Jɛnɛsis 42
42
Yosef nyɛmimɛi lɛ yahe abele yɛ Ijipt
1Be ni Yakob na le akɛ abele yɛ Ijipt lɛ, ekɛɛ ebii lɛ akɛ, “Mɛɛba nyɛkwɛkwɛɔ nyɛhiɛ gãagãa nɛkɛ?” 2#Bɔf 7.12 Etee nɔ ekɛɛ akɛ, “Naa, minu akɛ abele yɛ Ijipt; nyɛyaa jɛi ni nyɛyahea abele nyɛbahãa wɔ koni wɔyi ana wala ni wɔkagboi.” 3No hewɔ lɛ, Yosef nyɛmimɛi ni ji etsɛbii nyɔŋma lɛ yiŋ kɛtee Ijipt koni amɛyahe abele. 4Shi Yakob hãaa Benyamin, Yosef nyɛbi etsɛbi lɛ, kɛ etsɛbii krokomɛi lɛ aya, ejaakɛ ekɛɛ, “Koni aleee nɔ osharã ko akayasharã lɛ.”
5No hewɔ lɛ, Yakob bii lɛ yɛ mɛi ni ba abelehemɔ lɛ ateŋ; ejaakɛ hɔmɔ lɛ eba Kanaan shikpɔŋ lɛ nɔ hu. 6Yosef ji lumɔ yɛ shikpɔŋ lɛ nɔ, ni lɛ ehɔ̃ɔ abele ehãa mɛi fɛɛ. Enyɛmimɛi lɛ ba, ni amɛbakoto lɛ, ni amɛkɛ amɛhiɛ bumɔ shi. 7Yosef na enyɛmimɛi lɛ, ni eyoo amɛ; shi ekɛ amɛ ye tamɔ gbɔi, ni etutu ehiɛ ewo amɛ. Ebi amɛ akɛ, “Nɛgbɛ nyɛjɛ?”
Amɛto he akɛ, “Wɔjɛ Kanaan shikpɔŋ lɛ nɔ wɔba niyeniihemɔ.”
8Yosef yoo enyɛmimɛi lɛ, shi amɛ lɛ, amɛyooo lɛ. 9#Jɛn 37.5-9 Kɛkɛ ni Yosef kai lamɔi ni ela yɛ amɛhe lɛ, ni ekɛɛ amɛ akɛ, “Saralɔi ji nyɛ; nyɛba ni nyɛbakwɛ wɔshikpɔŋ lɛ yayaiaŋ.”
10Amɛhã lɛ hetoo akɛ, “Minuŋtsɔ, dabi, shi moŋ niyenii hemɔ otsuji ba. 11Nuu kome bii ji wɔ fɛɛ; anɔkwafoi ji wɔ; jeee saralɔi ji otsuji lɛ.”
12Yosef kɛɛ amɛ akɛ, “Dabi, nyɛba nyɛbaakwɛ shikpɔŋ lɛ yayaiaŋ.”
13Amɛto he akɛ, “Wɔ otsuji lɛ, nyɛmimɛi nyɔŋma kɛ enyɔ ji wɔ, nuu kome bii ji wɔ yɛ Kanaan shikpɔŋ lɛ nɔ; wɔteŋ gbekɛ fe fɛɛ lɛ yɛ wɔtsɛ ŋɔɔ amrɔ nɛɛ; ni mɔ kome bɛ jeŋ.”
14Shi Yosef kɛɛ amɛ akɛ, “Nɔ ni mikɛɛ lɛ pɛpɛɛpɛ nɛ: Saralɔi ji nyɛ. 15Nɔ ni akɛaana nyɛnɔkwale nɛ. Mina Farao akɛ nyɛjeŋ biɛ nyɛyaŋ, ja nyɛnyɛmi gbekɛ lɛ ebashɛ biɛ dã. 16Nyɛtsua nyɛteŋ mɔ kome ni eyaŋɔa nyɛnyɛmi gbekɛ lɛ kɛba be mli ni nyɛ lɛ awo nyɛ kpabuŋ lɛ, koni akɛkpa nyɛ wiemɔi lɛ shi akɛ anɔkwafoi ji nyɛ lo; kɛjeee nakai lɛ, mina Farao akɛ saralɔi ji nyɛ.” 17Kɛkɛ ni ewo amɛ fɛɛ tsuŋ gbii etɛ̃.
18Gbi ni ji etɛ̃ lɛ nɔ lɛ, Yosef kɛɛ enyɛmimɛi lɛ akɛ, “Nyɛfea nɔ ni mibakɛɛ nɛɛ, koni nyɛyi ana wala, shi mi lɛ Nyɔŋmɔ gbeyeishelɔ ji mi. 19Kɛ anɔkwafoi ji nyɛ lɛ, nyɛhãa atsĩa nyɛnyɛmimɛi lɛ ateŋ mɔ kome naa yɛ kpabuŋ lɛ mli, koni nyɛ mɛi ni eshwɛ lɛ nyɛŋɔ abele kɛya yɛ hɔmɔ ni yɔɔ nyɛshĩai lɛ hewɔ, 20ni nyɛkɛ nyɛnyɛmi gbekɛ lɛ aba miŋɔɔ. No akɛaana akɛ nyɛwiemɔi lɛ anɔkwale ni, koni nyɛkagboi.”
Amɛfee nakai. 21#Lal 50.21 Kɛkɛ ni amɛkɛɛkɛɛ amɛhe akɛ, “Lɛɛlɛŋ, wɔyeɔ fɔ yɛ wɔnyɛmi lɛ hewɔ akɛni wɔna bɔ ni esusuma hao ni ekpa wɔ fai aahu ni wɔbooo toi lɛ. No hewɔ ni nɛkɛ haomɔ nɛɛ eba wɔnɔ nɛɛ.”
