KA BUKE MUA A MOSE, I KAPA ʻIA KINOHI 24
24
MOKUNA XXIV.
1 ʻO ka hoʻohiki ʻana a kā ʻAberahama kauā. 10 Kona hele i Mesopotamia. 12 Kāna pule. 15 Loaʻa ʻo Rebeka iā ia. 29 Hoʻokipa ʻia ke kauā e Labana. 34 Ka ʻōlelo a ke kauā. 50 ʻAe mai Labana lāua ʻo Betuʻela. 58 Ko Rebeka ʻae ʻana e lilo i wahine na ʻIsaʻaka. 61 Ko lākou hele a me ka loaʻa iā ʻIsaʻaka.
1¶ Ua ʻelemakule ʻo ʻAberahama, ua nui nō hoʻi kona mau lā, a ua hoʻopōmaikaʻi ʻo Iēhova iā ʻAberahama i nā mea a pau.
2ʻĪ akula ʻo ʻAberahama i ke kauā kahiko o kona hale, i ka mea iā ia ka mālama i kona mea a pau, “Ē, e kau mai ʻoe i kou lima ma lalo iho o koʻu ʻūhā,
3a naʻu nō e hāʻawi aku iā ʻoe e hoʻohiki ma o Iēhova lā, ma ke Akua o ka lani, a ke Akua o ka honua; i lawe ʻole ai ʻoe i wahine na kaʻu keiki na ʻIsaʻaka, no nā kaikamāhine a ko Kanaʻana ka poʻe aʻu e noho nei i waena;
4akā, e hele aku ʻoe i koʻu ʻāina, a i koʻu poʻe hoahānau, a e lawe mai i wahine na kaʻu keiki na ʻIsaʻaka.”
5ʻĪ maila ua kauā nei iā ia, “Inā paha ʻaʻole e makemake ka wahine e hahai mai iaʻu a hiki i kēia ʻāina; e pono anei iaʻu e kaʻi aku i kāu keiki i ka ʻāina āu i hele mai nei?”
6Pāpā akula ʻo ʻAberahama iā ia, “E ao ʻoe, mai kaʻi aku ʻoe i kaʻu keiki ma laila.
7“Na Iēhova ke Akua o ka lani, nāna au i lawe, mai ka hale mai o koʻu makua kāne, a mai ka ʻāina mai o koʻu poʻe hoahānau, a ʻōlelo mai iaʻu, a hoʻohiki mai nō hoʻi iaʻu, i ka ʻī ʻana mai, ‘E hāʻawi auaneʻi au i kēia ʻāina no kāu poʻe mamo,’ nāna nō e hoʻouna aku i kona ʻānela ma mua ou, a e lawe mai ʻoe i wahine na kaʻu keiki mai laila mai.
8“A i makemake ʻole ka wahine e hahai mai iā ʻoe, a laila e hala ʻole ʻoe i kēia hoʻohiki ʻana noʻu; akā, mai kaʻi aku ʻoe i kaʻu keiki i laila.”
9A kau ihola ke kauā i kona lima ma lalo iho o ka ʻūhā o ʻAberahama kona haku, a hoʻohiki ihola nona ma ia mea.
10¶ Lālau akula ua kauā lā i nā kāmelo o kona haku he ʻumi; no ka mea, ma kona lima ka waiwai a pau o kona haku; kū aʻela ia, a hele akula i Mesopotamia, i ke kūlanakauhale ʻo Nahora.
11Hoʻokukuli ihola ia i kona mau kāmelo ma waho o ke kūlanakauhale, ma ka luawai, i ke ahiahi, i ka manawa e hele mai ai nā wāhine e huki wai.
12ʻĪ akula ia, “E Iēhova ke Akua o kuʻu haku o ʻAberahama, ke pule aku nei au iā ʻoe, e hoʻopōmaikaʻi mai ʻoe iaʻu i kēia lā, a e lokomaikaʻi mai ʻoe i kuʻu haku iā ʻAberahama.
13“Eia au ke kū nei ma ka luawai; a e hele mai ana nā kaikamāhine a nā kānaka o ke kūlanakauhale e huki i ka wai.
14“E ʻae mai ʻoe, ʻo ke kaikamahine aʻu e ʻōlelo aku ai, ‘Ke noi aku nei au iā ʻoe, e kuʻu iho ʻoe i kou bākeke, i inu ai au,’ a e ʻī mai ʻo ia, ‘E inu ʻoe, a e hoʻohāinu hoʻi au i nā kāmelo,’ ʻo ia nō ka mea āu i koho ai na kāu kauā na ʻIsaʻaka; i laila au e ʻike ai i kou lokomaikaʻi ʻana mai i kuʻu haku.”
