LUCAS 7
7
Jesús cu dzáic u toj óolal u palitzil jun túul centurión
(Mt 8.5-13)
1Le ca j dzo'oc u ca'ansic Jesús le máaco'obo', j bin Capernaum. 2Yaan ca'ach te'elo' jun túul centurión yaan jun túul u aj meyaj jach u yaacuntmaj, ta'aytac u quíimil tumen koja'an. 3Le ca tu yu'ubaj le centurión u yúuchul t'aan tu yo'olal Jesuse', tu túuxtaj dze'edzec u anciano'ob le judíobo' u ti'al u káat óolto'ob ti' Jesús ca taalac u dzáa toj óolal ti' le u j meyajo'. 4Leti'obe' tu nadzajuba'ob tu yicnal Jesús ca jo'op' u jach káat óoltico'ob ti', táan u ya'alico'ob: Le centuriona' cu najmaltic ca a wáante. 5Tumen jach u yaabiltmaj c caajal, leti' xan túuxt ca beeta'ac c sinagoga.
6Jesús túune' ca j bin tu yéetelo'ob. Ba'ale' le ca j náadz ti' le najo', le centuriono' tu túuxtaj dze'edzec u amigo'ob u ti'al a'alic ti' Jesús: Yuumtzil, ma' a ch'a'ic u meeyjul a taal, tumen ma' táan in najmatic ca ocoquech tin wotoch. 7Le beetique' mix tin wóoltaj j bin teen in caxantechi'. Chéen a túuchi'itic u t'aanile', cu yutztal le in j meyajo'. 8Tumen tene' tu yáanal páajtalil yanen xan, chéen ba'ale' yaan xan in soldado'ob tu yáanal in páajtalil. Le quéen in wa'al ti' jun túul ti'ob ca xi'ique' cu bin, le quéen in wa'al ti' u láak ca taalaque' cu taal, le quéen xan in wa'al ti' in aj meyaj ca u beet wa ba'axe', cu beetic.
9Le ca tu yu'ubaj Jesús lela', ja'ak u yóol tu yo'olal le máaco'; ca tu pactaj le máaco'ob tzaypachtico' ca tu ya'alaj: Jach tu jaajile' mix ichil u cajnáalilo'ob Israel in wilmaj sen nojoch ocsaj óolal je'el bix le yaan ti' le máaca'.
10Le ca j suunajo'ob tu yotoch le centurión le máaxo'ob j túuxta'abo'obo' tu yilajo'ob dzo'oc u yutztal le aj meyajo'.
Jesús cu ca'a púut cuxquintic u paal jun túul x quimen íicham
11Cu dzo'ocol lela', Jesuse' táan u bin ti' jun p'éel caaj, Naín u kaaba'. U yéet bin xan u apóstolo'ob yéetel u láak ya'ab máaco'ob. 12Le ca j náadz ti' le caajo', tu yilaj táan u bisa'al j mucbil jun túul quimen. Lela' jun túulili' paal ti' u maama, máax quimen u yíicham. Ya'ab u máaquilo'ob le caaj cu bino'ob yéetelo'. 13Le ca j ila'ab tumen Yuumtzile' ch'a'ab óotzilil ti', ca j a'ala'ab ti': Ma' a wokol.
14Ca túun j náadz Jesuse', ca tu dzáalkabtaj le caajao'. Ca j wa'alaj le máaxo'ob cuchmajilo'. Ca tu ya'alaj Jesús ti' le quimeno': Xi'ipal, teen a'alic teech: ¡Líiken!
15Le máax quimen ca'acho' j culaji' ca jo'op' u t'aan. Jesús túune' ca tu kubaj ti' u maama. 16Le ca tu yilajo'ob lela', láaj sajacchajo'ob, ca jo'op' u qui'iqui' t'antico'ob Ku, táan u ya'alico'ob: Jun túul nojoch aj bóobat dzo'oc u chíicpajal ichilo'on. Tu ya'alajo'ob xan: Ku dzo'oc u taal u ti'al u yáant u caajal.
17Ti' tuláacal Judea Yéetel tu bakpacho'obe' ojéelta'ab ba'ax dzo'oc u beetic Jesús.
