Saint Luc 10
10
1Afal fèn aïnli Nanjou sane afékéli bongkè‐difala‐séré, da kè pi kli jing hana séré séré ti dambèl hi nè bil loukou pouli bon, da guèl on bon ko̱ kème nding baï séna rou. 2Da kè sa hi kli: Waka to maïya, da njou‐bakarali tane nyè ya. Mono on oui sa jo̱jo̱ Nanjou waka on, an kème pi njou‐bakarali gui baï loura fèn paï an bil waka nè. 3Oui sé mboro abaï, mono, mè pi oui sé mahana ka goune badouali an wora naïn loupli. 4Oui sé jing ngou mbo̱ri, maléba loukou ngou, maléba saboko ya, da oui name njoukouna mbéo an domboro ya. 5Da bil voul hana ko̱ ouime ti ri guè rou, oui sa: Go̱ro̱ iki mi gui an bil voulou aïn. 6Da tokoré goune a goro iki makaou an ndourou, yé go̱ro̱ iki abaï makaou jing nè, da tokoré mi tiya, yé féré guè mone baï. 7Da oui kaou bil voul o̱kèo̱ da oui son ka njo fèn on ko̱ klime hi oui; baï ko̱ njou‐bakara mapélékè fèn on ko̱ kème jing. Oui tane dé sé guè voula njoukouna katoul ya. 8Da bil pou hana ko̱ ouime ti ri guè rou, da klime ji pamna oui, oui son fèn on ko̱ klime hi oui. 9Oui haï mona njou‐jangmali an bil pou on, ka sa hi kli: Bilkaou a Ouone mi hèdi jing oui tou. 10Da bil pou hana ko̱ ouime ti ri guè rou, da kli tane ga pame oui ya, oui tèn an domboro pou aïn, ka sa: 11Na to sassal a pou baï ko̱ mi mbo bo̱ko̱ na, na to on kon bèl mone baï; da oui toutou baï aïn, ko̱ bilkaou a Ouone mi hèdi jing oui tou. 12Mè sa hi oui, ka name o̱kèo̱ soko, yé barabaï ma lé toul pou on ko̱ ma ta toul barabaï a pou Sodome.
13Go̱ro̱ séta mi ba baï a mo pou Chorazin! Go̱ro̱ séta mi ba baï a mo, pou Bethsaïda! baï ko̱, tokoré njèran pinali mi nding a pou Tyr da Sidon mahana ko̱ mi nding an bil baï, kli hèkè békéfèn akli jinguèl soko, ka bou la saki da kaou bil choukou. 14Da mono, yé barabaï ma lé toul baï ko̱ ma ta toul barabaï a pou Tyr da Sidon ka name walabaï. 15Da mo Capernaüm, ling‐o̱ ma ti bo̱l tèn nonkala lé? Yé mome diri sé guè tiya guè guèl kaouna a houlkèli.
16Kè ko̱ la oui mi la mi, da kè ko̱ pong oui, mi pong mi; da kè ko̱ pong mi, pong kè on ko̱ pi mi.
17Da bongkè‐difala‐séré mi féré ka ba jangnandaï, ka sa: Nanjou, zabololi mi la baï na ka bil ling‐o̱. 18Da Jésus sa hi kli: Mè ko̱ Satan lé gui ka nonkala mahana ka fana none mbame. 19Oui ko̱, mè hi njèran hi oui, baï ndana toula choïli da ndaïli, da toula njèran a bakèo̱ bon; da fèna mbéo tane ma baï ndingna bèlya jing oui ya. 20Da oui jangndaï ya, baï ko̱ espritli mi la baï abaï; da oui jangndaï baï ko̱ ling a abaï mi dé bi takarata an nonkala tou.
