Marko 13
13
Yezo apa lo ti kota da Nzapa mɛ azi na karangɔ lupu lupu
(Mat. 24.1-2; Luk. 21.5-6)
1Ngoi mɛ Yezo ĩ lo ka ya kota da Nzapa ĩ si ko, mbanga lɔ va lo kɔi apa hɛ̃ lo ya: “Wa hangɔ lo tɛ Nzapa, ba anzɔ̃nzɔ̃ tɛ́nɛ mɛ awa na da olo hĩ! Da ni akɔnɔ nga sĩ!” 2Yezo agbinya hɛ̃ lo ya: “Mɔ hũ se mɛ da olo akɔnɔ na ni. Mbanga lá kɔi gbanda ko, azi akara gbanda ni zu asa tise, ko ta le tɛ́nɛ kɔi angbã gbanda ndo fɔ̃ lo ma.”
Asiɔ lo mɛ na singɔ uzu ti nda sese wɛngɔ
(Mat. 24.3-14; Luk. 21.7-19)
3Yezo ama ka ndo hɔtɔ mɛ so mbage lɛ kota da Nzapa, adu tise. Ili hɔtɔ ni la hɔtɔ ti Olivie. Bo Petro, na Zaki, na Yoanɛ, nga na Andre ndo la angbã so tɔ̃nda lo. Ko ala hũnda lo ya: 4“Pa hɛ̃ e, da Nzapa ni akara gbanda lá wa? Ló mɛ gbanda afa ya, ngoi ti alo ni ko zu alengbi wɛ nɛ?” 5La Yezo apa hɛ̃ la ya: “Ale ĩ du na kpengba lɛ, so azi ahanda ĩ. 6Ta sanga ma, azi gba aga gbanda na ili mbi, ko zo kɔi kɔi na popo tɛ la apa gbanda ya, ni Mɛsia. Ko ala handa gbanda azi gba. 7Ngoi mɛ gbanda ĩ ma pa ti to mɛ azi ndotiri so tɔ̃nda ĩ, bere pa ti to mɛ azi ndotiri ka yɔngɔrɔ ndo ko, ta ĩ du na mbɛtɔ ma. Ale alo ni ko asi, kanda ta nda sese awe gbanda bo na ngoi ni ko ma. 8Azi ti mbanga kɔdɔrɔ na afɔ̃ la ti kɔdɔrɔ mɛ ndɛ̃ atiri gbanda to, ambanga gbia abi gbanda to tɛrɛ afɔ̃ la. Sese ayingi gbanda na ndo ndɛ̃ ndɛ̃ ndɛ̃, gwɛ̃ aya nga gbanda. Alo ni ko zu adu gbanda nga ma se pɛnɔ ti gwa mɛ ndotɛ wali uzu ti lo dúngɔ nyi.
9“Wa tɛ ĩ ko, ale ĩ nvɛni, ĩ du na kpengba lɛ. Ale ĩ gbe bɛ ĩ na ya pɛnɔ mɛ gbanda ĩ hũ. Ta sanga ma, azi ahɛ̃ gbanda nyɔ ya, agbɔ̃nɔ ĩ, agwe na ĩ ka tɛ awa fangɔ ngbanga. Azi asɔ̃nɔ ĩ gbanda na fimbo na ya da sambela tɛ Ayuda. Ala hɛ̃ gbanda nyɔ ya, asi na ĩ ka gbɛlɛ akota azi asi nga na ĩ ka gbɛlɛ agbia na lo tɛ mbi. Ko adu ngoi mɛ gbanda ĩ du atemwɛ so pangɔ tɛnɛ tɛ mbi ka gbɛlɛ la la. 10Ale apa Nzɔ̃ Pa tɛ Nzapa uzu hɛ̃ azi kwɛ zu ti lɛ sese, wa nda sese awɛ. 11Ngoi mɛ gbanda agbɔ̃nɔ ĩ, anɔ na ĩ ka gbɛlɛ awa fangɔ ngbanga ko, ta ĩ pia ĩ kpã bɛ ĩ ngbũ na se kɔdɛ mɛ ĩ na bɛrɛngɔ na nyɔ ĩ ka gbɛlɛ la ma. Kanda na ngoi ko gbanda ko, ĩ tɛnɛ bo tɛnɛ mɛ Nzapa na tongɔ ka bɛ ĩ. Ta sanga ma, ta ĩ nvɛni la na tɛnɛngɔ tɛnɛ ni ma, adu Tɔrɔ Santo la na tɛnɛngɔ tɛnɛ ni na se lɛ ĩ. 12Ambanga azi na kangɔ ayata la nvɛni ya, aho la. Ambanga ato ayangambi na lingɔ aya la nga so. Ayangambi na sabangɔ tɛrɛ awa dúngɔ la, ala nga na kangɔ awa dungɔ la ya, aho la. 13Bɛ azi zu akɛ̃ gbanda ĩ ka ka ka na lo tɛ mbi. Kanda zo ko la agbe bɛ lo na ya pɛnɔ ni ngbĩi akpi da ko, Nzapa aso tɔrɔ tɛrɛ lo.”
