मार्कल 4
4
विजा वीतना पीटो
(मत्याल 13:1-9; लूकाल 8:4-8)
1येसु ओसो उंद देबा गालिल सम्दुरकचुल, लोकुरिन काग़्हता बोटटोग़. वेल्लाय मुलु ओना सर्ने जमा आस मतोर. अदिनेनाह्क येसु एग़कचुल मतद ओडातगा उदतोग़. सबेटोर बार ओनाङ केंजलाह, दडकचुल निच मतोर. 2येसु मुडा लोकुरिन पुन्पिह कीयनव पीटोने, वेल्लाङे पोल्लोङ काग़्हतोग़. उंद पीटो इद्रम मता: 3“केंजाट, उंद दिया ओर्वोग़ मन्कल विजा वीतलाह पेसतोग़. 4ओग़ वीतनेके, उडुन विजा अग़दा कचुल अरता, अदिनु पिटेङ वासि कतम तिताङ. 5उडुन विजा आद बंडाना जागाते अरता, अगा आदता पोग़ोन बर्बर तोळ्यो मताह्क, विजा चट्पिटे मोन्ह्टटा. 6मति ईर्क लोपा अनवाह्कु, एद तेग़तस्के पोर्ह्काङ वाग़िस डोलताङ. 7ओसो उडुन विजा कोये-जपिना जागाते अरता, पया कोये-जपिङ वने बेर्सिसि पेसनद वंज-सोपतुन हव्कताङ, बेर्स एवोङ. अदिनेनाह्क अव एन्क पेसोङ. 8मति उडुन विजा इसि, राब जागाते अरता. पया अद मोन्ह्टिसि, उंद-उंद मोदुदुह्क बेगा डेडा वीसा (30), बेगा मूंड वीसाङ (60), बेगा नूरु (100), इद्रमलेह्का तेना पंटा वाता,” इनजोर वेहतोग़. 9वेहचि, “मियग्डाहि बोरिह्क पुनदलाह गिर्दा मन्ह्ता, नावा पोल्लोतुन बेस केंजाटु!” इतोग़.
विजा वीतना पीटोता अर्तम
(मत्याल 13:10-23; लूकाल 8:9-15)
10पया येसु वग़ोग़े मतोग़ अस्के, तनाङ बळयिर बारा मन्कलोर, ओसो दुस्रोर उच्वुर ओना संगे मनवालोर ओनगा वासि, “गूरु, इद पीटोता अर्तम माक वेहा,” इतोर. 11येसु ओरिन इतोग़, “मीक इतेके, देवुळि तना राजेमताङ मकतव पोल्लोन पुनदलाह बुद ईता, मति तानाङ पोल्लोन नमवोरिह्क बार, इव पोल्लोन नना पुन्पिह कीयनव पीटोने वेहतह्नन. 12बह इतेके:
ओर नावाङ कबस्किन ऊळलाह कोनि ऊळनुर, मति
अविस्कना अर्तम ओर पुनोर आयनुर, ओसो
नावाङ केंजलाह कोनि केंजनुर,
मति ओरिह्क तेळियो आयग़ा.
