Saint Jean 7
7
1Afal fèn aïnli, Jésus mi sé guè guèl Galilée, kè tane ga ji baï séna guè guèl Judée ya, baï ko̱ Juifli mi nza mborokè baï ina nè.
2Da name gnèna laka Juifli, gnèna laka Tabernacle mi hèdi tou. 3Mono, yine nèli mi sa hi nè: Mo ourou an guèl aïn, ka sé guè guèl Judée, baï an njou‐séna bong noli mi ndé ko̱ pina no kéng ko̱ mome nding. 4Baï njoukouna mbéo tane ga ji baï ndingna fèna ka foli ya, ko̱ kè fènè mi ji baï bina nonkè kala an nona ro̱kè; tokoré mome nding fèn aïnli mo bi nono kala fèno hi njou‐koukoulali. 5Baï ko̱ yine nèli kéng mi tane ga la bilaou‐è ya. 6Mono, Jésus mi sa hi kli: Name ni tane ga mafalkè ya, ka name abaï mane guèbassoko. 7Njou‐koukoulali mi tane ma baï jèkna oui ya; da kli jèk mi tou, baï ko̱ mème to̱ko̱ bongbaï kli bi kala, ko̱ pina kli mi tane bèlya. 8Oui sé gnèna laka on; séna gnèna laka aïn ami mi pane, baï ko̱ name ni mi pane, tane ga kan ya. 9Afal ko̱ kème sa baï aïn hi kli, kè pane amè an guèl Galilée.
10Da ko̱ yine nèli mi hé sé guèl name gnèna laka on tou, kè ndé hé sé fènè kéng, ka nona ro̱kè ya, da ka ba foli.
11Mono on, Juifli mi nza nè an guèl name gnèna laka on, da kli sa: Kè an hane dé? 12Da rokè njoukouli fa baï nyèta jing hana baï toulè. Hanali mi sa: Kè ba bèla njoukou. Afékéli mi sa: Haï tane ti on ya, kè ba njou‐mongna njoukouli ro̱ko̱ta. 13Da njoukouna mbéo mi tane ga sa baï nè an nona rokè ya, baï ko̱ klime ngou waou nona Juifli.
14Da ka hanguèl name gnèna laka, Jésus mi sé guè bil temple, da to̱ko̱ fèn. 15Da laou a Juifli mi sé siya, da kli sa: Njoukou aïn mi tou baï kèna takarata an hani, ko̱ kème tane ga kaou baï mbèla kèna takarata ya lé? 16Mono, Jésus mi féré sa hi kli, ka sa: To̱ko̱nafén ni tane ti ba ami ya, da ba a kè on ko̱ mi pi mi. 17Da tokoré njoukouna mi ji baï kaouna mara fal toulè, kè ma tou kong ba to̱ko̱nafèn on ba a Ouone maléba mème ko̱ sa ka ba mboro ni fèni. 18Kè on ko̱ mi sa ka ba mboro nè fènè, kème nza ba baï jona monè fènè, da kè ko̱ mi nza baï jona kè on ko̱ mi pi nè, kè ba babaï, da vaïnafèn tane ga ti bilè gounfènakè ya. 19Moïse mi hi guingna hi oui jinguèl ya lé? Da njoukouna mbéo an woro baï mi tane ga bou fal guingna ya. Baïfèn da ouime nza mborokè baï ina mi lé? 20Rokè njoukouli on mi féré sa hi nè: Mo kaou jing zabolo. Guème ko̱ nza mborokè baï ina mo lé? 21Jésus mi féré sa, ka sa hi kli: Mè nding pina mbéo bo̱l, da laou baï bon mi sé siya. 22Moïse mi hi oui baï ina gassa jinguèl (da tane ti ba a Moïse ya, da ba a tangko baïli) da ouime i gassa hi njoukou ka name sabbat. 23Da tokoré njoukouna mi sé gassa ka name sabbat, on mi tane ga ti ba baï moungnoura guingna Moïse ya, da baïfèn da hèrè mi ba oui jing mi baï ko̱ mème haï mona njoukou ka name sabbat lé? 24Oui tane wal baï mahana ko̱ ouime ko̱ ka ba none baï ya, da oui wal baï guédék.
