Luka 15
15
Too ni laaje lɛ he abɛ lɛ
(Mateo 18.10-14)
1Agbɛnɛ toohelɔi kɛ eshafeelɔi lɛ fɛɛ bɔ̃i tsimɔ kɛ lɛ bɛŋkɛmɔ ni amɛbabo lɛ toi. 2Shi Farisifoi kɛ mlatsɔɔlɔi lɛ wie huhuuhu amɛkɛɛ, “Nuu nɛɛ hereɔ eshafeelɔi atuu ni ekɛ amɛ yeɔ nii.” 3#Eze 34.11, 16; Luk 19.10 Ni ebu amɛ nɛkɛ abɛ nɛɛ ekɛɛ, 4“Nyɛteŋ namɔ ni kɛji eyɛ toi oha ni amɛteŋ ekome laaje lɛ, eshiŋ nyɔŋmai nɛɛhu kɛ nɛɛhu lɛ yɛ ŋa lɛ nɔ, ni eyatao nɔ ni elaaje lɛ kɛyashi beyinɔ ni eeena lɛ? 5Ni kɛ ena lɛ lɛ, ewoɔ lɛ etswaa ekɔ̃ŋ, ni enaa miishɛɛ; 6ni kɛ eba shĩa lɛ, etsɛɔ eshieŋtsɛmɛi kɛ ekuŋbii kɛkpeɔ, ni ekɛɔ amɛ akɛ, ‘Nyɛkɛ mi anaa miishɛɛ, ejaakɛ mina mitoo ni laaje lɛ.’ 7Miikɛɛ nyɛ akɛ nakai nɔŋŋ miishɛɛ aaaba ŋwɛi yɛ eshafeelɔ kome ni tsakeɔ etsui lɛ hewɔ fe jalɔi nyɔŋmai nɛɛhu kɛ nɛɛhu ni tsuitsakemɔ he ehiaaa amɛ lɛ.”
Jwiɛtɛi kuku ni laaje lɛ he abɛ lɛ
8“Aloo mɛɛ yoo ni yɔɔ jwiɛtɛi kukuji nyɔŋma, ni kɛji kuku kome laaje lɛ, ni esuŋ kane ni ebɛɛ shĩa lɛ mli fitsofitso ni etao kɛyashi beyinɔ ni eeena? 9Ni kɛ ena lɛ, etsɛɔ eshieŋtsɛmɛi kɛ ekuŋbii kɛkpeɔ ni ekɛɔ akɛ, ‘Nyɛkɛ mi anaa miishɛɛ, ejaakɛ mina mijwiɛtɛi kuku ni laaje lɛ.’ 10#Efes 3.10 Nakai nɔŋŋ, miikɛɛ nyɛ akɛ, Nyɔŋmɔ bɔfoi lɛ naa miishɛɛ yɛ eshafeelɔ kome ni tsakeɔ etsui lɛ hewɔ.”
Bi nyɛnyɛŋtswi lɛ
11Yesu saa ekɛɛ, “Nuu ko yɛ bihii enyɔ. 12Ni amɛteŋ gbekɛ̃ lɛ kɛɛ etsɛ akɛ, ‘Ataa, hã mi onii lɛ amli nɔ ni ji migbɛfaŋnɔ.’ Ni eja nii lɛ amli ehã amɛ. 13#Abɛi 29.3 No sɛɛ lɛ, yeee gbi ko kɛkɛ ni gbekɛ̃ lɛ bua fɛɛ naa, ni edom etee maŋsɛɛ shɔŋŋ he ko, ni jɛi ekɛ nyɛnyɛŋtswibɔɔ yakpãtã enii lɛ ahiɛ yɛ. 14Shi be ni efite fɛɛ lɛ, hɔ̃mɔ ni naa wa ko bate shi yɛ nakai shikpɔŋ lɛ nɔ fɛɛ, ni ebɔ̃i lɛ fimɔ. 15Ni eyiŋ etee ni ekɛ ehe yakpɛtɛ nakai shikpɔŋ lɛ nɔ bii lɛ eko he; ni ehã etee ebɔi lɛ amli ni eyalɛ kplotoi. 