Matie 14

Yoanɛ wa hɛngɔ batisimɔ akpi

(Mar. 6.14-29; Luk. 9.7-9)

1Na ngoi ni ko, Erodɛ mɛ gbia ti sese ti Galilea ama pa tɛ Yezo. 2La lo pa hɛ̃ awa kwa tɛ lo ya: “Adu Yoanɛ wa hɛ̃ngɔ batisimɔ la aso na pɛ kwá, ko ĩ ba nda mɛ lo lua nguru ti lingɔ na aye ti kpɛnɛ la.” 3-4Erodɛ atɛnɛ ndo so, na lo mɛ ya, lo Erodɛ nvɛni, lo mu ndo Erodiadɛ mɛ ya nyita lo Filipo, lo du na ni. Ko na lo ni ko, Yoanɛ abela ndo lo ya: “Ta mɔ lengbi ti dungɔ na Erodiadɛ ma!” Ngoi mɛ Erodiadɛ ĩ ma so ko, lo hɛ̃ nyɔ ya, agbɔ̃ Yoanɛ, la agbɔ̃ Yoanɛ, agbe lo, abi lo bɔlɔkɔ. 5Erodiadɛ aye ndo ya, aho Yoanɛ. Kanda Erodɛ ndokpɛ ndo azi, ta sanga ma, ala zu ndomu ndo Yoanɛ nga ma lo wa pangɔ nyɔ Nzapa.

6Kanda ĩ ti na ngoi ti yenga ti lá mɛ adú na Erodɛ ko, nyi Erodiadɛ ti wali adɔ dɔ so gbɛlɛ azi mɛ Erodɛ aili la. Bɛ Erodɛ ade ndo sĩ na lo tɛ nyi wali ni ko. 7La Erodɛ anyɔ ngɛ ya, sereka, ye zu mɛ nyi wali ko ayɔ ti ni ko, ni hɛ̃ ni hɛ̃ lo. 8Ta lo Erodiadɛ awa lo, la lo pa hɛ̃ Erodɛ ya: “Fa li Yoanɛ wa hɛ̃ngɔ batisimɔ, mɔ kpã ya sɛmbɛ, mɔ hɛ̃ mbi na olo!” 9Ko vundu agbɔ̃ gbia Erodɛ na lo tɛnɛ ni. Kanda na lo ti ngɛ mɛ fɛrɛ lo nyɔ na gbɛlɛ azi mɛ lo ili la ko, lo hɛ̃ nyɔ ya, afa li Yoanɛ ahɛ̃ nyi wali ko. 10La Erodɛ ato zo anɔ ka da bɔlɔkɔ, afa li Yoanɛ, 11akpã ya sɛmbɛ, aga na ni hɛ̃ nyi wali ko. La nyi wali ko amu ahɛ̃ ta lo. 12Ava Yoanɛ ĩ ma ya, Yoanɛ akpi ko, ala nɔ amu kinda tɛ lo ahɔ. So pɛni, ala nɔ apa pa ti kwá ni hɛ̃ Yezo.

Yezo aliɛ tɛ bɛ azi koto okɔ̃ ala tɛ

(Mar. 6.30-44; Luk. 9.10-17; Yoa. 6.1-14)

13Ngoi mɛ Yezo ĩ ma pa ti kwá ni ko, lo na ava lo alo so ndo ko, ako ya ngɔ, agwe na kunɛ la ka bɛ ndo. Ko azi butu butu ama ndo ya, Yezo na ava lo agwe ka bɛ ndo. La azi butu butu alo ka ya kɔdɔrɔ tɛ la, adɔ nɔ ti tɛrɛ nyɔ kpo, anɔ pɛko Yezo. 14Yezo ĩ lo ka ya ngɔ ĩ ko gegi ko, lo hũ azi butu butu, ko vundu tɛ la agbɔ̃ lo sĩ. Ko lo to nda sárangɔ nga tɛ azi mɛ azi ko aga na la.

15Ngoi mɛ ndɔ ĩ de ko, ava lo anɔ ka tɛ lo, apa hɛ̃ lo ya: “Ngoi aɔ wɛ, ko ndo mɛ adu ge bɛ ndo. Wa pa hɛ̃ azi olo butu butu ya, ala gwe ka kɔdɔrɔ, avɔ̃ tɛ atɛ.” 16Yezo agbinya hɛ̃ la ya: “Ta alengbi ya, ala nɔ ma, ĩ nvɛni í hɛ̃ la tɛ ala tɛ!” 17La ala pa hɛ̃ lo ya: “E ndo mɛ bo na mapa kɔ̃ na susu sɛ.” 18Yezo ĩ ma so ko, lo pa hɛ̃ la ya: “Ĩ ga na ni ge hɛ̃ mbi.” 19So pɛni, lo hɛ̃ nyɔ hɛ̃ azi ko butu butu ya, ala dunga tise na ndo ndiri. La lo mu mapa ko okɔ̃, na susu ko osɛ, lo ya lɛ lo ndozu, lo hɛ̃ sia kɔli hɛ̃ Nzapa na lo ni. So pɛni, lo kara ya ni, lo hɛ̃ ava lo ya, ala kangbi na azi mɛ aga butu butu. 20Ala zu atɛ ndo ni, ya la asĩsĩ. Tanga tɛ mɛ angbã, asĩsĩ gogo sui kɔi ndoni sɛ, ko ava lo amu agwe na ni. 21Azi mɛ ndo atɛ ye ko, ala ndo akɔli nga ma ge tɛ koto kɔ̃. Ta adikɔ ndo awe na ayangambi ma.