अद्रम पुतेके, तेळियतेके, ओर देवुळतके मलवेर,
अस्के देवुळि ओरा पापमतुन मापि केवालि #
यशायाह 6:9-10; योहन 12:40; बळयिर 28:26-27 ,”
इनजोर इतोग़. 13पया ओसो ओरिन इतोग़, “मीट इद पीटोता अर्तम पुनवेके, इंका ओसो वेहतनव सबे पीटोना अर्तम बेद्रम पुनदकिर? 14वीतवाल इतेके, देवुळता पोल्लोतुन पोकुर केवाल आंदोग़, (विजा इतेके देवुळता पोल्लो आंदु). 15अग़दगा अरतद विजाता जागा इहलेह्का मन्ह्ता. उच्वुर मन्कलोर देवुळता पोल्लोतुन केंजिह्तोर, मति देयह्कना मुक्याल चट्ने वासि, ओरा जीवातगा वीततद पोल्लोतुन माग़्ङनाह कीस्ता. 16अद्रमे आद बंडातगा अरतद विजाता जागा इहलेह्का मन्ह्ता: उच्वुर मन्कलोर देवुळता पोल्लोतुन, गिर्दाते चट्नेन केंजिह्तोर. 17मति अद पोल्लो ओरा जीवातगा गडवाह्कु, गळ्के विस्वस कीस्तोर. पया देवुळता पोल्लोतुन नमताह्क, ओरिह्क अड्सन्काय, तिपल्काय वातेके, चट्नेन विस्वसतुन विळ्सिह्तोर. 18कोये-जपिनगा अरतद विजाता जागा इहलेह्का मन्ह्ता, उच्वुर मन्कलोर देवुळता पोल्लोतुन केंजिह्तोर. 19मति पिसवग़ताङ आल्सुळ्कु ओसो अनम-दनमता उळ्बे, सम्सरमता लालुस, इव ओरा जीवातगा देवुळता पोल्लोतुन बेर्स एवोङ,#रोम सहरतोर 12:2 पया अद पोल्लो बातय पाय्दाता आयो. 20मति राब जागा इहलेह्का मन्ह्ता, बोर मन्कलोर देवुळता पोल्लोतुन केंजिसि, तमा जीवातगा तासिह्तोर. (राब जागातगा अरतद विजा) बेद्रम उंद-उंद मोदुदुह्क बेगा डेडा वीसा (30), बेगा मूंड वीसाङ (60), बेगा नूरु (100), इद्रम पंटा वास्ता, अद्रमता पंटालेह्का, ओर बेसताङ कबस्क कीस तोहतह्तोर,” इनजोर इतोग़.
चिमलिता पोल्लो
(लूकाल 8:16-18)
21येसु ओसोवने ओरिन इतोग़, “बोग़ाय चिमलि नीर्विह कीसि, डूटलोप्पा मुळ्हच तासनोग़ा? इलवेके कटुलता इळ्न तासनोग़ा? आयो, वेह्च आयि इनजोर, बोव्लापोग़ोन तासिह्तोग़. 22अद्रमे देवुळताङ सबे मकिह कीतव पोल्लोङ पङ्ने आयनुङे, इद्रमता वेला वायग़ा. 23मियग्डाहि बोरिह्क पुनदलाह गिर्दा मन्ह्ता, ओर नावा पोल्लोतुन बेस केंजाटु,” इतोग़. 24ओसोवने ओरिन इतोग़, “इव पोल्लोनु मीट उसरते केंजाटु. बेद गोट्टाते मीट दुस्रोरिह्क कहच ईय्ह्निर, अदे गोट्टाते देवुळि मीक कहच ईयग़ा, तान्काय एक्वा ईयग़ा.#मत्याल 7:2; लूकाल 6:38 25बाराह्क इतेके, बोनगा पुनदनद बुद मन्ह्ता, ओन्कु देवुळि ओसो इंका ईयग़ा. मति बोनगा पुनदनद बुद इले, ओनगा बेचोन दिसिह्ता, तान वने देवुळि तेंडिस ओयग़ा,#मत्याल 13:12; 25:29; लूकाल 8:18; 19:26” इनजोर वेहतोग़.
पेनेम मोन्ह्टनद पीटो
26अद्रमे ओसो येसु वेहतोग़, “देवुळता राजेमता पोल्लो इद्रमलेह्का मन्ह्ता: ओर्वोग़ मन्कल तना पोलमतगा पेनेह्क वीतिह्तोग़. 27वीतिसि ओग़ नग़्का उंजना, सकर तेदिस कबळ कीयना कीस्तोग़. पया पेनेह्क मोन्ह्टिसि बेर्सिह्ताङ. इव इद्रम बह आस्ताङ इनजोर, ओग़ मन्कल पुनोग़. 28ओग़ मन्कल बातय केवालेवा, बूमि तनाय अनम पुटिह कीस्ता. मुने ऊयुम बेर्सिह्ता, बेर्सिसि एन पेसिस पूयिह्ता, पया एन्कनगा पेनेम पोयह्ता. 29अहे पया पेनेह्क अयताहे, चट्पिट एटळते कोयह्तोर,”#तोहचीतव पोल्लोङ 14:15 इनजोर वेहतोग़.
