Jɛnɛsis 22
22
Nyɔŋmɔ ka Abraham
1 #
Heb 11.17-19; Yak 1.12 Saji nɛɛ asɛɛ lɛ eba mli akɛ Nyɔŋmɔ ka Abraham ni ekɛɛ lɛ akɛ, “Abraham!” Ni Abraham kɛɛ, “Naa mi!”
2 #
2 Kron 3.1
Nyɔŋmɔ kɛɛ lɛ akɛ, “Ŋɔɔ obi Isak ni ji obi koome ni odɔɔ ehe lɛ, ni oyiŋ oya Moria Shikpɔŋ lɛ nɔ, ni okɛ lɛ ayashã afɔle yɛ jɛi, yɛ gɔji lɛ ateŋ ekome ni matsɔ̃ɔ bo lɛ nɔ.”
3No hewɔ lɛ, Abraham te shi leebi maŋkpa, ni ewo eteji nɔ nii, ni eŋɔ eblahii lɛ enyɔ kɛ ebi Isak lɛ efata ehe. Egba lai ni ekɛyaashã shãa afɔle lɛ; ni eyiŋ eeya he ni Nyɔŋmɔ etsɔ̃ɔ lɛ lɛ. 4Gbi ni ji etɛ̃ lɛ nɔ lɛ, Abraham wo ehiɛ nɔ, ni ena jɛi yɛ shɔŋŋ. 5Kɛkɛ ni Abraham kɛɛ eblahii lɛ akɛ, “Nyɛkɛ teji lɛ ahĩa biɛ; mi kɛ oblanyo lɛ miiya he ni jeɔ lɛ wɔyaja Nyɔŋmɔ ni wɔku wɔsɛɛ wɔba nyɛŋɔɔ ekoŋŋ.”
6Kɛkɛ ni Abraham kɛ afɔleshãa lai lɛ tere ebi Isak, ni eŋɔ la lɛ kɛ kakla lɛ ehiɛ edɛ; ni amɛyi enyɔ lɛ pɛ amɛyi mli amɛtee. 7Be ni amɛyaa lɛ, Isak kɛ etsɛ Abraham wie, ni ekɛɛ, “Ataa!” Etsɛ here nɔ ekɛɛ, “Naa mi, mibi!” Ni Isak kɛɛ, “Naa, la kɛ lai nɛ, shi nɛgbɛ too gwantɛŋbi ni akɛbaashã shãa afɔle lɛ yɔɔ?”
8Abraham to he akɛ, “Mibi, Nyɔŋmɔ diɛŋtsɛ aaahã too gwantɛŋ ni akɛshã shãa afɔle lɛ!” Kɛkɛ ni amɛyi enyɔ lɛ fɛɛ amɛkɛshwie nɔ kɛtee.
9 #
Yak 2.21
Be ni amɛshɛ he ni Nyɔŋmɔ etsɔ̃ɔ lɛ, Abraham ma afɔleshãa latɛ yɛ jɛi. Eto lai lɛ eshwie afɔleshãa latɛ lɛ nɔ. Kɛkɛ ni efi ebi Isak lɛ, ni ekɛ lɛ ŋmɛ lai lɛ nɔ yɛ afɔleshãa latɛ lɛ nɔ. 10Kɛkɛ ni Abraham kpã enine mli ekɔ kakla lɛ koni ekɛgbe ebi lɛ. 11Shi Yehowa bɔfo lɛ jɛ ŋwɛi etsɛ Abraham ekɛɛ, “Abraham, Abraham!” Abraham here nɔ ekɛɛ, “Naa mi!” 12#Yer 7.31; Rom 8.32 Bɔfo lɛ kɛɛ lɛ akɛ, “Kaahã onine miisa oblanyo lɛ he, ni asaŋ kaafee lɛ nɔ ko nɔ ko! Shi mina mile agbɛnɛ akɛ osheɔ Nyɔŋmɔ gbeyei, akɛni okamaaa lɛ obi koome nɛɛ lɛ.”
13Kɛkɛ ni Abraham wo ehiɛ nɔ; eyaakwɛ ehe lɛ, naa ojwɛni ko yɛ esɛɛgbɛ ni eklontoi elalaa koo. Abraham tee eyamɔ ojwɛni lɛ, ni eŋɔ lɛ eshã shãa afɔle lɛ yɛ ebi lɛ najiaŋ. 14No hewɔ lɛ, Abraham wo jɛi gbɛi akɛ “Yehowa aaakwɛ.” No hewɔ akɛɔ kɛ ŋmɛnɛ akɛ, “Yehowa Gɔŋ lɛ nɔ aaakwɛ yɛ lɛ.”
15Ni Yehowa bɔfo lɛ jɛ ŋwɛi etsɛ Abraham nɔ ni ji shii enyɔ nɔ, 16#Heb 6.13-14 ni ekɛɛ, “Bɔ ni Yehowa kɛɛ nɛ, ‘Mikã mi diɛŋtsɛ mihe kitã akɛ, akɛni ofee enɛ ni okamaaa mi obi lɛ ni ji obi kome too lɛ 17#Heb 11.12; Jɛn 24.60 hewɔ lɛ, jɔɔmɔ majɔɔ bo, ni mahã oshwiei afa tamɔ ŋwɛi ŋulamii kɛ ŋshɔnaa shia. Oshwiei lɛ aaaye amɛhenyɛlɔi anɔ kunim. 18#Jɛn 12.3; Bɔf 3.25; Gal 3.6 Ni oshwiei lɛ amli aaajɛ ajɔɔ shikpɔŋ lɛ nɔ maji fɛɛ, ejaakɛ obo mi toi.’ ” 19Kɛkɛ ni Abraham ku esɛɛ kɛba eblahii lɛ aŋɔɔ. Amɛte shi, ni amɛ fɛɛ amɛŋɔ shwie nɔ kɛba Beersheba. Abraham hi shi yɛ Beersheba.
20 #
Jɛn 11.29
Saji nɛɛ asɛɛ lɛ, eba mli akɛ abakɛɛ Abraham akɛ, “Naa, Milka hu kɛ onyɛmi nuu Nahor efɔ bii.”#22.20: Blema woji komɛi kɛɛ “bii kpaanyɔ” 21Kromɔbi lɛ ji Uz kɛ enyɛmi Buz kɛ Kemuel ni ji Aram tsɛ lɛ; 22kɛ Kesed kɛ Hazo kɛ Pildash kɛ Yidlaf kɛ Betuel. 23#Jɛn 24.15 Betuel fɔ Rebeka. Mɛi kpaanyɔ nɛɛ ji mɛi ni Milka kɛ Abraham nyɛmi Nahor fɔ. 24Nahor hemɔ ni atsɛɔ lɛ Reuma lɛ hu kɛ Nahor fɔ Teba kɛ Gaham kɛ Tahash kɛ Maaka.
Currently Selected:
Jɛnɛsis 22: NEGAB
Highlight
Share
Copy
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
