KA ʻEUANELIO I KĀKAU ʻIA AI E IOANE 16
16
MOKUNA XVI.
1 Aʻo mai ʻo Iesū i kāna poʻe haumāna no ka hōʻino ʻia mai o lākou. 16 Hōʻike mai i kona make ʻana a me kona ala hou ʻana.
1¶ “Ua ʻōlelo aku au i kēia mau mea iā ʻoukou, o hina auaneʻi ʻoukou.
2“E hoʻokuke lākou iā ʻoukou i waho o nā hale hālāwai; a e hiki mai nō ka manawa e manaʻo ʻia ka mea pepehi iā ʻoukou, ua hoʻomaikaʻi aku ia i ke Akua.
3“A e hana lākou i kēia mau mea; no ka mea, ʻaʻole lākou i ʻike i ka Makua, ʻaʻole hoʻi iaʻu.
4“Akā, ʻo kēia mau mea kaʻu i ʻōlelo aku ai iā ʻoukou, aia hiki mai ka manawa, a laila e manaʻo ʻoukou ia mau mea; no ka mea, ua haʻi aku au iā ʻoukou. ʻAʻole naʻe au i haʻi aku ia mau mea iā ʻoukou i kinohou; no ka mea, ua noho pū au me ʻoukou.
5“ʻĀnō ke hoʻi aku nei au i ka Mea nāna au i hoʻouna mai; ʻaʻole naʻe kekahi o ʻoukou e nīnau mai iaʻu, ‘E hele ana ʻoe i hea?’
6“Akā, no kaʻu ʻōlelo ʻana aku iā ʻoukou ia mau mea, ua piha ko ʻoukou naʻau i ka ʻehaʻeha.
7“He ʻoiaʻiʻo nō naʻe kaʻu e ʻōlelo aku nei iā ʻoukou; he pono nō ʻoukou e hele aku au; no ka mea, i ʻole au e hele aku, ʻaʻole e hiki mai ke Kōkua i o ʻoukou nei; akā, i hele aku au, naʻu nō ia e hoʻouna mai iā ʻoukou.
8“Aia hiki mai ia, nāna e hoʻākāka mai i ko ke ao nei i ka hewa, a i ka pono, a me ka hoʻāhewa ʻana;
9i ka hewa; no ka mea, ʻaʻole lākou e manaʻoʻiʻo mai iaʻu;
10i ka pono; no ka mea, e hele aku au i koʻu Makua, ʻaʻole ʻoukou e ʻike hou iaʻu;
11i ka hoʻāhewa ʻana; no ka mea, ua hoʻāhewa ʻia ke aliʻi o kēia ao.
12“He nui kaʻu mau mea i koe e ʻōlelo aku iā ʻoukou; akā, ʻaʻole e hiki iā ʻoukou ke hoʻomaopopo i kēia manawa.
13“Aia hiki mai kēlā, ʻo ka ʻUhane ʻoiaʻiʻo, nāna ʻoukou e aʻo mai i ka ʻoiaʻiʻo a pau; no ka mea, ʻaʻole nāna kāna ʻōlelo ʻana; akā, ʻo nā mea āna i lohe ai, ʻo ia kāna e ʻōlelo ai, a e hōʻike nō ʻo ia iā ʻoukou i nā mea e hiki mai ana.
14“E hoʻonani mai ia iaʻu; no ka mea, e lawe nō ia i kaʻu, a e hōʻike aku iā ʻoukou.
15“ʻO nā mea a pau a ka Makua, naʻu nō ia; no laila au i ʻōlelo ai, e lawe nō ia i kaʻu, a e hōʻike aku iā ʻoukou.
16“A liʻuliʻu iki, ʻaʻole ʻoukou e ʻike iaʻu; a liʻuliʻu iki hou aku, a e ʻike nō ʻoukou iaʻu; no ka mea, e hele ana au i ka Makua.”
17No laila, nīnau aʻela kekahi poʻe o nā haumāna āna iā lākou iho, “He aha kēia mea āna i ʻōlelo mai ai iā kākou, ‘A liʻuliʻu iki, ʻaʻole ʻoukou e ʻike iaʻu; a liʻuliʻu iki hou aku, a e ʻike ʻoukou iaʻu’; no ka mea, ‘e hele ana au i ka Makua’?”
18Nīnau aʻela hoʻi lākou, “He aha kēia mea āna i ʻōlelo ai, ‘A liʻuliʻu iki?’ ʻAʻole kākou i ʻike i kāna mea i ʻōlelo ai.”
