Marko 1

Yoanɛ apa tɛnɛ tɛ Nzapa

(Mat. 3.1-12; Luk. 3.1-18; Yoa. 1.19-28)

1Ĩ ma se mɛ Nzɔ̃ Pa tɛ Yezo Kristo Nyi Nzapa ato na nda ni lo mɛ. 2Ezai wa pangɔ nyɔ Nzapa asu ndo ka ya buku tɛ lo ya:

“Nzapa apa ya: ‘Ba, mbi to wa pangɔ kwa tɛ mbi uzu tɛ mɔ ya,

Lo lɛkɛ lege hɛ̃ mɔ, mɔ ɔ da.’

3Wa kwa ni ndoto mbela ka bɛ ndo ya:

‘Ĩ lɛkɛ lege alo mbiri mbiri hɛ̃ Gbia oo!’ ”

4Na lo ni ndo la Yoanɛ asi ka bɛ ndo so hɛ̃ngɔ batisimɔ hɛ̃ azi. Lo pa hɛ̃ la ya: “Ale ĩ gbinya bɛ ĩ, ĩ mu batisimɔ, wa Nzapa aka lɛ lo ndo asiɔ ye tɛ ĩ.” 5Azi gba mɛ ka sese ti Yudea, nga na azi gba mɛ ka kɔdɔrɔ mɛ ili ni la Yeruzalɛmɛ ndoga ka tɛ lo. Asiɔ ye mɛ ndo ala li ko, ala pa ndo ni na gbɛlɛ azi zu, la Yoanɛ ahɛ̃ la batisimɔ ka ya ngu mɛ ili ni la Yurdɛnɛ.

6Yoanɛ ndoyu ndo bɔngɔ mɛ alɛkɛ na kwa tɛrɛ sa mɛ ili lo la samo. Lo ndogbe ndo gba ti pɔrɔ sa na gu ya lo. Lo ndotɛ ndo amɔnyɔkpɔ̃, lo ndosũ ndo nga kpɔ̃ lavũ ti ya ndo. 7Lo pa hɛ̃ azi mɛ aga butu butu ya: “Zo mɛ na gangɔ pɛ mbi ko, lo ɔ mbi na nguru. Ta mbi du zo mɛ mbi lengbi bɛ ti wongɔ tɛrɛ mbi tise, zarangɔ kpu pɔrɔ tɛ lo, hãngɔ ni na gɛrɛ lo ma. 8Mbi ndoyɔrɔ ĩ na ya ngu so hɛ̃ngɔ ĩ batisimɔ, kanda tɛ lo ko, lo na sangɔ Tɔrɔ Santo tɛrɛ ĩ so hɛ̃ngɔ ĩ batisimɔ.”

Yoanɛ ahɛ̃ Yezo batisimɔ

(Mat. 3.13—4.11; Luk. 3.21-22; 4.1-13)

9Yezo alo ka Nazarɛtɛ, kɔdɔrɔ mɛ ka sese ti Galilea, aga ka tɛ Yoanɛ, la Yoanɛ ahɛ̃ lo batisimɔ ka ya ngu mɛ ili ni la Yurdɛnɛ. 10Ngoi mɛ Yezo alo ka ya ngu so ndoko gegi ko, lo hũ lɛ ndozu azi mbue! Tɔrɔ Santo aga nga ma mbipa, azu ndo lo. 11Ko legɔ̃ zo adu ka ndozu apa ya: “Mɔ Nyi mbi ti kpɔ̃ bɛ mbi, bɛ mbi ndode na lo tɛ mɔ sĩ.”

Satana atara bɛ Yezo

12Ngoi mɛ Yezo ako gegi wɛ ko, Tɔrɔ Santo amu lo, agwe na lo ka bɛ ndo. 13Lo la kai bi sui siɔ, ko Satana atara bɛ lo. Lo ndodu ndo kai na popo tɛ asa ti ya ndo, ko aangelo ndoza ndo lo.