U J túuchi'ob Juan Bautista
(Mt 11.2-19)
18Juane' tu yojéeltaj tuláacal le ba'alo'oba', tumen u j tzaypacho'obe' tu tzicbaltajo'ob ti'. Ca tu t'anaj ca'a túul ti'obe'. 19Ca tu túuxtajo'ob tu yicnal Jesús u ti'al u káato'ob ti' wa jach jaj leti' le Cristo bíin taalaco' wa unaj u pa'atico'ob u yaanal. 20U j túuchi'ob Juane' tu nadzajuba'ob tu yicnal Jesús, ca tu ya'alajo'ob ti': Juan Bautistae' tu túuxtajo'on u ti'al káatic teech wa teech le Cristo bíin taalaco' wa unaj c pa'atic u yaanal.
21Jach ti' le súutuc kuchico'obo' Jesuse' tu dzáaj u toj óolal ya'abcach máaco'ob ti' u koja'anilo'ob bey xan ti' pakbe'en koja'anilo'ob; tu jóokesaj kaakas pixano'ob, tu dzáaj xan u sáasilil yich ya'ab ch'óopo'ob.
22Jesuse' tu núucaj ti'ob: Xeene'ex ca a wa'ale'ex ti' Juan le ba'ax dzo'oc a wilique'ex yéetel dzo'oc a wu'uyique'exo'; tzicbalte'ex ti'e' le ch'óop'obo' cu paacato'ob, móoch ooco'obo' cu xíimbalo'ob, le yaan jáaway ti'obo' cu tojquinta'al u yóolo'ob, le cóoco'obo' cu yu'ubajo'ob, le quimeno'obo' cu ca'a púut cuxquinta'alo'ob, yéetel ti' le óotzilo'obo' cu tzicbalta'al u péectzil tocsajil. 23Utz yanil máax ma' tu lúubul u yóol tin wo'olal.
24Le ca j bino'ob le máaxo'ob j túuxta'abo'ob tumen Juano', cáaj u t'aan jesús tu yo'olal Juan, táan u ya'alic: ¿Ba'ax bine'ex a wile'ex te x tocoy lu'umo'? ¿Jun cúul jalal cu yúumta'al tumen iik? 25Wa ma'e', ¿ba'ax j bine'ex a wile'ex? ¿Jun túul máac u búuquintmaj co'ocoj nooko'ob? Te'exe' a wojele'exe' le máaxo'ob cu búuquintico'ob co'ocoj nooko'obe' yéetel cuxa'ano'ob ich ayikalile' ti' yano'ob tu najil ajawo'obe'. 26Tu dzooque' ¿ba'ax j bine'ex a wile'ex? ¿Jun túul aj bóobat? Bey, jach jaj, jun túul máac asab nojoch ti' jun túul aj bóobat. 27Tu yo'olal Juan cu ya'alic le Quili'ich Dzíibo':
Quin túuxtic in aj bisaj t'aan táanil ti' teech u ti'al u nu'ucbes a beel.
28Quin wa'alic te'exe', ichil tuláacal máaque', ma' yanac aj bóobat asab nojoch ti' Juan Bautistai. Ba'ale' le máax asab chichan tu ajawil Kue' asab nojoch ti' Juan.
29Tuláacal le máaco'obo' yéetel le j kam páatano' tu kamajo'ob ocja' ti' Juane', le ca tu yu'ubajo'ob lela' tu kaj óolto'ob Kue' jach toj. 30Ba'ale' le j fariseob yéetel u aj ca'anbesajilo'ob le a'almaj t'aano', le máaxo'ob ma' dza'an ocja' ti'ob tumen Juane', tu dzajo'ob jun tzéelil ba'ax tu yóoltaj u beet Ku tu yo'olalo'ob. 31Yuumtzile' tu ya'alaj: ¿Ba'ax yéetel quin in quetbes u máaquilo'ob le kiino'oba'? ¿Ti' ba'ax chica'ano'ob? 32Chíica'ano'ob ti' le mejen paalal cu cutalo'ob j báaxal te j kíiwico' yéetel cu paclan yaawticuba'ob: T paxaj te'ex le jalalo', ma' óokotnaje'exi'; okom kaaynajo'on, ma' okolnaje'exi'. 33Tumen j taal Juan Bautista ma'atech u jaantic waaj mix u yukic vino, te'exe' ca wa'alique'exe' yaan kaakas pixan ti'. 34Cu dzo'ocole' ca j taal u Paal Máac, máax cu janal yéetel cu yukul; te'exe' ca wa'alique'exe' jach ya'ab u janal yéetel u yukul; cu biscubáa yéetel j kebano'ob bey xan yéetel j kam páatano'ob. 35Ba'ale' u yojéelaj Kue' cu yila'al ti' le máaxo'ob yaan u na'ato'obo'.
