Matie 2

Awa kɔdɛ alo ka tɔ aga aba Yezo

1Adú ndo Yezo ka kɔdɔrɔ ti Bɛtlɛmɛ ka sese ti Yudea, na ngoi mɛ ndo Erodɛ gbia. Ngoi mɛ Maria ĩ dú Yezo wɛ ko, awa kɔdɛ mɛ ndoba nda lo tɛ atongolo alo ka tɔ, aga asi ka Yeruzalɛmɛ. 2Ala hũnda azi ya: “Nyingambi mɛ adú lo fanani, ko lo la na dungɔ gbia tɛ Ayuda ko, lo so wa? E hũ tongolo tɛ lo asi ka tɔ, la e ga so vɔrɔngɔ lo.”

3Ngoi mɛ gbia Erodɛ ĩ ma so ko, bɛ lo angbã talele, nga na bɛ awa Yeruzalɛmɛ zu. 4La lo bombi azi zu mɛ agbia tɛ awa lungɔ Nzapa na ye, na awa hangɔ ndia, na azi tɛ lo, lo hũnda la ya: “Ndo mɛ alengbi ti dúngɔ na Mɛsia ni wa?” 5Ala gbinya hɛ̃ lo ya: “Ka Bɛtlɛmɛ mɛ ka sese ti Yudea. Ta sanga ma, ma tɛnɛ mɛ ndo wa pangɔ nyɔ Nzapa asu lo mɛ:

6‘Bɛtlɛmɛ mɛ ka sese ti Yudea, mɔ du nyi kɔdɔrɔ buai,

Kanda mɔ ɔ akota kɔdɔrɔ ti Yudea zu.

Ta sanga ma, gbia mɛ gbanda abata azi tɛ mbi awa Izrayɛlɛ ko,

Lo lo gbanda ka tɛ mɔ.’ ”

7La Erodɛ aili awa kɔdɛ na gbɛ mbingo, ahũnda la na lo ti ngoi mɛ tongolo ni asi na ni ngĩini. 8So pɛni, lo to la na kwa ka Bɛtlɛmɛ ya: “Ĩ nɔ, ĩ gi nyingambi ni nzɔ̃ni. Se ĩ tã lo ko, í ga í pa hɛ̃ mbi, wadila mbi nɔ nga mbi vɔrɔ lo.”

9Ala ĩ ma nyɔ mɛ gbia ahɛ̃ la wɛ ko, ala hã nɔ aɔ. La ala hũ tongolo mɛ ndo ala pia ahũ ka tɔ: tongolo ni so ndogwe so gbɛlɛ la. Ko ngoi mɛ tongolo ni ĩ si na ndo mɛ nyingambi da ko, tongolo ni adɔ alo. 10Ala ĩ hũ so ko, bɛ la ade zɔgɔrɔ. 11La ala nɔ ali ya da ni ko. Ala ĩ hũ nyingambi na ta lo Maria ko, ala kuku na li kuni la, avɔrɔ nyingambi ni. Ala zizi nyɔ kumba tɛ la, ahɛ̃ lo tisa. Tisa ni adu ndo wɔrɔ, na yɔmbɔ mɛ andozɔ zɔngɔ, nga na mbanga yɔmbɔ mɛ ili ni la mirɛ. 12So pɛni, ala hũ suma, ko Nzapa atisa la na ya suma ni ya, ta ala diri anɔ ka tɛ Erodɛ ma. La ala mu lege mɛ ndɛ̃, adiri agwe ka kɔdɔrɔ tɛ la.

