Marko 4

Matɔ tɛ wa kĩngɔ ale tɛ

(Mat. 13.1-9; Luk. 8.4-8)

1Yezo ati ha azi na tɛnɛ tɛ Nzapa na nyɔ kpo ti Galilea. Lo ĩ hũ ya, azi butu butu abombi tɛrɛ la so tɔ̃nda ni ko, lo ko ya ngɔ mɛ ka lɛ ngu lo du, la azi angbã tɛ la ka ndo gegi, so nyɔ tungu. 2Lo ha la na ye ndɛ̃ ndɛ̃ ndɛ̃ na ya tongɔ matɔ tɛ lo. Ko na ya ye mɛ lo ha na la ko, lo pa hɛ̃ la ya: 3-4“Ĩ ma la! Mbanga zo kɔi anɔ ka yaka so kĩngɔ ale tɛ. Ngoi mɛ lo so ndokĩ ale tɛ ni ko, ambanga ale tɛ ni asa so bɛ lege, ko ahũ aga adɛrɛ ni atɛ. 5Ambanga ale tɛ ni asa na ndo sese mɛ aalingbi tɛrɛ lo na tɛ́nɛ. Ale tɛ ni ako hiɔ, ta sanga ma, sese ni yakere. 6Lá ĩ sũ baka baka ko, agbiri atɛ mɛ akoro, ko atɛ ni aulɛ, na lo mɛ ya, ta ambatana ni ali sese kpa ma. 7Ambanga ale tɛ mɛ ndɛ̃ asa na ya sã ti kĩ. Ngoi mɛ asã ti kĩ ĩ mai ko, avĩvĩ atɛ mɛ akoro, ta kɔdɛ mɛ ya, tɛ ni ale da ma. 8Kanda ambanga ale tɛ mɛ ndɛ̃ asa na nzɔ̃ sese, ako, amai, ahɛ̃ nga le tɛ: ambanga le tɛ ni sui ta, ambanga sui mana, ambanga mɛ ndɛ̃ ngbangbo kɔi.” 9So pɛni, Yezo apa hɛ̃ la ya: “Zo ko la ma lo adu da ko, ale lo ma!”

Nda mɛ Yezo ndotrnɛ tɛnɛ na ya matɔ

(Mat. 13.10-17; Luk. 8.0-10)

10Ngoi mɛ Yezo azia azi butu butu aɔ, ayikɔ ko, azi mɛ ndo so tɔ̃nda lo, na ava lo sui kɔi ndoni sɛ ahũnda lo ya, lo tɔndɔ hɛ̃ ani nda amatɔ mɛ lo ndopa. 11Yezo agbinya hɛ̃ la ya: “Na ndo tɛnɛ ko ti lo Lɛngɔ Gbia tɛ Nzapa ko, bo ĩ la Nzapa afa ĩ na lo mɛ ta azi ahĩnga ma. Kanda azi mɛ ndɛ̃ ndoma tɛnɛ tɛ lo bo na ya matɔ, nga ma se mɛ asu na ni ka ya Buku tɛ Nzapa ya:

12‘Ala ba ndo, wa ta ala hũ ye kɔi ma.

Ala ma tɛnɛ, wa ta ala hĩnga nda ni ma,

So ala gbinya bɛ la, ko Nzapa aka le lo ndo siɔ ye tɛ la!’ ”

Yezo atɔndɔ nda matɔ tɛ wa kĩngɔ ale tɛ

(Mat. 13.18-23; Luk. 8.11-15)

13Yezo apa hɛ̃ la ya: “Ta ĩ ma nda matɔ ni ko ma? Wa ĩ na mangɔ nda amatɔ mɛ ndɛ̃ zu nga sia? 14Wa kĩngɔ ale tɛ adu nga ma wa pangɔ tɛnɛ tɛ Nzapa. 15Ambanga azi adu nga ma bɛ lege mɛ ale tɛ asa da. Bo na ngoi mɛ ala ma tɛnɛ ni wɛ ko, Satana aga alia ni ka ya bɛ la azi. 16Azi mɛ ndɛ̃ adu nga ma sese mɛ aalingbi tɛrɛ lo na tɛnɛ! Bo na ngoi mɛ se ala ma tɛnɛ tɛ Nzapa ko, ala ye lo ni na dengɔ bɛ. 17Kanda ta tɛnɛ ni ali bɛ la ma. Ala ye lo ni bo ti pɛ ngoi yakere. Na ngoi mɛ se ala to nda hũngɔ pɛnɔ, bere se azi ato nda hɛ̃ngɔ la pɛnɔ na lo tɛnɛ tɛ Nzapa ko, ala dɔ lege ti lo yengɔ lo tɛ Nzapa vakpa azia. 18Ambanga azi mɛ ndɛ̃ adu nga ma ale tɛ mɛ asa na popo ti asã ti kĩ. Ala ndoma tɛnɛ tɛ Nzapa, 19wa se sɔngɔ bɛ Ti alo ti sese olo, na dengɔ bɛ ti nwa mɛ alengbi ti handangɔ zo, nga na gwɛ̃ ti aye ndɛ̃ ndɛ̃ ndɛ̃ ako ndo bɛ la ko, avi tɛnɛ tɛ Nzapa kpu, ko ta se mɛ ya, tɛnɛ ni ale da ma. 20Kanda ambanga azi mɛ ndɛ̃ adu tɛ la nga ma ale tɛ mɛ asa na nzɔ̃ sese. Ngoi mɛ se ala ma tɛnɛ tɛ Nzapa ko, ala ye lo ni, ko ala hɛ̃ le. Ambanga azi ni ndohɛ̃ le sui ta, ambanga sui mana, ambanga mɛ ndɛ̃ ngbangbo kɔi.”