Yezo aili azi siɔ mɛ awa hongɔ susu

(Mat. 4.12-22; Luk. 4.14-15; 5.1-11)

14Erodɛ ahɛ̃ nyɔ, agbɔ̃ Yoanɛ abi lo bɔlɔkɔ. Na ngoi ni ko, Yezo anɔ ka sese ti Galilea, apa Nzɔ̃ Pa tɛ Nzapa ya: 15“Ngoi ti gangɔ tɛ Nzapa alengbi wɛ, Nzapa adoli so lɛngɔ gbia na ndo ĩ! Ale ĩ gbinya bɛ ĩ, í ye Nzɔ̃ Pa tɛ lo!”

16Ngoi mɛ Yezo so ndodɔ nɔ na tɛrɛ nyɔ kpo ti Galilea ko, lo hũ Simɔ na nyita lo Andre mɛ awa hongɔ susu. Ala ndosa ndo gbanda ka ya kpo so gingɔ asusu. 17Yezo apa hɛ̃ la ya: “Ĩ ga, e na ĩ e ɔ ndoni kɔi, ko mbi to ĩ, ĩ gi azi hɛ̃ Nzapa.” 18Bo na ngoi ni ko, ala dɔ gbanda tɛ la azia, ala na lo aɔ ndoni kɔi.

19Ala ĩ ɔ yakere ko, ala hũ Zaki na nyita lo Yoanɛ mɛ aya Zebedeo. Ala so ya ngɔ, so ndolɛkɛ gbanda tɛ la. 20Bo na ngoi ni ko, Yezo aili la, ala zia to la Zebedeo, nga na awa kwa tɛ lo so ya ngɔ, ala na Yezo aɔ ndoni kɔi.

Yezo atoma siɔ tɔrɔ na ya tɛrɛ kɔli kɔi

(Luk. 4.31-37)

21Yezo na ava lo anɔ ka kɔdɔrɔ mɛ ili ni la Kapɛrnaumɛ. Ĩ da na lá ti wɔngɔ tɛrɛ ko, Yezo ali ya da sambela, ato nda hangɔ la na lo tɛ Nzapa. 22Ngoi mɛ Yezo ĩ kɔ nda hangɔ azi na lo tɛ Nzapa wɛ ko, ala bema sĩ na lo ti se kɔdɛ tɛ lo ti hangɔ ye. Ta sanga ma, lo ha ndo la na ye ni nga ma se tɛ gbia. Ta lo ha ndo la na ni nga ma se tɛ awa hangɔ ndia ma.

23Bo na ngoi ni ko, kɔli kɔi mɛ na siɔ tɔrɔ ya tɛrɛ lo aga, ali ya da sambela ni ko, adɛrɛ kɔngɔ ya: 24“Oo Yezo wa Nazarɛtɛ, ye mɛ mɔ ye lingɔ na e nɛ? Mɔ ga ya mɔ ho e? Mbi hĩnga mɔ nzɔ̃ni. Mɔ Santo mɛ Nzapa ato mɔ!” 25Yezo ĩ ma so ko, agbo ndo siɔ tɔrɔ ko, ahɛ̃ nga nyɔ hɛ̃ lo ya: “Kai so, si ya tɛrɛ kɔli olo mɛ!” 26Siɔ tɔrɔ ayingi kɔli ko kpu kpu kpu, alo ka ya tɛrɛ lo, asi na kota kɔngɔ nyɔ lo buai. 27Azi zu ĩ hũ so ko, ala bema, la ala hũndangbi tɛrɛ la ya: “Oko alengbi na nɛ? Yezo aha lo ti fanani nga ma se tɛ gbia nvɛni! Zo kɔli olo ndohɛ̃ nyɔ hɛ̃ asiɔ tɔrɔ, ko ala ndoma nyɔ lo o!” 28Ta ĩ ninga ma ko, pa ili Yezo ati gboo na lɛ sese ti Galilea zu.

Yezo asara awa ngã ma wo ma

(Mat. 8.14-17; Luk. 4.38-41)

29Yezo na Zaki nga na Yoanɛ azia da sambela, anɔ bo na ngoi ni ko ka ya da tɛ Simɔ na Andre. 30Ala ĩ si kai ko, ala tã wogara Simɔ ase tise, ta sanga ma, tɛrɛ lo ndogbi. Bo na ngoi mɛ Yezo ĩ si kai ko, azi apa hɛ̃ lo, lo ti ngã tɛ wogara Simɔ.

