi mɛ ĩ ili la ya, ala ga, atɛ yenga ti mungbingɔ tɛ kɔli na wali ko, ĩ lengbi ti gbɔ̃ngɔ la gbɔ̃ngɔ, wa ala kɛ̃ tɛngɔ ye, na ngoi ko la kɔ wali ade so popo tɛ la? Ipɔ, ta seni la ma. 35Kanda lá kɔi gbanda ko, azi aha gbanda kɔ wali so popo tɛ la aɔ na ni. Ko lá ni ko gbanda la ala kɛ̃ tɛngɔ ye.”

36Yezo ato nga ndo matɔ hɛ̃ la ya: “Ta zo ndosu nyɔ fana bɔngɔ, abo na lɛ kã ti ngbina bɔngɔ ma. Se lo li so ko, fana bɔngɔ asuru, ko ta fana bɔngɔ na lengbingɔ na ngbina bɔngɔ ma. 37Ta zo ndomu fana kana asa na ya ngbina pɔrɔ mɛ alɛkɛ nga ma mbenda ma. Se lo li so ko, fana kana ao ngbina mbenda, kana asa tise, ko mbenda ni amumana. 38Kanda ale asa fana kana na ya fana mbenda. 39Ta zo ndonyɔ ngbina kana, ko so pɛni ko, lo ti lo ye ya, ni nyɔ fana kana ma. Ta sanga ma, lo na nɛngɔ ya: ‘Ngbina kana aɔ fana kana.’ ”

Currently Selected:

Luka 5: NGB87

Highlight

Copy