15ʻAʻole ia i hoʻōki iho i kāna ʻōlelo ʻana, aia hoʻi, hiki maila ʻo Rebeka, ka mea i hānau na Betuʻela, na ke keiki kāne a Mileka a ka wahine a Nahora, ko ʻAberahama kaikuaʻana, me kona bākeke ma luna o kona poʻohiwi.
16Ua maikaʻi ka maka o ua kaikamahine lā ke nānā ʻia aku, he wahine puʻupaʻa, ʻaʻole i ʻike ʻia e kekahi kāne; iho ihola ia ma ka luawai, hoʻopiha ihola i kona bākeke, a hoʻi maila i luna.
17Holo akula ua kauā lā e hālāwai me ia, ʻī akula, “Ē, ke noi aku nei au iā ʻoe, e hō mai noʻu i wahi wai o kou bākeke e inu.”
18ʻĪ maila kēlā, “E inu ʻoe, e kuʻu haku.” A wikiwiki ʻo ia i kuʻu iho i kona bākeke ma kona lima, a hoʻohāinu maila iā ia.
19A pau kāna hoʻohāinu ʻana iā ia, ʻī maila ia, “E huki hoʻi au i ka wai no kou mau kāmelo, a pau ko lākou inu ʻana.”
20Wikiwiki aʻela ia, a ninini ihola i ka wai o kona bākeke i loko o ke pā, a holo hou aʻela i ka luawai e huki ai, a huki maila ia no kona poʻe kāmelo a pau.
21Mahalo ihola ka naʻau o ua kanaka lā iā ia, ʻaʻole ia i ʻekemu aku, i mea e ʻike ai ʻo ia, i ka hoʻopōmaikaʻi ʻana mai paha o Iēhova i kona hele ʻana mai, ʻaʻole paha.
22A pau ka inu ʻana o nā kāmelo, lawe aʻela ua kanaka lā i kekahi apo gula no ka ihu, he hapalua o ka sekela ma ke kaupouna ʻana, me nā kūpeʻe gula ʻelua no kona mau lima, he ʻumi nā sekela ma ke kaupouna ʻana;
23nīnau akula ia, “He kaikamahine ʻoe na wai? Ke noi aku nei au iā ʻoe, e haʻi mai iaʻu; a he wahi kaʻawale nō anei i loko o ka hale o kou makua kāne e moe ai mākou?”
24ʻĪ maila kēlā iā ia, “ʻO wau nō ke kaikamahine a Betuʻela a ke keiki a Mileka, āna i hānau ai na Nahora.”
25ʻĪ hou maila hoʻi kēlā iā ia, “He mauʻu maloʻo nō a he ʻai na nā holoholona iā mākou a nui, a he wahi nō hoʻi e moe ai.”
26Kūlou ihola ke poʻo o ua kanaka lā, a hoʻomaikaʻi akula iā Iēhova.
27ʻĪ akula, “E hoʻomaikaʻi ʻia aku ʻo Iēhova ke Akua o kuʻu haku o ʻAberahama, ʻaʻole ia i hoʻonele mai i kuʻu haku i kona aloha a me kona ʻoiaʻiʻo; ma ke alanui wau, a ua alakaʻi aku ʻo Iēhova iaʻu ma ka hale o nā hoahānau o kuʻu haku.”
28¶ Holo akula ua kaikamahine lā, a haʻi akula i ko ka hale o kona makuahine ia mau mea.
29He kaikunāne ko Rebeka, ʻo Labana kona inoa; a holo maila ʻo Labana i waho i ua kanaka lā, ma ka luawai.
30A ʻike akula ia i ke apo no ka ihu, a me nā kūpeʻe lima ma nā lima o kona kaikuahine, a lohe akula ia i ka ʻōlelo a kona kaikuahine a Rebeka, i ka ʻī ʻana mai, “Pēlā i ʻōlelo mai ai ke kanaka iaʻu,” hele maila ia i ua kanaka nei; aia hoʻi, kū ihola ia me nā kāmelo ma ka luawai.
31ʻĪ maila ia, “E ka mea i aloha ʻia e Iēhova, e komo mai ʻoe; he aha kāu e kū wale nei i waho? No ka mea, ua hoʻomākaukau iho nei au i ka hale, a me ka wahi no nā kāmelo?”
32Komo akula ua kanaka lā i loko o ka hale; wehe aʻela ia i nā kāmelo, a hāʻawi akula i ka mauʻu maloʻo a me ka mea ʻai na nā kāmelo, a me ka wai e holoi i kona mau wāwae, a me nā wāwae o nā kānaka me ia.