Yozɛfu amu Maria na Yezo ala kpɛ agwe ka Egipito

13Awa kɔdɛ ĩ gwe wɛ ko, Yozɛfu ahũ suma, ko na ya suma ni ko, angelo tɛ Gbia asi gbɛlɛ lo, apa hɛ̃ lo ya: “Erodɛ na hɛ̃ngɔ nyɔ ya, agi nyi mɔ, agbɔ̃ lo aho lo. Wa lo vu, mɔ mu lo na ta lo, mɔ kpɛ na la, ĩ gwe ka sese ti Egipito. Ko mɔ ngbã na la kai, nga ka mbi pa hɛ̃ mɔ ya, mɔ diri wadila.”

14La Yozɛfu alo, amu nyingambi na ta lo, agwe na la na bi ni ko ka Egipito, 15angbã na la kai ngbĩi, nga ka la ko ndo Erodɛ akpi na ni. Lo ni ko asi ya, tɛnɛ mɛ ndo Gbia Nzapa akpã na nyɔ wa pangɔ nyɔ lo, la lo tɛnɛ ati na seni. Tɛnɛ ni lo mɛ: “Mbi ili Nyi mbi ka Egipito ya, lo lo kai lo si.”

Erodɛ ahĩ nyɔ ya akpɔ aya kɔli mɛ adɛ yakereni

16Ngoi mɛ ndo Erodɛ ĩ hũ ya, awa kɔdɛ ahanda ni ko, ngɔnzɔ agbɔ̃ lo sĩ. Na se tɛnɛ ko ndo awa kɔdɛ apa hɛ̃ lo na lo ti ngoi mɛ ndo tongolo afa na tɛrɛ lo ko, lo hɛ̃ nyɔ ya, akpɔ aya kɔli ti Bɛtlɛmɛ zu. Lo hɛ̃ nga nyɔ ya, akpɔ aya kɔli zu mɛ na tɔ̃ Bɛtlɛmɛ mɛ buru tɛ la ati se, nga na ala mɛ ta buru tɛ la adɛ ati sɛ ma. 17La tɛnɛ mɛ ndo Yeremia, wa pangɔ nyɔ Nzapa atɛnɛ ati na seni. Tɛnɛ ni lo mɛ:

18“Ndo ka kɔdɔrɔ mɛ ili ni la Rama ko,

Ama ndo zo ndode kɔngɔ, ndoto to, ndodema nga tɛrɛ lo sĩ nvɛni.

Adu ndo wali mɛ ili lo Rasɛlɛ la ndoto so aya lo,

Ko ta lo ye ndo ya, avɔrɔ bɛ ni ma,

Ta sanga ma, aya ni akpili wɛ.”

Yozɛfu amu Maria na Yezo adiri na la ka Izrayɛlɛ

19Ngoi mɛ Erodɛ ĩ kpi wɛ ko, Yozɛfu adu ka Egipito ahũ Suma, ko na ya suma ni ko, angelo tɛ Gbia asi gbɛlɛ lo, 20apa hɛ̃ lo ya: “Lo, mɔ mu nyingambi na ta lo, mɔ diri na la ka Izrayɛlɛ, ta sanga ma, azi ko ndo ndogingisa ya, ani ho nyingambi ko, ala kpili wɛ.”

21La Yozɛfu alo, amu nyingambi na ta lo, ala diri ka sese ti Izrayɛlɛ. 22Yozɛfu ĩ ma ya, Arkelausɛ ati gbia ti sese ti Yudea na mada tɛ to lo Erodɛ ko, mbɛtɔ ti dungɔ so Yudea agbɔ̃ lo.

Nzapa ĩ tisa lo na ya suma ko, lo mu nyingambi na ta lo, lo gwe na la ka sese ti Galilea, 23ala nɔ adu kɔdɔrɔ ka kɔdɔrɔ mɛ ili ni la Nazarɛtɛ. Lo ni ko asi ya, tɛnɛ mɛ ndo awa pangɔ nyɔ Nzapa atɛnɛ ati na seni. Tɛnɛ ni lo mɛ: “Azi na ilingɔ lo ya, lo wa Nazarɛtɛ.”

Currently Selected:

Matie 2: NGB87

Highlight

Copy