Génesis 18
18
Yuumtzile' cu chíicpajal ti' Abraham
1Yuumtzile' j chíicpaj ti' Abraham tu káaxil u béequilo'ob Mamre, ca'aliquil culucbal Abraham tu jool u pasel, míin chúumuc kiin. 2Abrahame' tu líiksaj u yich ca tu yilaj wa'alacbalo'ob actáan ti'e' óox túul j xiibo'ob. Le ca tu yilajo'obe', j líik tu séeblaquil u kamo'ob, ca j noclaj lu'um, 3ca tu ya'alaj:
In Taata, quin káat óoltic teech ma' a bin tu séeblaquil. 4Wa ca tucultic utze', in ca'aj in káat jun p'íit ja' u ti'al a p'o'ic a woque'ex, cu dzo'ocole' ca je'elele'ex jun súutuc tu yáanal u bo'oy le che'o'. 5Bey tumen dzo'oc a kuchule'ex tu'ux cajacbal le a palitzile'exa' bin in ca'aj in taas te'ex wa ba'ax a jaante'ex u ti'al a ca ch'a'ique'ex muuk ma'ili' u líikbal a bine'ex tu ca'a tene'. Leti'obe' tu núucajo'ob:
Ma'alob túun. 6Abrahame' j ooc tu pasele', ca tu ya'alaj ti' Sara:
Séeba'an, ch'a'a' óox p'éel u p'iisil ma'alob harinae' ca beet wa jay p'éel waajo'ob.
7Cu dzo'ocole' Abrahame' j bin áalcabil tu'ux yaan u wacaxo'obe', ca tu yéeyaj jun túul u asab ma'alobil ichil u mejenil u wacaxe' ca tu dzaj ti' jun túul u palitzilo'ob, máax j nu'uct tu séeblaquil u ti'al jaantbil. 8Pa'ate' yéetel le chan wacaxo' Abrahame' tu dzaj ti'ob mantequilla#18.8 Mantequilla, u yoodzel yéetel u yeek u kab im wacax, cu bokla'al bey u suut mantequillail, jach qui' u jaanta'al yéetel castlan waaj. yéetel leche, tu dzaj yóol u táanlico'ob ca'aliquil leti'obe' táan u janalo'ob yáanal le che'o'.
9Le ca j dzo'oc u janalo'obe' le u'ula'obo' tu káatchi'itajo'ob ti' Abraham:
¿Tu'ux yaan Sara a watan? ca tu núucaj Abraham:
Te'elo', ichil le paselo'.
10Jun túul ti'obe' tu ya'alaj túun:
Le ja'ab cu taalo' yaan in suut in xíimbal teech, ti' túun le ja'abo' Sara a watane' yaan u yantal jun túul u chan paal.
Sarae' táan ca'ach yu'ubic tuláacal, ca'aliquil ti' yaan tu paach Abraham tu jool le paselo'. 11Abraham yéetel Sarae' dzo'oc ca'ach u sen ch'íijilo'ob, Sarae' dzo'oc ca'ach u xu'ulul u yilic u nook. 12Tu yo'olal lelo' Sarae' ma' j páatji u muclic u che'eji', ca tu tucultaj: ¿Bix cu bin j antal teen le qui' óolala' wa sen ch'ija'anen bey xan in wíicham? 13Ba'ale' Yuumtzile' tu ya'alaj ti' Abraham:
¿Ba'ax teen che'ejnaj x Sara? ¿Ma' wa tu yocsic tu yóol je'el u páajtal u yantal jun túul u chan paal quex tumen dzo'oc u ch'íijile'? 14¿Yaan wa ba'ax sen talam ma' tu páajtal u beetic Yuumtzil? Le ja'ab cu taalo' bíin suunaquen in xíimbal teech u ti'al túun lelo' x Sarae' bin yanac u chan paal.
15Le ca tu yu'ubaj x Sara lela' tu ch'a'aj sajaquil, tu yo'olal lelo' tu ya'alaj:
Tene' ma' che'ejnaqueni' Ba'ale' Yuumtzile' tu núucaj ti':
Tene' in wojel che'ejnajech.