Siɔ ye mɛ ndosu mbɛtɔ bɛ zo
(Mat. 24.15-28; Luk. 21.20-24)
14Yezo apa ya: “Ĩ hũ gbanda ye mɛ andoili ya: ‘Siɔ ye mɛ ndosa mbɛtɔ bɛ zo.’ Azi akpa gbanda ni na ndo mɛ ta alengbi ya, akpa ni da ma. (Ale wa dingɔ tɛnɛ olo ahĩnga nda ló ni ko nzɔ̃ni!) Na ngoi ni ko, ale azi mɛ ka sese ti Yudea akpɛlɛ gbanda agwe ka ndo hɔtɔ. 15Na la ko gbanda ko, ta zo alo gbanda ka gegi, ali ya da ya ni lɔ ye, ni kpɛ na ni ma. 16Se tɛ zo mɛ nga gbanda ka yaka la, ta lo lo gbanda ka yaka, lo diri ka ya da so mungɔ kota bɔngɔ tɛ lo ma. 17Awe mɛ ata ngɔ, na awe mɛ ndoã aya la ahũ gbanda pɛnɔ na ngoi ni ko sĩ! 18Ale ĩ vɔrɔ Nzapa ya, ta pɛnɔ ni ko asi na ngoi ti de ma. 19Ta sanga ma, azi ahũ gbanda pɛnɔ na ngoi ni ko sĩ. Pɛnɔ mɛ ta azi ade ahũ ma, ka ndo la Nzapa ali na sese ngbĩi asi na lá olo mɛ. Ta azi ati hũ gbanda pɛnɔ nga so fani mɛ ndɛ̃ ma. 20Se ta adu ya, Gbia Nzapa nvɛni la adiri na bi ti pɛnɔ ni angbã nduruni ma ko, ale ta zo kɔi alengbi ti ngbãngɔ lɛ lo ngɛ̃ ma. Kanda lo diri ndo na bi ni angbã yakere, na lo tɛ azi mɛ lo sara la lo kpa ya, ala du azi tɛ ni.
21“Se mbanga zo aga gbanda so handangɔ ĩ ya, ĩ ba Mɛsia lo ge, bere lo pa ya, ĩ ba lo la kai ko, ta ĩ ye ma. 22Ta sanga ma, awa hangɔ lo tɛ Nzapa na nvɛnɛ aga gbanda, ko zo kɔi kɔi apa gbanda ya, ni Mɛsia, bere ni wa pangɔ nyɔ Nzapa. Ala li gbanda akukuna ye nga na aye ti kpɛnɛ ya, se alengbi ko, ani handa azi mɛ Nzapa asara la akpã ya, ala du azi tɛ ni. 23Wa mbi pia mbi tisa ĩ uzu na lo ti aye kwɛ zu mɛ na gangɔ ya, ĩ du na kpengba lɛ.”
