Yohane 19

1Kɛkɛ ni Pilato ŋɔ Yesu ni eyi lɛ kpelebii, 2ni asraafoi lɛ kɛ ŋmei fee akekre ni amɛkɛfi eyitso, ni amɛwo lɛ atade tsuru ko, 3ni amɛba eŋɔɔ amɛbakɛɛ, “Hã manye, Yudafoi amaŋtsɛ!” Ni amɛgbala lɛ mai.

4Kɛkɛ ni Pilato je kpo ekoŋŋ ni ekɛɛ amɛ akɛ, “Naa, mikɛ lɛ eje kpo kɛba nyɛŋɔɔ, koni nyɛna nyɛle akɛ minaaa fɔbuu sane ko yɛ ehe.” 5Kɛkɛ ni Yesu je kpo ni ŋmei akekre lɛ fĩ eyitso ni ewo atade tsuru lɛ. Ni Pilato kɛɛ amɛ akɛ, “Naa gbɔmɔ lɛ!” 6Be ni osɔfonukpai lɛ kɛ tsuji lɛ na lɛ lɛ, amɛbolɔ amɛkɛɛ, “Sɛŋmɔ lɛ, sɛŋmɔ lɛ!” Pilato kɛɛ amɛ akɛ, “Nyɛ diɛŋtsɛ nyɛŋɔa lɛ ni nyɛyasɛŋa lɛ mɔ, ejaakɛ mi lɛ minaaa fɔbuu sane ko yɛ ehe.” 7#Yoh 10.36; Lev 24.16 Yudafoi lɛ here lɛ nɔ akɛ, “Wɔ lɛ wɔyɛ mla, ni wɔmla lɛ naa lɛ esa gbele, ejaakɛ efee ehe Nyɔŋmɔ Bi.”

8Be ni Pilato nu nɛkɛ wiemɔ nɛɛ, eshe gbeyei fe tsutsu lɛ; 9ni ebote kojomɔhe lɛ ekoŋŋ, ni ebi Yesu akɛ, “Nɛgbɛ ojɛ?” Shi Yesu hãaa lɛ hetoo. 10Ni Pilato kɛɛ lɛ akɛ, “Okɛ mi ewieee? Ani oleee akɛ miyɛ hegbɛ akɛ miŋmɛɔ ohe, ni miyɛ hegbɛ hu akɛ misɛŋɔ bo?” 11Yesu here nɔ akɛ, “Kɛjeee ŋwɛi ajɛ akɛhã bo lɛ, kulɛ onaŋ hewalɛ ko yɛ minɔ. No hewɔ lɛ, mɔ ni jie mi wo odɛ̃ŋ lɛ he esha lɛ da fe onɔ lɛ.” 12Kɛjɛ no nɔ lɛ Pilato tao ehe eŋmɛɛ; shi Yudafoi lɛ bolɔ akɛ, “Kɛji oŋmɛɛ mɔ nɛ he lɛ, ojeee Kaisare shieŋtsɛ; mɔ fɛɛ mɔ ni feɔ ehe maŋtsɛ lɛ ete shi ewo Kaisare.” 13Be ni Pilato nu nɛkɛ wiemɔi nɛɛ, ekɛ Yesu je kpo, ni eyata kojomɔ sɛi lɛ nɔ, yɛ he ni atsɛɔ jɛi akɛ “Tɛkamɔ” ni Hebri wiemɔ mli lɛ atsɛɔ lɛ “Gabata” lɛ. 14Shi Hehoo lɛ Hesaamɔkɛtoo Gbi ni, aaafee shwane ŋmɛlɛ nyɔŋma kɛ enyɔ mli ni. Ni ekɛɛ Yudafoi lɛ akɛ, “Naa nyɛmaŋtsɛ lɛ!” 15#Yoh 19.6 Shi amɛ lɛ amɛbolɔ amɛkɛɛ, “Okɛ lɛ aya, okɛ lɛ aya! Sɛŋmɔ lɛ!” Pilato bi amɛ akɛ, “Nyɛmaŋtsɛ lɛ, misɛŋ lɛ lo?” Osɔfonukpai lɛ here nɔ akɛ, “Wɔbɛ maŋtsɛ ko akɛ ja Kaisare.” 16Kɛkɛ ni ekɛ lɛ hã amɛ ni ayasɛŋ lɛ.

