EFETIKILO 3
3
1Onyõha ya velelepo oku nyanga, ovinyama viosi viovusenge via lulika Yehova Suku vi sule. Kuenje ya pula ukãi yiti, Ocili Suku wa popia hati, Ko ka li koviti viosi viovocumbo, ale? 2Ukãi wa kumbulula onyõha hati, Tuakuakulia kapako oviti viovocumbo; 3te epako liuti owo u kasi vokati kocumbo, owo Suku a linga hati, Ko ka liko, ndaño oku lambako, sanga vu fa. 4Onyõha ya popia lukãi yiti, Mbu, okufa ka vu fi; 5momo Suku wa kulĩha okuti eteke vu liako, ovaso ene haico a letuluka kuenje vu linga nda Suku, vu kulĩha eci ciwa leci cĩvi. 6Ukãi yu wa mõla uti okuti wa posokela oku liako, haiwo wa posokela oku u tala, haiwo uti wa soliwila oku eca olondunge, yu wa yunga epako, kuenje wa lia; wa ecavo limue ku veyaye kuenje wa liavo. 7Oco ovaso avo a situluka kavali kavo, kuenje va lilimbuka okuti va kasi ño epõlõla; oco va litongela amẽla akuyu ha va liluvikiyila okowalo.
8Va yeva ondaka ya Yehova Suku eci a ñuala ñuala vocumbo koñolosi; oco ulume lukãi waye va salama kolonyima vioviti viovocumbo oku tila Yehova Suku. 9Yehova Suku yu wa kovonga ulume, wo pula hati, O kasi pi? 10Eye wa kumbulula hati, Nda yevela ondaka yove vocumbo kuenje nda kuata usumba, omo ñasi ño epõlõla oco nda salamẽla. 11Eye hati, Wa ku sapuila hati, O kasi epõlõla, helie? Mbi wa lia kuti una nda ku handeleka siti, Ku ka lieko? 12Eye ulume wa popia hati, Ukãi una wa nyiha oku kala lame, eye wa nyihako epako liuti waco kuenje nda lia. 13Yehova Suku wa pula ukãi hati, Oco hẽ, nye wa ci lingila? Ukãi wa kumbulula hati, Onyõha ya ndueyisa kuenje nda lia. 14Yehova Suku wa popia lonyõha hati,
Omo wa linga ndoco,
wa siñaliwa pokati kovinyama viosi viovimbo
kuenda ovinyama viosi viovusenge.
Imo liove o likoka posi
hu lialia eve
oloneke viosi viomuenyo wove
15Ñapa ukuse pokati kene, love lukãi,
lo pokati kombuto yove lombuto yaye.
Eye o sasõla utue wove,
kuenje ove u lumana kocisendemãi.
16Wa popia lukãi hati,
Ha luisa olongembia viove koku cita kuove;
o cita cita omãla lolongembia,
haimo onjongole yove yi kala kulume wove,
leye o ku viala.
17Ku Adama wa linga hati,
Omo wa tava kondaka yukãi wove
kuenje wa lia kuti una
nda ku handeleka, siti,
Ku ka lieko,
oco osi yi siñalĩwa.
O liako lohali oloneke viosi viomuenyo wove;
18yi ku imĩla olosongo loholokoso;
kuenje o lialia ovikũla viovusenge.
19O lialia okulia kuove
lesalamĩho liokopolo yove,
toke eteke o tiukila vali keve;
momo haiko wa tundile.
Ove ukueve, keve haiko o tiukila.
20Ulume yu wa luka onduko yukãi waye hati, Heva, momo eye nyõho yava vosi va kasi lomuenyo. 21Kuenje Yehova Suku wa tungila Adama lukãi waye ovikutu viovipa, yu wa va walisa.
22Oco Yehova Suku wa popia hati, Ota, ulume wa linga ndetu, kaliye o kulĩha eci ciwa leci cĩvi; kandopo sanga õluĩla okuokuo kuaye kuti womuenyo loku kotolako ha li, hã ha kala hũ lomuenyo, 23oco Yehova Suku wo tundisa vocumbo ce Edene, okuti o ka lima osi kuna a tundile. 24Wa tundisa ulume, kuenje konele yutundilo wocumbo ce Edene wa kapako va Keruvi, losipata yondalu yi pongolokela kuosi oku lava onjila yo kuti womuenyo.
Currently Selected:
EFETIKILO 3: EMB63
Highlight
Share
Copy
Want to have your highlights saved across all your devices? Sign up or sign in
Umbundu Bible © United Bible Societies, 1963.