Matɔ ti mɔinda

(Luk. 8.16-18)

21Yezo apa hɛ̃ la ya: “Ta zo ndozɔ mɔinda ya, ni kpã na gbɛ ta, bere na gbɛ tange ma! Kanda zo ndozɔ ni ya, ni kpã na ndo mɛsa. 22Ye kwɛ zu ko la Nzapa ahɔndɛ ko, asi gbanda yango. Ye zu ko la na gbe mbingo ko, asi nga gbanda yango ngbɛ̃! 23Zo ko la ma lo adu da ko, ale lo ma!”

24Yezo apa nga hɛ̃ la ya: “Ale ĩ bata li ĩ na lo ti tɛnɛ mɛ ĩ ndoma! Ko ye mɛ Nzapa na hɛ̃ngɔ ĩ ko, lo na hangɔ na ye mɛ ndo ĩ nvɛni ndohɛ̃ afɔ̃ ĩ, ko lo kpa nga gbanda omɛ ndɛ̃ ndo ni! 25Ta sanga ma, zo ko la adu na ye ko, Nzapa akpa gbanda ye mɛ ndɛ̃ ndo ni. Wa tɛ zo ko la na nyi ye ko, Nzapa amu gbanda nyi ye ni ti lo.”

Matɔ ti ale tɛ mɛ ako na bɛ lo

26Yezo apa hɛ̃ la ya: “Lo Lɛngɔ Gbia tɛ Nzapa akpa nga ma zo mɛ akĩ ale tɛ ka yaka tɛ lo. 27So pɛni, bɛ se lo la langɔ na bi, bɛ se lo zingɔ na nda perere lá kwɛ lá kwɛ na ngoi ni ko, ta lo hĩnga se mɛ ale tɛ tɛ lo ndoko na ni, nga na se mɛ ndomai na ni ma. 28Sese nvɛni la ahɛ̃ ale tɛ ni ko. Ye mɛ ndosi uzu la kugbe ti tɛ, so pɛni da ti tɛ, ti ndani gbɔ ko, le tɛ amai nzɔ̃ni na ya da ni. 29Ngoi mɛ le tɛ ni avuru ko, zo mɛ akĩ ale tɛ ato nda kɔrɔngɔ ni, ta sanga ma, ngoi ni alengbi.”

Matɔ ti ale tɛ mɛ ili ni la mutardɛ

(Mat. 13.31-32,34; Luk. 13.18-19)

30So pɛni, Yezo apa hɛ̃ la ya: “Ye mɛ e lengbi ti hangɔ na lo Lɛngɔ Gbia tɛ Nzapa nɛ? Matɔ mɛ e mu, ko e ha na lo Lɛngɔ Gbia tɛ lo nɛ? 31Lo Lɛngɔ Gbia tɛ lo akpa nga ma ale tɛ mɛ andoili ya mutardɛ. Ngoi ko la akĩ ni ko, adu ale tɛ mɛ yakere buai, aɔ aale tɛ ti lɛ sese zu. 32Kanda ngoi mɛ amai ko, ati kɛkɛ mɛ kotani buai, aɔ ndo akɛkɛ zu. Akati ni ati nga kotani buai, ko ahũ alengbi ti gangɔ wangɔ da tɛ la na gbede ni.”

33Ĩ ba se mɛ Yezo ndoha azi na tɛnɛ tɛ Nzapa na ya matɔ sĩni, gi tɛrɛ omɛ la. Lo ndoha tɛnɛ tɛ lo na se mɛ zo kɔi kɔi alengbi ti rnangɔ ni. 34Lo ndotɛnɛ tɛnɛ hɛ̃ la ngoi zu gi na matɔ. Kanda ngoi mɛ lo na ava lo ndongbã na kunɛ la ko, lo ndotɔndɔ nda ni hɛ̃ la.

Yezo agbanzi kpengba yá ka lɛ ngu

(Mat. 8.23-27; Luk. 8.22-25)

35Ĩ ti na ndɔ ti lá ni ko, Yezo apa hɛ̃ ava lo ya: “E fa ngu.” 36La ala zia azi mɛ fɛrɛ aga butu butu so ndo ko aɔ. Ava Yezo ako ya ngɔ mɛ fɛrɛ Yezo da, ala ɔ na lo. Ambanga ngɔ mɛ ndɛ̃ ndo nga so tɔ̃nda la, ko ala gwe ndo ndoni kɔi. 37-38Ngoi mɛ ala so ndogwe ko, Yezo ase tɛ lo ka nda ngɔ, ako li lo na koli, ala langɔ. Kpengba yá ato nda yangɔ wuuu wuuu wuuu! Mɔpo so ndosa na ya ngɔ pua pua, ngu asĩ ya ngɔ mɛkɛ̃. Ava lo azingɔ lo, apa hɛ̃ lo ya: “Wa hangɔ e na lo, e na kpilingɔ, ko mɔ hũ ka lɛ mɔ gɛgɛrɛ?” 39Yezo azingɔ, agbo ndo yá, agbo nga ndo ngu ti kpo ya: “Du kpɔ! Kai so!” Ko yá azia yangɔ, la lɛ ngu ade ngĩ. 40So pɛni, Yezo ahũnda ava lo ya: “Nda mɛ mbɛtɔ agbɔ̃ ĩ so nɛ? Ta ĩ dɛ ĩ ye lo tɛ mbi ma?” 41Mbɛtɔ agbɔ̃ ndo la aɔ ndoni, ko ala tɛnɛ na popo tɛ la ya: “Kɔli olo lo na? Abɛ nga yá na ngu ti kpo ama nyɔ lo o!”

Currently Selected:

Marko 4: NGB87

Highlight

Copy