KA BUKE MUA A MOSE, I KAPA ʻIA KINOHI 30
30
MOKUNA XXX.
1 Pā Rāhela, a hāʻawi aku iā Bileha na Iakoba. 9 Hāʻawi ʻia ʻo Zilepa na Iakoba. 14 Nā hua a Reubena. 17 Nā keiki hou a Lea. 22 Hānau ʻo Rāhela iā Iosepa. 25 Ko Iakoba manaʻo hele, a uku hou ʻia e Labana. 37 Kāna hana a me kona waiwai.
1¶ A ʻike aʻela ʻo Rāhela, ʻaʻole ia i hānau i nā keiki na Iakoba, huāhuā akula ʻo Rāhela i kona kaikuaʻana; ʻī maila ia iā Iakoba, “E hāʻawi mai ʻoe i keiki naʻu, o make au.”
2Hoʻaʻā ʻia ka inaina o Iakoba iā Rāhela; ʻī akula ia, “ʻO wau nō anei ka pani hakahaka no ke Akua, nāna i ʻauʻa mai ka hua o kou ʻōpū?”
3ʻĪ maila ia, “Aia hoʻi kuʻu kauā wahine ʻo Bileha, e komo aku ʻoe i ona lā; a e hānau mai auaneʻi ia ma luna o kuʻu mau kuli, i keiki ai hoʻi au ma ona lā.”
4Hāʻawi maila ʻo ia iā Bileha i kāna kauā wahine, i wahine nāna; a komo akula ʻo Iakoba i ona lā.
5Hāpai ihola ʻo Bileha, a hānau maila, he keiki kāne na Iakoba.
6ʻĪ maila ʻo Rāhela, “Ua hoʻāpono mai ke Akua iaʻu, ua hoʻolohe mai hoʻi ia i koʻu leo, a ua hāʻawi mai ia i keiki naʻu.” No laila, kapa ihola ia i kona inoa, ʻo Dana.
7Hāpai hou ihola ʻo Bileha ke kauā wahine a Rāhela, a hānau maila, ʻo ka lua ia o kāna keiki kāne na Iakoba.
8ʻĪ maila ʻo Rāhela, “Me nā hākōkō nui kaʻu i hākōkō pū ai me kuʻu kaikuaʻana, a ua lanakila au.” A kapa ihola ia i kona inoa, ʻo Napetali.
9¶ A ʻike ihola ʻo Lea, ua oki kona hānau ʻana, lālau akula ia iā Zilepa, i kāna kauā wahine, a hāʻawi akula iā ia i wahine na Iakoba.
10A hānau maila ʻo Zilepa ke kauā wahine a Lea i keiki kāne na Iakoba.
11ʻĪ maila ʻo Lea, “Pōmaikaʻi!” A kapa ihola ia i kona inoa, ʻo Gada,
12hānau maila hoʻi ʻo Zilepa ʻo ke kauā wahine a Lea i ka lua o ke keiki kāne na Iakoba.
13ʻĪ maila ʻo Lea, “Pōmaikaʻi nō wau; no ka mea, e hoʻomaikaʻi mai auaneʻi nā kaikamāhine iaʻu.” A kapa ihola i kona inoa ʻo ʻAsera.
14¶ Hele akula ʻo Reubena i nā lā o ka ʻohi palaoa ʻana, a loaʻa iā ia ma ke kula nā hua dudaima, a lawe maila ia mau mea i kona makuahine iā Lea. A laila, ʻī maila ʻo Rāhela iā Lea, “Ke noi aku nei au iā ʻoe, e hāʻawi mai naʻu i kekahi mau dudaima a kāu keiki kāne.”
15ʻĪ akula kēlā iā ia, “He mea ʻuʻuku anei kou lawe ʻana aku i kaʻu kāne? A manaʻo anei hoʻi ʻoe e lawe aku i nā dudaima a kuʻu keiki?” ʻĪ maila ʻo Rāhela, “No laila, e moe pū ia me ʻoe i nēia pō no nā dudaima a kāu keiki.”
