Saint Marc 15

1Koukoulion ka guèlapélé, loukou sacrificateurli jing tangchidoli da njou‐to̱ko̱na bong guingnali tèn njou‐walabaïli, kli bon mi ndo̱ï baï bana kèdakè, da gna Jésus, ka ya nè sé, da hi nè bi ndo̱ka Pilate.

2Da Pilate mi oui nè: Mo ba Nanjoukaou a Juifli lé? Da Jésus mi féré sa, ka sa hi nè: Mo sa on tou. 3Da loukou sacrificateurli mi sa kita kon toulè nyèta. 4Da Pilate mi kaïn oui nè ba aféké ka sa: Mo ba sana fal njako̱ tane tiya lé? Mo ko̱ klime sa kita kon toulo̱ toul fènli nyèta. 5Da Jésus mi tane féré fal njakè ya, da mono on laou a Pilate mi sé siya.

6Guèbassoko jinguèl ka name loukou laka kème yèng njou‐jo̱bo̱ mbéo on, ko̱ klime ji. 7Da njoukouna mbéo ko̱ ling‐è ba Barabbas kaou jobo jing kli on ko̱ nding nzaou jinguèl, njoukouli on ko̱ nding nzaou mi i njoukouli. 8Da rokè njoukouli mi ourou siya da tissaon baï ouine Pilate an kème nding mahana ka on ko̱ kème ti nding jinguèl. 9Da Pilate mi féré sa hi kli, ka sa: Oui jiji ba mème sél Nanjoukaou a Juifli hi oui lé? 10Baï ko̱ kème toutou ko̱ loukou sacrificateurli mi hi Jésus bi ndo̱kè ka ba fanahang. 11Da loukou sacrificateurli mi lang ro̱kè njoukouli on, an Pilate mi yèng ba Barabbas hi kli, guèl bo̱ka Jésus. 12Da Pilate mi kaïn sa ba aféké, ka sa hi kli: Mono on, yé mè nding ba fèn jing kè on ko̱ ouime di nè ba Nanjoukaou a Juifli lé? 13Da klime kaïn wan njaka guè siya ho: Bara nè bi di croix. 14Da Pilate mi sa hi kli: Fème ko̱ kè nding bèlya lé? Da klime wan njaka guè siya ho mingta: Bara nè bi di‐croix. 15Da Pilate, baï ko̱ kème ji bina wélé toula Juifli, kème sél ba Barabbas hi kli; da afal ko̱ kème jo̱ Jésus ka baraza, kè hi nè baï an klime bara nè bi di‐croix.

16Da tourougouli mi ya nè sé guè njaka bara, ko̱ ba voul walabaï, da klime ndoï sarang tourougouli bon guè ndourou. 17Da klime bou bitibiti la hi nè, ka kang mbélé ngassadi, da goukou bi toulè. 18Da klime tissaon baï namna nè, ka sa: Woromon, Nanjoukaou a Juifli! 19Da klime jo̱ toulè jing pakala, ka san same kon toulè, da houkou an mbèlè, ka hiou nè. 20Da ko̱ klime gaï nè tou, kli voulou bitibiti la guèfal, da kli bou ba dodok la nè fènè hi nè. Da klime ya nè sé kala baï bara nè bi di‐croix.

21Da njoukouna mbéo ko̱ ling‐è ba Simon an pou Cyrène, baba a Alexandre da Rufus, ko̱ mi féré gui pou ka waka; klime to̱ko̱ssé hi nè baï hola di‐croix a Jésus. 22Da klime ya Jésus gui guèl on ko̱ klime bi lingkè ba Golgotha, on mi sa ba guèl hourou. 23Da klime ji hina vin ko̱ klime joukourou jing myrhe hi nè an kème njo, da kème tane ji njonakè ya.

24Da klime bara nè bi di‐croix, ka wal la nè jing hana, da rou mbadé rou baï ko̱na kong ba guème ko̱ ma i. 25L’heure mane saï, ko̱ klime bara nè bi di‐croix.

26Da fèn on ko̱ klime dé bi guè siya an laou toulè mi to̱ko̱ none fèn on ko̱ klime sa kon toulè ko̱ sa ba: NANJOUKAOU A JUIFLI.

