Matie 4

Satana atara bɛ Yezo

(Mar. 1.12-13; Luk. 4.1-13)

1So pɛni, Tɔrɔ Santo amu Yezo anɔ na lo ka bɛ ndo ya, Satana atara bɛ lo. 2Bi sui siɔ, lá nga sui siɔ, ta lo tɛ ndo ye ma, la gwɛ̃ agbɔ̃ lo. 3Satana anɔ ka tɔ̃nda lo, apa hɛ̃ lo ya: “Se mɔ du Nyi Nzapa ko, pa hɛ̃ atɛ̃nɛ olo agbinyangbi ati tɛ, mɔ tɛ.” 4Ko Yezo agbinya hɛ̃ lo ya: “Buku tɛ Nzapa apa ya: ‘Ta zo ndodu lɛ lo ngɛ̃ bo na lo ti tɛ ma, kanda zo ndodu lɛ lo ngɛ̃ na lo ti tɛnɛ zu mɛ Nzapa ndotɛnɛ!’ ”

5La Satana amu lo, agwe na lo ka Yeruzalɛmɛ, kɔdɔrɔ mɛ Santo, akpã lo ka bɛ li kota da Nzapa, 6apa hɛ̃ lo ya: “Se mɔ du Nyi Nzapa ko, zunda ge tise. Ta sanga ma, Buku tɛ Nzapa apa ya: ‘Nzapa ahɛ̃ gbanda nyɔ hɛ̃ aangelo tɛ lo na lo tɛ mɔ, ko ala lia mɔ ya, ta mɔ gu gɛrɛ mɔ na tɛnɛ ma, so mɔ ɔ̃ kã!’ ” 7Ko Yezo agbinya hɛ̃ lo ya: “Buku tɛ Nzapa apa nga ya: ‘Ta mɔ tara bɛ Gbia Nzapa tɛ mɔ ma!’ ”

8Satana ati amu lo, agwe na lo ka bɛ li hɔtɔ mɛ ganguruni, afa lo na akɔdɔrɔ zu mɛ na lɛ sese, nga na ndima ti akɔdɔrɔ ni, 9apa hɛ̃ lo ya: “Se mɔ kuku gbɛlɛ mbi mɔ vɔrɔ mbi ko, mbi hɛ̃ aye olo zu hɛ̃ mɔ.” 10La Yezo apa hɛ̃ lo ya: “Satana, ɔ lɛ mbi! Ta sanga ma, Buku tɛ Nzapa apa ya: ‘Ale mɔ vɔrɔ Gbia Nzapa tɛ mɔ, ko bo lo la ale mɔ li kwa hɛ̃ lo!’ ”

11La Satana adɔ lo azia, agwe. So pɛni, aangelo aga aza lo.

Yezo ato nda kwa tɛ lo ka Galilea

(Mar. 1.14-15; Luk. 4.14-15)

12Ngoi mɛ Yezo ĩ ma ya, Erodɛ ahɛ̃ nyɔ, la agbɔ̃ Yoanɛ, abi lo bɔlɔkɔ ko, lo nɔ ka sese ti Galilea. 13Ta lo ngbã ndo ka kɔdɔrɔ ti Nazarɛtɛ ma, kanda lo gwe ndo lo du ka Kapɛrnaumɛ, kɔdɔrɔ mɛ ka nyɔ kpo ti Galilea, ka sese ti Zabulona nga na ti Nɛfɛtali. 14Lo ni ko asi ya, tɛnɛ tɛ Ezai wa pangɔ nyɔ Nzapa ati na seni. Tɛnɛ ni lo mɛ:

15“Ĩ azi ti sese ti Zabulona,

Na ĩ azi ti sese ti Nɛfɛtali

Mɛ ĩ ndodu ka sese ti kota ngu ti Yurdɛnɛ,

Nga na ĩ azi ti Galilea mɛ ta ĩ du Ayuda ma,

16Nga ma la ĩ ndodu na ya mbingo ko,

Ĩ na hũngɔ ndo yango ngbɛ̃!

Wa tɛ ĩ azi mɛ ĩ ndodu nga ma azi mɛ akpili wɛ ko,

Ndo na vurungɔ ndo ĩ!”

17Ato na ngoi ko la Yezo ato nda pangɔ tɛnɛ tɛ Nzapa hɛ̃ azi ya: “Ĩ gbinya bɛ ĩ, ta sanga ma, Nzapa adoli so lɛngɔ gbia na ndo ĩ.”

Yezo aili akɔli siɔ mɛ awa hongɔ susu

(Mar. 1.16-20; Luk. 5.1-11)

18Ngoi mɛ Yezo so ndodɔ nɔ na tɛrɛ nyɔ kpo ti Galilea ko, lo hũ akɔli se mɛ adu ayata, ala awa hongɔ susu. Adu ndo Simɔ mɛ andoili lo ya Petro, na nyita lo Andre. Ala ndosa ndo gbanda ka ya kpo so gingɔ asusu. 19Yezo apa hɛ̃ la ya: “Ĩ ga e na ĩ e ɔ ndoni kɔi, ko mbi to ĩ, ĩ gi azi hɛ̃ Nzapa.” 20Bo na ngoi ni ko, ala dɔ gbanda tɛ la azia, ala na lo aɔ ndoni kɔi.

21Yezo ĩ ɔ ĩ yikɔ ko, lo hũ ambanga akɔli sɛ mɛ adu ayata. Adu ndo Zaki na Yoanɛ mɛ aya Zebedeo. Ala na to la Zebedeo ndo ndoni kɔi na ya ngɔ, ala ndolɛkɛ ndo gbanda tɛ la. La Yezo aili la. 22Bo na ngoi ni ko, ala dɔ ngɔ tɛ la, adɔ nga to la azia, ala na Yezo aɔ ndoni kɔi.

23Yezo afɔnɔ ndo ka sese ti Galilea zu. Lo ha azi na tɛnɛ tɛ Nzapa ka ya da sambela ti sese ni ko, lo pa Nzɔ̃ Pa ti lo Eɛngɔ Gbia tɛ Nzapa, lo sara nga awa ngã zu, nga na pɛnɔ zu mɛ na tɛrɛ azi. 24Azi ti sese ti Siria zu ama pa tɛ lo, ko ala ga ka tɛ lo na azi zu mɛ lɛ ngã ndɛ̃ ndɛ̃ ndɛ̃ tɛrɛ la, ala ga nga na ala mɛ lɛ pɛnɔ ndɛ̃ ndɛ̃ ndɛ̃ tɛrɛ la: ala mɛ na asiɔ tɔrɔ ya tɛrɛ la, awa pupuluka, nga na awa ngbengule, la lo sara la. 25Azi butu butu alo ka Galilea, alo ka sese ti Kɔdɔrɔ Sui Kɔi, alo ka Yudea, alo nga ka sese mɛ ka mbage ngu ti Yurdɛnɛ, ala zu agwe pɛ lo.

Currently Selected:

Matie 4: NGB87

Highlight

Copy