19ʻIke ihola nō ʻo Iesū i ko lākou makemake e nīnau iā ia, a ʻī maila ʻo ia iā lākou, “Ke ninaninau anei ʻoukou kekahi i kekahi i ka mea aʻu i ʻōlelo ai, ‘A liʻuliʻu iki, ʻaʻole ʻoukou e ʻike iaʻu, a liʻuliʻu iki hou aku, a e ʻike ʻoukou iaʻu’?
20“ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, e uē auaneʻi ʻoukou, a e kanikau hoʻi; akā, e ʻoliʻoli nō ke ao nei; a e kaumaha auaneʻi ʻoukou; akā, e hoʻolilo ʻia ko ʻoukou kaumaha i ʻoliʻoli.
21“ʻO ka wahine hānau keiki, he ʻehaʻeha kona; no ka mea, ua hiki mai kona hora; a i hānau ʻia ke keiki, ʻaʻohe ona manaʻo hou i ka pōpilikia, no ka ʻoliʻoli i ka hānau ʻia ʻo ke kanaka i loko o ke ao nei.
22“A he ʻehaʻeha ko ʻoukou i kēia manawa; akā, e ʻike hou auaneʻi au iā ʻoukou, a ʻoliʻoli ko ʻoukou naʻau, ʻaʻole kekahi e kāʻili aku i ko ʻoukou ʻoliʻoli mai o ʻoukou aku.
23“A i kēlā manawa, ʻaʻole e nīnau mai ʻoukou iaʻu i kekahi mea. ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, ʻo nā mea a ʻoukou e noi ai i ka Makua ma koʻu inoa, ʻo ia kāna e hāʻawi mai iā ʻoukou.
24“Ma mua mai, ʻaʻole ʻoukou i noi i kekahi mea ma koʻu inoa; e noi, a loaʻa iā ʻoukou, i māhuahua aʻe ai ko ʻoukou ʻoliʻoli.
25¶ “Ua ʻōlelo pohihihi aku au ia mau mea iā ʻoukou; e hiki mai nō ka manawa, ʻaʻole au e ʻōlelo pohihihi hou aku iā ʻoukou; akā, e hōʻike akāka aku au iā ʻoukou i nā mea o ka Makua.
26“I kēlā manawa e nonoi aku ʻoukou ma koʻu inoa; ʻaʻole au e haʻi aku iā ʻoukou, ʻo wau kekahi e noi aku i ka Makua no ʻoukou.
27“No ka mea, ʻo ka Makua, ʻo ia ke aloha aku iā ʻoukou, no ko ʻoukou aloha ʻana iaʻu, a no ko ʻoukou manaʻoʻiʻo ʻana, ua hele mai au mai ke Akua mai.
28“Mai ka Makua mai au i hele mai nei i kēia ao; eia hou, e haʻalele ana au i ke ao nei, a e hoʻi aku i ka Makua.”
29ʻĪ akula kāna poʻe haumāna iā ia, “Aia hoʻi, ʻānō ke ʻōlelo akāka mai nei ʻoe, ʻaʻole me ka ʻōlelo nane.
30“ʻĀnō, ua maopopo iā mākou ua ʻike ʻoe i nā mea a pau, ʻaʻole ou hemahema e pono ai ke nīnau kekahi iā ʻoe; no kēia mea i manaʻoʻiʻo ai mākou, ua hele mai ʻoe mai ke Akua mai.”
31ʻŌlelo maila ʻo Iesū iā lākou, “Ke manaʻoʻiʻo nei anei ʻoukou?
32“Aia hoʻi, e hiki ana ka hora, ʻānō hoʻi ua hiki mai, e hoʻopuehu ʻia kēlā mea kēia mea o ʻoukou ma kona wahi, a e haʻalele ʻoukou iaʻu e hoʻokahi wale nō; ʻaʻole hoʻi au e hoʻokahi wale ana; no ka mea, ʻo ka Makua pū me aʻu.
33“Ua ʻōlelo aku au iā ʻoukou i kēia mau mea, i loaʻa ai iā ʻoukou ka maluhia i loko oʻu. I loko o ke ao nei e loaʻa iā ʻoukou ka pōpilikia; akā, e hoʻolana ʻoukou; ua lanakila wau ma luna o ke ao nei.”
Currently Selected:
KA ʻEUANELIO I KĀKAU ʻIA AI E IOANE 16: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