27Da klime ndé bara njou‐riya séré jing nè kéng: aïn mbéo an mboro wonron ndo̱kè da kènkè an mboro waïn ndo̱kè. 28Mono on an tènrèn none Takarata a Ouone mi tèn kala ka babaï: Kli ndé kèn nè mabahana jing njou‐séla guingnali.

29Da kli on ko̱ ta ndourou mi poukou nè, ka tékéré toul kli, da sa: En! Mo ko̱ bèngnèrèn temple aïn ka kaïn za nè ma name saï, 30mo kou mono fèno, ka diri gui tiya an toul di‐croix aïn! 31Da mono on, loukou sacrificateurli tèn njou‐to̱ko̱na bong guingnali mi ndé gaï nè jing hana kéng, ka sa: Kème kou ba njou‐afékéli, kè tane ma baï kouna monè fènè ya! 32Oui yèng an Christ, Nanjoukaou a Israël, mi diri gui tiya kassénaï an toul di‐croix, an name ko̱ ka la bilaou! Da kli on ko̱ klime bara kli bi di‐croix an bèl monè, mi ndé kèkè nè kéng.

33Da ko̱ l’heure mi mane difala‐mbéo, guèl mi yiri kon toul koukoula bon bo̱l tèn l’heure difala‐nèng. 34Ka l’heure a difala‐nèngkè Jésus mi wan njaka mingta guè siya: Éloï. Éloï, lama sabachthani? On mi sa ba: Ouone ni, Ouone ni, baïfèn da mome yèng mi lé? 35Da hanali an wora kli ko̱ mi o an ndourou, ko̱ klime la on, kli sa: Oui ko̱, ko̱ kème di Élie. 36Da hana mbéo mi ngou sé, da ko̱ kème bou raro bil fona mbi lènadi mba, kè gna bi njaka pakala, baï hina Jésus an kème njo, ka sa: Oui yèng, an name ko̱ kong ba yé Élie ma gui baï dira nè gui tiya.

37Da Jésus mi wan njaka mingta guè siya, ka yèng esprit nè.

38Da loukou la voile an bil temple mi go̱ro̱ mane séré ka siya bo̱l tèn tiya.

39Da ko̱ kabita tourougouli ko̱ o bèl mona Jésus ka ko̱, ko̱ kème yèng esprit nè mahana ka on, kè sa: Babaï, njoukou aïn ba Goune a Ouone.

40Waïnli mi ndé kaou dita kéng ka ko̱. An zéng kli ba Marie Magdala, da Marie ma a lélé Jacques da Joses da Salomé, 41kli on mono, ko̱ Jésus mi pane kaouna guèl Galilée, klime sé falè, ka nding bakara hi nè, tèn gara waïn afékéli nyèta, ko̱ mi hé gui jing nè jinguèl ka pou Jérusalem.

42Da ko̱ bèlaléou mi lé tou, — baï ko̱ ba name réknafèn ti dambèl hi name sabbat, — 43Joseph an pou Arimathée mi gui. Kè ba cho̱kna njou‐bana kèdakè, da kè fènè mi ndé voro bilkaou a Ouone kéng. Da kème sé guè mona Pilate ndo̱t tane waou ka oui nè baï houl a Jésus. 44Da laou a Pilate mi sé siya ko̱ kème la ba Jésus mi hou tou gata on, da kème di kabita toulougouli, ka oui nè ba Jésus mi hou gata on tou. 45Da ko̱ kème la ko̱ kabita toulougouli mi sa tangta ba kème hou ka babaï tou, kè hi houla Jésus hi Joseph. 46Da Joseph mi zé la lin, da bi houla Jésus guè tiya an toul di‐croix, ka kiwili nè ka la lin on, da goro nè an bil pal on, ko̱ klime dang an bil loukou kone, da kè ki kone saou bi njaka pal on. 47Da Marie Magdala, da Marie ma Joses, mi ènrèn guè guèl on ko̱ klime bou nè rou.

Currently Selected:

Saint Marc 15: KBN1947

Highlight

Copy