16I ke ahiahi, hoʻi maila ʻo Iakoba mai ke kula mai, a hele akula ʻo Lea e hālāwai me ia, ʻī akula, “E komo mai ʻoe i oʻu nei; no ka mea, he ʻoiaʻiʻo nō, ua hoʻolimalima au iā ʻoe me nā dudaima a kaʻu keiki.” A moe pū ihola ʻo ia me ia ia pō.
17Hoʻolohe maila ke Akua iā Lea a hāpai ihola ʻo Lea, a hānau maila na Iakoba i ka lima o kāna keiki kāne.
18ʻĪ maila ʻo Lea, “Ua hāʻawi maila ke Akua i kaʻu uku, no kuʻu hāʻawi ʻana aku i kaʻu kauā wahine na kuʻu kāne.” A kapa ihola ia i kona inoa ʻo ʻIsakara.
19Hāpai hou ihola ʻo Lea, a hānau mai na Iakoba i ke ono o kāna keiki kāne.
20ʻĪ maila ʻo Lea, “Ua hāʻawi mai ke Akua iaʻu i ka haʻawina maikaʻi; ʻānō lā, e noho pū auaneʻi kaʻu kāne me aʻu; no ka mea, ua hānau nō au i nā keiki kāne ʻeono nāna.” A kapa ihola ia i kona inoa ʻo Zebuluna.
21A ma hope iho, hānau maila ia i kaikamahine, a kapa ihola i kona inoa ʻo Dina.
22Hoʻomanaʻo maila ke Akua iā Rāhela, a hoʻolohe maila ke Akua iā ia, a hoʻohua maila i kona ʻōpū.
23Hāpai ihola ʻo ia, a hānau maila he keiki kāne; ʻī maila ia, “Ua lawe aku nō ke Akua i kuʻu hōʻino ʻia.”
24Kapa ihola ia i kona inoa ʻo Iosepa; ʻī ihola, “E hāʻawi mai ke Akua i keiki kāne hou naʻu.”
25¶ I ka manawa a Rāhela i hānau ai iā Iosepa, ʻī akula ʻo Iakoba iā Labana, “E hoʻihoʻi aku ʻoe iaʻu, i hele aku ai au i koʻu wahi, a i koʻu ʻāina.
26“E hāʻawi mai ʻoe i kaʻu mau wāhine, a me kaʻu mau kamaliʻi, i nā mea aʻu i hoʻoikaika aku ai nāu, a e kuʻu aʻe ʻoe iaʻu e hele; no ka mea, ua ʻike ʻoe i ka hana aʻu i hana aku ai nāu.”
27ʻĪ maila ʻo Labana iā ia, “Ke noi aku nei au iā ʻoe, inā i loaʻa iaʻu ke aloha i mua ou, e noho; ua ʻike nō wau ma ka hoʻāʻo ʻana, nou nō kā Iēhova i hoʻopōmaikaʻi mai ai iaʻu.”
28ʻĪ maila hoʻi ʻo ia, “E haʻi mai ʻoe i kāu uku, a e hāʻawi aku nō wau.”
29ʻĪ akula kēlā iā Labana, “Ua ʻike nō ʻoe i koʻu hoʻoikaika ʻana aku nāu, a me ka pono o kāu poʻe holoholona.
30“No ka mea, he mea ʻuʻuku kāu ma mua o koʻu hiki ʻana mai, a ua hoʻomāhuahua ʻia aʻe ia he lehulehu loa; a ua hoʻopōmaikaʻi mai ʻo Iēhova iā ʻoe, ma hope mai o kuʻu hele ʻana mai; ʻānō hoʻi, āhea lā au e hoʻolako ai i ko ka hale oʻu kekahi?”
