Luka 13
13
Nyɛtsakea nyɛtsui ni nyɛhiɛ akakpãtã
1Nakai be lɛ mli nɔŋŋ lɛ mɛi komɛi yɛ jɛi ni gba lɛ Galileabii ni Pilato kɛ amɛlá futu amɛfɔlei lɛ amli lɛ ahe sane. 2#Yoh 9.2 Ni Yesu here nɔ ni ekɛɛ amɛ akɛ, “Ani nyɛsusuɔ akɛ nɛkɛ Galileabii nɛɛ eshafeelɔi ji amɛ fe Galileabii krokomɛi lɛ fɛɛ, hewɔ ni amɛna nɛkɛ amanehulu nɛɛ? 3#Lal 7.12 Miikɛɛ nyɛ akɛ ebɛ mli nakai, shi moŋ kɛ nyɛtsakeee nyɛtsui lɛ, nyɛ fɛɛ nyɛhiɛ baakpãtã nakai nɔŋŋ. 4Aloo nyɛsusuɔ akɛ, mɛi nyɔŋma kɛ kpaanyɔ lɛ ni Siloam mɔɔ lɛ ku shwie amɛnɔ ni egbe amɛ lɛ, amɛ amɛ ji nɔtɔ̃lɔi fe gbɔmɛi fɛɛ ni yɔɔ Yerusalɛm? 5Miikɛɛ nyɛ akɛ ebɛ mli nakai, shi moŋ, kɛ nyɛtsakeee nyɛtsui lɛ, nyɛ fɛɛ nyɛhiɛ baakpãtã nakai nɔŋŋ.”
Agbãmitso lɛ he abɛ lɛ
6 #
Mat 21.19
Ni ebu amɛ nɛkɛ abɛ nɛɛ akɛ, “Mɔ ko tɛo agbãmitso yɛ ewaintrom mli ni eba enɔ yibii taomɔ lɛ, enaaa eko. 7Kɛkɛ ni ekɛɛ tromsaalɔ lɛ akɛ, ‘Naa, afii etɛ̃ nɛɛ fɛɛ lɛ mibaa mibataoɔ yibii yɛ agbãmitso nɛɛ nɔ, shi minaaa eko. Toomɔ ofɔ̃ shi! Mɛɛba hu ni egbeɔ shikpɔŋ lɛ?’ 8#2 Pet 3.9, 15 Shi tromsaalɔ lɛ here nɔ ekɛɛ lɛ akɛ, ‘Nuŋtsɔ, hã ni ehi shi afi nɛɛ hu, kɛyashi beyinɔ ni matsa ehewɔ kɛkpe ni mawo eshishi tumo, 9akɛ aleenɔ eeewo yibii afi nɛɛ lo; shi kɛjeee nakai lɛ, dani otoo lɛ ofɔ̃ shi.’ ”
Yoo ni edɔ kɔmɔɔ lɛ tsamɔ
10Hejɔɔmɔ gbi lɛ eko nɔ lɛ, eetsɔ̃ɔ nii yɛ kpeehei lɛ eko. 11Yoo ko yɛ jɛi ni mumɔ ni hãa mɔ gbɔjɔɔ ehi emli afii nyɔŋma kɛ kpaanyɔ, ni edɔ kɔmɔɔ, ni enyɛɛɛ emli ekpã kwraa po. 12Be ni Yesu na lɛ lɛ, etsɛ lɛ ni ekɛɛ lɛ akɛ, “Yoo, afɛne bo kɛjɛ ohela lɛ mli!” 13#Mar 7.32 Ni ekɛ eniji shwie enɔ, ni amrɔ lɛ nɔŋŋ lɛ yoo lɛ jaje trɔmɔɔ, ni ewo Nyɔŋmɔ hiɛ nyam.
14 #
Ɛks 20.9-10; Deut 5.13-14 Shi kpeehe onukpa lɛ mli wo la akɛni Yesu tsa mɔ yɛ hejɔɔmɔ gbi lɛ nɔ lɛ, ni ekɛɛ asafo lɛ akɛ, “Gbii ekpaa yɔɔ ni sa akɛ atsuɔ nii yɛ mli no hewɔ lɛ, nyɛbaa yɛ nomɛi amli, koni atsa nyɛ, shi jeee hejɔɔmɔ gbi lɛ nɔ!” 15#Luk 14.5 Kɛkɛ ni Nuŋtsɔ lɛ here lɛ nɔ ni ekɛɛ, “Osatofoi! Ani hejɔɔmɔ gbi lɛ nɔ lɛ nyɛteŋ mɔ fɛɛ mɔ fɛneee etsina loo eteji yɛ niyenii anɔ he ekpalaaa lɛ eyahãaa lɛ nu lo? 16Shi nɛkɛ yoo nɛɛ ni ji Abraham biyoo ni Satan efi lɛ nɛkɛ afii nyɔŋma kɛ kpaanyɔ nɛɛ lɛ, ani ejaaa akɛ afɛneɔ lɛ yɛ nɛkɛ kpãa nɛɛ mli yɛ hejɔɔmɔ gbi lɛ nɔ lo?” 17Ni be ni ewie nɛkɛ lɛ, ehenyɛlɔi lɛ fɛɛ ahiɛ gboi, ni asafo lɛ fɛɛ na miishɛɛ yɛ anunyam nibii ni efee lɛ fɛɛ hewɔ.
