Matie 16
16
Afarizeo na Asaduseo ahũnda Yezo ya lo li ye ti kpɛnɛ
(Mar. 8.11-13; Luk. 12.54-56)
1Afarizeo na Asaduseo anɔ ka tɛ Yezo, ya ani tara bɛ lo. La ala hũnda lo ya: “Li hɛ̃ e ye ti kpɛnɛ kɔi mɛ afa ya, nguru tɛ mɔ alo ka tɛ Nzapa!” 2La Yezo agbinya hɛ̃ la ya: “Ngoi mɛ se ndɔ ade ko, ĩ ndopa ya: ‘Nda ko, lɛ ndozu na dungɔ nzɔ̃ni, ta sanga ma, lɛ ndozu abɛ ngboo!’ 3Wa na nda perere ko, ĩ ndopa ya: ‘Na la olo ko, ngu na ningɔ, ta sanga ma, lɛ ndozu avu kpiti kpiti.’ Biani, ĩ hĩnga bo kambisangɔ nda aye ti lɛ ndozu, wa ta ĩ hĩnga nda aye ti ngoi olo ma! 4Ĩ azi ti ngoi olo mɛ ĩ du asiɔ azi, ĩ du nga awa wezangɔ lo tɛ Nzapa. Ĩ ndohũnda mbi ya, mbi li hɛ̃ ĩ ye ti kpɛnɛ. Kanda ta mbi na lingɔ hɛ̃ ĩ ye ti kpɛnɛ kɔi ma. Ĩ da bɛ ĩ bo na ye ti kpɛnɛ mɛ ndo Nzapa ali na Yonasi.” La Yezo azia la, lo na ava lo ahã nɔ agwe.
Tɛnɛ tɛ Afarizeo na tɛnɛ tɛ Asaduseo adu nga ma yɔrɔ mɛ ndosusu na mapa
(Mar. 8.14-21)
5Ngoi mɛ ava lo ĩ fa ngu wɛ ko, ala da bɛ la ya, bɛ ani ali fɛrɛ na mungɔ mapa. 6La Yezo apa hɛ̃ la ya: “Ĩ du na kpengba lɛ, ko ĩ bata nga li ĩ nzɔ̃ni na lo yɔrɔ tɛ Afarizeo nga na tɛ Asaduseo mɛ ndosusu na mapa.” 7Ala ĩ ma so ko, ala tɛnɛ lo ni ka popo tɛ la ya: “Lo tɛnɛ nga so, na lo mɛ ya, ta e mu fɛrɛ mapa ma.” 8Ko Yezo ahĩnga tɛnɛ mɛ ala tɛnɛ, la lo hũnda la ya: “Nda mɛ ĩ ndotɛnɛ ya, mbi pa nga so, na lo mɛ ya, ta ĩ na mapa ti tɛngɔ ma nɛ? Ta ĩ ye lo tɛ mbi kpa ma! 9Ta ĩ dɛ ĩ ma nda tɛnɛ ni ko ma? Bɛ ĩ ali na mapa kɔ̃ mɛ ndo mbi kara ya ni mbi hɛ̃ ĩ, ĩ kangbi na azi koto kɔ̃? Ko bɛ ĩ ali na gogo ma wo ma mɛ ndo ĩ lɔ ĩ gwe na ni? 10Ko mapa mbara mbara mɛ ndo mbi kara ya ni hɛ̃ ĩ, ĩ kangbi na azi koto siɔ ko, bɛ ĩ ali nga na ni? Bɛ ĩ ali na gogo ma wo ma mɛ ndo ĩ lɔ ĩ gwe na ni? 11Ko ale ĩ hĩnga ya, ta mbi ndotɛnɛ tɛnɛ ni ko na lo ti mapa ma. Ĩ bata li ĩ nzɔ̃ni na lo tɛnɛ tɛ Afarizeo nga na tɛ Asaduseo, ta sanga ma, tɛnɛ tɛ la adu nga ma yɔrɔ mɛ ndosusu na mapa.”
12La ava lo ahĩnga ya, ta adu na lo ti yɔrɔ mɛ ndosusu na mapa la lo pa fɛrɛ hɛ̃ ani ya, ani bata li ani nzɔ̃ni ma. Kanda adu na lo ti lo mɛ Afarizeo na Asaduseo ndoha.