31La Yezo anɔ ka tɔ̃nda lo, agbɔ̃ ti lo, aya lo ndozu, ko tɛrɛ lo ade le le le. La lo hɛ̃ la tɛ.

32Ndɔ ĩ de, na ngoi mɛ lá ĩ ti wɛ ko, azi alɔ awa ngã zu, alɔ nga azi mɛ na asiɔ tɔrɔ ya tɛrɛ la, aga na la ka tɛ Yezo. 33Azi zu mɛ so ya kɔdɔrɔ ko abombi tɛrɛ la ndoni kɔi so nyɔ da mɛ fɛrɛ Yezo da. 34La lo sara azi gba mɛ na lɛ ngã tɛrɛ la ndɛ̃ ndɛ̃ ndɛ̃, lo toma nga asiɔ tɔrɔ gba na ya tɛrɛ azi. Lo gbanzi asiɔ tɔrɔ ni ya, ta ala tɛnɛ tɛnɛ ma, na lo mɛ ya, ala hĩnga lo nzɔ̃ni.

Yezo afɔnɔ na lɛ sese ti Galilea

(Luk. 4.42-44)

35Ĩ la bu ndã ĩ de, na gbe bi nvɛni ko, Yezo alo ka ya da asi, agwe ka bɛ ndo so sambelangɔ Nzapa. 36Simɔ na afɔ̃ lo anɔ so gingɔ lo. 37Ngoi mɛ ala ĩ tã lo ko, ala pa hɛ̃ lo ya: “Azi zu ndogi mɔ.” 38Yezo agbinya hɛ̃ la ya: “É gwe ka ndo mɛ ndɛ̃, ka ya kɔdɔrɔ mɛ tɔ̃nda e. Ale mbi pa nga tɛnɛ tɛ Nzapa kai, ta sanga ma, mbi ga ge lɛ sese na lo ni.” 39So pɛni, lo fɔnɔ na lɛ sese ti Galilea zu, so pangɔ tɛnɛ tɛ Nzapa na ya ada sambela, lo toma nga asiɔ tɔrɔ na ya tɛrɛ azi.

Yezo asara wa ndiba

(Mat. 8.1-4; Luk. 5.12-16)

40Mbanga wa ndiba kɔi aga ka tɛ Yezo, akuku gbɛlɛ lo, adema tɛrɛ lo hɛ̃ lo ya: “Mɔ na nguru ti sarangɔ mbi, wa se bɛ mɔ aye ko, mɔ sara mbi.” 41Vundu tɛ wa ndiba ko agbɔ̃ Yezo ma wo ma, la Yezo aye ti lo, abɔrɔ tɛrɛ lo, apa hɛ̃ lo ya: “Mbi ye, ndiba tɛ mɔ awe!” 42Bo na ngoi ni ko, ndiba tɛ kɔli ko awɛ, tɛrɛ lo ati nzɔ̃ni. 43-44Ko Yezo ahɛ̃ nyɔ kpengbani hɛ̃ lo ya: “Ma mbi kpa, ta mɔ pa lo ni hɛ̃ zo kɔi ma. Wa nɔ ka tɛ wa lungɔ Nzapa na ye, mɔ fa lo na se mɛ tɛrɛ mɔ ati na ni. So pɛni, mɔ lu Nzapa na ye mɛ ndo Mɔizɛ alu ndia ni, so fangɔ na azi zu ya, ndiba tɛ mɔ awɛ. Wa gwe bo na olo mɛ.” 45Kanda ngoi mɛ kɔli ko ĩ gwe ko, lo to nda pangɔ hɛ̃ azi zu se mɛ fɛrɛ Yezo asara na lo. Na lo ni ndo ko, ta kɔdɛ mɛ ya, Yezo ati fa tɛrɛ lo yango ka ya kɔdɔrɔ ti ya Galilea da ma. Kanda lo ngba ndo ka bɛ ndo. La azi alo na ndo kwe zu, anɔ ka tɛ lo.

Currently Selected:

Marko 1: NGB87

Highlight

Copy