21Ka l’heure o̱kèo̱ Jésus jangndaï ka esprit, da kè sa: Mè kaou koukoula hi mo, O Baba, Nanjou an nonkala da an koukoula, baï ko̱ mome mou fèn aïnli jing cho̱kna njoukouli tèn kli on ko̱ tou fèn ta, da mo to̱ko̱ saon fèn aïnli hi ba joï goundi, babaï Baba, mè jone mo toul fèn on ko̱ mome ko̱ bèl mono ta. 22Baba ni hi fènli bon bi ndo̱ko̱ ni tou, da njoukouna mbéo mi tane tou ya Goune fènè ba kè ba guè lé, bo̱l ba Baba fènè, da njoukouna mbéo mi tane ga tou ya Baba fènè ba kè ba guè lé? bo̱l ba Goune fènè, da kè on ko̱ Goune fènè mi ji baï to̱ko̱na nè hi nè. 23Da kè ki monè guè mona njou‐séna bongli, kè sa ka foli: Jangnandaï ba baï a none on ko̱ ko̱ fènli on ko̱ oui ko̱! 24Baï ko̱ mè sa hi oui, prophèteli da nanjoukaouli nyèta ji baï ko̱na fènli on ko̱ oui ko̱, da kli tane ga ko̱ ya, da kli ji lana fèn on ko̱ oui la, da kli tane ga la ya.
25Da mono, njou‐to̱ko̱na guingna mi ourou siya ka lé Jésus, ka sa: Njou‐to̱ko̱nafèn, yé mème nding ba fèn an mème ya pélé yana kambèlè lé? 26Da kè sa hi nè: Fèn mi dé an bil takarata guingna ba fèn lé? Mo kèn ba fèn an bilkè lé? 27Da kème féré sa, ka sa: Dadaon mome sé hang Nanjou, Ouone no, jing go̱ro̱ bon, da jing laou‐o̱ bon, tèn jing njèran no bon, da jing laou tounafèn no bon; da mome sé hang a ba no mahana ka ba mono fèno. 28Da kè sa hi nè: Mo féré baï bèlta tou, mome nding on, yé mo kou. 29Da baï ko̱ kè ji sana bèlta toul monè fènè, kè sa hi Jésus: Ba ni ba guè lé? 30Jésus mi féré sa, ka sa: Njoukouna mbéo ourou an pou Jérusalem da diri sé guè pou Jéricho. Kè lé an ndo̱ka njou‐riyali, da kli fan la nè ka njo̱ nè, ka yèng nè ka ourou, da kème nding baï houl. 31Da sacrificateur hana mbéo mi ta domboro on, da ko̱ kème ko̱ njoukou aïn, kè dé ka mboro lèkè. 32Da mono Lévite mbéo mi ndé gui amè kéng, da ko̱ kème kan guèl on, kè ko̱ nè ka ndé dé ka mbora lèkè kéng. 33Da njoukouna an guèl Samarie mi sé ya domboro on, da kème tèn guèl an njoukou on, da ko̱ kème ko̱ njoukou aïn kè ko̱ nè passé ta. 34Da kè gui bèl monè, kè kou nongno nèli ka bi nome da vin toul nongno on; da kè ya nè bi toul torofio nè, ka ya nè sé guè wonron voulou, ka pèng nè an soko. 35Da pélé aféké kè hi mbo̱ri denierli séré hi nanjou voul aïn. Kè sa hi nè: Mo pèng nè, da tokoré mome jo̱l mbo̱ri ta aïn, yé mè féré hi mo ko̱ mème féré fal. 36Mo kèrè ba fèn jing njoukouli on saï ba guème, ko̱ ba ba a kè on, ko̱ tèn an wora njou‐riyali lé? 37Da kè sa: Kè on ko̱ nding haïo hi nè. Da Jésus sa hi nè: Mo sé ka nding mahana on.
38Da ko̱ Jésus sé domboro jing njou‐séna bong nèli, kè kan bil pou hana, da waïn hana mbéo ling‐è ba Marthe mi ya nè sé guè voulè. 39Ling a yine nè ba Marie, ko̱ kaou bo̱ko̱ hola Jésus kéng, ka la baïnjakè. 40Da ndingna bakara an bil voulou mba njaka Marthe nyèta, da kè guè mona Jésus, ka sa: Nanjou, mo ji ba an yine ni mi yèng mi an mème nding bakara ka ho̱ko̱ ni lé? Mono on, mo sa hi nè an kème lé mbèli. 41Da Jésus mi féré sa, ka sa hi nè: Marthe, Marthe, mo bi hang‐o̱ guè siya, da mono hou mbi baï toul fènli nyèta. 42Da ba fèn mbéo on ko̱ tane ti baï pènrankè ya. Da Marie mi jing amè bèlafèn on, da yanakè an ndo̱kè tane tiya.
Currently Selected:
Saint Luc 10: KBN1947
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1947.
