Saint Marc 2
2
1Afal name hanali, Jésus mi kaïn féré gui pou Capernaüm ba aféké, kli la tirikè ko̱ kè makaou bil voulou. 2Da koukoulion njoukouli ro̱ko̱ta mi ndo̱ï guè ndourou, mono on ko̱ guèl mi tane ma kli ya, tongna tèn njaka mboro bon, da kè sa baïnjaka hi kli.
3Da klime gui ka ya njoukou ko̱ na jangma yawè, guè monè, ko̱ njoukouli nèng mi bang nè. 4Da ko̱ klime lé baï guèna mona Jésus pélé baï ko̱ njoukouli mi ro̱ko̱ta, kli bourou toul voulou tane guèl on ko̱ Jésus mi kaou rou, ka diri toko ko̱ njou‐jangma yawè mi na bou rou ka guèl on ko̱ klime bourou. 5Da ko̱ Jésus mi ko̱ tounassaon akli, kè sa hi njou‐jangma yawè: Goune ni, mè yèng bi mboro békéfèn noli tou. 6Da njou‐to̱ko̱na bong guingna hanali ko̱ makaou ndourou mi kèrè ka bo̱ko̱ go̱ro̱ kli: 7Baïfèn da njoukou aïn mi sa on lé? Kème poukou ba Ouone. Guème ko̱ ma baï yèngna bi mboro békéfènli, wara ko̱ ba Ouone ka ho̱kè bo̱l ya lé? 8Koukoulion Jésus mi toutou baï aïn ka esprit nè, ko̱ klime kèrè ka bo̱ko̱ go̱ro̱ kli, da kème sa hi kli: Baïfèn da ouime kéré baï aïnli ka bo̱ko̱ go̱ro̱ baï lé? 9An hane mi la maïya lé? Baï sanakè hi njou‐jangma yawè on ba: Mè yèng mi mboro békéfèn noli tou, maléba baï sana ba: Mo ourou siya ka bi toko no ka sé lé? 10Da ba baï an ouime toutou ko̱ Goune a njoukou mi jing njèran an koukoula ma baï yèngna bi mboro békéfènli, 11kè sa hi njou‐jangma yawè on: Mè sa bi njako̱, mo ourou siya, ka bi toko no, da sé guè bil voulo̱. 12Da koukoulion kème ourou siya, ka bi toko nè, da tèn guè kala an none kli bon, mono on ko̱ laou kli bon mi sé siya, da klime jone Ouone, ka sa: Na tane ga ko̱ fèn mahana ka aïn jinguèl on ya.
13Da Jésus mi tèn kala ka kaïn féré sé guè bèl loukou mbi; da ro̱kè njoukouli on bon mi guè monè, da kème to̱ko̱ fèn hi kli. 14Ko̱ kème yé tana, kè ko̱ Lévi goune a Alphée, ko̱ mi kaou guèl mangna l’impôt, da Jésus mi sa hi nè: Mo gui fali. Da kème ourou siya ka sé fala Jésus.
15Da mono on, ko̱ Jésus mi kaou table an bil voula Lévi baï sona laka, njou‐mangna l’impôtli da njou‐békéfènli makaou jing nè tèn njou‐séna bong nèli; baï ko̱ klime nyèta da kli sé falè. 16Da ko̱ njou‐to̱ko̱na bong guingnali tèn pharisienli mi ko̱ ko̱ Jésus mi son laka jing njou‐békéfènli tèn njou‐mangna l’impôtli, kli sa hi njou‐séna bong nèli: Baïfèn da kème son laka ka njo jing njou‐mangna l’impôtli tèn njou‐békéfènli lé? 17Da ko̱ Jésus mi la baï on, kè sa hi kli: Tane ti ba kli on ko̱ mi tane ga na jangma ya, mi ko̱ ji médecin, da ba kli on ko̱ mi na jangma mi ko̱ ji médecin. Mè tane ga gui ba baï dina njou‐guédékli ya, da mè gui ba baï dina njou‐békéfènli.
18Da njou‐séna bongli a Jean tèn a pharisienli mi chang laka, da klime guè mona Jésus, ka sa hi nè: Baïfèn da njou‐séna bongli a Jean tèn njou‐séna bongli a pharisienli mi chang laka, da njou‐séna bong noli mi tane ga chang laka ya lé? 19Da Jésus mi sa hi kli: Yé ndo̱ko̱bali a wa waïn ma chang laka ko̱ wa waïn mi pane jing kli lé? Guèbassoko ko̱ wa waïn mi pane jing kli, kli tane ma baï changna laka ya. 20Da namkè ma gui o̱, ko̱ mi ya wa waïn a woro kli, da mono on, yé kli ma chang laka ka name o̱kèo̱. 21Njoukouna mi tane ga san féké la an toul tangkè ya; maléba tongna kème nding on féké la ma go̱ro̱ tangkè da go̱ro̱ ta guèlkè nyèta. 22Da njoukouna mi tane ga kon féké vin an bil tang mboung outre ya; maléba tongna kème nding on, féké vin ma fourou ka dèrè mboung on kon pa; da klime kon féké vin on ba bil féké mboung outre.
23Da baï mi gui mahana ka on ka name sabbat, ko̱ Jésus mi ta an bil waka mèrèn mapa, njou‐séna bong nèli mi tissaon baï wéna toul mèrèn mapa on ka toul séna. 24Da pharisienli mi sa hi nè: Mono, baïfèn da klime nding fèn on ko̱ ka mboro guingna tane ma baï ndingnakè ka name sabbat ya lé? 25Da Jésus mi féré sa hi kli: Oui tane ga kèn an Takarata toul fén on ko̱ David mi nding jinguèl ya, ko̱ fèn mi nak nè, da nzala mi i nè, kira njoukouli on ko̱ mi jing nè lé? 26Ka mboro hani mi ko̱ kème ri bil voula Ouone, ka name on ko̱ Abiathar ba zaworo sacrificateur, ka son mapa a Ouone, ko̱ ka mboro guingna tane ma baï sonakè ya, wara sacrificateurli ya, da kème ndé hi kli on ko̱ mi jing nè kéng lé? 27Da kème sa hi kli: Mi nding name sabbat ba baï toula njoukou, ka tane ga nding njoukou ba baï toula name sabbat ya. 28Baï on, ko̱ Goune a njoukou ba ndé nanjou a name sabbat kéng.
Currently Selected:
Saint Marc 2: KBN1947
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1947.