25Mono, njoukou hanali an pou Jérusalem mi sa: Tane ti ba kè on ko̱ klime nza mborokè baï ina nè mini ya lé? 26Da oui ko̱, kème sa baï tang an nona rokè da klime kaou yime ka njaka kli! On ba babaï ko̱ zaworoli mi toutou kè on ba Christ lé? 27Da name toutou guèl on ko̱ njoukou aïn mi gui ka ndourou; da ko̱ Christ mi gui njoukouna mbéo mi tane ma baï touna guèl on ko̱ kème gui ka ndourou ya. 28Mono, da Jésus mi to̱ko̱ fèn da bouka guè siya an bil temple, ka sa: Oui toutou mi, da toutou guèl on ko̱ mème ourou gui ka ndourou. Mè tane ga gui ami fèni ya; da kè on ko̱ mi pi mi kè ba babaï, da oui tane ga tou nè ya. 29Mè toutou nè, baï ko̱ mème ourou gui ka monè, da kème ko̱ pi mi tou. 30Baï on klime nza mborokè baï bana nè, da njoukouna mbéo mi tane ga da ndo̱kè monè ya, baï ko̱ name nè mi pane da tane ga kan ya.
31Da njoukou hanali nyèta an wora ro̱kè njoukouli on mi la bilaou‐è, da kli sa: Ko̱ Christ mi gui, kè ma nding fèn‐to̱ko̱nakèli ta aïnli ko̱ njoukou aïn mi nding lé? 32Pharisienli mi la ko̱ rokè njoukouli mi gnoronfèn jing hana toul fèn aïnli baï toulè. Mono, loukou sacrificateurli da pharisienli mi pi kabitali baï bana nè.
33Mono Jésus sa: Mè pane jing oui gounfènakè on, da afal mè ma sé guè mona kè on ko̱ mi pi mi. 34Yé oui ma nza mi da oui ba ko̱na mi tane tiya, da guèl on ko̱ mème kaou, oui tane ma baï guina ya. 35Mono, Juifli mi bakèdakè jing hana fèn kli, ka sa: Yé njoukou aïn ma sé ba hani, da na ma ko̱ nè ya lé? Kè ma sé guè mona njoukouli on ko̱ mi yaïli sé mona Grecli, da to̱ko̱ fèn hi Grecli lé? 36Baïnjaka on ko̱ kème sa ba fèn lé? Yé oui ma nza mi da oui ba ko̱na mi tane tiya, da guèl on ko̱ mème kaou, oui tane ma baï guina ya.
37Ka sèkèrè name gnèna laka ko̱ ba loukou name, Jésus mi ourou siya da o ka bouka guè siya, ka sa: Tokoré po̱ko̱ mbi mi i njoukouna, kème gui moni ka njo. 38Kè on ko̱ mi la bilaou ni, mbi yana ma tèn ba toutoung mbi bi bilè ko̱ mi ou, mahana ko̱ Takarata a Ouone mi sa. 39Da kè sa on ba toula Saint‐Esprit, da yé kli on bon ko̱ mi la bilaou‐è ma ya nè, da Saint‐Esprit mi pane ga gui ya, baï ko̱ Jésus mi tane ga ya jonafèn nè ya.
40Mono ko̱ njoukou hanali nyèta an wora ro̱kè njoukouli mi la baïnjaka aïnli, kli sa: Ka babaï, kè ba prophète on. 41Njoukou afékéli mi sa: Kè on ba Christ. Da njou‐hanali mi oui: On ba babaï, ko̱ Christ ma gui ka guèl Galilée lé? 42Takarata a Ouone mi sa: Christ ma gui ka ba mèran David ya lé? da kè ma gui an pou Bethléhem, pou a David, ko̱ kème bi ndourou jinguèl ya lé? 43Mono, ro̱kè njoukou aïnli mi wal jing hana baï toulè. 44Njoukou hanali an woro kli mi ji baï bana nè, da njoukouna mbéo mi tane ga da ndo̱ko̱ monè ya.
45Mono, kabitali mi féré guè mona loukou sacrificateurli, da pharisienli. Da klime oui kli: Baïfèn da ouime tane ga ya nè gui ya lé? 46Kabitali mi féré sa: Njoukouna tane ga sa baï mahana ka njoukou aïn ya. 47Mono, pharisienli mi féré sa hi kli: Kè ndé mong oui tou kéng lé? 48Zaworo hanali maléba pharisien hanali mi la bilaou‐è lé? 49Da ro̱kè njoukouli on ko̱ tane ga tou guingna ya, klime kaou ka poukouna. 50Nicodème, kè on ko̱ mi gui mona Jésus ambèl, da kè ba mbéo an woro kli, kè sa hi kli: 51Guingna na mi wal baï hi njoukou ambèl ko̱ name la bongbaï nè fènè, da tou fèn on ko̱ kème nding lé? 52Klime féré sa, ka sa hi nè: Mo ba njoukou an guèl Galilée kéng lé? Mo nza da mo ma ko̱ ko̱ prophète ba tèna ka guèl Galilée tane tiya.
53Da kli bon mi ourou sé dodok voul klili.
Currently Selected:
Saint Jean 7: KBN1947
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1947.