31ʻĪ maila ʻo ia, “He aha kaʻu e uku aku ai iā ʻoe?” ʻĪ akula ʻo Iakoba, “ʻAʻole ʻoe e uku mai iaʻu i kekahi mea; inā paha penei ʻoe e hana mai ai iaʻu, a laila au e hana hou, a e mālama hoʻi i kāu poʻe holoholona;
32e hele aʻe au i waena o kāu poʻe holoholona a pau i nēia lā, a e hoʻokaʻawale aku i nā holoholona kikokiko a ʻōniʻoniʻo, a me nā mea ʻeleʻele a pau o ka poʻe hipa, a me nā mea ʻōniʻoniʻo a kikokiko o ka poʻe kao; a ʻo ia kaʻu uku.
33“Pēlā e hoʻāpono aku ai koʻu pono iaʻu i ka wā ma hope, i ka wā e lilo mai ai ia i uku naʻu i mua o kou mau maka; ʻo nā mea a pau o ka poʻe kao me aʻu, ʻaʻole i kikokiko, ʻaʻole hoʻi i ʻeleʻele no ka poʻe hipa, ʻo ia ke ʻōlelo ʻia he mea i ʻaihue ʻia.”
34ʻĪ maila ʻo Labana, “Aia hoʻi, ʻo koʻu makemake nō ia, me kāu i ʻōlelo mai ai!”
35Ia lā nō, hoʻokaʻawale aʻela ʻo ia i nā kao kāne a pau i ʻōniʻoniʻo a i kikokiko, a me nā kao wahine a pau i ʻōniʻoniʻo a kikokiko, me nā mea kiko keʻokeʻo a pau; a me nā mea ʻeleʻele o nā mea keiki hipa, a hāʻawi akula i loko o ka lima o kāna mau keiki kāne.
36A hoʻokaʻawale aʻela ʻo Labana i nā lā hele i ʻekolu ma waena ona a ʻo Iakoba; a hānai akula ʻo Iakoba i nā poʻe holoholona a Labana i koe.
37¶ Lawe aʻela ʻo Iakoba i nā lāʻau popela maka, me nā lāʻau ʻalemone, a me nā lāʻau pelane, a ihi ihola i nā kaha ʻōniʻoniʻo keʻokeʻo ma ua mau lāʻau lā, i mōakāka nā wahi keʻokeʻo o ua mau lāʻau lā.
38Kūkulu ihola ia i nā lāʻau āna i ihi ai, i mua o nā holoholona, ma nā pā wai hoʻoinu, i ka wā i hele ai lākou e inu, i hāpai ai lākou i ka wā i hele ai lākou e inu.
39Hāpai ihola nā holoholona i mua o ua mau lāʻau lā, a hānau maila i nā keiki ʻōniʻoniʻo, kikokiko, a me ke kīkohukohu.
40Hoʻokaʻawale aʻela ʻo Iakoba i nā keiki hipa, a hāliu aʻela i nā maka o ka poʻe holoholona ma nā mea ʻōniʻoniʻo, a me nā mea ʻeleʻele o ko Labana poʻe holoholona; hoʻokaʻawale aʻela ia i kona mau poʻe holoholona, ʻaʻole i hoʻokokoke aku iā lākou me nā holoholona a Labana.
41I ka wā i ʻai ai nā holoholona ikaika, a laila, waiho ihola ʻo Iakoba i nā lāʻau i mua o nā maka o nā holoholona ma loko o nā pā wai inu, i hāpai ai lākou i mua o nā lāʻau.
42Akā, inā he mau holoholona nāwaliwali lākou, ʻaʻole ia i waiho i nā lāʻau i loko; pēlā nō, na Labana ka poʻe nāwaliwali, a na Iakoba ka poʻe ikaika.
43A he nui loa ka waiwai o ua kanaka nei; iā ia nā holoholona he nui wale, me nā kauā wahine, a me nā kauā kāne, nā kāmelo, a me nā hoki.
Currently Selected:
KA BUKE MUA A MOSE, I KAPA ʻIA KINOHI 30: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