Jesús tu yotoch Simón le fariseo'
36Jun túul ti' le fariseobo' tu káat óoltaj ti' Jesús ca taalac janal tu yéetel. Jesús túune' j taal tu yotoch le fariseo' ca j culaj tu cúuchil janal. 37Jun túul co'olel kaas u cuxtal cajacbal xan ti' le caajo', le ca tu yojéeltaj dzo'oc u bin Jesús tu yotoch le fariseo', j kuch túun táan u taasic jun p'éel chan p'úul chuup yéetel qui'iboc aceite. 38Táan u yokol ca tu nadzubáa tu yooc Jesús ca tu ch'ulaj yéetel u ja'il u yich. Cu dzo'ocole' tu tiquincunsaj yéetel u tzo'otzel u pool, tu dzu'udzaj, ca tu wecaj xan le qui'iboc aceite' tu yóokolo'. 39Le fariseo' máax t'anmail janal Jesuse' tu yilaj lela' ca tu tucultaj: Le máaca' wa jaj jun túul aj bóobate' je'el u na'atic máax machic yéetel ba'ax co'olelil lela', tumen jun túul co'olel kaas u cuxtal.
40Ca túun j a'ala'ab ti' le fariseo tumen Jesuso'; Simón, yaan in wa'alic teech jun p'éel ba'al. Le fariseo túune' ca tu núucaj: A'al teen aj ca'anbesaj.
41Jesús tu ya'alaj: Ca'a túul máaco'obe' u p'axmajo'ob taakin ti' jun túul máac cu dzáic taakin majantbil. Jun túule' quinientos taakino'ob u p'axmaj ti'; le u láako' cincuenta. 42Ba'ale' mix jun túul páatji' u bo'otic u p'axi'. Le máac túun p'axa'ano' tu sa'atsaj u p'ax tu ca'a túulal. A'al teen: ¿Máacalmáac ti' le ca'a túulo'ob cun asab yaabiltico'?
43Simone' tu núucaj: Bey in wóol leti' le máax asab ya'ab sa'atsa'ab ti'o'. Jesuse' tu ya'alaj ti': Jaj a t'aan.
44Jesús túune' tu pactaj le co'olelo' ca tu ya'alaj ti' Simón: ¿Táan wa a wilic le co'olela'? J ooquen ta wotoche', ma' ta dzáaj teen ja' u ti'al in wooqui', ba'ale' le co'olela' dzo'oc u ch'ulic yéetel u ja'il u yich, dzo'oc xan u tiquincunsic yéetel u tzo'otzel u pool. 45Ma' ta dzu'udzajeni', ba'ale' leti'e' ma' xu'uluc u dzu'udzic in wooqui'. 46Ma' ta dzáaj aceite' tin pooli', ba'ale' leti'e' tu wecaj qui'iboc aceite' tin wooc. 47Le beetic xan quin wa'alic ti' teech, u nojoch yaacunaj le co'olela' cu ye'esic u ya'abil u kebano'obe' sa'atsa'an; ba'ale' le máax jun p'íit cu sa'atsa'al ti'e', jun p'íit u yaacunaj cu ye'esic.
48Ca tu ya'alaj ti' le co'olelo': Sa'atsa'an a kebano'ob.
49Le máaxo'ob túun t'ana'ano'ob, culucbalo'ob tu yéetel te'elo', jo'op' u ya'alico'ob tu baatzilo'ob: ¿Máax ta t'aan le máaca' cu sa'atsic tac kebano'ob?
50Ba'ale' Jesús tu ya'alaj ti' le co'olelo': Dzo'oc a to'ocol tumen ocsaj óolnajech. Xeen yéetel jéedzel.
Currently Selected:
LUCAS 7: MAYADC
Highlight
Share
Copy
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
