Pinali a Njou‐Mboro‐Pinali 28
28
1Da ko̱ name kan soko bon bèlta tou, na toutou ling an koua on ba Malte.
2Da njou‐woropali on mi nding pan bil jing na, da pame na bon, ka doko hèlè hi na baï ko̱ mbame mi to̱ kassénaï, da tétél mi ba maïya. 3Da ko̱ Paul mi mang nzangnaran di ka kon hèlè, choï mi tèn kala baï ko̱ hèlè mi jang nè ka noung ndo̱kè da haka rou. 4Da ko̱ njou‐woropali on mi ko̱ béké choï on ko̱ mi haka ndo̱kè, klime sa jing hana: Tane so ya, njoukou aïn ba njou‐ina njoukou, ko̱ walabaï guédék mi tane ga ji an kème kou ya, tongna on ko̱ kème kou an loukou mbi on tou. 5Da Paul mi wén choï on bou hèlè, da guèlkè mi tane sé nè ya. 6Da klime kèrè ba yé ma mbara maléba kème ma lé ka hou njouï koukoulion, da ko̱ klime voro on bongkè dita, ka ko̱ko̱ ko̱ fèna mbéo mi tane ga nding nè ya, klime komo kèrafèn kli, ka sa kè ba ouone hana.
7Diya an guèl on, sél koukoulali toutoul toutoul an gangna njoukou on an koua ko̱ ling‐è ba Publius, kème ya na guè bil voulè ka nding jing na bèlta ma name saï. 8Da mono on, baba a Publius mi séta jing jangma bana hèlè mone da jo̱ko̱na séme. Da Paul mi ri guè monè an bil voulou ka hiou Ouone ka goukou ndo̱kè toulè, ka haï monè. 9Da ko̱ kème nding on tou, gara njoukouli on bon ko̱ mi ndé na jangma kéng an koua on, mi gui monè da mone kli mi haï tou, 10kli on mi jone na maïya, da ko̱ name yé oura baï séna ka none mbi fènli on bon ko̱ mi nak na, klime hi kon bateau hi na.
11Da afal ko̱ féou saï mi ta tou, name ourou baï séna ka bateau a Alexandre, bateau on ko̱ mi kaou baï féou tétél an koua on, fèn to̱ko̱na nè ba goune holo wonron njoukouli. 12Da name gna bateau an pou Syracuse da kaou ndourou ma name saï. 13Da name ourou an ndourou ka sé vongna bèl mbi, da tèn Reggio. Da afal name mbéo, koukouna an mboro sud mi kou, da ka name an sérékè name kan pou Pouzzoles, 14name jing yindi an ndourou, klime sa jo̱jo̱ na baï kaouna ma name difala‐séré jing kli da mono on name tèn gui pou Rome. 15Da ko̱ yindi mi la baï na, klime ourou an pou Rome ka gui baï wounatoul jing na an guèl zénacho̱ko̱ an pou Appius tèn Tavernes Saï, da ko̱ Paul mi ko̱ kli on, kème kaou koukoula hi Ouone, da joung hang‐è.
16Da ko̱ name kan pou Rome tou, klime yèng Paul baï kaouna fènè ka ho̱kè jing tourougou mbéo, on ko̱ mi pèng nè.
17Da baï mi gui mahana ka on ko̱ afal name saï Paul mi di hona njoukouli a Juifli; da ko̱ klime ndoï tou, kè sa hi kli: Mè, yindi, mè tane ga nding fèna on ko̱ mi pong Juifli maléba mbora tangko nali ya, da klime bou mi jo̱bo̱ an pou Jérusalem, ka hi mi bi ndo̱ka njou‐Romainli, 18ko̱ klime foul saon baï ni tou, klime ji baï yèngna mi bo̱on da rokokè mi tane ga ti touli baï houl ya. 19Da ko̱ Juifli mi tane ga ji bo̱ko̱ baï on ya, klime nanli bi touli da mè oui baï a César, tongna on tènrèn nonkè mi tane ti baï sana kita kon toula pime pou ni ya. 20Mono, baï toul baï aïn mi ko̱ mè sa jo̱jo̱ oui baï guina ko̱na mi da baï sana baï hi oui, baï ko̱ toul oliya a Israël on mi ko̱ kli gna mi jing sal réme aïn.
21Da kli sa hi nè: Njoukou hanali an guèl Judée mi tane ga pi takarata baï sana baï toulo̱ hi na ya, da yindi an ndourou mi tane ga to̱ko̱ béké baï hana maléba sana baï bèlya kon toulo̱ ya. 22Da name ji baï lana baï on ko̱ mi na hang‐o̱ da, da name toutou baï toul tènrèn none baï aïn njoukouli manguèl bon mi pong.
23Da ko̱ klime kèn namkè hi nè tou, kli gui nyèta guè monè an bil voulè. Da kème to̱ko̱ saon baï on hi kli, ka sa bongbaï toul bilkaou a Ouone, ka wara kli an toul baï a Jésus ko̱ mi dé an bil guingna Moïse da mi dé an bil prophèteli tinassaonkè ka toula pélé bo̱l tèn bèlaléou. 24Da njoukou hanali mi la bilaou baï on ko̱ kème sa, da njoukou afékéli mi tane la bilaou ya. 25Da ko̱ klime tane ga ji bo̱ko̱kè jing hana ya, kli nding baï oura da Paul mi sa gara sèkèrè baïnjaka; Saint‐Esprit mi sa baï ka babaï hi tangko baïli ka mbora prophète Ésaïe ko̱ kème sa:
26Mo sé guè mona njoukou aïnli, ka sa:
Ka lanakè, yé oui ma la ka soukou baï, da yé oui ba tounakè nguite tane tiya;
Da ko̱nakè, yé oui ko̱ ka none baï, da oui ba ko̱nakè tangta tiya.
27Baï ko̱ laou a njoukou aïnli mi na wang;
Da klime chome soukou kli, da kli rima none kli bi rou tou,
Maléba ka touya kli ma ko̱ tangta ka none kli, da kli ma la ka soukou kli,
Da klime tou nguite ka laou kli,
Da kli féré komo mboro kli, da mè haï kli.
28Mono on dadaon an ouime tou on ko̱ mi pi yana‐baï‐toul a Ouone on hi mèran gentili, an klime ndé la kéng.
29Da ko̱ kème sa baï njaka aïn o̱tou, Juifli mi ourou ka sé ka njaka jing hana nyèta.
30Da Paul mi bi ma saka séré an bil voulè on ko̱ kè hi ba cho̱ko̱kè, da kème ya kli on bon ko̱ mi gui monè baï ko̱na nè, 31ka sa mboura bilkaou a Ouone, da kème to̱ko̱ saon baï a Nanjou Jésus‐Christ ndo̱t tane waou, da njoukouna mbéo mi tane dèn mboro nè ya.
Currently Selected:
Pinali a Njou‐Mboro‐Pinali 28: KBN1947
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society in 1947.