33A lawe ʻia mai ka ʻai nāna, ʻī akula ʻo ia, “ʻAʻole au e ʻai, a haʻi ʻē aku au ma mua i kaʻu mea i hele mai nei.” ʻĪ maila kēlā, “E haʻi mai.”
34ʻĪ akula ia, “ʻO wau nō ke kauā a ʻAberahama.
35“Ua hoʻopōmaikaʻi nui mai ʻo Iēhova i kuʻu haku; a ua lilo ia i mea nui; ua hāʻawi mai ia nāna i hipa, a me nā bipi, i ke kālā a me ke gula, i nā kauā kāne a me nā kauā wahine, i nā kāmelo a me nā hoki.
36“A hānau maila ʻo Sara ka wahine a kuʻu haku i keiki kāne nāna i kona wā luahine, a ua hāʻawi aku kēlā i kona waiwai a pau nona.
37“A ua hāʻawi mai kuʻu haku iaʻu e hoʻohiki, i ka ʻī ʻana mai, ‘Mai lawe ʻoe i wahine na kuʻu keiki no nā kaikamāhine a ko Kanaʻana, nona kēia wahi aʻu e noho nei;
38akā, e hele ʻoe i ka ʻohana a kuʻu makua kāne, a i koʻu poʻe hoahānau, a e lawe mai ʻoe i wahine na kuʻu keiki.’
39“ʻĪ akula au i kuʻu haku, ‘Inā paha ʻaʻole e makemake ka wahine e hahai mai iaʻu.’
40“ʻĪ maila kēlā iaʻu, ‘Na Iēhova, na ka Mea i mua ona koʻu hele ʻana, nāna nō e hoʻouna aku i kona ʻānela me ʻoe, a e hoʻopōmaikaʻi i kou hele ʻana; a e lawe mai ʻoe i wahine na kuʻu keiki no koʻu poʻe hoahānau, a no ka ʻohana a koʻu makua kāne.
41‘A laila, e hala ʻole ʻoe i kuʻu hoʻohiki ʻana, ke hiki aku ʻoe i koʻu poʻe hoahānau, a hāʻawi ʻole mai lākou iā ʻoe, a laila e hala ʻole ʻoe i kuʻu hoʻohiki ʻana.’
42“A hiki maila au i kēia lā i ka luawai, ʻī akula, ‘E Iēhova ke Akua o kuʻu haku ʻo ʻAberahama, inā ʻoe e hoʻopōmaikaʻi mai i kuʻu hele ʻana e hele nei,
43eia wau, ke kū nei ma ka luawai, a i ka manawa e hele mai ai ka wahine puʻupaʻa e huki wai ai, a e ʻī aku au iā ia, “Ke noi aku nei au iā ʻoe, e hāʻawi mai noʻu i wahi wai o kou bākeke e inu,”
44a e ʻōlelo mai ʻo ia iaʻu, “E inu ʻoe, a e huki hoʻi au no kou mau kāmelo”; ʻo ia ka wahine a Iēhova i koho ai na ke keiki a koʻu haku.’
45“ʻAʻole au i hoʻōki iho i ka ʻōlelo ʻana i loko o kuʻu naʻau, aia hoʻi, puka maila ʻo Rebeka, me kona bākeke ma luna o kona poʻohiwi; iho ihola ia ma ka luawai, a huki maila; ʻī akula au iā ia, ‘Ke noi aku nei au iā ʻoe, e hāʻawi mai noʻu e inu.’
46“Wikiwiki ihola ia, a kuʻu ihola i kona bākeke mai luna iho ona, ʻī maila, ‘E inu ʻoe, a e hoʻoinu hoʻi au i kou mau kāmelo,’ inu ihola nō au, a hoʻoinu akula hoʻi ʻo ia i nā kāmelo.
47“Nīnau akula au iā ia, ʻī akula, ‘He kaikamahine ʻoe na wai?’ ʻĪ maila kēlā, ‘He kaikamahine na Betuʻela ke keiki a Nahora, na ka mea a Mileka i hānau ai nāna.’ A lou akula au i ke apo ma kona ihu, a me nā kūpeʻe lima ma kona mau lima.
48“Kūlou ihola au i kuʻu poʻo, a hoʻomana akula iā Iēhova, a hoʻomaikaʻi akula iā Iēhova i ke Akua o kuʻu haku ʻo ʻAberahama, nāna au i alakaʻi ma ke ala pono, i lawe au i ke kaikamahine a ka hoahānau o kuʻu haku i wahine na kāna keiki.