Yesu sɛŋmɔ kɛ egbele

(Mateo 27.32-44; Marko 15.21-32; Luka 23.26-43)

Ni amɛkɛ Yesu tee. 17Ni lɛ diɛŋtsɛ etere esɛŋmɔtso lɛ kɛtee he ni atsɛɔ jɛi Yitsoŋoŋohe ni Hebri mli lɛ atsɛɔ lɛ “Golgota” lɛ. 18Jɛi amɛyasɛŋ lɛ yɛ; ni amɛkɛ mɛi krokomɛi enyɔ fata ehe, mɔ kome yɛ biɛ ni mɔ kome hu yɛ biɛ, ni Yesu yɛ teŋ. 19Ni Pilato ŋma nɔ ko ekpɛtɛ sɛŋmɔtso lɛ yiteŋ; nɔ ni eŋma nɛ, “YESU NAZARENYO, YUDAFOI LƐ AMAŊTSƐ LƐ”. 20Nɛkɛ nii ni aŋma nɛɛ Yudafoi lɛ ateŋ mɛi pii kane, ejaakɛ he ni asɛŋ Yesu yɛ lɛ bɛŋkɛ maŋ lɛ; ni aŋma yɛ Hebri kɛ Roma kɛ Hela wiemɔi amli. 21Ni Yudafoi lɛ asɔfonukpai lɛ kɛɛ Pilato akɛ, “Kaaŋma akɛ, ‘Yudafoi lɛ amaŋtsɛ lɛ’, shi moŋ akɛ lɛ ekɛɛ akɛ, ‘Mi ji Yudafoi lɛ amaŋtsɛ lɛ.’ ”

22Pilato here nɔ akɛ, “Nɔ ni miŋma lɛ, miŋma.”

23Be ni asraafoi lɛ sɛŋ Yesu lɛ, amɛkɔlɔ etadei lɛ, ni amɛja mli ejwɛ, asraafonyo kome nɔ ekome; ni amɛkɔ eflaka lɛ hu. Shi flaka lɛ bɛ tsamɔhe; alo kɛjɛ ŋwɛi kɛyi shi. 24#Lal 22.18 No hewɔ lɛ, amɛkɛɛkɛɛ amɛhe akɛ, “Nyɛkahãa wɔgbalaa no, shi nyɛhãa wɔfɔ̃a nɔ oshiki ni wɔna mɔ nɔ ni aaatsɔ̃.” Koni ŋmalɛ ni kɛɛ akɛ, “Amɛja mitadei lɛ amli amɛhã amɛhe, ni mihebo lɛ amɛfɔ̃ nɔ oshiki lɛ aba mli. Enɛ ji nɔ ni asraafoi lɛ fee lɛ.”

25Shi Yesu nyɛ kɛ enyɛ nyɛmi yoo, Maria, Klopa ŋa lɛ, kɛ Maria Magdalena damɔ esɛŋmɔtso lɛ masɛi. 26#Yoh 13.23 No hewɔ lɛ, be ni Yesu na enyɛ kɛ kaselɔ ni esumɔɔ lɛ damɔ shi lɛ, ekɛɛ enyɛ akɛ, “Awo, obi nɛ!” 27Fee sɛɛ lɛ ekɛɛ kaselɔ lɛ akɛ, “Naa, onyɛ nɛ!” Ni kɛjɛ nakai ŋmɛlɛtswaa lɛ nɔ lɛ kaselɔ lɛ ŋɔ lɛ kɛtee lɛ diɛŋtsɛ ewe.

