Jɛnɛsis 40
40
Yosef tsɔ̃ɔ gboklɛfoi lɛ alamɔi ashishi
1Saji nɛɛ asɛɛ lɛ, Ijipt maŋtsɛ lɛ dãawolɔ lɛ kɛ ebolooshãlɔ lɛ tɔ̃ amɛnuŋtsɔ ni ji Ijipt maŋtsɛ lɛ nɔ. 2Farao mli fu epiafoi enyɔ nɛɛ, ni ji edãawolɔ nukpa lɛ kɛ ebolooshãlɔ nukpa lɛ, 3ni eyawo amɛ tsuŋ yɛ blafoiatsɛ lɛ shĩa yɛ gboklɛfoi atsu lɛ mli he ni akɛ Yosef ewo lɛ. 4Blafoiatsɛ lɛ tu piafoi lɛ ewo Yosef dɛŋ ni ekwɛɔ amɛnɔ. Piafoi enyɔ lɛ ye be kplaŋŋ yɛ tsu lɛ mli.
5Gbi ko nyɔɔŋ lɛ amɛyi enyɔ lɛ fɛɛ amɛla, Ijipt maŋtsɛ lɛ dãawolɔ nukpa lɛ kɛ ebolooshãlɔ nukpa lɛ ni awo amɛ tsuŋ lɛ, amɛteŋ mɔ fɛɛ mɔ kɛ elamɔ, kɛ lamɔ lɛ shishi hu. 6Be ni Yosef tee amɛŋɔɔ leebi lɛ, eyoo akɛ amɛfee mɔbɔmɔbɔ. 7No hewɔ lɛ, ebi Farao piafoi nɛɛ ni kɛ lɛ yɔɔ mɔɔ lɛ mli yɛ enuŋtsɔ shĩa lɛ mli lɛ akɛ, “Mɛɛba nyɛfee mɔbɔmɔbɔ ŋmɛnɛ nɛkɛ?”
8 #
Dan 2.27-28; Jɛn 41.16 Amɛto he akɛ, “Wɔla lamɔi komɛi, ni mɔ ko bɛ ni aaatsɔ̃ɔ wɔ shishi.” Yosef kɛɛ, “Ani lamɔ shishitsɔɔmɔ lɛ jeee Nyɔŋmɔ nɔ ni? Nyɛfainɛ, nyɛgbaa mi lamɔi lɛ!”
9No hewɔ lɛ, daawolɔi anukpa lɛ gba Yosef elamɔ lɛ, ni ekɛɛ lɛ akɛ, “Milamɔ lɛ mli lɛ, mina ni waintso ko ma mihiɛ. 10Egbala niji etɛ̃, amrɔ nɔŋŋ ni efimɔ afofro kpɔi, ni egba afofro, ni ewo wainyibii shabii ni etsu. 11Mihiɛ Farao kpulu mli; ni mitserɛ wain yibii lɛ, ni miŋa miwo kpulu lɛ mli, kɛkɛ ni mikɛ kpulu lɛ hã Farao.”
12Yosef kɛɛ lɛ akɛ, “Naa olamɔ lɛ shishitsɔɔmɔ. Niji etɛ̃ lɛ damɔ shi hã gbii etɛ̃. 13Biɛ gbii etɛ̃ lɛ, Farao aaajie bo yɛ tsuŋ, ni ekɛ bo aaayato ogbɛhe lɛ ekoŋŋ ni okɛ Farao kpulu lɛ aaawo edɛŋ tamɔ bɔ ni ofeɔ sa lɛ be ni bo ji edãawolɔ lɛ. 14Shi kɛji ehi ehã bo lɛ, miikpa bo fai koni okai mi, ni omli ahi ahã mi koni otsi mitã otsɔ̃ɔ Farao koni abajie mi yɛ tsu nɛɛŋ. 15#Jɛn 37.28 Shi ju aju mi yɛ Hebribii ashikpɔŋ lɛ nɔ; ni biɛ nɛɛ hu mifeko nɔ ko ni sa akɛ akɛ mi awo kpabuŋ nɛɛŋ.”
16Be ni abolooshãlɔi anukpa lɛ na akɛ lamɔ lɛ shishitsɔɔmɔ lɛ yɛ miishɛɛ lɛ, ekɛɛ Yosef akɛ, “Mi hu mila lamɔ ko. Milamɔ lɛ mli lɛ, mina ni mitere bodobodo kɛntɛŋi etɛ̃. 17Kɛntɛŋ ni ma yiteŋ tɔɔ lɛ, niyenii srɔtoi fɛɛ ni ashãa ahãa Farao lɛ yɛ mli, ni loofɔji miiye yɛ kɛntɛŋ lɛ mli yɛ miyiteŋ.”
18Yosef hã hetoo ni ekɛɛ, “Naa olamɔ lɛ shishitsɔɔmɔ. Kɛntɛŋi etɛ̃ lɛ damɔ shi hã gbii etɛ̃. 19Biɛ gbii etɛ̃ lɛ, Farao aaajie bo yɛ tsuŋ ni eeefo oyi ni ekɛ bo aaatsotsoro tso nɔ, ni loofɔji aaaye oheloo.”
20Ni eba mli akɛ gbi ni ji etɛ̃ lɛ, Farao fɔmɔgbi ni. Eŋmɛ etsuji fɛɛ okplɔ̃ ni ejie edãawolɔi anukpa lɛ kɛ ebolooshãlɔi anukpa lɛ yɛ tsuŋ yɛ enukpai lɛ ahiɛ. 21Ehã edãawolɔi anukpa lɛ yaye egbɛhe lɛ ekoŋŋ; ni lɛ ekɛ kpulu lɛ wo Farao dɛŋ. 22Shi abolooshãlɔi anukpa lɛ, esɛŋ lɛ, tamɔ bɔ ni Yosef tsɔ̃ɔ amɛlamɔi lɛ ashishi lɛ. 23Shi dãawolɔ nukpa lɛ eyakaiii Yosef; ehiɛ kpa enɔ.
Currently Selected:
Jɛnɛsis 40: NEGAB
Highlight
Share
Copy
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