पुलुळ (दुलि) पेनेमता पीटो
(मत्याल 13:31-32,34; लूकाल 13:18-19)
30येसु ओसो वेहतोग़, “देवुळता राजेमता पोल्लो बेद्रम बेर्सग़ा? इद पोल्लोतुन तेळियिह कीयलाह, उंद पीटो वेहतह्नन. 31देवुळता राजेमता पोल्लो, उंद पुलुळ पेनेमता लेह्का मन्ह्ता. पुलुळ पेनेम इतेके, पकाय उड्ला पेनेम मन्ह्ता. 32मति नेल अर्सि मोन्ह्टटापया, अद बेर्सिसि बेरा मरा आस्ता. अस्के पिटेङ वने, तानाङ कांदाना दळ्मतगा वासि, गूडाङ पंडिह्ताङ,”#यहेजकेल 17:23 इनजोर वेहतोग़.
33ओसो इद्रमताङ वेल्लाङे पीटोने, येसु लोकुरिन देवुळता पोल्लो वेहन्दोग़. ओर बेचोन पुनदा पग़्न्दुर, अचोन ओरिह्क वेहन्दोग़. 34मुडा लोकुरिन पुन्पिह कीयनाङ पीटोङलेवा बातय वेहोग़ आंदोग़,#योहन 10:6; 16:25,29 मति मुल लेवस्के, तना संगे मन्जि, कग़यवालोरिह्क सबे पीटोना अर्तम तेळियिह कीस वेहन्दोग़.
येसु दूंदतुन रोमिह कीस्तोग़
(मत्याल 8:18,23-27; लूकाल 8:22-25)
35पया अद दिया मुलपोळ्द, येसु तनाङ कग़यवालोरिन इतोग़, “अलेट! माट सम्दुरता अबर दडटेके दाकल,” इतोग़. 36इतस्के मुडा लोकुरिन अगान विळ्सिसि, तना उदिस मतद ओडातेने, ओनाङ कग़यवालोर उदतोर. दुस्राङ ओडाङ वने ओरा संगे मताङ. 37अस्के सम्दुरतगा बेरा दूंदि वाता. पया लच्काङ ओडातगा वास दल्गिंदुङ, ओडा पूरा एग़ निंदलाह आस मता. 38येसु बार पेग़्केडेके, तला ऊसि वाटिसि, उंजिस मतोग़. पया कग़यवालोर ओनगा अन्जि तेहतोर, तेहचि इतोर, “ए गूरु, तेदा, माट मुळ्न्दिह्नल, बह निमा सीता केविना?” इतोर. 39इतस्के येसु तेदिसि, दूंदतुन दगाङ ईतोग़, ओसो एताङ लच्कान, “रोमा, मेर्क्ने आम!” इतोग़. इतस्के दूंद-मुर्गम मायिसि, बेस मेर्क्ने आता. 40पया येसु कग़यवालोरिन इतोग़, “बाराह्क रेयिह्निर? (नना मीक पिसिह कीकन इनजोर,) नावा पोग़ोन विस्वस इलेया?” इतोग़. 41मति ओर पका रेयतोर. रेयिसि तमतमाय, “अलाले! वळ्यु ओसो एग़ वने, वेना उकुमतुन केंजिह्ताङ अयो! इतेके वेग़ बेद्रमतोग़ मन्कल मनदनोग़ रा!” इनजोर इतोर.
Currently Selected:
मार्कल 4: माडियाबाय्बल
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.