28 # Yoh 13.3; 18.4; Lal 22.15 Enɛ sɛɛ lɛ, akɛni Yesu le akɛ agbe nii fɛɛ naa momo lɛ, bɔ ni afee ni ŋmalɛ lɛ aba mli lɛ, ekɛɛ, “Kumai miiye mi.” 29#Lal 69.21 Nɔ ma jɛi kɛ emli ashiŋ obɔ̃; ni amɛkɛ ŋshɔŋkotsa tsɔ ashiŋ lɛ mli; ni amɛkɛma hisopotso naa, ni amɛkɛto enaa. 30Ni be ni Yesu he ashiŋ lɛ, ekɛɛ, “Agbe naa!” Ni ema eyi shi, ni ebu enaa.

Atsu Yesu ŋmawuiaŋ akplɔ

31 # Deut 21.23 Shi Hesaamɔkɛtoo Gbi ni, ni bɔ ni afee ni amɛgbohii lɛ akahi sɛŋmɔtso lɛ nɔ yɛ hejɔɔmɔ gbi lɛ nɔ (ejaakɛ nakai hejɔɔmɔ gbi lɛ gbi wulu ni) hewɔ lɛ, Yudafoi lɛ yakpa Pilato fai akɛ akumɔ amɛnaji ni ajie amɛ. 32No hewɔ lɛ, asraafoi lɛ tee, ni amɛyakumɔ mɛi ni asɛŋ afata ehe lɛ anaji, klɛŋklɛŋ mɔ lɛ kɛ mɔ ni ji enyɔ lɛ fɛɛ. 33Shi be ni amɛshɛ Yesu nɔ ni amɛna akɛ egbo momo lɛ, lɛ lɛ amɛkumɔ̃ɔɔ enaji; 34shi moŋ asraafoi lɛ ateŋ mɔ kome kɛ akplɔ tsu eŋmawuiaŋ, ni amrɔ lɛ lá kɛ nu jɛ mli ho.

35Ni mɔ ni na lɛ, lɛ eye he odase nɛɛ, ni edase lɛ anɔkwaŋ, ni ele akɛ anɔkwale ewieɔ, koni nyɛhe nyɛye. 36#Ɛks 12.46; Num 9.12; Lal 34.20 Ejaakɛ afee nii nɛɛ, koni nɔ ni aŋma akɛ, “Akuŋ ewu ko” lɛ aba mli. 37#Zak 12.10; Kpoj 1.7 Ni asaŋ ŋmalɛ kroko kɛɛ, “Amɛaakwɛ mɔ ni amɛtsu lɛ nɔ lɛ.”

Yesu fuu

(Mateo 27.57-61; Marko 15.42-47; Luka 23.50-56)

38Nii nɛɛ asɛɛ lɛ, Yosef ni jɛ Arimatia ni ji Yesu kaselɔ shi Yudafoi lɛ ashemɔ hewɔ lɛ ejieee ehe shi lɛ, yabi Pilato koni ehã eyajie Yesu gbonyo lɛ; ni Pilato ŋmɛ lɛ gbɛ. No hewɔ lɛ, etee ni eyajie Yesu gbonyo lɛ kɛtee. 39#Yoh 3.2; Mal 2.11 Ni Nikodemo, mɔ ni klɛŋklɛŋ be ni ebaaba Yesu ŋɔɔ lɛ eba nyɔɔŋ lɛ, hu kɛ “mire” kɛ “aloe” ni afutu aaafee kiloi nyɔŋmai etɛ̃ ba. 40Kɛkɛ ni amɛŋɔ Yesu gbonyo lɛ, ni amɛkɛ klalai lɛ kɛ tsofai lɛ fimɔ lɛ, tamɔ bɔ ni Yudafoi feɔ fuɔ mɔ lɛ. 41He ni asɛŋ lɛ yɛ lɛ, trom ko yɛ jɛi, ni gbonyobu hee ko yɛ trom lɛ mli ni atoko mɔ ko yɛ mli pɛŋ; 42no hewɔ lɛ, amɛyato Yesu yɛ jɛi yɛ Yudafoi lɛ aHesaamɔkɛtoo gbi lɛ hewɔ, ejaakɛ gbonyobu lɛ bɛŋkɛ.

Currently Selected:

Yohane 19: NEGAB

Highlight

Copy