16#Abɛi 23.21 Ni eba etsine akɛ kulɛ ena yɔɔ ni kplotoi lɛ yeɔ lɛ eko eye ni etɔ, shi mɔ ko hãaa lɛ. 17Shi be ni ehiɛ tserɛ lɛ lɛ, ekɛɛ, ‘Apaafoi enyiɛ mitsɛ bɛ ni naa niyenii yeɔ ni eko shwɛɔ, ni hɔ̃mɔ gbeɔ mi yɛ biɛ nɛɛ! 18#Yer 3.12, 13; Lal 51.7 Mate shi matee mitsɛ ŋɔɔ ni mayakɛɛ lɛ akɛ, “Ataa, mifee Nyɔŋmɔ shishi esha ni mifee esha mishi bo, 19ni misaaa mɔ ni atsɛɔ mi obi dɔŋŋ; ŋɔɔ mi ofee tamɔ opaafoi lɛ eko.” ’ 20Ni ete shi ni eyiŋ eba etsɛ ŋɔɔ. Shi be ni enyiɛ shɔŋŋ kɛbaa lɛ, etsɛ na lɛ, ni emusuŋ tsɔ̃ lɛ, ni esha foi ni eyafua lɛ atuu, ni eshwɔshwɔɔ enaa. 21Ni ebi lɛ kɛɛ lɛ akɛ, ‘Ataa, mifee Nyɔŋmɔ shishi esha ni mifee esha, mishi bo, ni misaaa mɔ ni atsɛɔ mi obi dɔŋŋ!’ 22Shi tsɛ lɛ kɛɛ etsuji lɛ akɛ, ‘Nyɛyajiea atade ni yɔɔ fɛo fe fɛɛ lɛ kɛbaa mramra, ni nyɛkɛbawoa lɛ, ni nyɛwo enine kpotia kɛ enaji hu tokotai; 23ni nyɛkɛ tsinabi ni ewo fɔ lɛ abaa nyɛbagbea, ni nyɛhãa wɔyea nii ni wɔnaa tsuijurɔ; 24#Efes 2.1, 5; 5.14 ejaakɛ mibi nɛɛ gbo, ni ehiɛ etsɛ̃ ekoŋŋ; elaaje, ni ana lɛ.’ Ni amɛbɔ̃i nyamɔ.
25“Shi ebi nukpa lɛ yɛ ŋmɔshi. Ni be ni ebaa ni ebabɛŋkɛ shĩa lɛ, enu saŋkui kɛ joi ahe, 26ni etsɛ tsuji lɛ eko kɛba, ni ebi lɛ akɛ, ‘Mɛni afeɔ nɛɛ?’ 27Ni ekɛɛ lɛ akɛ, ‘Onyɛmi lɛ eba, ni otsɛ egbe tsinabi ni ewo fɔ lɛ, ejaakɛ eshɛ edɛŋ kpiŋtiŋŋ.’ 28#Luk 15.2 Ni bi nukpa lɛ mli fu, ni ekpɛlɛ̃ɛɛ shĩa lɛ yaa. No hewɔ lɛ, etsɛ je kpo ni ebakpa lɛ fai. 29Shi ehere nɔ ni ekɛɛ etsɛ lɛ akɛ, ‘Kwɛ afii abɔ sɔŋŋ ni misɔ̃mɔ bo, ni mitɔ̃ko okitã ko nɔ dã, ni mi lɛ, ohãko mi too abotiabi po dã, koni mi kɛ mishieŋtsɛmɛi ana tsuijurɔ; 30shi ŋmɛnɛ ni nɛkɛ obi nɛɛ ni kɛ ajwamãŋi eyaye onii lɛ ba lɛ, ogbe tsinabi ni ewo fɔ lɛ ohã lɛ.’ 31Ni ekɛɛ lɛ akɛ, ‘Mibi, bo lɛ, okɛ mi yɔɔ daa nɛɛ, ni nɔ fɛɛ nɔ ni miyɔɔ lɛ onɔŋ; 32shi esa akɛ wɔnya ni wɔmii ashɛ wɔhe, ejaakɛ onyɛmi nɛɛ gbo, ni ehiɛ etsɛ̃ ekoŋŋ, elaaje, ni ana lɛ.’ ”
Currently Selected:
Luka 15: NEGAB
Highlight
Share
Copy
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
