Pinali a Njou‐Mboro‐Pinali 25
25
1Mono on ko̱ Festus mi sé kan sél koukoula an ndourou bon tou, afal ko̱ name mi mane saï kème ourou an pou Césarée da hé sé guè pou Jérusalem. 2Da loukou sacrificateurli, tèn loukou njoukouli a Juifli mi sa kon toula Paul hi nè, da kli sa jo̱jo̱ nè, 3ka oui nè baï bina wélé toula kli baï pongna Paul an klime pi an kème gui pou Jérusalem, kli ji name kon domboro ka foli, baï ina nè. 4Da Festus mi féré sa, klime pèng Paul bi an pou Césarée, da kè fènè mi ji séna guè pou Jérusalem koukoulion. 5Da kème sa: Dadaon sangna njoukouli an woro baï, klime ndé diri sé jing mi, da tokoré fèna mbéo mi yé toula njoukou aïn, oui ma sa kita nè.
6Da ko̱ kème kaou jing kli ta name difala‐saï, name tane mane bo ya, kè ourou ka diri sé guè pou Césarée.
Da ko̱ guèlapélé mi taka tou, kè kaou toul kangala njaka bara, da kème sa bi njaka kli baï yana Paul gui. 7Da ko̱ kème gui tou, Juifli on ko̱ mi ourou ka diri gui ka pou Jérusalem, mi o bèl monè, da sa kita kon toulè jing béké baïli nyèta, baïli on ko̱ klime sa ndouloukoussou bo̱on. 8Da ko̱ Paul mi sa bong njakè, kè sa: Mè tane ga nding békéfèn jing guingna Juifli, maléba jing temple tèn César ya. 9Da Festus, baï ko̱ kème ji bina wélé toula Juifli, kè féré sa hi Paul, ka sa: Mo ji baï héna sé guè pou Jérusalem, da kli ma wal baï toul fèn aïnli an ndourou an noni lé? 10Paul mi sa: Yé mè ma o njaka kangala walabaï a César, da dadaon klime wal baï ni an ndourou, mè tane ga nding fèn bèlya jing Juifli ya, mahana ka on ko̱ mome ndé toutou bèlta bon kéng. 11Da tokoré mème yé ba njou‐ndingna fèn bèlya, da mème nding fèna ko̱ ma houl, mè tane ga ngou houl ya; da tokoré fènli on bon ko̱ klime sa kitakè kon touli ba wo̱ko̱, njoukouna mbéo tane ma baï soutina mi hi kli ya. Mè oui baï a César da. 12Da ko̱ Festus mi bakèdakè jing njou‐walabaïli tou, kème féré sa. Mo oui baï a César tou, yé mo ma sé guè mona César.
13Da ko̱ name hanali mi ta tou, nanjoukaou Agrippa da Bérénice mi gui pou Césarée baï namna Festus. 14Da ko̱ klime kaou ndourou ma name hanali nyèta tou, Festus mi to̱ko̱ bongbaï a Paul hi nanjoukaou on, ka sa: Njoukouna makaou guèl aïn ko̱ Felix mi yèng nè bi jo̱bo̱, 15toul baï nè, ko̱ mème kaou pou Jérusalem, loukou sacrificateurli, da tangchidoli a Juifli, klime sa kita nè hi mi, da oui mi an mème kon barabaï toulè. 16Da mème féré sa hi kli: On mi tane ga ti ba dofèn a Romainli ya, baï soutina njoukouna hi njoukou afékéli baï ina nè, ambèl ko̱ njoukou on ko̱ baï mi na toulè mi ko̱ njoukouli on, ko̱ mi sa kita nè an nonè da, da dadaon an kème sa bong njakè toul kita on ko̱ klime sa kon toulè da. 17Mono on ko̱ klime gui jing hana guèl aïn, mè tane ga kaou za ya, da afal ko̱ pélé mi taka tou, mè kaou toul kangala njaka bara, ka pi njaka ni baï yana njoukou on gui. 18Toul baï nè on ko̱ njou‐sana kita nèli mi ourou siya, kli sa kita kon toulè jing béké baïli ko̱ tane ga ti mahana ka on ko̱ mème kèrè ya; 19da klime jing njakana baï toula Paul, ka ba mboro tènrèn none baï akli fèn kli, da toul njoukouna mbéo on ko̱ ling‐è ba Jésus, ko̱ hou tou, da Paul mi sa ba kè makaou ka none. 20Da baï ko̱ mème tane ga tou mboro walabaï aïn ya, mè oui nè baï séna guè pou Jérusalem baï an klime wal baï fèn aïnli an ndourou soko. 21Da ko̱ Paul mi oui mi ba kè ji lana baï an njaka Auguste da, mè sa bi njaka njoukouli baï pèngna nè bi bo̱l tèn ko̱ mème pi nè sé guè mona César.
22Da Agrippa mi sa hi Festus, mè ji lana baï an njoukou aïn kéng. Festus mi féré sa: Ka guèlapélé yé mo ma la baï nè.
23Mono ko̱ guèlapélé mi taka tou, Agrippa, da Bérénice mi gui jing fèn gangna maïya, da klime ri gui guèl kaouna barabaï jing zaworo kabitali tèn loukou njoukouli a pou, da klime ya Paul gui mahana ka on ko̱ Festus mi bi njakè.
24Da Festus mi sa: Nanjoukaou Agrippa, tèn njoukouli on bon ko̱ kaou guèl aïn jing na, oui ko̱ njoukou aïn ko̱ ro̱kè Juifli bon mi oui baï toulè an pou Jérusalem da tèn an guèl aïn kéng, klime wan njaka guè siya ba dadaon njoukou aïn mi yan ba aféké ya. 25Da mè tane ga ko̱ ko̱ kème nding békéfèn hana ko̱ mi tane ma houl ya, da baï ko̱ kè fènè mi oui baï a Auguste tou, mè badi baï pina nè. 26Mè tane ga ko̱ baï hana tang baï pina takarata toula njoukou aïn hi nanjou ni ya. Baï on mi ko̱ mè ya nè gui none baï, da an nono ho̱kè nanjoukaou Agrippa, baï ko̱ mo mi foul saon baï nè tou, an mème jing baï hana baï dénakè bi takarata. 27Baï ko̱ mi tane ti bèlta ya an noni, baï pina njou‐jo̱bo̱ hana tane to̱ko̱na baï on ko̱ klime sa kita rou kon toulè ya.
Currently Selected:
Pinali a Njou‐Mboro‐Pinali 25: KBN1947
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society in 1947.