Gangɔ tɛ Nyi Zo
(Mat. 24.29-31; Luk. 21.25-28)
24Yezo apa ya: “Ko ngoi mɛ gbanda azi ahũ pɛnɔ ko wɛ ko, ta lá ati sũ gbanda ma, ta nzɛ̃ ati sũ nga gbanda ma. 25Atongolo alo gbanda ka lɛ ndozu, asa ge tise, aye ti nguru mɛ ka le ndozu ayingi nga gbanda. 26Ko azi ahũ gbanda mbi Nyi Zo, mbi na gangɔ na ya da baba na kota nguru, nga na ndima. 27Mbi to gbanda aangelo na ndo kɔi kɔi na lɛ sese zu ya, ala bombi azi tɛ mbi mɛ mbi sara la mbi kpã.”
Nda matɔ ti kɛkɛ mɛ ili ni la figie
(Mat. 24.32-35; Luk. 21.29-33)
28Yezo apa ya: “Ĩ ma tɛnɛ mɛ mbi na tɛnɛngɔ na ndo matɔ ti kɛkɛ figie, ko ale ĩ hĩnga ni lo mɛ: ngoi mɛ angbina kugbe ni adara tise, ko afana kugbe ato nda tɔ̃ngɔ ko, ĩ ndohĩnga ya, zongo adoli ti singɔ. 29Se gangɔ tɛ mbi nga la. Ngoi mɛ gbanda ĩ hũ aye mɛ mbi pa lo ni hɛ̃ ĩ ato nda singɔ ko, ale ĩ hĩnga ya, mbi Nyi Zo, mbi doli ti gangɔ. Mbi lo na tɔ̃ nyɔ ngise. 30Mbi pa hɛ̃ ĩ ti beta tɛnɛ ya, azi ko la ade lɛ la ngɛ̃ na olo ko, ta ala zu akpili gbanda uzu, wa aye ni ko zu asi ma. 31Ndozu na sese awe gbanda, kanda ta tɛnɛ tɛ mbi awe gbanda bɛ gbɔ ma.”
Bo Nzapa kɔi la abinga ngoi mɛ gbanda sese awɛ na ni
(Mat. 24.36-44)
32Yezo apa ya: “Ta zo kɔi ahĩnga gbanda bi ni, bere ngoi ni ko ma. Abɛ nga aangelo mɛ ka yayu, abɛ nga mbi Nyi Nzapa ko, ta mbi hĩnga nga ngoi ni ko ma. Bo To mbi kɔi la ahĩnga ngoi ni ko. 33Wa ĩ du na kpengba lɛ, ta ĩ la langɔ ma, ta sanga ma, ta ĩ hĩnga gbanda ngoi ni ko ma. 34Ngoi ni ko na dungɔ nga ma se mɛ zo ndoga so gwengɔ fɔnɔ. Na ngoi ti ɔngɔ tɛ lo ko, lo zia aye ti da kwe zu na ti awa kwa tɛ lo, lo kangbi la kɔi kɔi na kwa. Ko lo hɛ̃ nyɔ hɛ̃ wa batangɔ nyɔ ngise ya, lo du lɛ lo ngɛ̃, lo bata nyɔ ngise nzɔ̃ni. So pɛni ko, nvɛ̃ da azia la aɔ.” 35Ko Yezo apa nga hɛ̃ ava lo ya: “Ale ĩ du lɛ ĩ ngɛ̃, na lo mɛ ya, ta ĩ hĩnga ngoi mɛ nvɛ̃ da na diringɔ ma. Bere lo na diringɔ na ndɔ ee, bere na bɛ bi ee, bere na kɔzo kɔndɔ ee, bere na nda perere nvɛni ee, ta ĩ hĩnga ma. 36Ĩ du na kpengba lɛ ya, se lo si va ko, ta lo tã ĩ na langɔ ma. 37Tɛnɛ olo mbi tɛnɛ hɛ̃ ĩ ko, mbi tɛnɛ nga ni hɛ̃ azi mɛ ndɛ̃ zu, wa í du lɛ ĩ ngɛ̃!”
Currently Selected:
Marko 13: NGB87
Highlight
Share
Copy
Want to have your highlights saved across all your devices? Sign up or sign in
Ngbandi New Testament © United Bible Societies, 1987.
