LUCAS 15
15
U quet t'aanil jun túul saatal j taman
(Mt 18.10-14)
1Tuláacal le j kam páatan yéetel le j kebano'obo' cu nadzicuba'ob tu yicnal Jesús u ti'al u yu'ubo'ob u t'aan. 2Tu yo'olal lela' le fariseob yéetel u aj ca'anbesajilo'ob le a'almaj t'aano' jo'op' u tutucchi'ob táan u ya'alico'ob: Le máaca' cu kamic j keban wíinico'ob, cu janal xan yéetelo'ob.
3Jesús túune' tu dzáaj le quet t'aan ti'oba':
4¿Máax ti' te'ex, wa yaan cien j tamano'ob ti'e', ca kuchuc sa'atal jun túul ti'obe', ma' tu p'atic le noventa y nueve te j káaxo' ca xi'ic u caxant le j sa'ato' tac quéen u caxte? 5Cu dzo'ocol u caxtique' cu dzáic tu queléembal yéetel qui'imac óolal. 6Le quéen kuchuc tu yotoche' cu much'quintic u amigo'ob yéetel le máaxo'ob cajacbalo'ob naadz ti'o', cu ya'alic xan ti'ob: Qui'imacchajac a wóole'ex tin wéetel, tumen dzo'oc in caxtic le in j taman sa'atten ca'acho'. 7Quin wa'alic ti' te'exe' bey xano' yaan mas qui'imac óolal te j ca'ano' tu yo'olal jun túul j keban wíinic cu kexic u tuucule' que tu yo'olal noventa y nueve utzil wíinico'ob ma' kaabéet u kexic u tuuculo'obi'.
U quet t'aanil jun p'éel taakin cu sa'atal
8Wa ¿Máax co'olelil yaan diez taakino'ob ti'e', wa cu satic jun p'éele', ma' tu t'abic jun p'éel sáasil, yéetel cu míistic le najo', iquil u dzaamail u yóol u ti'al u caxantic tac quéen u caxte? 9Cu dzo'ocol u caxtique' cu much'quintic u amigaob yéetel le co'olelo'ob cajacbal naadz ti'o', cu ya'alic xan ti'ob: Qui'imacchajac a wóole'ex tin wéetel tumen dzo'oc in caxtic le taakin sa'at teen ca'acho'. 10Bey túuno' quin wa'alic te'exe' yaan xan qui'imac óolal ichil u ángelo'ob Ku tu yo'olal jun túul j keban wíinic cu kexic u tuucul.
U quet t'aanil jun túul saatal paal
11Jesuse' tu ya'alaj xan: Jun túul máaque' yaan ca'a túul u paalal. 12U chichnil ichilo'obe' tu ya'alaj ti' u taata: Taat, dzáa teen le jun jaatz le ayikalil quin ti'alintico'. Le taatatzil túuno' tu t'oxaj le ayikalil ti'obo'. 13Le ca j máan dze'edzec kiino'obe', le íidzintzilo' tu molaj tuláacal u ayikalile' ca j bin náachil ti' táanxel lu'um, tu'ux tu láaj xupaj u taakin ti' jun p'éel kaakas cuxtal. 14Ba'ale' le ca j dzo'oc u laj xupique' j taal jun p'éel nojoch wi'ij te j lu'umo' ca jo'op' u mukyajtic wi'ij. 15Tu yo'olal lela' j bin u caxant meyaj tu yicnal jun túul u máaquil le lu'umo', máax túuxt u canant kéekeno'ob tu cajtalil. 16U káat u jaant ca'ach le ba'ax cu jaantic le kéekeno'obo', ba'ale' mix máac dzáic ti'. 17Ca túun ka'aj yiike' ca tu tuclaj: Buca'aj j meyajo'ob yaan tu yotoch in taatae' yaan ti'ob ya'ab ba'al u jaanto'ob, ba'ale' tene' táan in quíimil yéetel wi'ij waye'. 18Bin in ca'aj suut tu yicnal in taata ca in wa'al ti': Taat, dzo'oc in kebanchajal tu táan Ku yéetel ta táan. 19Ma' tin najmatic ca a'ala'ac wa a paalen; beeten je'el bix jun túul a j meyajo'obe'. 20Ca túun j líike' ca j suunaj tu yotoch u taata. Ca'aliquil náach yanile' j ila'ab tumen u taata. Le taatatzilo' tu ch'a'aj óotzilil ti', j bin áalcabil u nuptáante, tu méekaje' ca tu dzu'udzaj. 21Le paalo' tu ya'alaj: Taat, dzo'oc in kebanchajal tu táan Ku yéetel ta táan; ma' tin najmatic ca a'ala'ac wa a paalen. 22Ba'ale' le taatatzilo' tu ya'alaj ti' u palitzilo'ob: Séebcunsaba'ex, taase'ex u mas ma'alobil nook ca a taaque'ex ti'; dza'ex jun p'éel anillo tu yaal u kab, yéetel dza'ex xanab tu yooc. 23Taase'ex le poloc wacaxo' ca a quiimse'ex. ¡Co'one'ex janal, co'one'ex qui'imaccuntic c óol! 24Tumen le in paala' j quíim ca'achi', ba'ale' dzo'oc u ca'a cuxtal; sa'at ca'achi', ba'ale' dzo'oc u chíicpajal. Ca jo'op' u qui'imactal u yóolo'ob.
25Ca'aliquile' u nojoch paale' bija'an ich cool. Le ca j suunaj ca tu nadzubáa tu yicnal le najo', tu yu'ubaj u juum le paxo' yéetel u yúuchul óokot. 26Ca tu t'anaj jun túul ti' le xi'ipalo'obo' ca tu káat chi'itaj ti' ba'ax cu yúuchul. 27Ca j a'ala'ab ti' tumen le xi'ipalo': Dzo'oc u suut a wíidzin; le o'olale' a taatae' tu túuxtaj quiimsbil le poloc wacaxo', tumen toj yóol suunajic. 28Ba'ale' le sucu'untzilo' j kuuxilnaji yéetel ma' tu yóoltaj ocli'. Ca j yanchaj u jóokol u taata kat óoltic ti' ca ococ. 29Leti' túune' tu ya'alaj ti' u taata: Buca'aj ja'abo'ob dzo'oc in meyajtiquech, mix jun téen p'áatac ma' in beetic ba'ax ca wa'alic, ba'ale' mix jun téen a dzáa teen quex jun túul chan j taman u ti'al in qui'imaccuntic in wóol yéetel in amigo'ob. 30Ba'ale' le ca j suunaj le a paal, dzooc u xu'uxu'upic a taakin yéetel x kaakas co'olelo'obe', ca ta quiimsaj tu yo'olale' le poloc wacaxo'. 31Le taatatzil túuno' tu ya'alaj ti': In paal, teche' mantadz ti' yanech tin wéetele', yéetel tuláacal ba'al yaan tene' a ti'al. 32Ba'ale' bejela'e' jach unaj ca qui'imacchajac c óol, tumen le a wíidzina' quíim ca'achi', ba'ale' dzo'oc u ca'a cuxtal, sa'at ca'achi', ba'ale' dzo'oc u chíicpajal.
Currently Selected:
LUCAS 15: MAYADC
Highlight
Share
Copy
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
