Saint Marc 11
11
1Ko̱ klime hèdi bèl pou Jérusalem, diya jing pou Bethphagé da Béthanie, an bèl souraguèl Oliviers, da Jésus mi pi njou‐séna bong nèli séré, 2ka sa hi kli: Oui sé fèn baï guè bil pou on ko̱ na mbèl baï yo̱; da ko̱ ouime tèn bil pou on, koukoulion, oui ma ko̱ goune torofio ko̱ klime gna, ko̱ njoukouna mi tane ga kaou toulè ya; oui sélè, ka ya nè gui. 3Da tokoré njoukouna mi oui oui ba: Baïfèn da ouime nding on lé? oui sa ba: Nanjou fènè mi ji nè. Da koukoulion kè ma pi nè gui guèl aïn.
4Da njou‐séna bongli mi sé, ka ko̱ goune torofio ko̱ klime gna bi kala an njaka mboro an hanguèl mboro, da klime sélè. 5Da njoukou hanali ko̱ mi o woro kli an soko mi oui kli: Fèn oui an nding lé? Baïfèn da ouime sél goune torofio on lé? 6Da klime féré sa hi kli mahana ko̱ Jésus mi sa. Da kli yèng kli sé. 7Da klime ya goune torofio guè mona Jésus, ka fan la klili kon toulè, da Jésus mi kaou toulè. 8Da njoukouli nyèta mi yaïli la klili kon domboro, da afékéli mi hal ngoï an bil waka, ka kon domboro. 9Da kli on ko̱ ko̱ sé dambèl, tèn kli on ko̱ tong Jésus, mi hidifèn: Hosanna! Same kè ko̱ gui ka ling a Nanjou! 10Same bilkaou on ko̱ gui, bilkaou a baba na David! Hosanna an sèkèrè guèl ndèk!
11Da Jésus mi gui pou Jérusalem, kè ri guè bil temple. Da afal ko̱ kème ènrèn fènli bon tou, da ko̱ séssé mi nding baï rina, kème do̱li sé guè pou Béthanie jing kli on botoulè‐séré.
12Afal ka péla aféké, ko̱ klime yé tèna kala an pou Béthanie, nzala mi i Jésus. 13Ko̱ kème ko̱ di njouï dita sé jing goïkè, kè guè, baï ènrankè ka touya kè ma ko̱ lénakè an ndourou; da ko̱ kè guè bèl di njouï on, kè ko̱ ba goïkè bo̱on, baï ko̱ mi tane ga ti ba féou léna di njouï on ya. 14Da kème féré sa, ka sa hi di njouï on: Afal name aïn njoukouna mbéo ba sona léna no ba aféké tane tiya. Njou‐séna bong nèli mi ndé lala baï on bon!
15Kli gui tèn pou Jérusalem, da Jésus mi ri sé guè bil temple, ka tissaon baï nina kli on ko̱ mi jo̱l fèn tèn kli on ko̱ mi zé fèn an bil temple; da kème sokoro tableli a njou‐komona mbo̱rili kon pa, tèn kangala akli on ko̱ mi jo̱l nguédéli. 16Da kème tane ga yèng mboro hi njoukouna mbéo baï fana fèn ka ta bil temple ya, mahana ka on ko̱ klime hol ili. 17Da kème to̱ko̱fèn hi kli, ka sa: Mahana ka on ko̱ mi dé ya lé: Vouli bi lingkè ba voul hiouna Ouone baï a mèrèn pime pouli bon ya lé? Da ba oui, oui mosso nè tèn ba kou a njou‐riyali.
18Da loukou sacrificateurli tèn njou‐to̱ko̱na bong guingnali mi la baï on, da klime nza mborokè baï ina nè; baï ko̱ klime ngou waou nè, da baï ko̱ laou a ro̱kè njoukouli on bon mi sé siya baï toul to̱ko̱nafèn nè.
19Ka bèlaléou bon Jésus mi tèn an pou on sé kala.
20Ka guèlapélé ko̱ klime yé tana, kli ko̱ ko̱ di njouï on mi ho̱ko̱ wèkèrè bon tèn saonkè. 21Da ko̱ Pierre mi kèrè fal baï on, kème sa hi Jésus: Rabbi, mo ko̱, di njouï on ko̱ mome poukou nè mi ho̱ko̱ tou. 22Da Jésus mi féré sa, ka sa hi kli: Oui toussaon a Ouone. 23Babaï, mi mè sa hi oui, tokoré njoukouna mi sa hi souraguèl aïn: Mo ourou ka wou mono fèno sé bil loukou mbi‐tome, da tokoré kème tane ga nding ka ndouri ka bo̱ko̱ go̱rè ya, da kème la bilaou ka babaï ba fèn on ko̱ kème oui mi gui monè, yé kè ma ya fèn on. 24Mono baï on ko̱ mème sa hi oui ba: Fènli bon ko̱ ouime oui ka mboro hiouna Ouone, oui la bilaou ba yé oui ya fèn on, yé oui ma ya. 25Da ko̱ ouime o baï hiouna Ouone, tokoré ouime yé jing baï hana kira njoukouna, oui yèng bi mborokè hi nè, mahana ko̱ Baba baï on ko̱ kaou nonkala mi yèng bi mboro békéfèn baïli. 26Da tokoré ouime tane ga yèng bi mborokè ya, yé Baba baï on ko̱ kaou an nonkala ma ndé yèngna bi mboro békéfèn baïli tane tiya kéng.
27Da klime kaïn féré ré gui pou Jérusalem. Da ko̱ Jésus mi sèrè ya bil temple, loukou sacrificateurli, da njou‐to̱ko̱na bong guingnali tèn tangchidoli mi gui monè, 28ka sa hi nè: Mo nding fèn aïnli ka ba bil ling a guè lé? maléba guème ko̱ bi njako̱ baï ndingna fèn aïnli lé? 29Da Jésus mi sa hi kli: Mè ji ouina oui ba none baï mbéo bo̱l; an ouime féré sa hi mi, da yé mè sa hi oui ka ba bil ling a guè mi mè nding fèn aïnli. 30Baptême a Jean mi gui ka ba nonkala, maléba ka ba mona njoukouli lé? Oui sa gui hi mi. 31Da kli kèrè ka bo̱ko̱ go̱ro̱ kli jing hana, ka sa: Tokoré name sa ba: An nonkala, yé kè ma sa ba: Baïfèn da oui tane ga la bilaou nè ya lé? 32Da tokoré name sa ba: An njoukouli . . . Kli ngou waou a njoukouli, baï ko̱ njoukouli bon mi kèrè ko̱ Jean ba prophète ka babaï. 33Da klime féré, ka sa hi Jésus, ka sa: Name tane tou ya. Da Jésus mi sa hi kli: Da on mè ba sanakè hi oui tane tiya, ka ba bil ling a guè mi mè nding fèn aïnli.
Currently Selected:
Saint Marc 11: KBN1947
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1947.