Sinapi wu kɛ masha lɛ
(Mateo 13.31-35; Marko 4.30-36)
18Agbɛnɛ ekɛɛ, “Mɛni Nyɔŋmɔ Maŋtsɛyeli lɛ tamɔ, ni mɛni he mikɛaato? 19Etamɔ sinapi wu kuli ni nuu ko kɔ ni eyadu yɛ etrom mli, ni ekwɛ̃, ni efee tso kpele, ni ŋwɛi loofɔji ba bafee tsui yɛ eniji ateŋ.” 20Ni ekɛɛ ekoŋŋ akɛ, “Mɛni he mikɛ Nyɔŋmɔ Maŋtsɛyeli lɛ aaato? 21Etamɔ masha ni yoo ko kɔ ni ekɛhɔ ma tsesei etɛ̃ amli kɛyashi beyinɔ ni fɛɛ sha.”
Agbo fintɔŋŋ lɛ
22Ni eyakpa maji kɛ akrowai amli etsɔ̃ɔ nii, ni etse mli kɛmiiya Yerusalɛm. 23Ni mɔ ko bi lɛ akɛ, “Nuŋtsɔ, ani mɛi fioo kɛkɛ yiwala abaahere?” Shi ekɛɛ amɛ akɛ, 24#Mat 7.13, 14; Fil 3.12 “Nyɛpelea agbo fintɔŋŋ lɛ mlibotemɔ he, ejaakɛ miikɛɛ nyɛ akɛ mɛi pii aaatao mli abote shi amɛnyɛŋ. 25#Mat 25.11, 12 Be mli ni shĩatsɛ lɛ ete shi eyaŋa shinaa lɛ, ni nyɛaabɔ̃i sɛɛdaamɔ kɛ shinaa lɛ shimɔ, ni nyɛaakɛɛ akɛ, ‘Nuŋtsɔ, Nuŋtsɔ, gbelemɔ wɔ!’ lɛ, eeehere nɔ ekɛɛ nyɛ akɛ, ‘Mileee he ni nyɛjɛ.’ 26#Mat 7.22, 23 No lɛ nyɛbaabɔ̃i kɛɛmɔ akɛ, ‘Wɔye nii ni wɔnu nii yɛ ohiɛ, ni otsɔ̃ɔ nii yɛ wɔblohui amli.’ 27#Lal 6.8 Ni eeekɛɛ akɛ, ‘Miikɛɛ nyɛ akɛ mileee he ni nyɛjɛ; nyɛjea minɔ nyɛyaa, nyɛ mɛi fɛɛ ni nyɛtsuɔ nii ni ejaaa gbɛ lɛ!’ 28#Mat 22.13, 25-30 Jɛi yaafo kɛ nyanyɔji ashishikpemɔ aaahi, be ni nyɛaana Abraham kɛ Isak kɛ Yakob kɛ gbalɔi lɛ fɛɛ yɛ Nyɔŋmɔ Maŋtsɛyeli lɛ mli, ni nyɛ diɛŋtsɛ lɛ, ashwie nyɛ kɛje kpo lɛ. 29#Luk 14.15; Mat 8.11, 12 Ni mɛi aaajɛ bokã kɛ anai kɛ kooyi kɛ wuoyigbɛ aaaba ni amɛaabatara okplɔ̃ he yɛ Nyɔŋmɔ Maŋtsɛyeli lɛ mli. 30#Mat 19.30; Mar 10.31 Ni naa, sɛɛkpeebii yɛ ni baatsɔ̃mɔ klɛŋklɛŋbii, ni klɛŋklɛŋbii hu yɛ ni baatsɔ̃mɔ sɛɛkpeebii.”
Yesu fo shwie Yerusalɛm nɔ
(Mateo 23.37-39)
31Nakai ŋmɛlɛtswaa lɛ mli nɔŋŋ lɛ Farisifoi lɛ ekomɛi ba eŋɔɔ bakɛɛ lɛ akɛ, “Jee biɛ nɛɛ ni oya, ejaakɛ Herode miitao bo agbe.” 32Ni ekɛɛ amɛ akɛ, “Nyɛyaa ni nyɛyakɛa nakai osɔ lɛ akɛ, ‘Naa, miifãmɔ mumɔi fɔ̃ji ni miitsa mɛi ŋmɛnɛ kɛ wɔ, ni gbi ni ji etɛ̃ lɛ magbe naa.’ 33Shi kɛ̃lɛ ja minyiɛ ŋmɛnɛ kɛ wɔ kɛ wɔsɛɛ, ejaakɛ ebaŋ mli akɛ aaagbe gbalɔ ko yɛ he ko akɛ ja Yerusalɛm. 34Yerusalɛm, Yerusalɛm, bo mɔ ni ogbeɔ gbalɔi lɛ ni otswiaa mɛi ni atsuɔ amɛ oŋɔɔ lɛ atɛi, shii enyiɛ mitao akɛ mibuaa obii anaa, tamɔ bɔ ni wuɔ buaa ebii anaa ewoɔ efiji ashishi lɛ, ni nyɛkpɛlɛ̃ɛɛ! 35#Lal 118.26; Yer 22.5 Naa, ashi nyɛwe lɛ amaŋfɔ̃ ahã nyɛ. Shi miikɛɛ nyɛ akɛ, nyɛnaŋ mi dɔŋŋ kɛyashi beyinɔ ni nyɛaakɛɛ akɛ, ‘Ajɔɔ mɔ ni baa yɛ Nuŋtsɔ lɛ gbɛi mli’ lɛ.”
Currently Selected:
Luka 13: NEGAB
Highlight
Share
Copy
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