Yezo adɔ nɔ ti ndo lɛ ngu

(Mar. 6.45-52; Yoa. 6.15-21)

22So pɛni hiɔ ko, Yezo apa hɛ̃ ava lo ya: “Ĩ ko ya ngɔ, í ɔ uzu tɛ mbi, ĩ fa ngu, mbi dɛ ge so pangɔ hɛ̃ azi olo ya, ala diri ka tɛ la.” 23Yezo ĩ pa hɛ̃ azi ko butu butu, ala ĩ diri ka tɛ la wɛ ko, lo nɔ tɛ lo ka ndo hɔtɔ na kunɛ lo so sambelangɔ Nzapa. Ngoi mɛ bi ĩ vũ ko, lo ngbã so ndo ko, bo lo kɔi. 24Ngɔ mɛ fɛrɛ ava lo ako ya ni ko, ayikɔ ka lɛ ngu. Yá ndoya ndo aga ti ndo la. Na lo ni ko, mɔpo ada na ngɔ ni yenge yenge. 25Ĩ da na kɔzo kɔndɔ ko, Yezo adɔ nɔ ti ndo lɛ ngu, anɔ ka tɛ ava lo. 26Ngoi mɛ ava lo ĩ hũ lo so ndodɔ nɔ ti ndo lɛ ngu ko, mbɛtɔ agbɔ̃ la sĩ, ko ala pa ya: “Nyingɔ la.” Ko ala to nda dɛrɛngɔ kɔngɔ na mbɛtɔ. 27La Yezo apa hɛ̃ la hiɔ ya: “Ĩ zia mbɛtɔ, ĩ du na kpengba bɛ, ko ĩ hĩnga ya, mbi la!” 28La Petro apa hɛ̃ Yezo ya: “Gbia, se adu ya, mɔ nvɛni la ko, hɛ̃ nyɔ mɔ ya, mbi dɔ nga nɔ ti ndo lɛ ngu, mbi nɔ ka tɛ mɔ.” 29Yezo agbinya hɛ̃ lo ya: “Ga!” La Petro alo ka ya ngɔ, ato nda dɔngɔ nɔ, gwengɔ ka tɛ Yezo. 30Kanda Petro ĩ hũ ya, yá ndoya ko, mbɛtɔ agbɔ̃ lo, ko lo ĩ to nda gwengɔ gbɛ ngu ko, lo dɛ kɔngɔ ya: “Gbia, so mbi!” 31La Yezo aye ti lo, agbɔ̃ Petro, apa hɛ̃ lo ya: “Ta mɔ ye lo tɛ mbi kpa ma! Nda mɛ mɔ dɛ kitɛ nɛ?” 32La ala zu sɛ ako ya ngɔ, ko yá mɛ fɛrɛ ndoya ade ngĩ. 33Ko ava lo mɛ angbã tɛ la ka ya ngɔ, akuku gbɛlɛ Yezo, apa hɛ̃ lo ya: “Biani, mɔ Nyi Nzapa!”

Yezo asara awa nga ka sese ti Genezarɛtɛ

(Mar. 6.53-56)

34Ala ĩ fa ngu ti Galilea wɛ ko, ala lo ka ya ngɔ, ako ka sese ti Genezarɛtɛ. 35Azi ti sese ko ĩ hũ Yezo ko, ala hĩnga lo. Ko ala fɔnɔ, apa hɛ̃ azi zu mɛ ndodu ka kɔdɔrɔ mɛ so gunda la ya, Yezo aga. La ala ga na awa ngã zu hɛ̃ lo. 36Ko ala vɔrɔ tɛrɛ la hɛ̃ lo ya, se lo ye ko, lo zia awa ngã ko abɔrɔ bɛ nyɔ bɔngɔ tɛ lo, la lo ye. Ko azi zu ko ndo la abɔrɔ nyɔ bɔngɔ tɛ lo ko, tɛrɛ la ahã wee!

Currently Selected:

Matie 14: NGB87

Highlight

Copy