49“ʻĀnō lā, a i manaʻo lokomaikaʻi ʻiʻo mai ʻoukou i kuʻu haku, e haʻi mai iaʻu; a i ʻole, e haʻi mai hoʻi; i huli aku ai au i ka ʻākau paha, i ka hema paha.”
50¶ A laila, ʻōlelo maila ʻo Labana lāua ʻo Betuʻela, ʻī maila, “No Iēhova mai ia mea; ʻaʻole e hiki iā māua ke ʻōlelo aku iā ʻoe he hewa, ʻaʻole hoʻi he pono.
51“Aia hoʻi ʻo Rebeka i mua o kou alo, e lawe ʻoe iā ia a e hele aku, i lilo ai ia i wahine na ke keiki a kou haku, e like me kā Iēhova i ʻōlelo mai ai.”
52A lohe aʻela ke kauā a ʻAberahama i kā lāua ʻōlelo, hoʻomana akula ia iā Iēhova, e kūlou ana i ka honua.
53Lawe maila ua kauā lā i nā mea kālā a me nā mea gula, a me nā ʻaʻahu, a hāʻawi akula ia mau mea no Rebeka; hāʻawi akula hoʻi ʻo ia i nā mea maikaʻi na kona kaikunāne a me kona makuahine.
54ʻAi ihola lākou a inu hoʻi, ʻo ia a me nā kānaka me ia, a moe ihola ia pō. Ala aʻela lākou i kakahiaka, ʻī akula ia, “E kuʻu aku ʻoukou iaʻu e hele i koʻu haku.”
55ʻĪ maila kona kaikunāne lāua ʻo kona makuahine, “E noho nō ke kaikamahine me mākou i kekahi mau lā, i ʻumi paha; a ma hope aku e hele nō ia.”
56ʻĪ akula kēlā iā lāua, “Mai keʻakeʻa mai ʻolua iaʻu; no ka mea, ua hoʻopōmaikaʻi mai ʻo Iēhova i kuʻu hele ʻana mai; e kuʻu aku ʻoukou iaʻu e hele aku ai i koʻu haku.”
57ʻĪ maila lāua, “E hea aku māua i ke kaikamahine, a e nīnau aku iā ia.”
58Hea akula lāua iā Rebeka, nīnau akula iā ia, “E ake ʻoe e hele pū me kēia kanaka?” ʻĪ maila kēlā, “E hele wau.”
59Kuʻu akula lāua iā Rebeka ʻo ko lāua kaikuahine, me kona kahu, a me ke kauā a ʻAberahama, a me nā kānaka ona.
60Hoʻomaikaʻi akula lāua iā Rebeka, ʻī akula,
“ʻO ʻoe nō ko māua kaikuahine,
E lilo ʻoe i makuahine o nā tausani miliona;
E lilo hoʻi no kāu poʻe mamo,
Ka puka pā o ka poʻe inaina aku iā lākou.”
61¶ Kū aʻela ʻo Rebeka, me kona mau wāhine, holo maila lākou ma luna o nā kāmelo, e hahai ana i ua kanaka lā; a lawe aʻela ua kauā lā iā Rebeka, a hoʻi maila.
62I hele maila ʻo ʻIsaʻaka ma ke alanui o ka Pūnāwai Lahai Roi; no ka mea, i noho nō ia ma ka ʻĀina Kūkulu Hema.
63Hele akula ʻo ʻIsaʻaka ma ke kula e noʻonoʻo ai i ka wā ahiahi; ʻalawa aʻela kona mau maka i luna, aia hoʻi nā kāmelo e hoʻi mai ana.
64Nānā maila ʻo Rebeka, a ʻike maila ʻo ia iā ʻIsaʻaka, lele ihola ia mai luna iho o ke kāmelo.
65No ka mea, ua nīnau aku ia i ua kauā lā, “ʻO wai ia kanaka e hele mai ana i ke kula e hālāwai me kākou?” A ua ʻī mai ke kauā, “ʻO kuʻu haku nō ia.” No ia mea, lawe aʻela ia i ka pale, a hoʻouhi ihola iā ia iho.
66A haʻi maila ua kauā lā iā ʻIsaʻaka i nā mea a pau āna i hana ai.
67Alakaʻi akula ʻo ʻIsaʻaka iā ia ma loko o ka halelewa o kona makuahine ʻo Sara; lawe akula ʻo ia iā Rebeka, a lilo ihola ia i wahine nāna, a aloha aʻela ʻo ia iā ia. A ua hōʻoluʻolu ʻia ʻo ʻIsaʻaka no kona makuahine.
Currently Selected:
KA BUKE MUA A MOSE, I KAPA ʻIA KINOHI 24: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