22 #
Jɛn 37.21, 22 Ruben here amɛ nɔ akɛ, “Ani mikɛɛɛ nyɛ akɛ nyɛkafea gbekɛ lɛ esha ko, ni nyɛbooo toi? No hewɔ lɛ, agbɛnɛ ela shi abiɔ nɛɛ!” 23Shi amɛleee akɛ Yosef enu nɔ ni amɛwieɔ lɛ shishi ejaakɛ mɔ ko yɛ ni jieɔ enaa. 24Kɛkɛ ni Yosef tsɔ̃ ehe kɛje amɛmasɛi ni eyafo. Eku esɛɛ kɛba amɛŋɔɔ ekoŋŋ ni ekɛ amɛ bawie. Ejie Simeon yɛ amɛteŋ ni efi lɛ yɛ amɛhiɛ.
Yosef nyɛmimɛi lɛ ku amɛsɛɛ kɛtee Kanaan
25Kɛkɛ ni Yosef fã akɛ awo amɛkotokui lɛ amli abele obɔ̃bɔ̃, ni akɛ mɔ fɛɛ mɔ shika aku sɛɛ awo ekotoku mli ekoŋŋ. Efã hu akɛ ahã amɛ gbɛ nɔ niyenii. Ni afee nakai ahã amɛ. 26Kɛkɛ ni amɛkɛ amɛjatsui lɛ tere amɛtejii lɛ, ni amɛyi gbɛ. 27Be ni amɛshɛ shitoohe ko ni amɛteŋ mɔ kome fɛne ekotoku naa ni ebaahã eteji niyenii lɛ, ena eshika lɛ kã abele lɛ nɔ yɛ ekotoku lɛ mli, 28ni ekɛɛ enyɛmimɛi lɛ akɛ, “Akpale mishika lɛ ahã mi, ni naa, no po yɔɔ mikotoku lɛ mli nɛɛ!” Enɛ hã amɛtsui fã kɛ hekpokpomɔ ni amɛbibii amɛhe akɛ, “Mɛni ji enɛ ni Nyɔŋmɔ efee wɔ nɛɛ?”
29Be ni amɛbashɛ amɛtsɛ Yakob ŋɔɔ yɛ Kanaan shikpɔŋ lɛ nɔ lɛ, amɛgba lɛ nɔ fɛɛ nɔ ni ba amɛnɔ lɛ akɛ, 30“Nuu lɛ ni ji shikpɔŋ lɛ nɔ lumɔ lɛ hãhã ehiɛ ewo wɔ, ni ebu wɔ shikpɔŋ lɛ saralɔi. 31Shi wɔkɛɛ lɛ akɛ ‘Anɔkwafoi ji wɔ; jeee saralɔi ji wɔ. 32Nyɛmimɛi nyɔŋma kɛ enyɔ ji wɔ, nuu kome musuŋ bii ji wɔ, mɔ kome bɛ jeŋ, ni gbekɛ fe fɛɛ lɛ yɛ wɔtsɛ ŋɔɔ amrɔ nɛɛ yɛ Kanaan shikpɔŋ lɛ nɔ!’ 33Kɛkɛ ni nuu lɛ ni ji shikpɔŋ lɛ nɔ lumɔ lɛ kɛɛ wɔ akɛ, ‘Nɔ ni mikɛbaana akɛ anɔkwafoi ji nyɛ nɛ: nyɛshĩa nyɛteŋ mɔ kome nyɛhãa mi ni nyɛŋɔa abele yɛ hɔmɔ ni yɔɔ nyɛshĩai amli lɛ hewɔ kɛyaa. 34Nyɛkɛ nyɛnyɛmi gbekɛ lɛ abaa miŋɔɔ, kɛkɛ lɛ mibana akɛ jeee saralɔi ji nyɛ shi moŋ anɔkwafoi, koni majie nyɛnyɛmi lɛ mahã nyɛ ni nyɛye jara yɛ shikpɔŋ lɛ nɔ.’ ”
35Shi be ni amɛ jie amɛkotokui lɛ amli nii lɛ, naa mɔ fɛɛ mɔ shika ni afi kã ekotoku mli. Be ni amɛkɛ amɛtsɛ fɛɛ na shika ni afimɔfimɔɔ nɛɛ lɛ, amɛshe gbeyei. 36Ni amɛtsɛ Yakob kɛɛ amɛ akɛ, “Nyɛkpakpaa mibii yɛ mihe, Yosef bɛ, ni Simeon bɛ, ni nyɛbaaŋɔ Benyamin hu kɛya. Enɛɛmɛi fɛɛ lɛ haomɔ eji kɛhã mi.”
37Kɛkɛ ni Ruben kɛɛ etsɛ akɛ, “Kɛ mikɛ Benyamin ekuuu sɛɛ ebahãaa bo lɛ, no lɛ gbee mibihii enyɔ lɛ; bo lɛ tuu lɛ owo midɛŋ, ni mikɛ lɛ baaku sɛɛ abahã bo ekoŋŋ.”
38Shi Yakob kɛɛ akɛ, “Mibi lɛ kɛ nyɛ eyaŋ ejaakɛ enyɛmi lɛ egbo, ni lɛ ekome pɛ eshwɛ; kɛji oshara ko yasharã lɛ yɛ gbɛ ni nyɛyaanyiɛ nɛɛ nɔ lɛ, no lɛ he ni miyi eyɛ kɛshɛ nɛɛ, nyɛbaahã magbo kɛ awerɛhoo sɔŋŋ.”
Currently Selected:
Jɛnɛsis 42: NEGAB
Highlight
Share
Copy
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