Petro apa ya Yezo lo Mɛsia
(Mar. 8.27-30; Luk. 9.18-21)
13Yezo agwe ndo ka sese mɛ ndũ na kɔdɔrɔ mɛ ili ni la Sezarea Filipo. La lo hũnda ava lo ya: “Azi ndopa ya, mbi Nyi Zo mbi na?” 14Ala gbinya hɛ̃ lo ya: “Ambanga ndopa ya, mɔ Yoanɛ wa hɛ̃ngɔ batisimɔ, ambanga ya, mɔ Elia. Ambanga mɛ ndɛ̃ ndopa tɛ la ya, mɔ Yeremia mɛ wa pangɔ nyɔ Nzapa, bere mɔ mbanga wa pangɔ nyɔ Nzapa.” 15Ko Yezo ahũnda la ya: “Wa ĩ, ĩ ndonɛ tɛ ĩ ya, mbi na?” 16Simɔ Petro agbinya hɛ̃ lo ya: “Mɔ Mɛsia, mɔ Nyi Nzapa mɛ lɛ lo ngɛ̃.” 17La Yezo apa hɛ̃ lo ya: “Simɔ nyi Yoanɛ, dengɔ bɛ ati na mɔ, ta sanga ma, ta zo la apa hɛ̃ mɔ bɛta tɛnɛ ni ko ma, kanda To mbi mɛ ka yayu la apa ni hɛ̃ mɔ! 18Mbi pa hɛ̃ mɔ ya, nda ili mɔ ti Petro la Tɛ́nɛ, ko na ndo tɛ́nɛ ni ko la mbi na wangɔ Eklezia tɛ mbi. Ko ta kwá alengbi ti lingɔ ye na Eklezia ma. 19Mbi na hɛ̃ngɔ mɔ aya kɛrɛrɛ ti nyɔ da ti Kɔdɔrɔ Gbia tɛ Nzapa. Ye mɛ mɔ na gbanzingɔ ge lɛ sese ko, Nzapa nga na gbanzingɔ ni ka yayu. Ye mɛ mɔ na zingɔ lege ni hɛ̃ azi ko, Nzapa nga na zingɔ lege ni ka yayu.”
20So pɛni, Yezo ahɛ̃ la nyɔ ya, ta ala pa hɛ̃ azi ya ni Mɛsia ma.
Yezo apa lo ti kwa tɛ lo nga na lo ti songɔ tɛ lo
(Mar. 8.31—9.1; Luk. 9.22-27)
21Ato na ngoi ni ko, Yezo ato nda pangɔ yango hɛ̃ ava lo ya: “Ale mbi gwe ka Yeruzalɛmɛ, ko akangba ti kɔdɔrɔ, na agbia tɛ awa lungɔ Nzapa na ye, nga na awa hangɔ ndia ahɛ̃ mbi pɛnɔ ma ya ma. Na hongɔ mbi, ko na pɛ bi ta ko, mbi so.” 22La Petro amu Yezo, agwe na lo katɛ, ato nda belangɔ lo, apa hɛ̃ lo ya: “Gbia, Nzapa abata bɛ mɔ ma ke! Ipɔ, ta aye ni ko na lingɔ mɔ ma!” 23Yezo asana tɛrɛ lo, apa hɛ̃ Petro ya: “Mɔ nga ma Satana, ɔ lɛ mbi kai! Mɔ ndogi kɔdɛ ya, mɔ handa mbi, ko mbi li siɔ ye. Ta sanga ma, dangɔ bɛ tɛ mɔ nga ma tɛ azi, ta dangɔ bɛ tɛ mɔ nga ma tɛ Nzapa ma.”
24So pɛni, Yezo apa hɛ̃ ava lo ya: “Se zo aye ya, ni ga e na ni, e ɔ ndoni kɔi ko, ale lo zia dangɔ bɛ lo na tɛrɛ lo nvɛni, ale lo yɔ nga krusi tɛ lo so fangɔ ya, ni ye hũngɔ pɛnɔ, wadila lo ga, ko mbi na lo e ɔ ndoni kɔi. 25Ta sanga ma, zo ko la aye batangɔ du tɛ lo ko, tɔrɔ tɛrɛ lo na kpingɔ. Wa zo ko la aka tɛrɛ lo na lo tɛ mbi ko, tɔrɔ tɛrɛ lo na songɔ. 26Se zo alua aye ti lɛ sese zu, wa se tɔrɔ tɛrɛ lo akpi ko, aye ni zu ati gɛgɛrɛ. Ta mbanga ye so lɛ sese mɛ se zo ahɛ̃ ko, atɔ̃ na tɔrɔ tɛrɛ lo da ma. 27Mbi Nyi Zo mbi na aangelo tɛ To mbi e ga gbanda na ya ndima tɛ lo, ko mbi futa gbanda zo kɔi kɔi na se kwa mɛ lo li. 28Mbi pa hɛ̃ ĩ ti bɛta tɛnɛ ya, mbi Nyi Zo mbi ga gbanda nga ma gbia. Ko ambanga azi mɛ so ndo mɛ ahũ gbanda mbi uzu, wa ala kpili.”
Currently Selected:
Matie 16: NGB87
Highlight
Share
Copy
Want to have your highlights saved across all your devices? Sign up or sign in
Ngbandi New Testament © United Bible Societies, 1987.