U káat o'olal Abraham tu yo'olal Sodoma
16Cu dzo'ocole' le u'ula'obo' j wa'alajo'ob, ca jo'op' u binbalo'ob tu tojil u noj caajil Sodoma. Abrahame' jóok u yil u bino'ob. 17Ca túun tu tucultaj Yuumtzil: U najmal in wa'alic ti' Abraham ba'ax quin in beete. 18Tumen leti'e' bíin taatainta'ac tumen jun p'éel nojoch mu'uka'an caaj. Dzo'oc in séeb chi'itic ti'e', tu yo'olale' bíin in qui' t'ant tuláacal u caajilo'ob yóokolcaab. 19Teen tin yéeyaj u ti'al u ya'al ti' u paalal bey ti' u ch'i'ilancab ca u dzo'ocbeso'ob in ca'anbesajo'ob, ca u beetajo'ob xan tuláacal ba'ax utz yéetel ba'ax tu beel, u ti'al ca in dzo'ocbes beyo' tuláacal ba'ax in séeb chi'itmaj. 20Bey tuno' Yuumtzile' tu ya'alaj ti':
U cajnáalilo'ob sodoma yéetel Gomorrae' sen kaas ba'ax cu ya'ala'al tu yo'olalo'ob, u kebano'obe sen talam. 21Tu yo'olal lelo' táan in bin te'elo' u ti'al in wil wa jaaj sen talam kebano'ob je'el bix dzo'oc in wu'uyico', beyo' je'el in dzáic jaaj ti' in wiche'.
22Ca'a túul ti' le u'ula'obo' likul te'elo' j bino'ob Sodoma, ba'ale' Abrahame' j p'áat tu táan Yuumtzil. 23Tu nadzajubáa u láak jun p'íit tu yicnale' ca tu káatchi'itaj ti':
¿Bíin wa a xu'uls le máaxo'ob ma' sipa'ano'ob yéetel le aj kebano'obo'? 24Cux túun wa yaan cincuenta ma' j loolob máaco'ob te j caajo', ¿je'el wa túun a xu'ulsic le caajo'? ¿Ma' bíin a sa'atso'ob tu yo'olal le cincuentao'? 25¡Ma' tu páajtal a beetic jun p'éel ba'al beyo', le a quíimsic máax mina'an u si'ipil pa'ate' yéetel le sipa'ano'; óoli' bey láajquet sipa'ano'obe'! ¡Ma' a beetic lelo'! Teech u nojoch Aj xot kiinil tuláacal le yóokolcaabo' ¿Ma' bíin a beet ba'ax tu beel?
26Yuumtzil túune' tu núucaj ti':
Wa ca in nuptáant cincuenta ma' j loolob wíinico'ob tu caajil Sodomae', tu yo'olalo'obe' je'el in sa'atsic tuláacal le caja'ano'ob te'elo'.
27Ba'ale' Abrahame' tu ca'a a'alaj ti':
Sa'ates teen in táabal j t'aan ta wéetel beya', tumen teche' Kuech tene' chéen jun túulen j ma' óol wíinic, 28ba'ale', ma' xan ca u binet cinco j ma' loobil máaco'ob u ti'al ca chúucpajac le cincuentao'. ¿Chéen wa túun tu yo'olal le cinco cu bineltico' je'el a xu'ulsic tuláacal le caajo'? Ca tu núucaj Yuumtzil:
Wa ca in nuptáant cuarenta yéetel cinco ma' j loolob máaco'obe', ma' bíin in xu'ulsi'.
29Tu ya'alaj Abraham: Ma' xan wa yaan chéen cuarenta ma' loolob máaco'obi'.
Yuumtzile' tu ya'alaj: Tu yo'olal le cuarenta máaco'obo' ma' bíin in xu'uls le caajo'.
30Ba'ale' Abrahame' j t'aanaj tu ca'a téen:
Quin káat óoltic teech ma' a p'u'ujul tin wéetel iquil in sen káat óoltic jun p'éelili' ba'al, ba'ale' ma' xan ca a nuptáant chéen treinta ma' j loolob máaco'obi'.
Yuumtzile' tu ca'a a'alaj:
Tac tu yo'olal le treintao', je'el in sa'atsic u si'ipil le caajo'.
31Abrahame' tu ca'a a'alaj:
In Yuumtzil, dzo'oc in táabal j t'aan ta wéetel beyo', ba'ale' ¿Ba'ax je'el u yúuchul wa ca a nuptáant chéen veinte ma' j loolob máaco'obi'?
Yuumtzile' tu núucaj:
Tu yo'olal le veinteo' ma' bíin in xu'uls le caajo'.
32Ba'ale' Abrahame' tu ya'alaj tu ca'a téen:
In Yuumtzil beet utz ma' a p'u'ujul tin wéetel, ba'ale' bin in ca'aj t'aan ta wéetel u dzooc u téenel, ma' tin in ca'a a'al teech mix ba'al: ¿Ba'ax je'el a beetic wa ca nuptáant chéen dieci'?
Yuumtzile' tu núucaj:
Tac tu yo'olal le diezo', ma' bíin in xu'uls le caajo'.
33Le ca j dzo'oc u t'aan Yuumtzil yéetel Abrahame' j luk te'elo'; Abrahame' j suunaj tu pasel.
Currently Selected:
Génesis 18: MAYADC
Highlight
Share
Copy
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
